García zarra'l ciclu del RIDEA falando de les tornes del Padre Galo

Sede del RIDEA n'Uviéu

 'Los estudios filolóxicos asturianos, güei' ye'l nome de la iniciativa na que tamién participa'l Seminariu de Filoloxía Asturiana.

 Baxo'l nome de 'Trescalar la penumbra de lo estranxero: teoría y práctica de la traducción en Fernán Coronas y testos nuevos', Antón García va falar d'esta otra faceta del Padre Galo que, "amás de poeta n’asturianu, desendolcó un interesante llabor de traductor a esa llingua (dende l’alemán y l’italianu) y al castellanu (dende’l xaponés). Esta xera, poco conocida, ilústrase con testos nuevos acabante descubrise".

Antón García

 D'igual forma, l'escritor y tamién traductor va analizar "la traducción como actividá histórica de la lliteratura n’asturianu". Va ser a les 19.30 hores na sede del RIDEA (Palaciu Conde Toreno, Uviéu), con entrada llibre hasta completar aforu.

 La conferencia de García trátase de la cabera de les cuatro programaes pol Real Instituto de Estudios Asturianos (RIDEA) y organizaes por Ramón D'Andrés en collaboración col Seminariu de Filoloxía Asturiana (SFA),del que ye coordinador. Xulio Viejo, el propiu d'Andrés y Xuan C. Busto protagonizaron les anteriores.                       Fonte: asturies.com

Antón García gana con "Ferralla" el Premiu Xuan María Acebal de Poesía n'asturianu

Na semeya, Antón García 

  La ventésimu primer edición del Premiu Xuan María Acebal de Poesía n'asturianu recayó nel escritor Antón García, dotáu con 3.000 euros. El xuráu encargáu de valorar les ocho obres finalistes tuvo presidíu pol direutor xeneral de Planificación Llingüística y Nornmalización, Fernando Padilla Palici, ya integráu polos escritores Pablo X. Suárez, Elías Veiga, Esther Prieto y Ángeles Carvajal , amás del filólogu Xosé Miguel Suárez. A esti gallardón podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que foren inéditos y non premiaos notros concursos.

  Ente les obres presentaes, el xuráo decidió por mayoría conceder el premiu al poemario tituláo "Ferralla", nel que, según esplica l'acta, "trátase un tópico poéticu como'l de la muerte usando una estructura orixinal, de gran fuercia espresiva y con referencies cultes y populares perfectamente engarzaes".
La obra presentóse baxo'l seudónimu La Vieya Zuna. Abierta la plica, l'autor ganador resultó ser Antón García.

  Antón García (Tuña, Tinéu, 1960) ye llicenciáu en Filoloxía Española pola Universidá d'Uviéu. La so obra poética arrincada cola edición en 1984 d'Estoriu y ta recoyida en 2007 nel volume La mirada aliella ( Poesía reunida 1981-2006), onde incluye los sos dos otros poemarios publicaos, Los díes repetíos y Tierra adientro, con un prólogu de José Luis Piquero. Nel 2011 publicóse una antoloxía amplia de la so obra n'edición billingüe baxo'l títulu La mirada atenta / La mirada aliella, con prólogu d'Araceli Iravedra.
La so obra poética ta traducida a delles llingües:  francés, catalán, gallegu, portugués, vascu, rusu, occitanu, alemán y bretón. Tradució al asturianu poesía de dellos poetes y llingües, destacando los volúmenes dedicaos a Eugénio de Andrade (Manes enceses, 2014) y a Joan Vinyoli (Xuegoa p'apostalgar la muerte, 2015).

  Antón García dirixe la revista de cultura Campo de los Patos y foi ganador en 2014 del premiu de novela Xosefa Xovellanos cola obra Crónica de la lluz y la solombra.             Fonte: europapress.es

Una bona novela asturiana

En realidá la pallabra “asturiana” sobraría nesti títulu, porque la novela d’Antón García Crónica de la lluz y la solombra sería una bona novela en cualisquier llingua en que tuviere escrita inclusive, claro, el castellán. Pero préstame ponelo pa resaltar cómo un productu editorial fechu nel nuestru país, puede oldease perfechamente con cualquier otru de lliteratures que tienen un mayor prestixu. N’efeutu, trátase d’una obra escrita por un autor asturianu, que cuenta un tema asturianu que, amás, desendólcase na nuestra tierra,  y ta guapamente publicada por una editorial d’equí. Poro, préstame recalcalo porque avezaos a echar siempres a la escontra de tolo de nueso, bien ta destacar los bonos llogros propios, cuando se producen.

Y digo qu’esta Crónica de la lluz y la solombra ye una bona novela porque tien tolos ingredientes que necesita pa qu’asina asoceda. Antón García, que tien el llistón mui altu d’otros productos suyos tanto en poesía, como en narrativa -por axustanos namás al llabor de creación- llogra equí interesanos con un tema fuerte, desagradable, foscu, como ye la historia d’un doble crime nuna aldea asturiana del conceyu de Tinéu, la detención del culpable, el xuiciu, y el posterior axusticiamientu mediante’l tristemente famosu “garrote vil”. Una historia basada nun fechu real qu’ocurrió na braña de La Zorera, Gancedo, nel añu 1897.

El llibru d’Antón García, y quiero dicilo yá, nun ye aptu pa llectores que nun tengan un bonestómadu porque enantes dixi que yera desagradable, pero ye muncho más qu’eso: ye una historia afogante, opresiva, zarrada sobre sí mesma nuna especie de círculu claustrofóbicu que se llee -polo menos nel mio casu- con un ciertu malestar. Pa escribir una historia asina hai que ser, induldablemente, un bon escritor, porque si non nun te quitaría naide d’abandonar la so llectura enantes de llegar a la pallabra fin. En cambiu, l’autor de Tuña tiende una sutil rede de personaxes y personalidaes que garra la to atención dende l’empiezu, llevándote dende la remota braña onde asoceden los fechos, hasta la capital uvieina onde se cellebra’l xuiciu, con retornu al conceyu tinetense que ye onde fina’l condenáu y tamién la novela. Hai n’ésta, talo que si d’una obra de teatru se tratare, tres actos con tres llocalizaciones mui concretes y más d’una vuelta, al lleer determinaes partes de la mésma, pasóme pela cabeza l’alcordanza de les grandes traxedies griegues col so coru del pueblu arrodiando a los protagonistes, mientres estos van camín del tráxicu final que’l Destín-yos tien preparáu.

Pero al marxe de l’anéudota en sí -terrible anéudota, por cierto- Antón aprovecha pa describir con gran aciertu cómo yera la vida naquelles aldées asturianes, remotes, ayenes a la civilización onde la vida de caún taba en boca de tolos demás vecinos. Unos llugares onde la vida yera cualquier cosa, menos saludable, y nun lo digo sólo nel aspeutu mélicu de la pallabra. Y tamién nos cuenta con aciertu la otra vida, la de la ciudá de provincies con un notable guiñu al Clarín que tan bien supo retratala.

La mio norabona, entós, al autor, que con esta potente novela algamó, mui xustamente, el premiu Xosefa Xovellanos del añu pasáu.                               Fonte: trabayudecampu. com/Vicente García Oliva/asturies.com

El poeta Antón García ganal' Premiu Xosefa Xovellanos de Novela en Llingua Asturiana

"Crónica de la lluz y la solombra"

Antón García, XXXV Premiu Xosefa Xovellanos de Novela en Llingua Asturiana

   La Conseyería d'Educación, Cultura y Deportes otrogó'l Premiu Xosefa Xovellanos de Novela en Llingua Asturiana, dotáu con 3.000 euros, al testu "Crónica de la lluz y la solombra", del poeta Antón García.

    El xuráo encargáu de valorar les obres presentaes tuvo presidíu pola directora xeneral de Política Llingüística, Ana María Fueyo, y contó cola presencia de los escritores Pablo Rodríguez Medina, ganador de la edición anterior del galardón; Ana Vanessa Gutiérrez, Roberto González Quevedo y Paz Fonticiella, amás del técnico en materia llingüístico Xosé Miguel Suárez Fernández.

   A esti galardón qu'algama el so XXXV edición, podíen presentase noveles en llingua asturiana de tema, xéneru y estructura llibres, con una estensión mínima de setenta y cinco páxines, inédites y non premiaes n'otros concursos.

   El xuráo decidió por mayoría conceder el premiu a la novela "Crónica de la lluz y la solombra", de la que destaca "la habilidá pa narrar el soceso central de la hestoria dende múltiples puntos de vista y la maestría del manexu de registros llingüísticos colos que s'algama un ritmo bien llográu". L'autor presentó'l trabayu baxo'l seudónimu "Escudiella".

   Antón García (Tuña, Tinéu, 1960) ye poeta, narrador y traductor, amás d'estudiosu de la lliteratura asturiana. Na so obra destaquen los títulos de narrativa "El viaxe" (1988) y "Díes de mundho" (1998), colos que ya ganó'l Premiu Xosefa Xovellanos nes sos ediciones séptima y decimoctava. Tamién llogró'l Premiu Teodoro Cuesta de Poesía (1995) y otros como'l de la Crítica o'l Fernández Lema. Lal so poesía completa apaeció axuntada nel volume "La mirada aliella" (2007). L'autor, que tamién ye fundador de les editoriales  Tsibros de Froy y Ediciones Trabe, dirixe nesti momentu la revista asturiana de cultura Campos de los Patos. Fonte: Europa Press

Ediciones Saltadera presenta una nueva coleición de publicaciones n'asturianu

 

"Les Manes enceses", d'Eugénio d'Andrade

    Ediciones Saltadera presenta una nueva coleición de publicaciones n’asturianu, que súmase a la revista asturiana de cultura, Campo de los Patos, que vien publicando dende 2010 (4 númberos) y la poesía completa de K. P. Kavafis (Los 154 poemes, con traducción y estudiu de Xosé Gago), editada a finales de 2013.

   Agora acaba de sacar Les manes enceses (Antoloxía 1948-2001), una obra que repasa llibru a llibru tola poesía d’Eugénio de Andrade, el poeta portugués más importante de la segunda mitá del sieglu XX, a l’altura de Fernando Pessoa. Andrade tuvo una especial vinculación con Asturies, llegando a participar nuna Selmana de les Lletres Asturianes. La seleición, traducción y prólogu son d’Antón García.

   En breve la editorial va publicar un nuevu llibru: Más espeso que l’agua, los rellatos que Consuelo Vega Díaz foi perfaciendo a lo llargo d’estos últimos años.                                                                          Fonte: asturies.com