Vuelve Escenines con teatru y música n'asturianu nes vacaciones escolares

Teatru y música n'asturianu pa los neños y neñes nes vacaciones de navidá

  Reciella fixo públicu güei el cartel del Festival de teatru y artes escéniques n'asturianu pa neñes y neños que se fai en Xixón algamando la so tercer edición

  Dende l'asociación de families pol asturianu preténdese "celebrar esta tercer edición con un programa bien completu, teniendo la suerte de cuntar con dalgunes de les meyores compañíes de teatru profesional asturianes y abriendo'l festival con un discu que toles families van querer tener".

  Nos próximos díes Reciella dirá dando detalles de los espectáculos, que van entamar el 27 d'avientu con un conciertu nel que van participar una dellos grupos cantando temes infantiles n'asturianu y acabar el 4 de xineru.

  Les compañíes teatrales que van participar nesta edición  son Higiénico Papel Teatro, "Carlos Alba Cellero" y El Callejón del Gato y toles actividaes van facese nel Colexu Xovellanos de Xixón, que collabora na organización xunto cola Conceyalía de Cultura del Conceyu de Xixón.                                                                                       Fonte: asturies.com

"Menudu Traxín” averará’l baille y el traxe tradicional asturianu a lo más pequeño de la casa esti xueves

L'actividá entamada por Vezos y Reciella celebrase nel colexu Xovellanos de Xixón el día 2 Redacción Esti xueves 2 d'abril, Xixón acoyerá “Menudu Traxín”, una actividá qu'averará’l baille y el traxe tradicional asturianu a lo más pequeño de la casa, entamada por Vezos Astures y Reciella. L'actividá ye gratuita y va facese nel patiu del Colexu Xovellanos de Xixón. Esti día del traxe y el baille tradicional pa neños y neñes ye una iniciativa con vocación de continuidá añal. La so primer edición va celebrase esti xueves 2 d'abril nel patiu del Colexu Xovellanos de Xixón (entrada pela cai Begoña) dende les 10.30 hasta les 14.00 hores. Toles neñes y neños - y les sos families- tán convidaos a venir; col traxe o ensin él, sepan o nun sepan baillar y falen o nun falen asturianu. Va haber talleres, xuegos, y actividaes pa deprender a baillar y pa conocer el traxe del país, too ello col oxetivu de pasar una xornada prestosa na que la reciella que tea familiarizao col baille y el traxe atope un entornu afayadizu pa rellacionase con xente de la so edá, y pa que lo que nun lo tea pueda averase y aficionase de forma lúdica a la nuestra tradición. Y amás col asturianu como llingua vehicular de les actividaes. Tolos neños y neñes tienen que dir acompañaes d'una persona adulta. La entrada ye llibre y toles actividaes son gratuites y cuenten cola collaboración del Colexu Públicu Xovellanos y la Oficina de Normalización Llingüística de Xixón. PROGRAMA 10.30 h. ENTAMU: xuegos tradicionales, photocall, talleres de colorear 12.00 h. TALLER DE BAILLE: Páxara Pinta, Capuchinos, Cachetíus y Danza del Pumba. 13.00 h. PASACAIS Fonte: Asturnews

El festival d’artes escéniques ‘Escenines pa la Reciella’ ufre cuatro espectáculos esta Navidá

Cartelu de II Escenines pa la Reciella, nel Colexu Públicu Xovellanos de Xixón

    El II ‘Escenines pa la Reciella’ principia esti llunes col cuentacuentos ‘Coses de neños’ que protagoniza Olga Cuervo. Ésta va ser la primer de les cuatro sesiones que ‘Reciella. Families pol Asturianu’ entama estes Navidaes nel salón d’actos del xixonés Colexu Públicu Xovellanos.

   Toles actividaes van desendolcase a les 19 hores y pretenden ser una amuesa de los espectáculos infantiles más destacaos que se tán faciendo anguaño n’Asturies na nuesa llingua: dos cuentacuentos, un teatru de solombres acompañáu de música y una obra de teatru en forma monólogu. Nel primeru, el d’esta tarde, los neños y neñes van poder disfrutar de los cuentos más populares de Cuervo, mentes que’l vienres el turnu va ser pa El Turnebís del Tribilín y la so obra de teatru de solombres ‘El cuélebre de San Llorienzo y otres histories’. El ciclu va continuar el martes 30, colos ‘Ecolocuentos’ de Carlos Alba ‘Cellero’, pa depués poner el ramu’l vienres 2 de xineru col espectáculu ‘Árbol’ de la Compañía Higiénico Papel.

   Reciella, premiada recién col Pegollu de los XXX Premios Andrés Solar pola so llabor escelente p’afitar la tresmisión xeneracional del asturianu, pretende con esta iniciativa que “los neños asturfalantes, asina como los que tienen interés y curiosidá por aprender l'idioma, tengan la oportunidá d'asistir a actividaes qu'utilicen la llingua asturiana con normalidá fuera del ámbitu escolar”. Asina, ufren estes cuatro sesiones que destaquen pol rexistru llingüísticu seriu y correutu de tolos artistes y compañíes, dalgo mui importante nel procesu de formación de los neños y neñes. ‘Escenines pa la Reciella’ cuenta col sofitu económicu del Conceyu de Xixón y de Caxa Rural. Fonte: asturies.com