Una campaña va promocionar la lliteratura n'asturianu nos comercios de Xixón

Trátense d’obres escrites por muyeres.

La conceyala d’Educación y Cultura, Ana Montserrat López Moro, y Camen Moreno, representante de la Unión de Comerciantes del Principado de Asturias, encargáronse d’informar el martes nel Centru de Cultura Antiguu Institutu del alcuerdu sobre la campaña de nome ‘Nel comerciu asturianu yes bienveníu/bienvenida y la lliteratura tamién’, actu nel que tamién estuvo presente María Xosé Rodríguez López, responsable de la Oficina de Normalización Llingüística. La primer de les aiciones previstes ye la esposición nos escaparates de 40 comercios de la ciudá d’una amuesa d’obres n’asturianu escrites por muyeres, coincidiendo cola celebración de la XXXVIII Selmana de les Lletres Asturianes baxo’l lema ‘Lletres, femenín plural’.

D’igual forma, van decorase los escaparates con una bolsa de compra cola frase ‘Llámalo pol nome, ye lo normal’. Esta campaña, que dio aniciu y va allargase hasta’l día 10, mentes que’l vienres los veceros y veceres que merquen dalgo nestos comercios van recibir de baldre un llibru en llingua asturiana, asina como una guía de llectura con testos d’escritores xixoneses.

Fonte: Asturies.com

Madrid acoyó'l Día de les Lletres nel Esterior

 La xornada d'ayeri abrió de manera oficial la XXXVIII Selmana de les Lletres Asturianes.

 El Centro Asturiano de Madrid foi la sede del Día de les Lletres nel Esterior, que va cuntó con delles actividaes  qu'empezó a les 20 hores, destacando la presentación del llibru editáu pola Conseyería d'Educación y Cultura con motivu de la gran fiesta de la nuesa lliteratura, de nome 'Escritores asturianes. Antoloxía de testos n'asturianu y gallego-asturiano'. Les autores Lurdes Álvarez, Sofía Castañón y Sabela Fernández participaron darréu nun alderique sobre esta espublización.

 Una actuación musical d'Anabel Santiago y la representación del sainete 'Llíu', de José Ram,n Oliva, a cargu del grupu de teatru Señaldá, completaron les actividaes d'esta xornada que tien l'oxetivu  d'homenaxar xunto cola emigración les nueses lletres. L'añu pasáu esta celebración entamóse en Buenos Aires.                                                     Fonte: asturies.com

‘Lletres, femenín plural’, llema de la XXXVIII Selmana de les Lletres Asturianes

• por Pablo R. Guardado

Del 27 d’abril al 9 de mayu van desendolcase les actividaes de la XXXVIII Selmana de les Lletres Asturianes, qu’esti añu lleva’l llema ‘Lletres, femenín plural’. Como novedá, van entamase visites guiaes n’asturianu a los centros históricos de Xixón y Uviéu.

Les autores en llingua asturiana y gallego-asturiano protagonicen esta edición de la Selmana de les Lletres Asturianes y la Conseyería d’Educación y Cultura dedica-yos numberoses actividaes. D’igual forma edita’l llibru ‘Escritores asturianes. Antoloxía de testos n’asturianu y gallego-asturiano’, que va presentase’l xueves 27 d’abril en Madrid, ciudá qu’acueye esti añu’l Día de les Lletres nel Esterior tomando’l relevu de Buenos Aires. Va ser na sede Centro Asturiano a les 20 hores.

N’Asturies, los actos van principiar el llunes 2 de mayu, a les 10 hores, coles visites escolares guiaes a la Xunta Xeneral, a les qu’esti añu van sumase rutes pelos cascos históricos de Xixón y Uviéu, tamién p’adultos. Nel casu de Cimavilla va ser el mesmu llunes, de 19.30 a 21 hores, mentes que’l percorríu pela capital del país va desendolcase’l martes.

Les persones interesaes en participar en cualesquier de les dos cites han d’acutar plaza nel teléfonu 985.10.67.41 o nel corréu lletrónicu splnormalizacion@asturias.org, yá qu’hai un tope máximu de visitantes.

‘Muyeres y lletres’

Ún de los actos centrales de la Selmana de les Lletres Asturianes va ser l’actividá ‘Muyeres y lletres’, un homenaxe a les escritores asturianes que va celebrase tamién el llunes, de magar les 19.30 hores, na Sala de Cámara del Auditoriu d’Uviéu. Ésta va consistir nuna llectura dramatizada de testos escritos por muyeres, cola participación de los actores Carla Loga y Ernesto González, que van tar acompañaos al pianu por Amparo Antuña, y un conciertu d’Anabel Santiago.

El xueves va inaugurase n’Avilés la V Feria del Llibru y Discu n’Asturianu, y el vienres va celebrase’l Día de les Lletres Asturianes, con actos escolares pela mañana. Otra manera, la Xunta pola Defensa de la Llingua Asturiana va entamar nesta xornada, un añu más, la manifestación ‘L’asturianu, llingua oficial’, con salida de la Estación del Norte (Renfe) d’Uviéu a les 19.30 hores y final nel Teatru Campoamor, onde l’Academia de la Llingua Asturiana celebra’l so actu académicu.

Al igual que l’añu pasáu, la conseyería va allargar esta selmana dedicada a la nuesa lliteratura hasta’l martes con espectáculos musicales, teatrales, de danza o’l segundu concrusu de microrrellatos improvisaos ‘Entaína a escribir’.

Fonte: Asturies.com