El PP d'Aragón anuncia una quexa pol emplegu del catalán nes Cortz

Cortz d'Aragón, La Alfajería: semeya obra de 'ecelan' baxo llicencia CC BY 2.5.

  Al igual qu'asocede n'Asturies, el Partido Popular (PP) nun quier que nes Cortz d'Aragón s'emplegue una llingua distinta al castellanu. El diputáu Fernando Galve, que tamién cargó contra l'aragonés, anunció esti martes una quexa énte la Mesa de les Cortz tres l'usu del catalán nuna comisión por parte d'Alfonso Clavería (Podemos).

  En concreto foi na 'Comisión de Comparecencias de les Cortes', qu'acoyía la intervención de trés representantes de la plataforma 'No hablamos catalán'. Clavería constestó a estes persones con una frase na qu'amiestaba'l catalán estándar y la variedá llocal de Fraga, cola intención d'amosar l'asemeyanza ente dambes, lo que provocó la indignación de Galve, pese a que tamién el representante de la Chunta Aragonesista saludara en catalán a los presentes o que'l de Ciudadanos, Joaquím Samsó, orixinariu del oriente d'Aragón, emplegase de manera espontánea dalguna pallabra nesa llingua.

  El popular, que sofitó los plantegamientos de la plataforma, afirmó que "n'Aragón nun falamos catalán" y protestó a la presidenta de la comisión, Itxaso Cabrera, tamién de Podemos, "por permitir falar en llingües que nun son l'español". Darréu calificó a Clavería de "maleducáu" y catalogó de "desagradable" tener que "sentir falar aragonés y catalán o nun se qué idioma" nel Parllamentu. D'igual forma, anunció una quexa énte la Mesa de les Cortz por nun tar contempláu l'usu de les llingües propies del país nel reglamentu de la Cámara.

  Esta situación recuerda a la postura amosada pol PP asturianu na Xunta Xeneral, impidiendo que s'utilizara l'idioma na Comisión d’Estudiu sobre Réxime, Proteición y Promoción del Asturianu, anque la Llei d'Usu y Promoción del Bable/Asturianu da llibertá a los diputaos pa emplegar l'asturianu y gallego-asturiano, que se sienten davezu nel Parllamentu. Sicasí, el reglamentu de la Cámara nun permite l'usu d'una llingua diferente al castellanu nes comunicaciones internes de la Xunta Xeneral.                  Fonte: asturies.com

Podemos ufre’l so programa eleutoral n’asturianu

La llingua asturiana apaez ente les opciones pa consultar el programa del partíu que tien a Sofía Castañón como cabezalera pal 20-A n’Asturies. Nél inclúi la resolución del conflictu col Gobiernu estatal polos fondos mineros adeudaos al país.

L’ampliu programa cuenta con 394 puntos, siendo’l primeru’l dedicáu al ‘Plan Nacional de Transición Enerxética’ que presenta la formación de Pablo Iglesias. Nel terrén llingüísticu destaca la qu’espresa’l ‘Derechu a una enseñanza vehiculada nes llingües cooficiales’ (139). Nesti puntuPodemos asegura que “vamos garantizar l’accesu al aprendizaxe nes llingües cooficiales en cualquier territoriu del Estáu, con centros específicos y de la promoción de los intercambios escolares ente comunidaes autónomes. Y va fomentase la identidá cultural col conocimientu de la contorna y la interculturalidá, con un currículu adaptáu a la llingua y cultura de cada territoriu del Estáu español”.

No que respeuta’l modelu territorial, apuesta por un ‘Alcuerdu pola financiación territorial’ (54) “nel marcu d’una reforma constitucional que reconoza la dimensión plurinacional del nuestru Estáu”. Nesi sen señala que “vamos entamar un procesu d’evaluación de los sistemes de financiación de les comunidaes autónomes, cola finalidá de promover un consensu sobre les reformes necesaries pa qu’ameyore la so eficacia en cuantes al cumplimientu efectivu de los principios d’autonomía, solidaridá interterritorial y llealtá institucional, nel marcu d’una Facienda federal. Vamos revisar tamién la financiación de les faciendes locales y provinciales p’asegurar la so capacidá d’atención a les necesidaes de la ciudadanía”.

Sobre el ‘Derechu a decidir’ (277) señala que “vamos abrir un ampliu debate ciudadanu sobre’l reconocimientu y les formes d’exerciciu del derechu a decidir nel marcu del debate acerca del cambiu constitucional. Vamos reconocer constitucionalmente la naturaleza plurinacional d’España, como tamién vamos asegurar el derechu de los gobiernos autonómicos a celebrar consultes a la ciudadanía sobre l’encaxe territorial del país”. Asina, caltién la so apuesta pola “convocatoria d’un referéndum con garantíes en Cataluña pa que los sos ciudadanos puedan decidir el tipu de rellación territorial que quieran afitar col restu d’España”.

Puntu concretu pa los fondos mineros

No que respeuta a los intereses asturianos, Podemos inclúi la demanda de ‘Fondos mineros pal desarrollu d’Asturies’ (350). “Vamos impulsar la resolución del conflictu ente alministraciones pol pagu de les cantidaes adeudaes de fondos mineros, y vamos aplicar estos fondos a polítiques económiques espansives que permitan destinar eses cuantíes a proyectos qu’ameyoren el fortalecimientu de les pymes asturianes, l’emplegu sostenible y los servicios públicos esenciales como la sanidá, la educación, la vivienda y los servicios sociales”, afirma’l programa, que tamién se pue consultar en castellanu, catalán, eusquera, gallegu y inglés.

Fonte: Asturies.com

La discriminación del asturianu aporta al Parllamentu Européu otra vuelta

Ferran Suay​, vicepresidente d’European Language Equality Network (ELEN)​, organización al que pertenez Iniciativa pol Asturianu​, tuvo falando de la situación de les llingües penínsulares nel Intergroup for Traditional Minorities, National Communities and Languages (Intergrupu poles minories tradicionales, comunidaes nacionales y llingües), del Parllamentu Européu.Suay esplicó la situación de discriminación de la llingua asturiana dientro d’un conceyu organizáu por esti Intergrupu esti xueves 8, recordando les situaciones de discriminación llingüística que se viven los falantes d’asturianu nel so día a día.

L’intergrupu ye un equipu formáu por diputaos de diferente partíos europeos que s’axunten pa trabayar pol futuru de les minories culturales y llingüístiques. Nesta llexislatura, una eurodiputada asturiana, Estefanía Torres, de Podemos, que tamién intervieno defendiendo la necesidá de camudar la situación de la llingua asturiana.

Fonte: Asturnews

Los asturianistes de Podemos trazen la llínia roxa

Xune Elipe amenaza con dexar la formación si nun se propón la oficialidá Como yá venía sintíendose dende hai selmanes, los representantes del movimientu asturianista llingüísticu integraos nel proyeutu de Podemos Asturies tuvieron de dar estes vacaciones de Selmana Santa un pasu alantre y dexar bien afitao que nun van permitir un programa eleutoral nel que nun tea la OFICIALIDÁ con toles lletres y ensin lletra pequeña. Xune Elipe yá dexara nidia la so posición hai tiempu d'abandonar la formación llegáu'l casu y vieno acabante de afitalo otra vuelta. Nuna información asoleyada esta selmana vacacional l'Axencia Europa Press falaba na so web de "distintes postures ante la reivindicación histórica de la declaración d'oficialidá de la llingua asturiana", principalmente estremaes "ente los que prefieren someter esti puntu a votación ciudadana, como'l restu del so programa eleutoral, o bien los que consideren que se debe asumir como un drechu básicu". Y recoyía declaraciones de dalgunos de los más nomaos militantes de podemos que son asturianistes nomaos y reconocíos ensin dubies al respeutive de la oficialidá como Xune Elipe, cantante de Dixebra, y Pablo Antón Marín Estrada, ún de los meyores escritores de nueso y candidatu nel conceyu Xixón. Xune Elipe ya deciera formar parte del equipu de Somos Asturies y de la llista eleutoral de Podemos Avilés coles condiciones de que Podemos Asturies nun fuera una delegación madrilana y que nun se discutiera la reconocencia oficial de la llingua asturiana ensin ambigüedaes de dengún tipu nel programa eleutoral. Xustamente lo qu'agora dalgunos candidatos de Podemos tán entamando a plantegar cola fin d'apartar la oficialidá del programa o dexalo arrequexao como una propuesta a debatir. Queda perpocu tiempu pa pesllar el programa y la non inclusión de la oficialidá podría pasar muncha factura a Podemos Asturies, que tien nel asturianismu una bona parte de la escasa cadarma organizativa cola que cunta. Fonte: Asturnews

Estefanía Torres de Podemos xura como Eurodiputada en llingua asturiana nun xestu significativu

Xunta Daniel Ripa ya Iglesias La nueva eurodiputada de Podemos, l'asturiana Estefanía Torres, va xurar güei n'asturianu'l so cargu pa sustituyir na Eurocámara al dirixente de Podemos Pablo Echenique, qu'arrenunció al escañu pa ser cabeza de llista nes eleiciones autonómiques del próximu 24 de mayu n'Aragón. El xestu yera bien acoyidu ayeri nes redes sociales onde l'asturianismu sigue desixendo un pronunciamientu sobro la oficialidá. Según informó la formación política que llidera Pablo Iglesias, col que va compartir escañu en Bruxeles, pidió tar na Comisión d'Agricultura y Desenvolvimientu Rural y tamién na de Mediu Ambiente, Salú Pública y Seguridá Alimentaria. Coles mesmes, tamién va formar parte d'un intergrupo parllamentariu de Minoríes Llingüístiques «pa da-y voz a otra minoría escaecida como ye la llingua asturiana». Estefanía Torres, que se va convertir asina al pie de Tania González na segunda eurodiputada asturiana de Podemos, comprometióse a cobrar el salariu mínimu belga, 1.502 euros al mes. Estefanía Torres La eurodiputada, politóloga y venceyada a Somos Asturies, aseguró ayeri que va tar nel Parllamentu «al serviciu de los de baxo, de les invisibles y los desanunciaos», y qu'espera contribuyir col so trabayu «a devolve-y el so poder llexítimu a los nuesos pueblos». Fonte: Asturnews

El 56 por cientu de los llectores d’Asturies.com cree que la oficialidá de la llingua asturiana nun va ser una prioridá pa Podemos

Vidas públicas vidas privadas na TPA:  Daniel Ripa (Podemos-Asturies) refuga dar una respuesta a la entruga de Justo Braga "¿Tú crees na oficialidá del asturianu?"

   L’ambigüedá de Podemos Asturies con respeuto a la oficialidá del asturianu y gallego-asturiano lleva al 56 por cientu de los nuesos usuarios a concluyir que nun ye una prioridá pa la formación. El so secretariu xeneral, Daniel Ripa, evitó otra vuelta posicionase sobre esta cuestión nuna entrevista de Justo Braga nel programa ‘Vidas públicas, vidas privadas’ de TPA.

   Nel nuesu ‘Conceyu Abiertu’ plantegamos a los nuesos llectores la so opinión sobre la postura que caltendrá Podemos sobre la oficialidá, resultando mayoritaria la desconfianza al respeuto. Asina, un 56 por cientu considera que nun va ser una prioridá pa la formación, por un 23 por cientu qu’opina que Podemos va apostar por esti estatus xurídicu pal idioma. Mentes, un 20 por cientu asegura tener duldes nesta cuestión.

   Pese a la presencia de destacaos asturianistes nel Conseyu Ciudadanu y dientro de la organización, y la esistencia d’un círculu de Derechos Llingüísiticos, lo cierto ye que Podemos entovía nun amosó un posicionamientu nidiu no que respeuta a la tan demandada oficialidá. Esta madrugada, Ripa evitó dar una respuesta concreta a Justo Braga en ‘Vidas públicas, vidas privadas’ –minutu 41 del videu– a una entruga sobre la oficialidá, pa depués insistir el periodista con ‘¿Tu crees na oficialidá del asturianu?’. “Yo creo na igualdá de derechos y los espertos tendrán de dicir cualá ye la forma de garantizar la igualdá de derechos y la pervivencia de la llingua, que ye lo importante. Si perdemos la llingua perdemos un patrimoniu social, humanu, cultural y inclusive económicu”, afirmó’l secretariu xeneral de Podemos Asturies darréu.

   Dende esti momentu yá ye posible votar nun ‘Conceyu Abiertu’ nuevu. Al igual qu’hai casi un añu coles Europees, nesta ocasión queremos saber con qu’ilusión afronten los nuesos llectores les eleiciones nacionales del 24 de mayu.                                                                                                  Fonte: Asturies.com

N'Ast pide respetu a Podemos pa colos drechos llingüísticos

Dende l’Asociación Cultural N’Ast vienen acabante de facer públicu’l so esmolecimientu nesti llunes poles declaraciones que, selmana tres selmana, vienen faciendo los cabezaleros de Podemos al rodiu la llingua asturiana. Y ye que, na so opinión, "determinaes postures públiques déxenmos plasmaos, más cuando vienen d’una formación política que, supuestamente, lleva naguando dende’l so aniciu por un cambiu sociopolíticu basáu, ente otres coses, nel fondu respetu a los drechos fundamentales de los y les ciudadanes, ente los que s’alcuentren, necesariamente, los sos drechos llingüísticos". Asina, en n'Ast dicen ver "qu’estes postures van dende’l más absolutu de los escaezos (nel pasáu “Manifestamientu pol Cambiu” del 31 de xineru en Madrid los cabezaleros de Podemos saludaren a los presentes en toles llingües del Estáu menos n’asturianu) al más absolutu de los desprecios (camentando que les llingües del Estáu, ente elles l’asturianu, son un factor qu’atenta escontra la xunidá d’España, sigún afitó Mª Eugenia Suárez, Secretaria Xeneral de Podemos en Gozón) pasando por una visión puramente folclorista más propia d’otres dómines, poniendo al asturianu como dalgo que-y presta ver a los turistes que vienen equí, “como la gaita” (que ye la que nel so intre amosó Daniel Ripa, candidatu de la corriente Somos Asturies a la Secretaría Xeneral de Podemos n’Asturies)". Mesmamente, nuna entrevista concedía a un diariu asturianu nel día d’ayeri, Tania González –eurodiputada asturiana y, por tanto, cargu públicu de Podemos– afitó, entrugada pola postura d’esta formación política énte la llingua asturiana, que na organización “nun hai una postura oficial, pero ye fundamental abrir l’alderique ente la ciudadanía asturiano, lo que nunca nun se fexo, pa saber lo que realmente pensamos los asturianos”. Declaraciones que dexen ablucaos a los componentes de N'Ast, "nun sólo porque a estes altures en Podemos tovía nun heba una postura oficial, sinón pol nivel de les mesmes: en cuestión de drechos fundamentales, nun hai nengún alderique qu’abrir. Énte esti panorama, dende N’Ast quieren recorda-y a Podemos "que’l drechu a emplegar la llingua propia ye un drechu reconocíu internacionalmente y que’l primer pasu pa esa reconocencia pasa necesariamente, nel casu del asturianu, pola so declaración como llingua oficial. Y daes les posibilidaes que-y apurren les encuestes a Podemos d’entrar na Xunta Xeneral con unos cuantos diputaos, quiciaes nun futuru prósimu esta declaración dependa de la so postura, polo que dende N’Ast queremos pidí-y a Podemos nun sólo que s’aclare col asuntu, sinón qu’apueste nidiamente polos drechos llingüísticos de los y les asturianes, pola OFICIALIDÁ DE LA LLINGUA ASTURIANA. Porque ensin oficialidá, nun va haber cambiu que valga". Fonte: Asturnews