‘Reciella. Families pol Asturianu’ recibió’l Pegollu de los XXX Premios Andrés Solar nuna gala emotiva pol recuerdu a Andrés el de Deva y pol posu d’esperanza pal futuru del idioma que dexaron los pequeños d’esta asociación. L’actu tamién sirvió pa la presentación del videu de ‘El cantar del vasu’.
Pese a la llaceriosa situación que vive l’asturianu, “con una presencia precaria y marxinal nel sistema educativu, nos medios de comunicación y na propia alministración”, como bien espresó la
Xunta pola Defensa de la Llingua Asturiana (XDLA) nel so discursu, les persones qu’enllenaron el sábadu’l patiu del Antiguu Institutu pudieron salir de la instalación cultural con motivos pa la esperanza. Les pallabres de Catuxa, una neña de 6 años, y l’agradecimientu pol premiu de los sos pequeños compañeros de Reciella, asina como’l prestosu videu del ‘Cantar del vasu’, son amueses de que la tresmisión del idioma a les xeneraciones nueves ye posible pese a les munches torgues que se-y pon. Una vegada más, la sociedá civil, col so esfuerciu ye la que dignifica l’idioma.
Un exemplu d’esa llucha constante ye la XDLA, con 30 años de trabayu al llombu y colos Andrés Solar como referencia, gallardones que recuerden al poeta xixonés fináu n’accidente de tráficu a los 29 años. Esti añu los premios cumplíen la so trixésima edición y por ello la organización convidó pa la tradicional actuación musical a Xulio Ramos, que tocara na primer edición de los Andrés Solar, celebraos nel 1985 nun llagar de La Camocha. La so presencia ayudó a aumentar la emotividá d’un actu nel que nun faltó, como ye vezu, Lali Solar, hermana d’Andrés el de Deva, y el so maríu Jesús.
Naciu Varillas y Vanessa Gutiérrez encargáronse de presentar l’actu, mientres que Susana Fernández tuvo’l cometíu de lleer les actes de los dos gallardones, el Pegollu y el Madreñazu. El primeru, el premiu positivu que la XDLA entrega a aquelles persones o entidaes que rescamplaren pol so llabor en defensa o promoción del asturianu, recayó en Reciella pol so proyeutu “intensu d’actividaes, talleres, cursos, conciertos, xuegos, materiales… Too ello pa favorecer la tresmisión interxeneracional del asturianu nes edaes más tempranes”. Xubió a recoyer el premiu una de les neñes de l’asociación, Catuxa, acompañada de David Guardado, que s’encargó de recordar la importancia que tien l’aprendimientu del idioma nes edaes tempranes. Tamién tuvo mensaxes pa l’Alministración, a la que reclamó qu’otorgue más importancia al idioma na educación Infantil, esto ye, nel periodu de 0 a 6 años, y pa la xente presente: “falai; falai cola vuesa reciella”, dixo
Darréu, Catuxa, de 6 años, ganóse a toos con una pallabres cargaes de tenrura y de realidá. “Soi de les mayores de Reciella y principié na escuela esti añu. Nella falen dafechu n’español. Paezme mayor facelo en dambes llingües, o como na Escolina de Reciella, n’asturianu”, apuntó pa de siguío recibir los aplausos del públicu, al igual que’l restu de neños y neñes de l’asociación presentes, que xubieron al escenariu pa, con ayuda de los sos mayores, facer un mosaicu con papeles que conformaben la pallabra ‘Gracies’. Con motivu del trenta aniversariu de los Andrés Solar, la XDLA tamién decidió entregar un Pegollu honoríficu a los familiares del escritor, Lali y Jesús.
Como tamién ye vezu nestos premios, el merecedor del Madreñazu, el premiu negativu de los Andrés Solar, nun acudió a recoyer el gallardón. Nesta ocasión el duldosu honor correspondió-y a la
Confederación Católica Nacional de Padres de Familia y Padres de Alumnos (CONCAPA) , en concreto a la so representante n’Asturies, Sandra Ruiz, “qu’a lo llargo d’esti añu vien atacando sistemáticamente la presencia de la llingua asturiana nel sistema educativu, y avalando y defendiendo les práctiques de determinaos centros educativos pa burllar la llei y nun ufiertar l’asignatura”.
Un cantar prestosu
Tres esta parte del actu, diose a conocer de manera pública’l videu fechu pol coleutivu
Xuncir, formáu por un grupu de docentes de Llingua Asturiana –que tuvieron representaos en Xixón por Pablo Quiroga, Iván Huerga y Poli Mencía–, siguiendo’l camín utilizáu n'otros países como
Éire o
Euskal Herriad'aprovechar el tirón de la nomada 'Cup song' o 'Cantar del vasu' –
'When I'm gone' ye'l so títulu orixinal– que tanto presta a escolinos y escolines, y que fixo famosa l'actriz y cantante Anna Kendrick na película 'Pitch perfect'. Con esti proyeutu didáuticu pretendíase fomentar l’usu del idioma ente la xente más mozo y llamar l’atención sobre la importancia de la tresmisión xeneracional del asturianu pal futuru de la llingua. El resultáu, según se comprobó nel videu, foi un ésitu tanto pola guapura del cantar como pola dedicación de los neños y neñes, y sirvirá como ferramienta pa trabayar en clase. Como atractivu, amás, ta la collaboración de delles personaxes de sonadía, ente ellos dalgunos téunicos y futbolististes del Sporting y del Oviedo, como’l Pitu Abelardo, Nacho Cases, Juan Muñiz, Diego Cervero o Esteban.
Carlos Pulgar, voceru de la XDLA, encargóse un añu más de la llectura del
discursu de l’asocación con motivu de los Andrés Solar. Tres agradecer a los presentes y a la familia del escritor la presencia nel actu, apuntó que “si Andrés nos pidiere cuentes de lo que fuimos a facer nestos 30 años, habríemos pidi-y benevolencia al xulganos porque poner punximos, ponemos y vamos poner al serviciu de la causa de la supervivencia del asturianu tol alma, tol empeñu, trabayu y intelixencia que seamos quien... Pero sabemos que nun ye abondo, nun ta siendo abondo”. Asina, recordó que “con una presencia precaria y marxinal nel sistema educativu, nos medios de comunicación y na propia alministración la llingua ta, más ceo que tarde, condenada. A too ello, súmense les estructures demográfiques asturianes que van facer que nos encontremos, dientro de quince o venti años, con una población menguao en xeneral, y en particular na xente más mozo”. Nesi sen, fixo referencia a la llucha contra’l reló que caltién anguaño l’idioma; “contra la perda continua de xente que fala asturianu y nun estáu de coses onde la tresmisión xeneracional ta cuasi rota”.
“La llucha ciudadana esfronóse siempre contra la muria de tibieza de l'Alministración”, continuó Pulgar, “más dispuesta a gastar perres en fueos artificiales qu'en dir al megollu del problema. Dalgunes ‘perres pal bable’ –cada añu menos–, pero, por supuestu, nada de derechos llegales; nada de campañes de dignificación; nada de solucionar el problema del asturianu na enseñanza; nada d'usar la toponimia que se va oficializando; nada de facer una programación n'asturianu cuidada y planificada na radiotelevisión pública; nada de falar n'asturianu nos actos oficiales... ¿Pue entendese qu'un presidente o una conseyera de Cultura nun tean presentes nos actos institucionales que festexen l'idioma y la lliteratura propies? Equí sí; equí ye lo normal”. Tres almitir errores nel movimientu de reivindicación llingüística, el voceru de la XDLA recordó que “nosotros, como parte del pueblu asturianu tenemos la responsablidá que nos toca. Pero la responsabilidá mayor nun ye la de los que queremos cambiar esta situación inxusta y nun somos quién. Non. La responsabilidá tiénenla los partíos que gobernaron y que gobiernen. Son ellos los que nun punxeron soluciones cuando teníen y tienen los medios pa facelo”.
La reforma del estatutu col cambiu políticu que se pronostica
Darréu fixo referencia al espaciu políticu nuevu que pronostiquen les encuestes y que pue cambiar “esti panorama continuista y tristayu que lleva al asturianu a desapaecer”. Asina, afirma, que de confirmase, “hai que poner enriba la mesa la reforma estatutaria pa incluyir la oficialidá. Una fuercia política que fale d'igualdá de derechos y que nun quiera ser corresponsable de la desaparición de la llingua asturiana tien que tomar partíu. Esi ye'l puntu de partida, non el de llegada. Depués yá vendrá, ha venir, un plan de normalización y una política planificada de recuperación llingüística”. Nun val, poro, con que l'asturianu “seya un adornu politicamente correctu; una traducción al llau pa quedar bien”, calcó.
Tres recordar “les posiciones cavernícoles de la derecha”, en referencia a les votaciones recientes del PP en contra del asturianu, criticó la postura amosada pola CONCAPA con respeuto a la materia de Llingua Asturiana y Gallego-asturiano, que reflexen el “clasismu ranciu y acomplexáu d’un sector minoritariu de la sociedá asturiana pero que siempre alcuentra altavoces en dellos medios de comunicación, que non solo faen de caxa de resonancia d’estos fans del apartheid llingüísticu, sinón que mesmamente marquen les llinies qu'hai que siguir nes sos campañes sistemátiques contra la enseñanza, la toponima o cualquier cosa que-yos estropie la visión reduccionista y cosmopaleta d’Asturies”. Nel polu opuestu ta Reciella, una asociación qu’aporta “una visión coherente, autónoma y digna del fechu llingüísticu y cultural asturianu”, y que ta promovida por unes persones que, “llegáu’l momentu de la maternidá y paternidá, asumieron con compromisu y convencimientu’l llabor de tresmitir la cultura y la llingua a les xeneraciones más nueves, cola seguranza de qu’una Asturies que conoza, respete, use y valore la so llingua va ser una Asturies meyor, más abierta, más llibre y con más oportunidaes”.
Pa finar l’actu, Xulio Ramos cantó dellos poemes d’Andrés el de Deva, como él y otros munchos lu llamaben, acompañáu na guitarra por Emilio Ribera. L’artista, que se fundió mientres l’actuación nun abrazu con Lali, terminó con una torna al asturianu fecha por Solar del Poema XV de Pablo Neruda –aprovechando la música de la versión de Paco Ibáñez–, y con una composición propia dedicada a los emigrantes.
Fonte: Asturies.com
_1_e4513d.png)
