El cómic protagoniza la xornada del 10 aniversariu de L’Arribada

   La cellebración de los 10 años de L’Arribada continúa esta selmana cola xornada d’esti miércoles dedicada al mundu del cómic con delles presentaciones y proyeiciones, amás d’un alderique sobre’l novenu arte n’Asturies.

  El primeru de los actos, que cuenta col sofitu del Ayuntamientu de Xixón, desenvuélvese esti miércoles 9 d’avientu a partir de les 18 hores na Sala de conferencies del Centru de Cultura Antiguu Institutu y va ser la proyección de L’últimu chalgueiru, de Gonzali Producciones. “L’Últimu Chalgueiru” ye un documental de Gonzali Producciones. Ta empobináu por Alberto Álvarez Peña. Rodáu per toa Asturies amuesa una gran bayura de rexistros propios del patrimoniu llingüísticu asturianu. Participaron nel rodaxe, colos sos testimonios, amás d’Emilio Fernández Cuervo, Mª. Cruz Arenas, Pepe Veiga, Julián Menéndez García, José María Álvarez, Rogelio Álvarez Fernández, Amparo Pardo Rodríguez, Secundino González Suárez, Celestina Riesgo Castro, Lolu del Revel.lón, Alicia Rodríguez Pérez, José Antonio Lozano, Gabino María García, Abel Jardón Méndez, Jovino Iglesias, José Suárez Fernández y Arturo González Fernández.

Portada del cómic Selene

  Tres de la proyección entamarán les presentaciones de cómics a les 19:10 hores na mesma Sala de conferencies, cola presentación d’ Astérix n’asturianu, por María Xosé Rodríguez, que va falar de la torna al asturianu de les aventures d’esti popular personaxe. Darréu, a les 20 hores, Va ser El fantásticu viaxe de Selene, por Pilar Sánchez Vicente, el cómic protagonista.

  Esti cómic con historia de Luz Pontón y Pilar Sánchez Vicente ilustráu por Alba Fernández Starczweska narra la vida de Selene, una moza descontenta cola vida monótona que lleva, que viaxa nel tiempu a los momentos más dramáticos de la Revolución Francesa. Aventura, traición, historia y feminismu tán presentes nesti dinámicu y coloríu cómic.

  Pa finar las xornada, a les 20:30 hores va desenvolvese una tertulia que lleva por títulu “Asturies y el cómic”.                                                                            Fonte: asturnews.com

Sal a la venta 'Astérix El Galu'

La primer historia d'Astérix y Obélix, 'Astérix El Galu', yá ta disponible en llingua asturiana. Salvat espubliza esti cómic tres l'ésitu algamáu por 'Astérix na tierra los pictos'.

Les llibreríes del país tienen a la venta esti exemplar, el primeru de los 35 álbumes editaos hasta la fecha, na nuesa llingua dende ayeri. 

Los responsables de la editorial cuenten con escosar esta edición enantes de les feches navidiegues dao'l tirón de los dos personaxes galos ente neños y adultos.

Fonte: Asturies.com

La XXXV Selmana de les Lletres Asturianes va tar dedicada al cómic

Na semeya,  cubierta de "Manzajú" de Barbero,  primer trabayu que llevó l'Alfonso Iglesias

   Coincidiendo col 125 aniversariu de la primer narración fecha n’asturianu con dibuxu artísticu, la Selmana de les Lletres Asturianes va tar dedicada al cómic. L’eventu va celebrase del 2 al 11 de mayu baxo’l lema "Dibuxando un camín".

   Foi nel 1889 cuando la revista "La Comedia Gijonesa" espublizó un cuentu popular firmáu por Pepe Priendes baxo’l nome "Un cuento viejo". Esta historia, contada en cuatro viñetes, llevaba un testu n’asturianu nel pie de caún d’elles, polo que se considera’l primer cómic fechu na llingua del país. Por esti motivu, 125 años depués, la Conseyería d’Educación, Cultura y Deporte va centrase nesti xéneru lliterariu que ta garrando puxu nos años últimos n’Asturies, lo que provocó la creación del Premiu Alfonso Iglesias dientro de los Premios Lliterarios, gallardón que nel 2013 recibió Alfonso Zapico por "Cuadernos d’Ítaca".

   Precisamente l’autor blimeín, residente na ciudá occitana d’Engoulaeme, va protagonizar el llibru qu’edita la conseyería por mor de la Selmana de les Lletres xunto col restu de ganadores del premiu, esto ye, Ruma Barbero (2009, con "Manzajú"), Isaac Rivero (2011, con "Doña Berta") y Javier Antonio Marinas (2012, con "Homes"). Ésti va constar de cuatro histories gráfiques feches de manera especial pa esta ocasión. La obra, de nome "Dibuxando un camín",  va regalase’l Día de les Lletres Asturianes (9 de mayu), xornada na que tamién se celebra’l Día del Llibru y el Discu n’Asturianu, con cada compra que se faiga d’artículos en llingua asturiana. Toos van tener, amás, un 10 por cientu de descuentu.   Fonte: Asturies.com

Barbero lleva al papel les histories del blogue "Aguantando cachones"

    Les 39 histories cuntaes por Ruma Barbero dende ochobre del 2011 hasta xunetu del 2013 nel so blogue ‘Aguantando cachones’ dan el saltu al papel. L’autor xixonés ta acabante d’espublizar un llibru de mesmu nome que les recueye.

   “De la qu’estudiaba bachilleratu’l mio pá nel Antiguu Institutu Xovellanos de Xixón, piraba les clases de ‘Formación del Espíritu Nacional’ pa dir aguantar cachones a La Escalerona colos compañeros de clase. Esto ye, a ver quién yera l’últimu en marchar de la qu’españaba la fola contra’l muru. Esti fechu paecióme dende siempre una metáfora bien prestosa”. Asina se presenta’l blogue ‘Aguantando cachones’, xerme d’esta obra espublizada por Tierra Llibros.

    “‘Aguantando cachones’ entamélu col envís de dir sacando histories curties que tenía en mente va tiempu. Histories reales o de ficción que nun daríen pa facer en munches páxines, pero que sí son la cuenta pa sacales de dientro en periodos de menor actividá, cuando tas per exemplu faciendo'l guión d'un llibru llargu, y asina, de pasu, nun perder mano de dibuxar. Lo del papel foi un añadíu, a mi sigue prestándome'l papel y a muncha xente tamién”, esplica Barbero.

   La obra, que cuenta con un prólogu mui sentíu de Boni Pérez, incorpora 39 histories en 52 páxines de cómic, la cabera d’elles, fecha en xunetu “cuando naide cuntaba con qu'aguantare casi mediu añu más”, dedicada a Nelson Mandela. Éstes falen de too, “dende un cantar de Tom Waits hasta una lletra qu'escribí pa Los Ciquitrinos –grupu nel que toqué a lo llargo d'once años– que nunca llegamos a musicar, pasando per histories que me pasaron a mi, a los mios collacios o a la xente la mio familia. Lo normal ye que seyan histories que yá cunté munches vegaes a la xente más cercano y poro, narrativamente téngoles yá mui pulidines. Van quedando anotaes nun archivín hasta qu'un día, según col humor, la mala lleche o la señaldá que te llevantes, acaben nel blogue”, señala.

   De momento, Barbero yá celebró delles presentaciones en Xixón que “tán resultando bien”. “Hai xente que nun sabía de la páxina, otres persones lleéranles toes nel blogue y teníen ganes de teneles en papel. Amás llego cola inercia de ‘La Chelita’, cola que tovía nun paré de facer promo y sálenme unes dedicatories bien guapes”, asegura. ‘Aguantando cachones’, na so edición de papel, ta disponible nos puntos avezaos de venta; tamién va ser posible mercala nos actos de presentación próximos que l’autor xixonés anunciará nel so blogue.

   Fonte: Asturies.com

Presenten el cómic "Hestories del mio conceyu" en Mieres del Camín

El dibuxante Xosé Xuan González "Xuan G." presentó na Casa Cultura Teodoro Cuesta de Mieres el so caberu trabayu entituláu "Hestories del mio conceyu", cómic promocionáu pol Serviciu de Normalización Llingüística del conceyu nel que l'autor turonés desencolca delles hestories rellacionaes col conceyu a lo llargo de los años.

Asina, con unos alumnos d'institutu como filu conductor, l'autor repasa sucesos de la "Guerra d'Independencia" escontra Napoleón, los años de la industrialización, la emigración, el ñacimientu del movimientu obreru y otros episodios como l'apaición de les pantasmes de soldaos carlistes na Vera'l camín de Turón, cola doble intención de recoyer sucesos hestóricos y populares del conceyu y promocionar la llingua del país na producción lliteraria y artística.

Fonte: Infoasturies

Palestina, de Joe Sacco

¿De qué va? // Autobiográficu. Joe Sacco, periodista de profesión, nárranos en forma de cómic el viaxe de dos meses que fizo a Palestina pel iviernu de 1991-92, demientres la primer intifada escontra la ocupación israelín. A mou de "diariu de viaxe", Sacco amuésamos la situación qu’alcontró na fastera y los testimonios de la xente que conoció, amosando nes sos viñetes la llercia, la tristura, la frustación, la desesperación ya inclusu, pesia too, la esperanza de los que viven ellí.

Sobre’l cómic // Palestina foi espublizada orixinalmente serializada en nueve comic-books apaecíos ente 1993 y 1995, que la edición española recompila nun únicu volume. La obra tien atrayío l’atención de círculos ayenos al mundiu del cómic, como lo amuesa que nel 1996 fora gallardonada con ún de los prestixosos American Book Awards y que nel 2002 (de nuevu d’actualidá pol recrudecimientu del conflictu en Palestina) recibiera’l premiu a la Meyor Novela Gráfica na Book Expo America.

Fonte: http://www.guiadelcómic.com/