28/11/12

IU propón la oficialidá del aragonés. ¿Y l'asturianu?


IU propón la oficialidá del aragonés al traviés d'una enmienda a la Llei de Llingües

DAMIÁN BARREIRO . UVIÉU -
IU d'Aragón, que refuga la reforma de la Llei de Llingües presentada pol Gobiernu autonómicu, propón un proyectu alternativu de Llei de defensa, fomentu y enseñanza de les llingües propies d'Aragón y na qu'apuesta pola cooficialidá de los tres llingües nes zona d'Aragón onde se falen y la posibilidá de dirixise a les instituciones públiques en cualquier d'elles: aragonés, catalán y castellán. Amás, nel testu rexistráu pola formación política, tamién proponen que la enseñanza de les llingües aragoneses sía obligatoria «pa garantizar la so supervivencia».


L'escritor aragonés, Anchel Conte, y el portavoz d'IU d'Aragón nes Cortes, Adolfo Barrena, esplicaron esti 26 de payares en rueda de prensa la enmienda a la totalidá que presentó'l so Grupu Parllamentariu al proyectu de Llei de Llingües d'Aragón del Gobiernu autonómicu, formáu por PP y PAR. Asina, afirmen que quieren tratar d'«evitar la muerte» del aragonés y acabar col «anticatalanismu» del Gobiernu autonómicu. Los dos afirmaron que'l Gobiernu autonómicu presentó un Proyectu de Llei «col que queden tovía peor que la llei aprobada poles Cortes nel 2009 y a la qu'IU votó en contra».

«La llei presentada por PP y PAR incumple l'artículu 7 del Estatutu d'Autonomía, que emplaza a les Cortes d'Aragón a fomentar la cooficialidá, y niega el derechu de los aragoneses a tener la so llingua propia», denunció Conte p'añadir que «tampoco nun recueye la obligatoriedá de la enseñanza del aragonés nos centros educativos, lo que va traer la destrucción y la muerte d'esta llingua, una de les llingües minoritaries más amenaciaes de toa Europa».

Pal escritor aragonés, «una de les razones poles que la Llei del PP y PAR nun inclúi la cooficialidá de les llingües aragoneses ye'l anticatalinismu qu'hai en dellos partíos de derecha y tamién d'esquierdes». Al so xuiciu, «si nun se falara catalán n'Aragón, l'aragonés sería yá cooficial ensin nengún problema, pero hai un anticatalanismu que ye la causa de que nun se reconozan les llingües: o se reconocen los dos o nun se reconocen nenguna, colo que s'optó por nenguna». Nesti sentíu, Conte considera qu'esto se debe al erru cometíu por dellos políticos de llindar les llingües a los territorios, «nel sitiu de venceyales a los derechos de los ciudadanos».

P'Adolfo Barrena, la llei presentada pol Gobiernu pa derogar la vixente ye un intentu claru de tarazar otru derechu más de los ciudadanos, «amás de ser cobarde por tar fundada en complexos d'identidá». Sobre'l testu rexistráu por IU, esplicó que planteen la posibilidá de recuperar la tutela xudicial, recoyida na actual llei, pero non na presentada pol Gobiernu, «pa que cualquier ciudadanu, que viera refugáu'l so derechu a espresase na llingua qu'escueya, pueda denunciar el casu nos xulgaos”.

Fonte: Les Noticies

6 comentarios:

  1. ¿Y pa l'asturianu? IU comete un atropellu y un gran agraviu comparativo al proponer la oficialidá del aragonés y nun proponer tamién a la llingua asturiana.
    Yá asocedió n'Asturies tropecientes vegaes ¿a quién quieren engañar? porque una cosa ye pedricar y otra bien y otra bien distinta dar trigu.
    O dicho otra manera una cosa ye falar (a los asturianos en Asturies) y otra obrar o faer bien les coses y ensín engañifes.

    ResponderEliminar
  2. Nun contamos pa IU nin pa naide, tamos llistos.

    ResponderEliminar
  3. La clase política ye la nuesa enemiga y la de toos, nun tamos llistos tamos perdíos compañeru. Ensín políticos profesionales taríamos muncho meyor.

    ResponderEliminar
  4. Lo dicho por unu ende arriba, l'aragonés y el catalán sí, l'asturianu a la m...

    ResponderEliminar
  5. L'asturianu llingua oficial, yá.

    ResponderEliminar
  6. L'asturianu morre de desaniciu.

    ResponderEliminar

Los comentarios tán pendientes de moderación. Espublizaránse lo primero dable.