Nos años ochenta y primeros noventa, aquellos que queríen atacar al asturianu negaben la so esistencia. El trabayu contináu del que ye’l movimientu social más importante del periodu democráticu n’Asturies, el movimientu de reivindicación llingüística, consiguió que güei, nin siquiera los máximos enemigos de que la llingua asturiana tenga futuru, puedan negar la so esistencia ensin cayer nel ridículu. La sociedá asumió con normalidá la so propia realidá llingüística de forma mayoritaria. La ciencia ganó sobre los prexuicios llingüísticos y l’argumentariu falsu creáu polos enemigos de la diversidá llingüística.
Una vegada asumida esta esistencia y nun pudiendo negala, l’argumentu camudó y lo que se niega agora ye la esistencia d’un conflictu llingüísticu, la esistencia d’una falta de drechos pa una parte de la ciudadanía. Esti mesmu mes y como ye vezu cada comienzu del cursu, son dellos los neños y neñes a los que, contra lo que diz la llei, se-yos niega la posibilidá de recibir clases d’asturianu nes escueles ya institutos d’Asturies.
Faigamos un poco d’hestoria. Dende 1998 y cola aprobación de la Llei d’Usu del Asturianu, ufiertar Llingua Asturiana nos centros ye obligatorio, en tolos centros, públicos, concertaos o privaos, y en tolos niveles, de Primaria a Bachilleratu. Los gobiernos del PSOE trataron de torgar esti drechu imponiendo la política de la “ratio mínimu”, cola que si nun había un mínimu d’ocho alumnos matriculaos nun se poníen clases d’asturianu nel cursu. Una forma bien cenciella de negar l’asignatura, pues munchos centros mentíen sobre’l númberu de matriculaos. Una política que foi derogada pol Tribunal Superior de Xusticia d’Asturies y el Tribuna Supremu d’España en sentencia de 2012.
Agora, y tienen que sabelo toles families asturianes, un alumnu o alumna que pida recibir clases d’asturianu (o gallego-asturianu na so zona) tien drechu a recibiles, anque namás se matriculara él o ella. Sicasí, les trampes siguen, y esti setiembre vemos como hai centros, públicos y concertaos, que siguen negando a les families que los sos fíos y fíes puedan estudiar la llingua de les sos cases.
A estos casos, súmase otru d’una empresa cooperativa a la que se-y negó estos díes la posibilidá de presentar los sos estatutos n’asturianu. El conflictu llingüísticu esiste, ta presente y vivímoslu cada día les persones que facemos vida falando n’asturianu en tolos ámbitos. Y lo más chocante ye que los problemes nun vienen de la xente, nin siquiera de los que nun falen asturianu, que reciben mui bien que se-yos fale nel nuesu idioma, porque toos y toes n’Asturies entendemos asturianu, sinón de les alministraciones públiques, les que tán obligaes por llei a salvaguardar los nuesos drechos llingüísticos, pola Constitución, pol Estatutu d’Autonomía, pola Carta Europea de les Llingües Minoritaries…
Munchos casos nun salen a la lluz pola falta d’autoestima de los falantes d’asturianu, pola falta de conciencia reivindicativa, pol desconocimientu de los sos drechos, pol mieu a que los señalen, y tenemos qu’insistir na necesidá de facelos públicos, la necesidá de visibilizar el conflictu llingüísticu n’Asturies, pa que los enemigos de la supervivencia del asturianu nun puedan siguir usando esi argumentu. Porque va pocos meses les Naciones Xuníes recibía a Iniciativa pol Asturianu en Xinebra pa entruganos sobre la situación de los Drechos Humanos n’Asturies, y una de les sos esmoliciones ye la situación que vivimos los asturfalantes nesti territoriu. ¿Tendrán que venir sanciones de fuera pa que’l Gobiernu d’Asturies se decate de qu’esta situación ye una inxusticia?
Fonte: Asturias24
