Asoléyase’l númberu 16 de la Revista de Filoloxía Asturiana

El Seminariu de Filoloxía Asturiana ta acabante d’asoleyar un númberu nuevu de la Revista de Filoloxía Asturiana, el 16, correspondiente al 2016. Editáu por Trabe, tamién se pue consultar al traviés de la plataforma Reunido de la Universidá d'Uviéu.

Esta espublización añal recueye artículos d'investigación nuevos, notes, cróniques y otros conteníos nes so páxines. Na primer estaya, atopamos cinco estudios, sobre la ‘Caracterización funcional de la interxección: a propósitu de delles interxecciones del asturianu’, d’Alfredo Álvarez Menéndez; ‘El neutro de materia en asturiano: Un acercamiento sintáctico al fenómeno en cuanto a la especificidad, genericidad y la posición del adjetivo’, de Matthew J. Burner; ‘El paisaxe solidariu: léxicu y toponimia comuñera’, de Xulio Concepción; ‘{Tener/llevar} + participio en el castellano de los Siglos de Oro y algunas notas interlingüísticas’, de Patricia Fernández Martín; y ‘Diálogos políticos de los años trenta’, de Rafael Rodríguez Valdés.

Les notes d’Enrique Pato y Iván Cueves ‘Notas sobre los infinitivos en -e (vendere) en la historia de la lengua’ y ‘Bibliografía 2012’, de manera respeutiva, y la necrolóxica ‘Juan Ignacio Ruiz de la Peña (1941-2016). Memoria de un asturianista’, obra de José A. Álvarez Castrillón, siguen a estos trabayos. Por último, enantes de la crónica que zarra la revista, inclúinse les reseñes ‘La traducción. Nuevos planteamientos teórico-metodológicos’, de María Azucena Penas, por Fernández Martín; ‘Esbozo del Diccionario de bable del centro y oriente de Asturias de José García Peláez ‘Pepín de Pría’’, de Beatriz Hernán-Gómez, a cargu de Xulio Viejo; ‘Palabras y cosas de Bermiego (Quirós) (1950-1961)’, de Manuel Menéndez García, fecha por Franco Nagore; ‘Palabres nueves n’asturianu. Proyectu Observatoriu Asturianu de Neoloxía y Terminoloxía (AsturNeo). Informe de los años 2010, 2011 y 2012’, Ramón d’Andrés, Vanesa Díaz Fanjul y Sara Gutiérrez Rodríguez, comentada por Cristina Bleorţu; y ‘Current Approaches to Limits and Areas in Dialectology’, d’Ernestina Carrilho, Catarina Magro y Xosé Álvarez, redautada por Carlota de Benito.
Fonte: asturies.com

La Revista de Filoloxía Asturiana llega al númberu 15

Cubierta de la Revista de Filoloxía Asturiana númberu 15

  El Seminariu de Filoloxía Asturiana ta acabante d'espublizar el númberu 15 de la Revista de Filoloxía Asturiana. Esti anuariu universitariu d'estudios llingüísticos y lliterarios asturianos y románicos pue consultase al traviés de la plataforma Reunido.

  Correspondiente al añu 2015, el númberu 15 de la Revista de Filoloxía Asturiana inclúi los estudios 'La influyencia de la "concordancia continua" del asturianu nel castellanu faláu n’Asturies', por Andie Faber (University of Massachussets); 'Un volume de testos de poesía asturiana de reciente apaición', obra de Xuan Carlos Busto Cortina (Universidá d'Uviéu; 'The influence of the focus structure on the placement of pronominal clitics in Asturian', escrito por Avelino Corral Esteban (Universidad Autónoma de Madrid); 'Necesitatea unui studiu sociolingvistic în Pola de Siero', firmao por Cristina Bleorţu (Universidá d'Uviéu / Universität Zürich); 'Una de derechos lingüísticos: varios conceptos sociolingüísticos aplicables a la situación del asturiano', de Benat Garaio Mendizabal (SOAS University of London).

  Completen la espublización les notes 'Nueves aportaciones sobre la figura del Padre Galo: poemes inéditos, reflexones sociollingüístiques y noticies de La Regalina', por Inaciu Galan y Gonzalez y Javier Cubero de Vicente (Universidá d'Uviéu) y 'A propósito de la lexicografía asturleonesa', de Janick Le Men Loyer (Universidá de Lleón), amás de la rellectura de 'Una nueva contribucion al conocimiento de las hablas asturianas', por Åke W:son Munthe (1899) y la necrolóxica, firmada por Marta Mori, 'Miguel Ramos Corrada (1949-2013)'. Pa finar, la revista inclúi les habituales reseñes y la crónica de los 'Nuevos actos d'homenaxe a Manuel Menéndez García' y del 'Homenaxe al catedráticu José Antonio Martínez García'.

  El númberu 15 de la Revista de Filoloxía Asturiana ta editáu por Trabe, pero tamién se pue consultar pela rede gracies a la plataforma Reunido de la Universidá d'Uviéu, onde se espublicen en '.pdf' revistes editaes dende dellos departamentos de la institución.
Fonte: asturies.com

El Seminariu de la Revista de Filoloxía Asturiana anuncia espublizaciones nueves

    La ‘Revista de Filoloxía Asturiana’ algama'l númberu 13, correspondiente al añu 2013. Ésta ye una de les cinco espublizaciones qu’acaba d’anunciar el Seminariu de Filoloxía Asturiana, grupu d’investigación de la Universidá d’Uviéu.

Cubierta de la Revista de Filoloxía Asturiana, númberu 13

    L’anuariu universitariu d'estudios llingüísticos y lliterarios asturianos y románicos dirixíu por Xulio Viejo cuenta con versión tanto en papel como en llinia gracies a la plataforma Reunido de la Universidá d’Uviéu. Esti númberu de la espublización, el 13, contién los estudios siguientes: ‘Usu de pruebes paramétriques pal determín d’una perspectiva de xéneru na lliteratura asturiana del Surdimientu’, de Xuan Santori; ‘Léxicu asturiano nes xergues gremiales d’Asturies’, de Ramón d’Andrés; ‘¿Más huellas del neutro de materia en los Siglos de Oro? Algunos testimonios de la región de Madrid’ de Sara Gómez Seibane y Delfina Vázquez Balonga; ‘El papel de las otras lenguas en la clase de español’, por Patricia Fernández Martín; y ‘m´i. Prime considerazioni sulla Negazione in iberico’, d’ Eduardo Blasco Ferrer.

    Amás, la ‘Revista de Filoxía Asturiana’ incorpora la nota ‘¿Dormir él? Dormiriola. Delles notes sobro’l sufixu verbal -iola n’asturianu’, de Pablo Suárez García; les necrolóxiques de María Jesús López Bobo, obra de Carmen Muñiz Cachón, y de Martín Sevilla Rodríguez, escrita por José Virgilio García Trabazo; y un material sobre los ‘Topónimos de la parroquia de San Xuan de Navelgas (Tinéu)’, de Marta López Fernández. Completen esti volumen les reseñes de les espublizaciones ‘Obres (in)completes de don Enrique García-Rendueles (1881-1955)’, de Jesús García Rendueles; ‘De geolingüística i etimologia romàniques’, de José Enrique Gargallo Gil y Maria-Reina Bastardas; ‘El castellano del País Vasco’, de Bruno Camus Bergareche y Sara Gómez Seibane; y ‘DiaTech. Herramienta para la dialectometría/Dialektometriarako erraminta’, de Gotzon Aurrekoetxea, feches les cuatro por D’Andrés. A éstes hai que sumar la escrita por Patricia Fernández Martín de 'Unidades fraseológicas y TIC’, trabayu coordináu María Isabel González Rey.

Otres  espublizaciones.      Viejo tamién coordina’l llibru ‘Estudios sobre variación sintáctica peninsular’, que recueye parte de les comunicaciones y conferencies del Simposiu Internacional sobre Variación Sintáctica Dialectal, celebráu na Universidá d'Uviéu en marzu del 2012 y organizáu pol Seminariu de Filoloxía Asturiana. “Nelli esplórense nueves cuestiones alredor de la sintaxis y la xeografía llingüística, rellacionaes colos espacios asturlleonés, gallegoportugués, románicu y vascu”, espliquen dende’l grupu d’investigación. Les intervenciones que’l llector va atopar na espublización son: ‘La conexión germánico-románica: fenómenos matriz en contextos subordinados’, de Francisco Fernández Rubiera; ‘Transitividad y afectación en el entorno lingüístico romance y eusquérico’, d’Anna Pineda; ‘Estrategias evidenciales y expresión de la fuente de información en gallego: los marcadores gramaticalizados’, de Xulio Sousa; ‘Vocês por vós en el portugués europeo: un fenómeno en auge’, de Víctor Lara Bermejo; ‘Variación sintáctica na transición fronteriza ente'l gallegoportugués y l'asturlleonés. Averamientu a cinco trazos xeodiferenciales’, de D’Andrés; y ‘Determinación, especificidad e indefinitud en los determinativos asturianos’, de Viejo.

   Otra manera, el Seminariu de Filoloxía Asturiana incorpora al so llistáu d’espublizaciones, ‘Hablar en tiempo’, obra na que Viejo fai una reflexón amplia sobre'l llinguaxe humanu y la diversidá llingüística, con munches implicaciones pal casu del asturianu. Completen les novedaes anunciaes esta mañana pol grupu d’investigación, la ‘Gramática comparada de las lenguas ibéricas’, de D’Andrés, y ‘Palabres nueves n’asturianu’, l’estudiu de neoloxismos del Proyectu Observatoriu Asturianu de Neoloxía y Terminoloxía (AsturNeo), cola participación de D’Andrés , Vanesa Díaz Fanjul y Sara Gutiérrez Rodríguez, trabayu nel qu’Asturies.com foi oxetu d’estudiu.   Fonte:  Asturies.com

La Revista de Filoloxía Asturiana abre'l plazu pa presentar artículos pal númberu de 2013

La Revista de Filoloxía Asturiana abre’l plazu pa presentar artículos pal númberu de 2013

Númberu anterior de la RFA

   La Revista de Filoloxía Asturiana publicar añalmente dende l'añu 2001, impulsada pol Seminariu de Filoloxía Asturiana, grupu d'investigación de la Universidá d'Uviéu. Como'l so nome indica, RFA ye una publicación especializada n'estudios llingüísticos y lliterarios relativos al dominiu románicu asturianu-lleonés, dende cualesquier perspectiva y orientación metodolóxica. Sicasí, ta abierta igualmente a conteníos más amplios del ámbitu de la hispanística, la romanística o la llingüística xeneral. El plazu d’unvíu de propuestes ta abiertu hasta’l 30 de xunu de 2013, notificando les aceptaes l’1 de setiembre.

   Ta indexada en Latindex. Dende 2010 espublízase tantu en papel como en llinia, al traviés de la plataforma de revistes científiques de la Universidá d'Uviéu. Amás, cuenta con comité científicu esternu de calter internacional, formáu por profesores como Rosario Álvarez, de la Universidá de Santiago de Compostela-Instituto da Lingua Galega, Antonio Bárbolo Alves, del CEL-Universidá de Trás-os-Montes e Alto Douro, Portugal, Eduardo Blasco Ferrer, de la Universidá de Cagliari, Cerdeña, Inés Fernández Ordóñez, de la Universidá Autónoma de Madrid-Real Academia Española o Graciela Reyes, de la Universidá d’Illinois en Chicago, EE.XX.

   Polo xeneral, los distintos conteníos de RFA dixébrense en distintes secciones bien establecíes: artículos (investigaciones d'hasta 20 páxines), notes (hasta 10 páxines), reseñes (recensiones crítiques actualizaes d'otres publicaciones), revisiones (reedición d'artículos clásicos de la Filoloxía Asturiana, pocu conocíos o pocu accesibles na actualidá), documentos (documentos llingüísticos inéditos o pocu conocíos), alderique (discutinios abiertos sobre distintes cuestiones filolóxiques) ya información (noticies sobre proyectos d'investigaciones, tesis, eventos diversos, etc…)

   Fonte:  Asturnews.