Esposición sobre investigación n'humanidades na Facultá de Filosofía y Lletres, nel Campus del Milán

Filoloxía Asturiana presente nuna esposición sobre investigación n'humanidaes nel Campus del Milán

   La Facultá de Filosofía y Lletres organiza la esposición «La Investigación n’Artes y Humanidaes na Universidá d’Uviéu», que se pue visitar hasta’l día 31 de mayu del 2013. La esposición tien llugar nel Campus del Milán d’Uviéu. Nel estragal del Edificiu Departamental, atópense los paneles de los diversos grupos d’investigación n’artes y humanidaes, y nel estragal del Aulariu «A» tán los paneles de los diversos proyectos d’investigación en marcha agora o nos últimos años.

   El Seminariu de Filoloxía Asturiana (SFA) ye ún de los grupos d’investigación presentes na esposición, y, dientro la nuesa Universidá, l’únicu reconocíu nestes árees del saber que trabaya na Filoloxía Asturiana. Tamién tán presentes na esposición cinco proyectos d’investigación nel campu de la Filoloxía Asturiana, trés d’ellos adscritos al SFA: el proyectu «Estudiu de la Transición Llingüística na Zona Eo-Navia, Asturies (ETLEN)», dirixíu pol profesor Ramón d’Andrés Díaz; el proyectu «Observatoriu Asturianu de Neoloxía (AsturNeo)», cola mesma dirección; y el proyectu «Corpus Xeneral de la Llingua Asturiana», dirixíu pol profesor Xulio Viejo Fernández.

   Con motivu d’esta esposición, la Universidá d’Uviéu edita un llibru lletrónicu con tola información sobre investigadores, grupos d’investigación y proyeutos.

   Na inauguración del actu participaron el Rector de la Universidá d’Uviéu, la Vicerrectora d’Investigación y Campus d’Escelencia Internacional, la Decana de la Facultá de Filosofía y Lletres y la Direutora Xeneral d’Universidaes del Gobiernu d’Asturies.

   Más información: Llibru asoleyáu con motivu de la esposición.

   Fonte:  Asturnews.

El Minor de Filoloxía Asturiana tien abierta la matrícula

El Minor n'Asturianu de Filoloxía Asturiana tien abierta la matrícula
La Facultá de Filosofía y Lletres tien abiertos los plazos pa matriculase nos minor que tien a disposición del so alumnáu. El minor d’asturianu, la primer titulación universitaria de Filoloxía Asturiana que ta homologada en toa Europa, tien abiertu’l plazu pa matriculase. El programa inclúi delles asignatures dedicaes a la sintaxis, léxicu o morfoloxía, ente otres.
El Minor n'Asturianu complementa la formación llograda en cualesquier de los Maiores qu'ufierta la Facultá de Filosofía y Lletres. Mientres los cuatro cursos que dura un Grau (o ocho si se fai a tiempu parcial), dirán combinándose asignatures d'un Maior con un Minor, nesti casu, el d'Asturianu. D'esta forma, cada cursu los alumnos faen diez asignatures, cinco en caún los dos semestres. D'estos diez, trés pertenecen al Minor n'Asturianu.
El programa del minor ta coordináu pol profesor Xulio Viejo.
Más información: Programa completu del minor d'asturianu.

Fonte: Asturnews.