Asoléyase’l númberu 16 de la Revista de Filoloxía Asturiana

El Seminariu de Filoloxía Asturiana ta acabante d’asoleyar un númberu nuevu de la Revista de Filoloxía Asturiana, el 16, correspondiente al 2016. Editáu por Trabe, tamién se pue consultar al traviés de la plataforma Reunido de la Universidá d'Uviéu.

Esta espublización añal recueye artículos d'investigación nuevos, notes, cróniques y otros conteníos nes so páxines. Na primer estaya, atopamos cinco estudios, sobre la ‘Caracterización funcional de la interxección: a propósitu de delles interxecciones del asturianu’, d’Alfredo Álvarez Menéndez; ‘El neutro de materia en asturiano: Un acercamiento sintáctico al fenómeno en cuanto a la especificidad, genericidad y la posición del adjetivo’, de Matthew J. Burner; ‘El paisaxe solidariu: léxicu y toponimia comuñera’, de Xulio Concepción; ‘{Tener/llevar} + participio en el castellano de los Siglos de Oro y algunas notas interlingüísticas’, de Patricia Fernández Martín; y ‘Diálogos políticos de los años trenta’, de Rafael Rodríguez Valdés.

Les notes d’Enrique Pato y Iván Cueves ‘Notas sobre los infinitivos en -e (vendere) en la historia de la lengua’ y ‘Bibliografía 2012’, de manera respeutiva, y la necrolóxica ‘Juan Ignacio Ruiz de la Peña (1941-2016). Memoria de un asturianista’, obra de José A. Álvarez Castrillón, siguen a estos trabayos. Por último, enantes de la crónica que zarra la revista, inclúinse les reseñes ‘La traducción. Nuevos planteamientos teórico-metodológicos’, de María Azucena Penas, por Fernández Martín; ‘Esbozo del Diccionario de bable del centro y oriente de Asturias de José García Peláez ‘Pepín de Pría’’, de Beatriz Hernán-Gómez, a cargu de Xulio Viejo; ‘Palabras y cosas de Bermiego (Quirós) (1950-1961)’, de Manuel Menéndez García, fecha por Franco Nagore; ‘Palabres nueves n’asturianu. Proyectu Observatoriu Asturianu de Neoloxía y Terminoloxía (AsturNeo). Informe de los años 2010, 2011 y 2012’, Ramón d’Andrés, Vanesa Díaz Fanjul y Sara Gutiérrez Rodríguez, comentada por Cristina Bleorţu; y ‘Current Approaches to Limits and Areas in Dialectology’, d’Ernestina Carrilho, Catarina Magro y Xosé Álvarez, redautada por Carlota de Benito.
Fonte: asturies.com

La Revista de Filoloxía Asturiana llega al númberu 15

Cubierta de la Revista de Filoloxía Asturiana númberu 15

  El Seminariu de Filoloxía Asturiana ta acabante d'espublizar el númberu 15 de la Revista de Filoloxía Asturiana. Esti anuariu universitariu d'estudios llingüísticos y lliterarios asturianos y románicos pue consultase al traviés de la plataforma Reunido.

  Correspondiente al añu 2015, el númberu 15 de la Revista de Filoloxía Asturiana inclúi los estudios 'La influyencia de la "concordancia continua" del asturianu nel castellanu faláu n’Asturies', por Andie Faber (University of Massachussets); 'Un volume de testos de poesía asturiana de reciente apaición', obra de Xuan Carlos Busto Cortina (Universidá d'Uviéu; 'The influence of the focus structure on the placement of pronominal clitics in Asturian', escrito por Avelino Corral Esteban (Universidad Autónoma de Madrid); 'Necesitatea unui studiu sociolingvistic în Pola de Siero', firmao por Cristina Bleorţu (Universidá d'Uviéu / Universität Zürich); 'Una de derechos lingüísticos: varios conceptos sociolingüísticos aplicables a la situación del asturiano', de Benat Garaio Mendizabal (SOAS University of London).

  Completen la espublización les notes 'Nueves aportaciones sobre la figura del Padre Galo: poemes inéditos, reflexones sociollingüístiques y noticies de La Regalina', por Inaciu Galan y Gonzalez y Javier Cubero de Vicente (Universidá d'Uviéu) y 'A propósito de la lexicografía asturleonesa', de Janick Le Men Loyer (Universidá de Lleón), amás de la rellectura de 'Una nueva contribucion al conocimiento de las hablas asturianas', por Åke W:son Munthe (1899) y la necrolóxica, firmada por Marta Mori, 'Miguel Ramos Corrada (1949-2013)'. Pa finar, la revista inclúi les habituales reseñes y la crónica de los 'Nuevos actos d'homenaxe a Manuel Menéndez García' y del 'Homenaxe al catedráticu José Antonio Martínez García'.

  El númberu 15 de la Revista de Filoloxía Asturiana ta editáu por Trabe, pero tamién se pue consultar pela rede gracies a la plataforma Reunido de la Universidá d'Uviéu, onde se espublicen en '.pdf' revistes editaes dende dellos departamentos de la institución.
Fonte: asturies.com

García zarra'l ciclu del RIDEA falando de les tornes del Padre Galo

Sede del RIDEA n'Uviéu

 'Los estudios filolóxicos asturianos, güei' ye'l nome de la iniciativa na que tamién participa'l Seminariu de Filoloxía Asturiana.

 Baxo'l nome de 'Trescalar la penumbra de lo estranxero: teoría y práctica de la traducción en Fernán Coronas y testos nuevos', Antón García va falar d'esta otra faceta del Padre Galo que, "amás de poeta n’asturianu, desendolcó un interesante llabor de traductor a esa llingua (dende l’alemán y l’italianu) y al castellanu (dende’l xaponés). Esta xera, poco conocida, ilústrase con testos nuevos acabante descubrise".

Antón García

 D'igual forma, l'escritor y tamién traductor va analizar "la traducción como actividá histórica de la lliteratura n’asturianu". Va ser a les 19.30 hores na sede del RIDEA (Palaciu Conde Toreno, Uviéu), con entrada llibre hasta completar aforu.

 La conferencia de García trátase de la cabera de les cuatro programaes pol Real Instituto de Estudios Asturianos (RIDEA) y organizaes por Ramón D'Andrés en collaboración col Seminariu de Filoloxía Asturiana (SFA),del que ye coordinador. Xulio Viejo, el propiu d'Andrés y Xuan C. Busto protagonizaron les anteriores.                       Fonte: asturies.com

Luis Casteleiro: “Pretendemos conformar un corpus dixital lo más grande posible de dictaos tópicos referíos a Asturies”

Luis Casteleiro

El Seminariu de Filoloxía Asturiana de la Universidá d’Uviéu ta acabante de dar el primer pasu del proyeutu Dictadoloxía Tópica d’Asturies col espublizamientu nuna web de los dictaos tópicos referíos a Asturies atropaos nun trabayu del gallegu Camilo José Cela inéditu na so mayor parte. Luis Casteleiro Oliveros (A Veiga, 1973) ye’l responsable d’esta iniciativa xunto con Ramón d’Andrés.

¿Qué s’entiende por dictaos tópicos?   El conceptu de dictáu tópicu ye realmente bien ampliu, yá qu’incluye cualquier construcción o enunciáu que contenga dalgún topónimu o faiga referencia a una determinada entidá de población o a los sos habitantes. Por tanto, son dictaos tópicos los xentilicios y los nomatos, pero tamién aquellos cantares o refranes que faigan dalguna referencia a un llugar.

Pal so estudiu naz el proyeutu Dictadoloxía Tópica d’Asturies.        Dictadoloxía Tópica d’Asturies ye un proyectu ambiciosu de recuperación patrimonial. Lo que pretendemos ye conformar un corpus dixital lo más grande posible de dictaos tópicos referíos a Asturies, a los sos conceyos y localidaes. Pa ello vamos sirvinos de material de cancioneros, refraneros, etc., y complementar los vacíos d’información con datos procedentes de trabayu de campu.

¿Qué nos pueden aportar estos dictaos tópicos?      Amás del interés puramente filolóxicu, los dictaos tópicos son instrumentos simbólicos d'una comunidá y dan claves sobre los factores que determinen la identidá d'un grupu. D’esta miente, conociendo los dictaos tópicos d'un llugar podemos ver qué imaxe y valores proyecta sobre sí y tamién al esterior.

El primer pasu del proyeutu ye ‘Asturies nel Diccionario Geográfico Popular de España de Camilo José Cela (DGPE-Astur)’, espublizáu recién. ¿En qué consiste?       Editamos nun portal web la información que les oficines de correos asturianes apurrieron pal ‘Diccionariu Xeográficu Popular d'España’ de Camilo José Cela. L'escritor gallegu pretendía publicar 19 tomos con tolos dictaos tópicos d'España y ante la imposibilidá d'encarar en solitariu un trabayu tan ampliu pensó en pidir ayuda a les persones que teníen capacidá de llegar a tolos llugares del país, inclusive a los más alloñaos: los carteros, que pasaron a ser tamién encuestadores de campu.

Lo que ficimos agora ye dixitalizar toles fiches qu'ellos ellaboraron nel añu 1971 con datos relevantes pal territoriu asturianu, pa dempués trescribir y etiquetar les informaciones incluyíes nos distintos campos. Finalmente, tresfiriéronse a una base de datos que dexa realizar consultes por testu llibre, pol llugar de recoyida de la ficha, pol llugar de referencia o pol tipu de datos (xentiliciu, nomatu, refrán, cantar…).

¿Por qué nun terminó nunca Cela esti trabayu qu’anició na década de los 60?        Sabemos que Cela atropó unes 25.000 fiches, pero finalmente namás ún de los tomos proyectaos llegó a espublizase (editóse en 1998 y nél recoyíense cuestiones metodolóxiques y tolos dictaos topicos que llevaben la palabra ‘España’ o'l xentiliciu ‘español’). Desconocemos la razón pola qu'abandonó'l proyectu, dexando arrequexáu tol material.

¿Qué repercusión tuvieron nel so momentu les encuestes feches al traviés de carteros?  La verdá ye que nun hebo repercusión pública nenguna. Hai qu'indicar, eso sí, que dellos eruditos locales, avisaos polos carteros, escribieron a Cela pa facilitar datos o ponese a la so disposición pa recoyelos. Parte d'esa correspondencia incorporóse tamién al DGPE-Ástur.

¿Cómo surdió la posibilidá d’acceder a la parte asturianu d’esti estudiu?   L’Intitutu da Lingua Galega llevó alantre un proyectu similar va unos años. Fueron ellos quien nos falaron de la existencia d'un material inédito bien interesante referíu a Asturies. Al tener noticia d'esto contactemos cola Fundación Camilo José Cela, que nos facilitó l’accesu a les fiches de los carteros asturianos.
 Como ye normal, hubo que firmar un conveniu pa poder dixitalizar el material. Dende'l primer momentu, la disposición de los xestores de la Fundación Cela foi escelente, pero nestes cuestiones siempres son necesarios unos trámites alministrativos más llargos de lo que quixéramos.

¿Cuántes entraes tien el DGPE-Astur?       Son un total de 1.620 dictaos tópicos (ente xentilicios, nomatos, refranes y cantares) que faen referencia a 613 localidaes asturianes. A partir d'equí, dirán incorporándose mensualmente nuevos datos tomaos d'otres publicaciones o de trabayos de campu.

¿Qué datos aportó’l so estudiu?     Como-y dicía, lo que fiximos hasta agora ye clasificar, etiquetar y divulgar los datos. Esto ye, tamos entá na fase inicial del estudiu, pero parez que los resultaos van ser bien interesantes.

¿Hebo daqué que-yos llamara l’atención sobre manera?  Son munches les cuestiones d’interés que recueye’l DGPE-Astur: dende xentilicios asturianos desconocíos hasta coples alusives a fechos hestóricos güei escaecíos. Abonden tamién los xentilicios o nomatos d'oficios que güei yá nun existen, pero que nel pasáu tuvieron una presencia bien curiosa n'Asturies.

Les entraes reflexen un emplegu importante de la toponimia tradicional ente la población. ¿Amuesen estos refranes y cantares una mayor vitalidá de la llingua asturiana nos década de los 70?      Sí, ensin dulda. Los más de los refranes, cantares o nomatos tán n'asturianu o gallego-asturianu, anque tamién ye frecuente que los xentilicios se presenten acastellanaos, sobre manera nes terminaciones.

El DGPE-Astur tamién suma términos de los territorios vecinos, Zamora, Salamanca y Madrid.       Sí, per un llau hai datos recoyíos polos carteros de Ribadeo, A Fonsagrada o Potes, por poner trés exemplos concretos, que se refieren a territoriu asturianu y que necesariamente teníen que s’incluyir nel nuestru proyectu. Amás, tamién conseñemos los datos arrexuntaos por carteros asturianos y qu'aluden a les provincies vecines.

En comparanza con otros países, ¿cómo foi la collaboración de los carteros y ciudadanos?        Pue dicise que los carteros asturianos acoyeron l'encargu con ilusión desigual. Dalgunos consideraron que yera una xera rutinaria y namás incluyeron nes fiches datos obvios, pero otros entusiasmáronse col proyectu y ficieron centenares de consultes gracies a les que se recoyeron datos bien detallaos y relevantes.

¿Cuál va ser el siguiente pasu de Dictadoloxía Tópica d’Asturies?       El pasu más inmediatu va ser la incorporación de los refranes con referencia toponímica incluyíos nel llibru de Xulio Viejo ‘Paremias populares asturianas (estudio, clasificación y glosa)’, que va pocos meses publicó l’Institutu Cervantes.     
                                                                                                                 Fonte: asturies.com

El proyeutu Dictadoloxía Tópica d’Asturies asoleya materiales inéditos atropaos por Cela nel país na década de los 70 al traviés d'un trabayu de campu

   ‘Asturies nel Diccionario Geográfico Popular de España de Camilo José Cela (DGPE-Astur)’ ye’l primer pasu del proyeutu Dictadoloxía Tópica d’Asturies (DTA). Una web entamada pol Seminariu de Filoloxía Asturiana asoleya los materiales inéditos atropaos pol escritor gallegu nel país nos 70.

   En concreto, el que fora gallardonáu col Nobel de Lliteratura nel 1989 recoyó los nomaos ‘dictaos tópicos’, esto ye, los xentilicios, nomatos, cantares y refranes referíos a los topónimos y habitantes de dellos pueblos d’Asturies como parte d’un estudiu inacabáu que llamó Diccionario Geográfico Popular de España (DGPE). El d’Iria Flavia desendolcó la idea nos años 60 cola intención d’utilizar datos espublizaos n’otres obres y facer trabayu de campu. Asina, nos 70 solicitó la collaboración de Correos pa que tolos carteros fixeren d’encuestadores utilizando una ficha común pa recoyer estos ‘dictaos tópicos’. Según espliquen dende’l Seminariu de Filoloxía Asturiana, la mayor cantidá d’estos datos quedaron inéditos, ente ellos los que correspuenden a Asturies, anque se conservaron na Fundación Pública Gallega ‘Camilo José Cela’.

   Agora, gracies al proyeutu Dictadoloxía Tópica d’Asturies (DTA) que llevó a la robla en xunetu del 2012 d’un conveniu ente la Universidá d’Uviéu, al traviés del Seminariu de Filoloxía Asturiana, y la fundación gallega, fíxose la dixitalización, catalogación y publicación on line de los materiales asturianos, un trabayu desendolcáu por Luis Casteleiro y Ramón d’Andrés que yá se pue consultar de manera llibre pela rede gracies a la web asoleyada recién. En total, Cela consiguió 540 fiches n’Asturies con centenares de datos, númberu que llegó a 30.000 nel restu del Estáu. Namáí nun algamó collaboración, yá sía por desinterés de los carteros o de los propios habitantes, en nueve conceyos: Degaña, Grau, Morcín, Les Regueres, La Ribera, Riosa, Santu Adrianu, Sariegu y Tameza.

Cuatro entrugues

   Estes fiches d’encuestación contaben con cuatro entrugues. La primera rezaba ‘¿Cuál ye’l nome o los nomes que reciben los naturales de la llocalidá?’, pa depués preguntar ‘¿Cuál ye’l nomatu o nomatos que reciben, nel so conxuntu los habitantes de la llocalidá’. El documentu continuaba con ‘¿Conoz el nomatu o nomatos que reciben, nel so conxuntu los habitantes de dalguna  llocalidá diferente a la suya? Sírvase trescribilo, col nome del pueblu al que se refier’ y finaba cola cuestión ‘¿Conoz dalgún refrán, dichu o copla nel que figure’l nome de la llocalidá, o’l nome o nomatu de los sos habitantes?’. La web tamién amuesa les cartes que Cela dirixó a dalgunes oficines de correos.

Fundación Pública Gallega "Camilo José Cela", Iria Flavia

   Esti trabayu desendolcáu por Casteleiro y D’Andrés ye’l primer pasu de Dictadoloxía Tópica d’Asturies (DTA), proyeutu que “tien como oxetivu ofrecer nesti mesmu portal los ‘dictaos tópicos’ d’Asturies, esto ye, los xentilicios, nomatos, cantares y refranes referíos a los topónimos y habitantes de los distintos llugares y pueblos d’Asturies. Pa ello van dir dixitalizándose y catalogándose los datos recoyíos de diverses fontes d’investigación. Conforme esti llabor se faiga, dirá anunciándose pa información d’investigadores y públicu en xeneral”, espliquen los sos responsables.                                                         Fonte: asturies.com

"La obra "El Cuarto de los Valles" marcó l'estilu de los estudios monográficos de les fales asturianes nos años 60 y 70", apunta D'Andrés

Nel RIDEA. Na semeya, públicu presente nel homenaxe con Gargallo y el fíu de Manuel, Arturo, en primer términu.

   La Universidá d’Uviéu, al traviés del Seminariu de Filoloxía Asturiana, y el Real Instituto de Estudios Asturianos (RIDEA) entamaron esta selmana unes xornaes d’homenaxe al llingüista Manuel Menéndez García. “La obra ‘El Cuarto de los Valles’ marcó l’estilu de los estudios monográficos de les fales asturianes nos años 60 y 70”, apunta Ramón D’Andrés.

   El coordinador del Seminariu de Filoloxía Asturiana ye una de les persones que participaron na ellaboración de los dos volumes de testos inéditos del filólogu que se presentaron ayeri na sede del RIDEA y que sirvieron de motor a estes xornaes d’homenaxe, centraes nel asturianu occidental, con motivu del cincuenta cabudañu del estudiosu nacíu nel conceyu de Tinéu nel 1909 y fináu nel 1962, a los 53 años, tres una enfermedá. “Manuel Menéndez foi un dialectólogu de referencia que fixo y publicó na década de los 50 y 60 la tesis doctoral ‘El Cuarto de los Valles’ sobre la fala de la zona de Navelgas, una obra modélica que marcó l’estilu de los estudios monográficos de fales asturianes nos años 60 y 70”, espresa D’Andrés, que cataloga la mesma de “notable en rigurosidá”.

   ‘El Cuerto de los Valles’ espublizóse en dos volumes nos años 1963 y 1965 (RIDEA) y agora ve la lluz el terceru con testos inéditos que s’atoparon en Madrid na tesis almacenada na Universidad Complutense, editáu baxo’l nome de ‘Toponimia, refranes y conjuros’. Con ellos trabayaron D’Andrés y Taresa Lorences, atopando dos subdivisiones, refranes y conxuros, y una rellación alfabética de toponimia de la zona. “Fiximos una reproducción fiel de los testos que dexó escritos a máquina y, na parte de la toponimia, incorporamos comentarios que comparen lo recoyío por Manuel Menéndez colos estudios toponímicos posteriores”, esplica’l coordinador del Seminariu de Filoloxía Asturiana. La segunda obra inédita del tinetense ye ‘Palabras y cosas de Bermiego (Quirós)’, espublizada pol Serviciu de Publicaciones de la Universidá d’Uviéu, cola que trabayó Xulio Viejo.

Actu d'homenaxe emotivu nel RIDEA

   José Enrique Gargallo Gil, del departamentu de Filoloxía Románica de la Universitat de Barcelona, encargóse de presentar estos dos llibros nel actu d’homenaxe que se celebró ayeri de tarde nel salón d’actos del RIDEA. Enantes, el direutor de la entidá, Ramón Rodríguez; Vicente Gotor, rector de la Universidá d’Uviéu; y Viejo –que s’espresó en llingua asturiana–, en representación del Seminariu de Filoloxía Asturiana, abrieron esti eventu xunto con Arturo Menéndez, fíu de Manuel; Marta, la otra fía, taba presente ente’l públicu.

   L’ex direutor del RIDEA, Juan Ignacio Ruiz de la Peña, protagonizó darréu una charra que se centró na figura de Manuel Menéndez como intelectual asturianista, pa depués dar pasu a Gargallo, qu’analizó l’impautu de les dos obres inédites nos estudios románicos. Por último, Xuan Bello, Antón García y Lorences, que reconocieron al filólogu como un puntu de referencia nos sos aniciu nos año 80 na escritura n’asturianu occidental, lleeron poemes nesta variante, y Xosé Anton Fernández ‘Ambás’ interpretó delles vaqueiraes y otres pieces con Ramsés Ilesies al pandeiro.

   Otra manera, el martes y el miércoles pola mañana desendolcáronse delles charres que se centraron en trés temátiques: la llingua asturiana occidental, la cultural popular y etnografía del occidente, y la historia y arqueoloxía de la zona. “Amás del aspeutu llingüísticu, Manuel Menéndez tenía tamién estos intereses”,  apunta D’Andrés, que destacó sobre manera la emotividá del homenaxe celebráu nel RIDEA.           Fonte: asturies.com

Alcuentru col Seminariu de Filoloxía Asturiana en Corvera

L'Aula Polivalente del Centru Sociocultural de Les Vegues (Corvera) acueye esti martes 13 un alcuentru abiertu colos profesores de la Universidá d’Uviéu y miembros del grupu d’investigación "Seminariu de Filoloxía Asturiana", Ramón d’Andrés y Xulio Viejo. El martes 13 dende les 19 hores va desarrollase un alcuentru abiertu colos profesores de la Universidá d’Uviéu y miembros del grupu d’investigación "Seminariu de Filoloxía Asturiana", Ramón d’Andrés y Xulio Viejo, nel Aula Polivalente del Centru Sociocultural de Las Vegas/Les Vegues. L'Actividá ye d’asistencia llibre y de baldre. El Seminariu de Filoloxía Asturiana ye un grupu d’investigación de la Universidá d’Uviéu formáu nel 2003. Esti grupu asume como campu d’investigación de so tolo relativo al estudiu de la llingua y la lliteratura asturiana, tanto dende una perspectiva inmanentista como interdisciplinar. Dende eses premises vien favoreciendo distintos proyectos d’investigación mesmo que publicaciones de la temática más diverso (historia llingüística y lliteraria, dialectoloxía, sociollingüística, llingüística variacional, computacional y de corpus, etc.), col puntu común de xuntura d’una perspectiva innovadora y la busca de la escelencia científica. En representación del Seminariu de Filoloxía Asturiana van participar los profesores titulares de la Universidá d’Uviéu, Ramón d’Andrés y Xulio Viejo. El primeru ye autor de bien d’artículos y llibros ente los que pueden señalase títulos como Llingua y xuiciu, Cuestiones d’asturianu normativu, Franco nos diccionarios o’l recién Gramática comparada de las lenguas ibéricas. No tocante al segundu, ye autor d’obres como La formación histórica de la llingua asturiana, Llingua y cultura lliteraria na Edá Media asturiano-lleonesa, Pensar asturiano o Hablar en tiempo. Tamién son coordinadores de distintos proyectos d’investigación como l’Asturneo o l’Eslema. Tamién va participar nel alcuentru Esther Prieto, responsable d’Ediciones Trabe, editorial encargada de publicar la Revista de Filoloxía Asturiana y que pa la ocasión va traer una muestra de publicaciones venceyaes col estudiu y investigación de la llingua asturiana y que van tar a la venta esi día. Fonte: Infoasturies

El Seminariu de la Revista de Filoloxía Asturiana anuncia espublizaciones nueves

    La ‘Revista de Filoloxía Asturiana’ algama'l númberu 13, correspondiente al añu 2013. Ésta ye una de les cinco espublizaciones qu’acaba d’anunciar el Seminariu de Filoloxía Asturiana, grupu d’investigación de la Universidá d’Uviéu.

Cubierta de la Revista de Filoloxía Asturiana, númberu 13

    L’anuariu universitariu d'estudios llingüísticos y lliterarios asturianos y románicos dirixíu por Xulio Viejo cuenta con versión tanto en papel como en llinia gracies a la plataforma Reunido de la Universidá d’Uviéu. Esti númberu de la espublización, el 13, contién los estudios siguientes: ‘Usu de pruebes paramétriques pal determín d’una perspectiva de xéneru na lliteratura asturiana del Surdimientu’, de Xuan Santori; ‘Léxicu asturiano nes xergues gremiales d’Asturies’, de Ramón d’Andrés; ‘¿Más huellas del neutro de materia en los Siglos de Oro? Algunos testimonios de la región de Madrid’ de Sara Gómez Seibane y Delfina Vázquez Balonga; ‘El papel de las otras lenguas en la clase de español’, por Patricia Fernández Martín; y ‘m´i. Prime considerazioni sulla Negazione in iberico’, d’ Eduardo Blasco Ferrer.

    Amás, la ‘Revista de Filoxía Asturiana’ incorpora la nota ‘¿Dormir él? Dormiriola. Delles notes sobro’l sufixu verbal -iola n’asturianu’, de Pablo Suárez García; les necrolóxiques de María Jesús López Bobo, obra de Carmen Muñiz Cachón, y de Martín Sevilla Rodríguez, escrita por José Virgilio García Trabazo; y un material sobre los ‘Topónimos de la parroquia de San Xuan de Navelgas (Tinéu)’, de Marta López Fernández. Completen esti volumen les reseñes de les espublizaciones ‘Obres (in)completes de don Enrique García-Rendueles (1881-1955)’, de Jesús García Rendueles; ‘De geolingüística i etimologia romàniques’, de José Enrique Gargallo Gil y Maria-Reina Bastardas; ‘El castellano del País Vasco’, de Bruno Camus Bergareche y Sara Gómez Seibane; y ‘DiaTech. Herramienta para la dialectometría/Dialektometriarako erraminta’, de Gotzon Aurrekoetxea, feches les cuatro por D’Andrés. A éstes hai que sumar la escrita por Patricia Fernández Martín de 'Unidades fraseológicas y TIC’, trabayu coordináu María Isabel González Rey.

Otres  espublizaciones.      Viejo tamién coordina’l llibru ‘Estudios sobre variación sintáctica peninsular’, que recueye parte de les comunicaciones y conferencies del Simposiu Internacional sobre Variación Sintáctica Dialectal, celebráu na Universidá d'Uviéu en marzu del 2012 y organizáu pol Seminariu de Filoloxía Asturiana. “Nelli esplórense nueves cuestiones alredor de la sintaxis y la xeografía llingüística, rellacionaes colos espacios asturlleonés, gallegoportugués, románicu y vascu”, espliquen dende’l grupu d’investigación. Les intervenciones que’l llector va atopar na espublización son: ‘La conexión germánico-románica: fenómenos matriz en contextos subordinados’, de Francisco Fernández Rubiera; ‘Transitividad y afectación en el entorno lingüístico romance y eusquérico’, d’Anna Pineda; ‘Estrategias evidenciales y expresión de la fuente de información en gallego: los marcadores gramaticalizados’, de Xulio Sousa; ‘Vocês por vós en el portugués europeo: un fenómeno en auge’, de Víctor Lara Bermejo; ‘Variación sintáctica na transición fronteriza ente'l gallegoportugués y l'asturlleonés. Averamientu a cinco trazos xeodiferenciales’, de D’Andrés; y ‘Determinación, especificidad e indefinitud en los determinativos asturianos’, de Viejo.

   Otra manera, el Seminariu de Filoloxía Asturiana incorpora al so llistáu d’espublizaciones, ‘Hablar en tiempo’, obra na que Viejo fai una reflexón amplia sobre'l llinguaxe humanu y la diversidá llingüística, con munches implicaciones pal casu del asturianu. Completen les novedaes anunciaes esta mañana pol grupu d’investigación, la ‘Gramática comparada de las lenguas ibéricas’, de D’Andrés, y ‘Palabres nueves n’asturianu’, l’estudiu de neoloxismos del Proyectu Observatoriu Asturianu de Neoloxía y Terminoloxía (AsturNeo), cola participación de D’Andrés , Vanesa Díaz Fanjul y Sara Gutiérrez Rodríguez, trabayu nel qu’Asturies.com foi oxetu d’estudiu.   Fonte:  Asturies.com

Esposición sobre investigación n'humanidades na Facultá de Filosofía y Lletres, nel Campus del Milán

Filoloxía Asturiana presente nuna esposición sobre investigación n'humanidaes nel Campus del Milán

   La Facultá de Filosofía y Lletres organiza la esposición «La Investigación n’Artes y Humanidaes na Universidá d’Uviéu», que se pue visitar hasta’l día 31 de mayu del 2013. La esposición tien llugar nel Campus del Milán d’Uviéu. Nel estragal del Edificiu Departamental, atópense los paneles de los diversos grupos d’investigación n’artes y humanidaes, y nel estragal del Aulariu «A» tán los paneles de los diversos proyectos d’investigación en marcha agora o nos últimos años.

   El Seminariu de Filoloxía Asturiana (SFA) ye ún de los grupos d’investigación presentes na esposición, y, dientro la nuesa Universidá, l’únicu reconocíu nestes árees del saber que trabaya na Filoloxía Asturiana. Tamién tán presentes na esposición cinco proyectos d’investigación nel campu de la Filoloxía Asturiana, trés d’ellos adscritos al SFA: el proyectu «Estudiu de la Transición Llingüística na Zona Eo-Navia, Asturies (ETLEN)», dirixíu pol profesor Ramón d’Andrés Díaz; el proyectu «Observatoriu Asturianu de Neoloxía (AsturNeo)», cola mesma dirección; y el proyectu «Corpus Xeneral de la Llingua Asturiana», dirixíu pol profesor Xulio Viejo Fernández.

   Con motivu d’esta esposición, la Universidá d’Uviéu edita un llibru lletrónicu con tola información sobre investigadores, grupos d’investigación y proyeutos.

   Na inauguración del actu participaron el Rector de la Universidá d’Uviéu, la Vicerrectora d’Investigación y Campus d’Escelencia Internacional, la Decana de la Facultá de Filosofía y Lletres y la Direutora Xeneral d’Universidaes del Gobiernu d’Asturies.

   Más información: Llibru asoleyáu con motivu de la esposición.

   Fonte:  Asturnews.