21/11/12

Xabiero Cayarga Premiu Críticu de poesía de la XDLA

Cayarga, Premiu Críticu de les Lletres Asturianes na estaya de poesía.


La XDLA dio a conocer esti miércoles la obra ganadora del Premiu Críticu de les Lletres Asturianes na so estaya de poesía. ‘La ñeve del cuquiellu’, de Xabiero Cayarga, foi la obra escoyida por unanimidá pol xuráu del gallardón.

Ésti tuvo compuestu por Xosé Miguel Suárez Fernández, Xuan Santori y Pablo Texón Castañón. Los trés reconocíos escritores destacaron esta obra “impecable no llingüístico y perfeuta no formal”, asina como la claridá de les sensaciones con un ciertu aporte clásicu que se plasma na obra en forma de poesía. Na so opinión, Cayarga (Cangues d’Onís, 1967) ye “ún de los pocos poetes asturianos que tien too aquello que se-y pide a un escritor universal: usa la llingua asturiana col respetu que se-y tien a lo heredao de casa y da-y un aire centroeuropéu y cosmopolita poco usual dientro del panorama poéticu n’asturianu”. ‘La ñeve del cuquiellu’, espublizada por Trabe nel 2011, yá ganara un añu enantes el Premiu Teodoro Cuesta de poesía y foi considerada pola Terturlia Malory de L’Entregu la ‘Meyor obra del 2011 n’asturianu’.

Ésti ye’l segundu Premiu Críticu de les Lletres Asturianes que fai públicu la Xunta pola Defensa de la Llingua Asturiana (XDLA), a falta de conococer los ganadores nes estayes d’ensayu y narrativa. Otra autora de Cangues d’Onís, Berta Piñán, foi la que se llevó’l de lliteratura infantil y xuvenil pola obra ‘La mio hermana ye una mofeta’. El coleutivu cívicu entama estos gallardones, de manera esceicional, como respuesta a l’ausencia de la llingua asturiana nos XIII Premios de la Crítica de l’Asociación d’Escritores d’Asturies. Los autores van recibir los gallardones el 30 de payares, a les 19.30 hores, nun actu na galería d’arte uviedina El Texu.

Fonte:  Asturies.com



2 comentarios:

  1. La XDLA yá otorgó los sos premios lliterarios.

    ResponderEliminar
  2. A ver si aprienden d'una vegada por toes los que tienen qu'aprender que nun se puede discriminar al asturianu de ciertos premios si quier dáse-yos categoría.

    ResponderEliminar

Los comentarios tán pendientes de moderación. Espublizaránse lo primero dable.