EQUO Asturies solidarízase con Andecha Astur

Imaxe: lne.es

EQUO Asturies quier faer pública la so solidaridá con Andecha Ástur pol atropellu sufiertu na xornada eleutoral del 24 de mayu,cuando se retiraron papeletes llegales d’esi partíu nos colexos eleutorales.

Según la información que nos tresmitieron dende Andecha Ástur na reunión que tuvimos, fueron los interventores del PP y el PSOE quien presionaron a los/les presidentes de mesa pa que retiraren diches papeletes, faciendo un usu abusivu de la so función llegal.

Creemos qu’esiste una total falta de medios por parte de la Xunta Eleutoral. Esta tendría de dar sofitu a les meses pa que les votaciones nun queden en manos de los interventores como vien asocediendo en munchos casos.

Otru abusu más ye’l que se produz poles dificultaes y la carestía pa recurrir ante la xusticia, que pierde la so función al nun haber un pronunciamientu rápidu.

La situación de indefesión d’un partíu como Andecha Ástur amuesa la necesidá de la declaración d’oficialidá del asturianu. Hai que trabayar por una meyora de la democracia y coses como estes nun pueden volver pasar.

Pidimos a los partíos que tán na Xunta xeneral qu’utilicen los votos que-yos emprestó la ciudadanía pa qu’esto nun vuelva asoceder.

Fonte:EQUO Asturies

L'asturianu suena más que nunca na Xunta Xeneral

por Pablo R. Guardado

Esta mañana ta celebrándose la sesión constitutiva de la Xunta Xeneral, onde l'asturianu ta teniendo más presencia que nunca. Seis diputaos de Podemos emplegaron l'idioma. Sanjurjo preside de nuevo la Cámara.

Emilio León, Daniel Ripa, Kike López, Héctor Piernavieja, Andrés Ron y Lucía Montejo son los parllamentarios de Podemos que recoyeron l'acta de diputaos usando l'asturianu. D'esta forma, el nuesu idioma, de siempres tapecíu nel Parllamentu asturianu, ta más presente que nunca.

Pedro Sanjurjo resultó escoyíu otra llexislatura más como presidente de la Xunta Xeneral tres una votación a la que tamién se presentó la popular Emma Ramos pese al alcuerdu esistente ente tolos grupos, a esceición del PP, de repartir tolos cargos de la mesa. D'esta forma, la formación lliderada por Mercedes Fernández pierde la vicepresidencia primera que-y correspondería, pasando ésta a María Josefa Miranda (IX), y tien que conformase cola vicepresidencia segunda, que va ocupar José Agustín Cuervas-Mons. Na votación pola presidencia, Sanjurjo, que ganó a Ramos en segunda ronda al nun tener mayoría absoluta na primera, cuntó col apoyu de los diputaos d'Izquierda Xunida y Ciudadanos, mentes que la popular namái algamó los de Foro.

El partíu encabezáu por Cristina Coto foi'l perxudicáu que quedó finalmente fuera de la Mesa, yá que pa la secretaría primera resultó escoyíu Ignacio Prendes (Ciudadanos) y pa la segunda, Rosa María Espiño (Podemos), que ganó na votación a Esther Landa tres empatar dambes a 14 apoyos.

Na semeya, fecha por Daniel Ripa, Piernavieja llee la constitución de la Xunta Xeneral en llingua asturiana.

Fonte: Asturies.com

La Xunta Eleutoral refuga la impugnación d'Andecha Astur

El refugu a la impugnación de les elecciones del 24 M pola retirada de les papeletes de Andecha Astur, que vieno acabante conocese, pon n'evidencia pa esta organización política "la falta de garantíes democrátiques, tantu más cuando los motivos pa refugala son falsos y contradictorios". La Xunta Eleutoral Central (XEC) tornaba esti día'l recursu de Andecha Astur “por nun concretar les meses nes que se produció nin el tiempu que duró esta”, magar que en na so denuncia "figuren 14 meses alcontraes nes que se retiraron les papeletes, el tiempu nel que tuvieron retiraes en dalguna d'elles, y ufiértase la posibilidá de declaraciones xuraes de ciudadanos a los que'l presidente de mesa negó-yos les papeletes pa poder votar a Andecha Astur". Por si fora poco, la sentencia de la XEC nun coincide cola Xunta Eleutoral Provincial (XEPA) nos motivos polos que decide archivar la denuncia: "Nel primeru de los casos la XEC acota que nun se concretó les meses nes que supuestamente se retiraron les papeletes nin el tiempu que duró la retirada, porque'l so motivu refuga la impugnación de les eleiciones a nivel d'Asturies". Sicasí la Xunta Eleutoral Provincial de Asturies (XEPA) reconoz los fechos, ponlos en conocencia del Ministeriu Fiscal y refuga la impugnación en Xixón, por calificar los fechos de “irregularidá procedimental”. Pa la organización nacionalista "con tan vergoñoses artimañes la XEC pon fin a la vía alministrativa pa la reclamación, y anque abre les puertes pa un recursu contenciosu-alministrativu, lo cierto ye qu'ésti se retrasará nel tiempu y por enforma que la razón ampárenos, la sentencia tardaría tantu en producise que sedría totalmente invidable". Fonte: Asturnews

El mayor consensu pola Oficialidá de la hestoria autonómica

Iniciativa pol Asturianu pide que s'impulse una reforma del Estatutu

Partíos de tol espectru políticu llevaron la promesa d’oficializar l’asturianu nel so programa eleutoral y la consencuencia foi que la postura favoratible a la resolución de la situación de desigualdá del asturianu y los sos falantes tien el mayor númberu de diputaos en tola hestoria de la Xunta Xeneral d’Asturies.

Desque en 1991 Xuan Xosé Sánchez Vicente fuera’l primer diputáu escoyíu con un programa a favor de la oficialidá, hasta güei, cuasi un cuartu de sieglu dempués, el sofitu al asturianu y de forma específica a la oficialidá normalizóse y ta asumíu pola gran mayoría de los asturianos y asturianes, siendo una parte más del programa de delles de les formaciones con más pesu.

Dempués d’estes elecciones, y de tantos años de trabayu, la reivindicación de la oficialidá axunta güei a 17 de los 45 diputaos del parllamentu, más de  los que tien l’actual partíu de gobiernu.

Les formaciones polítiques que se comprometieron colos sos votantes a defender la oficialidá (Podemos, Izquierda Xunida y Foro) han xuntar fuercies agora ya impulsar una reforma del Estatutu d’autonomía qu’incluya esti estatus llegal pal idioma, trabayando pa convencer a los demás partíos de la necesidá de camudar esta situación inxusta ya inesplicable nun sistema democráticu.

Precisamos un consensu de 3/5 de la Xunta Xeneral pa modificar l’Estatutu (27 diputaos). Ye’l momentu de forzar a los partíos tradicionalmente en contra a camudar la so postura, pa que s’adapte a la realidá social, que yá la tien asumida con normalidá. Ye’l momentu de que los partidarios de la oficialidá que tán dientro del PSOE y el PP faigan el máximu esfuerciu posible pa convencer a los suyos de la necesidá d’esti cambéu.

Y los partíos que defenden la oficialidá han demostrar, ellí onde gobiernen, que la reivindicación de la oficialidá nun ye una pallabra d’adornu nel so programa, estableciendo polítiques de normalización series y ambicioses nos conceyos.

Dende Iniciativa pol Asturianu siguimos trabayando dende’l primer momentu de la llexislatura pa consiguir esti necesariu consensu, cada día más cerca. Los ciudadanos, la so movilización y trabayu pol idioma dende tolos ámbitos posibles, van ser al final, los que consigan camudar les vieyes rocees de los dirixentes políticos pa cola llingua del país.

Fonte: Iniciativa pol Asturianu

La XDLA recuerda a los partíos favoratibles a la oficialidá que “tienen una oportunidá" nos sos pautos pa demostrar el so compromisu

Na semeya, Javier Fernández y la Pita

   En plena ronda de negociaciones ente los partíos con representación na Xunta Xeneral pa la formación de gobiernu, la XDLA recuerda a les formaciones favoratibles a la oficialidá que “tienen una oportunidá perfeuta” nestes conversaciones pa demostrar el so compromisu pa col respetu de los derechos de los falantes d’asturianu. Javier Fernández sigue ensin llegar a alcuerdos col restu d’organizaciones tres aconceyar con toes elles y too paez indicar que la FSA-PSOE repetirá un Gobiernu en minoría.

   El coleutivu cívicu afala a estes formaciones a facer valir “nos sos pautos, alliances y esixencies, de manera inescusable y irrenunciable, el respetu a la igualdá de la ciudadanía que la oficialidá supón”. Nestos momentos, el socialista Fernández, tres finar una primer ronda de contautos con tolos partíos ensin llegar a avances concretos, tien previsto entamar una segunda con tolos actores a esceición del PP, que cuenta con presentar a Mercedes Fernández como candidata a presidenta del país nel Plenu d’Investidura del día 16. Si nun hai cambios nes postures calteníes hasta la fecha, too paez indicar que la FSA-PSOE va gobernar el país en minoría nos cuatro años próximos.

   Un Gobiernu socialista en solitariu nuevu nun paez que vaya trayer bones noticies pa la llingua asturiana, que vien de vivir trés años de política insitucional “llamentable” nel terrén llingüísticu, según consideren dende la Xunta pola Defensa de la Llingua Asturiana (XDLA). “Más que l'enllancamientu avezáu de la escasa actividá del departamentu encargáu de la supuesta ‘política llingüística’ asturiana, pue falase d’un retrocesu claru. Non solo na visibilización y espardimientu de la llingua sinón, mesmamente, n'ámbitos que, como l’educativu, el mediáticu y el de la toponimia, taben na marxinación y precariedá permanente y qu’agora, depués d’años de desidia malintencionada y incompetencia proverbial, tán peor: nun tris de que’l asturianu desapareza d’ellos”, añade’l coleutivu cívicu.

   Nesi sen fai referencia a actividaes yá consolidaes, como’l Premiu al Meyor Cantar o l’Axenda Didáctica, que se retrasaron “de manera llastimosa hasta llegar al ridículu de que puedan convocase depués de que marchen –eso esperamos– tolos cargos a deu de la conseyería, la viceconseyería y la Direición Xeneral de Política Llingüística”. Tamién suma a estos despropósitos la web nueva d’Educastur, “onde nun s'atopa nenguna sección dedicada a la llingua asturiana y el gallego-asturiano y onde –nun ye nenguna novedá nesti Gobiernu– sigue ensin respetase la toponimia oficial qu'ellos mesmos aprobaron nel BOPA, pero qu'incumplen a sabiendes”. “Esto nun pue siguir asina”, continúa la XDLA, qu’anuncia la so disposición a denunciar toles aiciones del Gobiernu que supongan un retrocesu pa la llingua asturiana.                                                                       Fonte: asturies.com

Andecha Astur recurre l’alcuerdu de nun invalidar les elleiciones

La Xunta Elleutoral Provincial d’Asturies considera que nun hai base llegal pa la impugnación, pero sí infración elleutoral.

 Andecha Astur recurrió l’alcuerdu de la Xunta Elleutoral Provincial d’Asturies (XEPA) que considera que nun hai base llegal pa la impugnación de les elleiciones, aunque sí infración elleutoral, refiriéndose únicamente al Conceyu de Xixón, en cuentes d’a toa Asturies, comu figura na impugnación presentada.

Por esa xida, y por otres munches asemeyaes de lo que la mencionada XEPA considera “irregularidades procedimentales”, Andecha Astur presentó’l pertinente recursu al alcuerdu de la mesma, apurriéndo entá más información y desixendo-y a la XEPA la rialización de les oportunes investigaciones a la fin de concretar l’amplitú y duración de los fechos denunciaos, y la valoración de la repercusión de los mesmos de forma direuta ya indireuta.

Fonte: Andecha Astur

Andecha Astur da'l pasu d'impugnar les eleiciones pol asuntu de les papeletes

La falta de papeletes d'Andecha Astur en decenes de colexos eleutorales lleva a la organización a impugnar les eleiciones. En dalgunos casos nun se repusieron hasta cerca de les 14 hores.

Nun escritu presentáu a la Xunta Eleutoral apúntase l'ausencia de papeletes d'Andecha Astur "polo menos en 100 meses eleutorales llocalizaes preferentemente en Xixón, pero tamién n'Avilés, Grau y Mieres". La formación nacionalista tamién diz tener conocimientu de "otres munches que nun pudimos comprobar", un problema que, recuerda, detectó la propia Xunta Eleutoral, "al menos pola Xunta Eleutoral de Zona de Xixón, que tuvieron recibiendo consultes por parte de los presidentes de mesa mientres tola mañana y qu'obligó a la mesma emitir una circular a tolos presidentes de mesa especificando que les papeletes d'Andecha Astur 'no pueden ser retiradas bajo ningún concepto del Colegio Electoral'". Inclusive la Policía Llocal de Xixón tuvo qu'actuar a pidimientu de dicha Xunta de Zona tres la quexa d'Andecha.

"Ye evidente que too ello supón una violación nidia de los derechos democráticos más básicos, yá que la nuesa candidatura nun pudo tar presente n'igualdá de condiciones que'l restu, lo que supón un incumplimientu nidiu de lo dispuesto na LLOREG, motivu pol qu'Andecha Astur impugnó diches eleiciones", afirmen dende la formación nacionalista. Esta situación diose pola decisión de la Xunta Eleutoral de negase a distribuyir les papeletes en llingua asturiana validaes pol propiu organismu y l'actuación d'apoderaos del PSOE y el PP, qu'aprovecharon la falta d'información que teníen los presidentes de mesa pa retirar tanto les que taben n'asturianu –llevaes por Andecha a los colexos eleutorales– como en castellanu.

Fonte: Asturies.com

La XDLA crítica l'actitú represiva hacia l'asturianu na xornada eleutoral y pide pasos alantre pa iguar estes situaciones

Nuna nota de prensa asoleyada esti día, la Xunta pola Defensa de la Llingua (XDLA) crítica l'actitú represiva hacia l'asturianu na xornada eleutoral y pide a los partíos políticos pasos alantre pa iguar estes situaciones, depués de que la Xunta Eleutoral validara les papeletes n'asturianu d'Andecha Astur -anque namás nel recuentu y ensin poder aparecer nes meses eleutorales-. Esti partíu denunció qu'en plena xornada eleutoral y a lo menos nun cientu de meses taben retirándose les sos papeletes, colo que na XDLA atalante que ye "una intencionalidá represiva hacia'l nuesu idioma, dellos interventores reinterpretaron la resolución de la Xunta Eleutoral y retiraron toles papeletes d'esti partíu políticu". Pa la Xunta esta actitú "muestra la represión y el castigu exercíu sobre los asturfalantes y l'incumplimientu de la llexislación vixente, tanto a nivel asturianu como español y européu". Por eso, la XDLA "pide a tolos partíos políticos que van tar representaos na Xunta Xeneral nueva que dean pasos alantre pa poner fin a estes actitúes propies d'un periodu predemocráticu". Y ye que la existencia de mayoríes nueves "va permitir -si les otres partes nun exercen un bloquéu- avanzar llexislativamente nel reconocimientu de derechos y nel desarrollu real d'una planificación llingüística afayadiza pal casu asturianu. De la mesma manera, hai que recordar qu'en tolos conceyos del país van tar representaos partíos políticos que llevaben nel programa un compromisu esplicitu col idioma de la nuesa tierra. La XDLA espresa la importancia -yá sía executándola dende'l Gobiernu llocal o faciendo propuestes dende la oposición municipal- de desarrollar una política llingüística a nivel de los conceyos. Quier dicise, dende les alministraciones más averaes al ciudadanu". Por mor d'ello, la organización pide "a tolos conceyos asturianos que dean pasos alantre na recuperación de la toponimia tradicional -hailu tovía que nun dio'l primer pasu pa empezar el procesu-, na estabilidá de los servicios de normalización y nos derechos llaborales de los sos emplegaos, y nel desarrollu d'una política llingüística municipal, midíes que munches veces nun suponen nengún costu añadíu. Otra manera, hai que volver a insistir en qu'a nivel autonómicu ye preciso tamién dar pasos alantre p'acabar colos casos claros de represión exercíos contra les persones que quieren utilizar el so idioma na vida cotidina y nel exerciciu de los sos derechos democráticos como ciudadanos". Fonte: Asturnews

Andecha Astur denuncia la retirada de les sos papeletes en munchos colexos eleutorales por tar en llingua asturiana

por Pablo R. Guardado

Ayeri retiráronse les papeletes d'Andecha Astur en munchos colexos asturianos por tar en llingua asturiana. La Xunta Eleutoral validara per primer vegada ensin torgues les papeletes n'asturianu de la formación nacionalista, pero non la so distribución. Andecha nun descarta impugnar les eleiciones.

Andecha Astur distribuyera pela so cuenta diches papeletes, anque en dellos colexos retiráronse por tar n'asturianu, en munchos casos por presión de los apoderaos del PSOE y PP, según denunció'l partíu que tien a Paulo Arboleya como candidatu. Finalmente, paez que taben reponiéndose les papeletes, anque Andecha solicita a los ciudadanos que se-y comunique cualesquier casu nel que nun haya papeletes de la so formación a disposición del votante.                       Fonte: Asturies.com

Partíos y oficialidá nel programa eleutoral

Fonte: Iniciativa pol Asturianu

Los asturianistes de Podemos trazen la llínia roxa

Xune Elipe amenaza con dexar la formación si nun se propón la oficialidá Como yá venía sintíendose dende hai selmanes, los representantes del movimientu asturianista llingüísticu integraos nel proyeutu de Podemos Asturies tuvieron de dar estes vacaciones de Selmana Santa un pasu alantre y dexar bien afitao que nun van permitir un programa eleutoral nel que nun tea la OFICIALIDÁ con toles lletres y ensin lletra pequeña. Xune Elipe yá dexara nidia la so posición hai tiempu d'abandonar la formación llegáu'l casu y vieno acabante de afitalo otra vuelta. Nuna información asoleyada esta selmana vacacional l'Axencia Europa Press falaba na so web de "distintes postures ante la reivindicación histórica de la declaración d'oficialidá de la llingua asturiana", principalmente estremaes "ente los que prefieren someter esti puntu a votación ciudadana, como'l restu del so programa eleutoral, o bien los que consideren que se debe asumir como un drechu básicu". Y recoyía declaraciones de dalgunos de los más nomaos militantes de podemos que son asturianistes nomaos y reconocíos ensin dubies al respeutive de la oficialidá como Xune Elipe, cantante de Dixebra, y Pablo Antón Marín Estrada, ún de los meyores escritores de nueso y candidatu nel conceyu Xixón. Xune Elipe ya deciera formar parte del equipu de Somos Asturies y de la llista eleutoral de Podemos Avilés coles condiciones de que Podemos Asturies nun fuera una delegación madrilana y que nun se discutiera la reconocencia oficial de la llingua asturiana ensin ambigüedaes de dengún tipu nel programa eleutoral. Xustamente lo qu'agora dalgunos candidatos de Podemos tán entamando a plantegar cola fin d'apartar la oficialidá del programa o dexalo arrequexao como una propuesta a debatir. Queda perpocu tiempu pa pesllar el programa y la non inclusión de la oficialidá podría pasar muncha factura a Podemos Asturies, que tien nel asturianismu una bona parte de la escasa cadarma organizativa cola que cunta. Fonte: Asturnews

Izquierda Xunida considera que la oficialidá ye la “alternativa única pa la proteición y promoción efeutiva” de la llingua asturiana

por Pablo R. Guardado

Gaspar Llamazares, candidatu d’Izquierda Xunida (IX) a la presidencia del país, aconceyó na mañana d’esti miércoles con representantes de la Xunta pola Defensa de la Llingua Asturiana (XDLA). Pa la coalición, la oficialidá ye la “alternativa única pa la proteición y promoción efeutiva” del asturianu.

La diputada Emilia Vázquez acompañó a Llamazares nesti conceyu nel que’l coleutivu cívicu tuvo representáu pol voceru nacional Carlos Pulgar y Xulio Casado. Tres la mesma, IX aseguró que “apoyará la cooficialidá del asturianu na reforma próxima del Estatutu d’Autonomía” al entender que “la figura actual de ‘proteición’ amosó, de forma nidia, el so fracasu como vía pa garantizar la pervivencia de la llingua vernácula”. N’opinión del candidatu de la coalición, el marcu xurídicu actual nun valió pa protexer los derechos de los falantes n’Asturies del asturianu. “La proteición del asturianu convirtióse nuna desproteición” apuntó, pa depués asegurar que cualquier reforma del estatutu que se ponga en marcha “deberá protexer los derechos individuales y coleutivos, y dientro d’ellos, los de los falantes d’asturianu”.

Amás de la declaración d’oficialidá, Llamazares señaló la necesidá de “garantizar la normalización al traviés d’una llei de desarrollu del estatutu en rellación al asturianu” que tuviere como exes “la educación, la función pública y los medios de comunicación”. “Ési ye’l nuesu oxetivu y va formar parte del nuesu programa eleutoral”, afirmó. Por último, el candidatu recordó que la falta d’oficialidá ye causa de los agravios que se viven toles llexislatures en rellación al idioma en delles cuestiones, como “el que tuviemos recién col Ministeriu d’Educación” al respeuto de la especialidá docente de Llingua Asturiana y Gallego-asturiano.

Ronda de contautos de la XDLA

L’alcuentru con IX ye’l primeru que se fai públicu de los que ta celebrando la  XDLA de manera privada coles formaciones polítiques de cara a les eleiciones nacionales y municipales del 24 de mayu, según adelantó Pulgar. “La intención ye aconceyar con toos, tanto colos qu’en principio pueden parecer más favorables como colos que pueden paecer menos, porque tenemos que facer el llabor didáuticu d’esplicar a tolos representantes políticos qu’esto ye una cuestión de derechos que debería ser asumíu por toles fuercies polítiques d’Asturies ensin mayor problema”, aseguró’l voceru nacional.

Nel restu d’intervenciones, Vázquez destacó que “la xente asturiano defende l’asturianu; hai cada vez un mayor afeutu pola nuesa llingua y cultura”, dalgo que ve nel so día a día como profesional del enseñu, y añadió que lo que nun quier la ciudadanía “ye que sía oxetu d’enfrentamientu”. Pela so parte, Casado apuntó que la filosofía de la XDLA “ye defender l’asturianu como un patrimoniu del pueblu asturianu, ensin banderes polítiques y partidistes”, y recordó “que los derechos son universales y deben ser reconocíos”.

Na semeya, Vázquez, Llamazares, Casado y Pulgar.

Fonte. Asturies.com

NEL CAMÍN DE LA OFICIALIDÁ

         

Va cuarenta años, el venti de payares de 1975, l'estáu español entama la transición qu'empobina a l'actual democracia. Dende entós, n'Asturies gociamos del drechu de poder escoyer nes urnes llibremente cada cuatro años a los gobiernos que van dirixir el país. Nestes décades, y baxo una escasa alternancia, nun hebo nengún apueste seriu pola potenciación de la nuesa cultura. Los partíos con representación na Xunta Xeneral siempres se supeditaron a les órdenes impuestes dende Madrid, desatendiendo a costa fecha el porgüeyu de lo qu'equí realmente se necesitaba. Asina pues, en poco tiempu, Asturies pasó a ser un país con gran pesu nel estáu a ser una fonte d'emigración por perda d'emplegos, destrucción del mundu rural, precarización salarial, pieslle d'empreses, etc. Too ello, amuésase na pirámide demográfica onde se sopelexen más muertes que nacimientos y una población cada vegada más avieyao y dependiente con menor tasa d'anovación. Daqué abegosu pa un país.

            Si a los partíos políticos con representación na Xunta Xeneral nunca-yos esmoleció esta perda demográfica, los intentos d'otros p'algamar representación y poner Asturies en valir foron siempres probes. Bien por intereses partidistes o particulares, la hestoria del nacionalismu asturianu -como veceru d'esti pruyimientu- ye la de la ruptura y la xuntanza cíclica d'ésitu ramplón. Nel meyor de los casos, la competencia ente organizaciones nacionaliegues siempres fexo xebrar los votos y les fuercies en dos grupos.

            Nel actual escenariu políticu, col aprucir de Podemos, muncha xente con ideoloxía asturianista y/o nacionalista, averóse a esti partíu aprovechando'l paragües qu'ufierta a la escucha de les bases y a una mayor sensibilidá pa colos sos intereses de la población. Esti fechu amuésase claramente nel tema de la oficialidá del asturianu, onde en muncha propaganda usa esta llingua como vehicular xunto col castellanu. Un acontecimientu cuasi inéditu (solo compartíu con IU-IX) pa un partíu con grandes posibilidaes de representación y fundación madrilana. A pesar d'ello, cuando les bases de Podemos tán tovía ensin afitar, a esti partíu reclámense-y unes resoluciones y esplicaciones a les que tovía nun pue acoyer. Y anque'l tema de la llingua caltria nos drechos universales de la humanidá, depués de más de trenta años de democracia, n'Asturies tovía hai munches rocees que superar y combatir. Poro, dexemos que trabayen, que s'organicen, que falen, qu'alderiquen y, dempués, que s'espresen. Y dexemos, a la fin, qu'esta xente asturianista y/o nacionalista que s'averó a Podemos puea lluchar polo nueso ensin torgues nin pilancos. Tiempu habrá pa pidir desplicaciones o pa festexar.

            D'otra mena, ¿daquién ta convencíu que nel actual escenariu, el nacionalismu astur va algamar representatividá en 2015 y condicionar la oficialidá? Depués de más de trenta años onde solo había PSOE, PP ya IU-IX y nun se pudo abrir una vía clara na política con calter asturianista, ¿agora sí vamos poder en 2015 condicionar la oficialidá?

Blogue Falar y lleer

OFICIALIDÁ, SÍ O SÍ

Les eleiciones tán cerca y munchos ciudadanos quieren saber qué midíes propón cada formación política pa solucionar el conflictu llingüísticu que fai qu’una parte de la ciudadanía asturiana viva teniendo problemes por usar la so llingua de casa n’ámbitos públicos.

Nós venimos falando y vamos siguir aconceyando con toles fuercies que quieran facelo pa entruga-yos qué piensen facer cola situación de la llingua asturiana y pa esplica-yos cúales son les soluciones más afayadices pa la situación sociollingüística d'Asturies. Fadremos, como siempres, por xenerar el mayor consensu posible alredor de la necesidá d’oficializar l’asturianu. Y esperamos, y trabayamos, pa que toles fuercies polítiques escueyan llevar esta midida nel so programa.

Sicasí paez más que probable que como vien pasando n’otres convocatories delles fuercies polítiques nun recueyan la oficialidá nel so programa; poro, vamos pidir a los asturianos y les asturianes qu’escueyan a quién van votar namás ente los partíos que lleven nel so programa la oficialidá. Sabemos que davezu nun sedrá la única razón pa escoyer el votu, pero sí pue ser pa munches persones un mínimu necesariu pa pensar en votar a una fuercia.

La cuenta atrás pa les eleiciones asturianes escomencipió yá. Agora ye’l tiempu de comprometese cola llingua asturiana y non de buscar xides y argumentos que quedaron yá desfaos, desmitificaos. De dicir ensin mieu sí al reconocimientu de los drechos civiles, sí a la proteición de la nuesa cultura, sí a la nuesa identidá como pueblu…

Y dende Iniciativa pol Asturianu tenémoslo nidio, la única manera de facelo, l’únicu marcu llegal posible y válidu nel marcu del Estáu español pa garantizar los drechos de los falantes y poder trabayar con más seguranza nun futuru pal idioma ye l’estatus xurídicu de la oficialidá, como afita la Constitución Española y como demostraron los cuarenta años dende la Transición.

Por eso, agora ye’l momentu de tomar postures y ser valientes. Los asturianos y les asturianes sabrán premiar esta valentía, porque cada día son más conscientes de la importancia de que la so llingua nun acabe por morrer. Pa un partíu que tea a favor de los Drechos Humanos, namás hai una respuesta: Oficialidá, sí o sí.

Fonte: Iniciativa pol Asturianu