20/2/12

Iniciativa pol Asturianu protesta pol retayu a l’Academia de la Llingua Asturiana



L’asociación aprovecha pa recordar que la máxima institución llingüística asturiana sigue ensin recibir fondos del Gobiernu central.

La organización Iniciativa pol Asturianu considera que’l retayu d’un 40% a los presupuestos de l’Academia de la Llingua Asturiana (ALLA) ye un ataque al idioma asturianu, nun contestu mui difícil pa la llingua d’Asturies, y teniendo en cuenta que l’ALLA ye una institución siempres austera y que yá hasta agora cuntaba con namás los fondos imprescindibles pal desenrrollu del so llabor.

Por ello pidimos al Gobiernu d’Asturies que rectifiquen esta partida del presupuestu prorrogáu pa 2012, calteniendo, polo menos, la cantidá establecida pal añu anterior, y nunca con rebaxes penriba de la media del restu de los retayos de presupuestu.

Financiación estatal: l’asturianu nun cuenta
Amás, Iniciativa pol Asturianu, recuerda que ye tamién responsabilidá del Gobiernu d’España la financiación de l’Academia de la Llingua Asturiana, pues nos sos presupuestos incluyen una partida pa financiar a toles academia de les diferentes llingües que se falen nel Estáu español.

La Real Academia Española recibe más de 4 millones d’euros, mientres que l’academia del catalán (l’Institut d’Estudis Catalans) recibe cuasi 1 millón d’euros, la de la llingua vasca, mediu millón d’euros y la Real Academia Galega, 200.000 euros. Esto supón una nueva marxinación hacia la nuesa llingua, que nun cuenta pa les autoridaes estatales.

Por ello, Iniciativa pol Asturianu reclama al Gobiernu d’Asturies, amás del cambiu nos sos propios presupuestos, qu’esixa al Gobiernu d’España una partida pa l’ALLA nos presupuestos xenerales, pa finar con esta marxinación a la institución asturiana y ayudar a la financiación d’una institución imprescindible pa la normativización del idioma.

Fonte: Aruelu.com

1 comentario:

  1. Y con tola razón pero con escasu respaldu social polo que se güeya per equí, munchu manifiestu y pocos apoyos na calle aque ye lo que entiende los políticos.

    ResponderEliminar

Los comentarios tán pendientes de moderación. Espublizaránse lo primero dable.