Agua y fueu na Nueche (xixonesa) de San Xuan

Foguera de San Xuan na sablera de Poniente

 Llega la nueche más máxica del añu. Ésta ye una fecha enforma especial pa celebrar el solsticiu de branu y que destaca pola quema de fogueres y l'enramáu de fontes. 

 La foguera más multitudinaria que veremos en Xixón ye la qu’entama’l Conceyu na sablera d’El Natahoyo,

 L'aniciu de la celebración va ser con musica y baile del país na Plaza d'Italia a partir de les 20h. cola Agrupación Folclórica Los Xustos, pa entamar a les 21 hores col enramáu de la fonte de Pelayo por parte d’Andecha de Cultura Tradiciona Na Señardá y va siguir nel escenariu de la sablera coles actuaciones de la Banda Gaites Noega (22.45 hores) y la Banda Gaites Villa de Xixón (23.15 hores).

 A la medianueche, prendíu de la foguera, y dempués va tener llugar la danza prima y el llanzamientu de fueos artificiales. La celebración finará cola actuación del grupu Blus Probes.

 Otros barrios de la ciudá, como Ciares, Mareo, Cimavilla o La Calzada en L’Arbeyal, tamién celebren esta nueche máxica nun ambiente más vecinal.

 Esta ye una de les celebraciones más importantes nel calendariu festivu y el solsticiu de branu va tamién a festexase con fogueres en dellos barrios y parroquies del conceyu como Contrueces, Ciares, Viesques, Tremañes, Mareo, La Calzada, La Camocha y Cimavilla. Ye importante destacar les fiestes en Mareo, que van durar tol fin de selmana, con actividaes deportives, festives y conciertos.

 Una nueche máxica onde va poder atopase la flor d’agua, que sal per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes, como diz el refrán  'El día de San Xuan, salen les xanes a baillar'
                                                                                                                     Fonte: yexixon.com

El Conceyu de Xixón presenta a Springsteen como candidatu al Princesa de les Artes

Na imaxe d'arquivu, Bruce Springsteen

 Carmen Moriyón considera que la so rellación cola ciudá nun ye superficial, yá que "tocó n'El Molinón trés veces nes dos últimes décades".

 Pal consistoriu xixones Bruce Springsteen tien méritos abondos pa ser merecedor del Premiu Princesa d'Asturies de les Artes por representar ún de los mitos vivientes más importantes de la escena musical mundial. Amás, a los sos 67 años, "naide na escena musical algamó'l cumal d'esta manera con humildá, enfotu y determinación falando nes sos lletres problemes de fondu conteníu social como la emigración, el desemplegu o la probeza con un calter altamente comprometíu, solidariu y popular".

 L'alcaldesa Moriyón ye patrona de la Fundación Princesa d'Asturies  en representación del Conceyu de Xixón. Poro, ta autorizada a poder presentar candidatures a les categoríes nes que nun tea como xuráu.                                                                              Fonte: yexixon.com

Iniciativa pol Asturianu denuncia que’l procesu participativu del presupuestu de Xixón nun ufre la documentación n’asturianu

   Un ciudadanu denunció esti xueves nel Centru Municipal de L’Arena, en Xixón, la falta de la documentación precisa pa participar nel procesu de presupuestu participativu abiertu pol Conceyu de Xixón.

  Darréu d’esta denuncia, Iniciativa pol Asturianu vieno acabante denunciar esta situación que supón una novedá nel enfotu que davezu amosaba’l Conceyu de Xixón na normalización llingüística.                                                                      Fonte: asturnews.com

XsP entruga pol Plan de Normalización del Asturianu de Xixón

XsP entrugará esti llunes pela mañana na Comisión de Cultura del Ayuntamientu de Xixón pol Plan de Normalización del Asturianu, que tien d’entrar en vigor esti mes de xineru.

Esti mes de xineru yera’l momentu nel que tenía d’echar a andar el Plan de Normalización del Asturianu, sigún se comprometió l’equipu de Gobiernu esti branu, tres aceptar el ruegu de Xixón Sí Puede (XsP) nel que se propunxo esta midida p’atayar el retrocesu na normalización del asturianu nel conceyu.

Pero, una y bones, el mes de xineru ta nos sos últimos díes sin que se vean posibilidaes de cumplir pa col plazu prometíu y Mario Suárez del Fueyo, portavoz de XsP, va entrugar na Comisión de Cultura d’esti llunes si yá esiste’l mentáu Plan de Normalización. XsP tien constancia de que’l Conseyu Asesor de la Llingua aconceyó’l mes de payares pasáu, como pasu previu pa la puesta en marcha del Plan, polo qu’agora tocaría principiar a aplicar esti documentu.

En casu de que’l Plan tea efectivamente ellaboráu, Del Fueyo va pidir al Gobiernu qu’informe sobre cuándo se va a presentar. De nun tar fechu entá, XsP quier saber los plazos nos que se cuenta aprobar, presentar y executar. Al empar, el grupu municipal mantién qu’han facese públiques les midíes concretes que se van tomar pa facer el siguimientu de temporalización y execución del Plan.

La iniciativa de XsP tien por oxetivu “agotar toles posibilidaes” de la Llei d’Usu y Promoción del Asturianu, “da-y vida a la llingua” y que l’Alministración apurra los medios pa que la ciudadanía pueda facer usu del asturianu. Asina lo expunso Mario Suárez del Fueyo nel momentu de presentación del Plan, cuando esplicó qu’una de les primeres acciones había ser la “visibilización” del asturianu p’asina afalar a la ciudadanía al so usu. Esta visibilización tien de facese dende l’Alministración pente la publicidá institucional, asina como nos medios de comunicación y en xeneral en tolos ámbitos nos que l’Ayuntamientu tenga presencia, tanto como organizador d’eventos como cuando dea subvenciones y apoyos a tou tipu d’iniciatives.

Esti Plan, amás, ha de contemplar midíes p’afalar al usu de la toponimia oficial, l’estímulu d’actitúes positives pa col usu del asturianu n’ámbitos empresariales, deportivos, sindicales, culturales y artísticos. Esto ha dir de la mano de la promoción de productos culturales n’asturianu, la so promoción nes escueles d’Educación Infantil y la dotación de personal y recursos pa la Oficina de Normalización Llingüística.

Fonte: Asturnews

Xixón enllena les aules de superheroínes

L'actividá “El cómic n’asturianu”, organizada pola Oficina de Normalización Llingüística de Xixón na que van participar al rodiu de 260 neños y neñes de 9 colexos entamó recién enllenando les aules de superheroínes.

“El cómic n’asturianu” ye uná actividá nueva qu’entama nesti cursu escolar 2015-2016 dientro del Programa d’Espardimientu y Normalización de La Llingua Asturianana qu’organicen dende la Oficina. El dibuxante Ruma Barbero va falar a los los escolinos y escolines de cómics asoleyaos n’asturianu, de dibuxantes renomaos y pa rematar fadrá desplicaciones sobre como ye’l procesu de facer un cómic.

Fonte: asturnews

IX reclama más compromisu cola llingua

Proponen actualizar la ordenanza municipal que regula l'usu del asturianu nel conceyu y reforzar la Oficina Municipal de la Llingua

La concejala Ana Castañu, d'IX

   La concejala Ana Castañu, d'IX, va defender nel Plenu del próximu xueves una iniciativa del so grupu na que se pide un mayor compromisu municipal cola defensa y promoción de la llingua asturiana. La propuesta d'alcuerdu contempla tres puntos.

    El primeru plantega que'l Conceyu encamiente al Gobiernu rexonal «a regular un estatutu de llingua oficial pa la llingua asturiana». Nel segundu pídese empecipiar la revisión de la ordenanza municipal que regula l'usu de la llingua nel conceyu, según el plan de normalización, que les sos midíes pide aplicar «de manera efectiva» col enfotu de que «l'asturianu tea presente en toles esferes de l'actividá municipal».

   Nel terceru numbérense una serie d'iniciatives qu'IX considera necesariu adoptar «de forma urxente», ente elles la asignación de personal abondo pa la Oficina Municipal de la Llingua y l'ufierta de cursos de cualificación pal personal municipal, que tengan validez como méritos puntuables pal accesu a puestos de trabayu nos qu'haya una relación directa cola ciudadanía. IX reclama amás «una coordinación efectiva» ente les conceyalíes nos programes que tengan relación col asturianu.
Fonte: El Comercio.es

Rubiera desea que’l VIII Premiu Fierro Botas “sía otra vez un ésitu de participación y de resultáu”

Na semeya,  Verónica  Rodríguez Fernández,  Carlos  Rubiera  y  Xosé Nel Riesgo

   El Conceyu de Xixón convocó’l VIII Premiu d’Ensayu y Trabayos d’Investigación Fierro Botas, concursu que l'edil Carlos Rubiera espera que sía “otra vez un ésitu de participación y de resultáu pola calidá de los trabayos”. El ganador de la sétima edición foi Martín Pérez Álvarez con ‘Curandeiros, compostores y outros sanadores’.

   El conceyal d’Educación, Cultura, Xuventú y Fiestes presentó per vegada cabera esti gallardón –hai tiempu qu’anunció que nun continuaría como edil– acompañáu por Xosé Nel Riesgo, direutor de la Fundación Municipal de Cultura, Educación y Universidá Popular, y Verónica Rodríguez Fernández, responsable de la Oficina de Normalización Llingüística, “que representen la continuidá de la institución y la garantía de la celebración d’esta edición del Premiu Fierro Botas”. Esti gallardón entámase n’alcordanza del xesuita Federico González-Fierro Botas, espertu en llingua asturiana que finó n’accidente de tráficu en Rusia nel 2002, y reconoz el llabor de los investigadores asturianos na llingua del país.

   “Ye un premiu que va acumulando a lo llargo d’estes ediciones trabayos e investigaciones mui interesantes que van dexando un corpus d’investigación nel nuesu idioma, en dalgunos casos yá de referencia”, apuntó Rubiera, poniendo como exemplu l’ensayu d’Inaciu Hevia Llavona sobre la botella de sidra de Xixón. Pa participar nél ha de presentase un estudiu d’investigación en llingua asturiana o gallego-asturiano sobre la cultura rusa o eslava, la memoria social y coleutiva de los pueblos rusu y asturianu, o la memoria social y coleutiva de Xixón. La recompensa pal ganador ye de 3.000 euros y la espublización del so trabayu.

Rubiera recordó que los trabayos han de ser orixinales y inéditos, y apuntó que’l plazu pa entregalos –per triplicáu en cualesquier de los Rexistros del Conceyu de Xixón– fina’l 9 d’ochobre. El fallu del premiu conoceráse’l 27 de payares, coincidiendo cola estancia na ciudá del sobrín de González-Fierro Botas, Jaime González Fierro-Botas. L’edil tamién quixo na so intervención emponderar la figura del xesuita, del que destacó la so calidá como persona y “la so formación amplísima”, amás del so compromisu pa cola llingua asturiana y l’estudiu de la llingua rusa y la lliteratura soviética.

Presentación nel IV Festival Arcu Atlánticu

   El testu ganador del VII Premiu d’Ensayu y Trabayos d’Investigación Fierro Botas, de nome ‘Curandeiros, compostores y outros sanadores’, firmáu pol enfermeru y fisioterapeuta Pérez Álvarez, yá ta n’imprenta y va presentase nel trescursu del IV Festival Arcu Atlánticu, qu’esti añu va celebrase del 24 de xunetu al 2 d’agostu, según confirmó Rubiera. L’ensayu, escritu en gallego-asturiano, afonda na medicina tradicional tres la realización d’un importante trabayu de campu y recoyida de tradición oral.                                                                                                  Fonte: asturies.com

Adxuntu	Tamañu
Bases del VIII Premiu Fierro Botas.pdf	53.71 KB

Melero: "El billingüismu trai ventayes a los neños a la hora de poder falar una tercer o cuarta llingua"

      El Conceyu de Xixón y Reciella presentaron de forma oficial el cartafueyu sobre "Les ventayes del billingüismu n’Asturies". Vítor Xuan Melero, representante del coleutivu, esplicó los beneficios que trai a críos y críes falar asturianu y castellanu.

 

Na semeya, Sáez Hernández,  Xosé Nel Riesgo y Vítor Xuan Melero

    L'actu, que tuvo llugar na sala de conferencies del Centru de Cultura Antiguu Institutu, contó tamién cola participación de Xosé Nel Riesgo, direutor de la Fundación Municipal de Cultura, Educación y Universidá Popular, y de Xuan Nel Sáez Hernández, responsable dende’l 1 de febreru de la Oficina de Normalización Llingüística, que s’encargó d’esplicar los detalles de la campaña. Ésta consta de dos fases, siendo la primera’l repartu del cartafueyu ‘Les ventayes del billingüismu n’Asturies. Fála-yos. La llingua materna nel contestu global’ ente los padres de los neños y neñes de 0 a 3 años de les escueles infantiles del conceyu. “Cuanto más pequeños, son más capaces a asimilar meyor la diversidá llingüística que ye la que se pretende fomentar y protexer”, apuntó.

    Nesta primer fase, que coordina Josefina Merediz, responsable del Conceyu de les Escueles Infantiles de 0 a 3 años, pretende sensibilizar a les families y el personal de los centros sobre esti asuntu tomando como base’l cartafueyu ellaboráu por ‘Reciella. Families pol Asturianu’. “La idea ye facelo d’una manera didáutica, prestosa, amena… Que los guaḥes y les guaḥes puedan sentise enganchaos col tema del asturianu”, pa lo que van contar col trabayu de Carlos Alba ‘Cellero’. “La siguiente fase’l tiempu dirá”, pero l’oxetivu sería afitar lo que va trabayase no que queda de cursu.

    Melero, pela so parte, centró la so intervención nel conteníu del cartafueyu, destacando que “el billingüismu trai ventayes a la hora de poder falar una tercer o cuarta llingua”. “Les families que vienen xuntándose dientro de l’asociación Reciella suelen tener nenos d’ente 0 y 6 años. Nun ye una obligación, pero ye dalgo que dende dientro vemos que se debe a dos motivos: la importancia que tienen esos primeros años de cara a algamar el billingüismu y el vacíu llegal que se presenta al nun tar la llingua asturianu dientro del currículu d’Educación Infantil. Son les dos razones polo que ye perimportante nestos primeros años el trabayu colos nenos y los nenes”, añadió’l representante del coleutivu, que trabaya al traviés del entamu d’actividaes, de materiales y de convenios con otres asociaciones y alministraciones.

    ‘Les ventayes del billingüismu n’Asturies. Fála-yos. La llingua materna nel contestu global’ pretende “animar a les families a usar y tresmitir l’asturianu a les xeneraciones que vienen”. Pa ello, ufre conseyos “contrastaos pola nuesa propia esperiencia y el d’otres families” que s’utilicen nel deprendimientu de llingües. Estos conseyos van venceyaos coles estayes de crecimientu del neñu y son válides tamién pa xunidaes familiares falantes de castellanu y d’amestáu. D’igual forma, les fueyes del llibrín fechu por Reciella tamién esplica que “la variedá llingüística mundial ye una riqueza pa tola humanidá”, de la que forma parta l’asturianu, y que “el billingüismu aporta ventayes al desarrollu de los neños y les neñes, sobre manera cuando son pequiñinos”.

        2.000   cartafueyos.            Pa terminar, Riesgo quixo destacar la importancia que tien la conocencia d’idiomas pal daprendimientu d’otros nuevos, pa lo que punxo l’exemplu “d’una amiga de la Toscana que fai bastantes años díxome que quien tuviera la oportunidá de medrar falando dos llingües romances va poder falar ensin dificultá otres llingües romancés. Ella falaba toscanu –lo que se llama l’italianu ye’l toscanu, pero tamién ta’l piamontés, el friulés…– y piamontés por parte de madre, lo que-y facilitó saber otres dos llingües romances más, ente elles l’español, y entender probablemente cinco o seis”.

    Darréu, recordó qu’hai “un gran proyeutu européu que ta inacabáu, el Lexicom Romanorum”, un diccionariu de les llingües romances europees al que l’asturianu “aporta 400.000 entraes”. Estos vocablos, añade, “son un tesoro inagotable y una fonte d’información fundamental pa les más variaes investigaciones”. “Ye incontestable, por más que dalgunos s’emperren en despreciar”, continuó, “y cuando munchos s’emperren n’afitar o reivindicar les raíces llatines o romanes d’Asturies y busquen piedres pa demostralo, nun se decanten de que’l mayor tesoru de la romanización d’Asturies ye la llingua asturiana; ési ye’l gran anfiteatru, el gran foru y la gran ciudá romana d’Asturies que nun esistió en piedra pero sí en fala”, finó Riesgo.

    El repartu de los 2.000 cartafueyos editaos nesta campaña de nome ‘Les ventayes del billingüismu n’Asturies’, anunciada'l pasáu 21 de febreru con motivu del Día Internacional de la Llingua Materna, va principiar nos quince díes próximos. La xente interesao en facese con un exemplar pue acudir a la Oficina de Normalización Llingüística, departamentu que tamién va colgalu na so páxina web. Fonte:  Asturies.com

Trabe edita l'ensayu de Barreiro sobre la televisión y los procesos de recuperación identitaria

   La obra ganadora del VI Premiu Fierro Botas, ‘L’espeyu onde miranos: televisiones de proximidá n’Europa Occidental y procesos de recuperación identitaria’, yá ta disponible nes llibreríes. El so autor ye Damián Barreiro y la edición, de Trabe.

   Pendiente tovía de la presentación oficial por parte del Conceyu de Xixón, convocante del gallardón que tien como recompensa 3.000 euros y la espublización del ensayu, Ediciones Trabe encargóse de la so edición. Nél, el llector va atopar un trabayu rigurosu y estensu nel que’l periodista avilesín nacíu n’A Estrada repasa la historia de delles televisiones de proximidá europées claves nel procesu de recuperación llingüística y identitaria de los sos pueblos, pa depués analizar el papel que xuega anguaño la TPA n’Asturies. D’igual forma, Barreiro tamién cuenta nestes páxines les apaiciones que tuvo la llingua asturiana tanto na televisión como na radio y afonda na importancia de reflexar l’idioma del país en tolos xéneros, siempre poniendo sobre la mesa exemplos d’otros canales de territorios con llingua propia, pa crear una industria cultural y fortalecer una identidá propia.

   El Premiu d’Ensayu y Trabayos d’Investigación Fierro Botas, que concede l'Ayuntamientu de Xixón al traviés de la Conceyalía d'Educación, Cultura, Mocedá y Fiestes, tien como oxetivu recordar la figura del xesuita Federico González-Fierro Botas, espertu en llingua asturiana que finó n’accidente de tráficu en Rusia nel 2002, y reconocer el llabor de los investigadores asturianos na llingua del país.

Alderique sobre ‘La tele que queremos’.      Barreiro ye una de les persones convidaes pa participar el miércoles nuna mesa redonda qu’entama la Xunta pola Defensa de la Llingua Asturiana (XDLA) baxo’l nome de ‘La tele que queremos. El papel d’un serviciu públicu de comunicación como normalizador del idioma’. El voceru de la organización, Carlos Pulgar, va ser el moderador d’una mesa redonda na que tamién van participar Carlos Menéndez Otero, profesor de la Universidá d’Uviéu; Óscar Vega, miembru del Comité d’Empresa de RTPA; y Xosé Antón Fernández ‘Ambás’, músicu y presentador. La hora prevista d’aniciu  ye les 19 hores nel Centru Social Okupáu Autoxestionáu La Madreña.

   Esti alderique va celebrase tres l’asoleyamientu por parte dela XDLA d’un documentu robláu, en primer instancia, por 26 coleutivos, ente ellos l’Academia de la Llingua Asturiana, con cinco puntos “irrenunciables” nel que demanden a los responsables políticos “unos medios públicos al serviciu d’Asturies”.     Fonte: Asturies.com

FETEN 2014 arranca el 16 de Febreru en Xixón con una ufierta de 150 representaciones y l'estrenu de 7 espectáculos

Va cuntar cola participación de más de 70 compañíes.

   La víxesimo tercer edición de la Feria Europea d'Artes Escéniques pa Neños y Neñes de Xixón, FETEN va tener llugar del 16 al 21 de febreru cola participación de setenta compañíes procedentes de siete países que van ufiertar alredor de 150 representaciones ente les que caben destacar l'estrenu de siete espectáculo. Toos ellos empobinaos al públicu infantil y familiar.

   La Feria Europea d'Artes Escéniques pa Neños y Neñes de Xixón, FETEN 2014, que va celebrar so ventiavu tercer edición ente los próximos díes 16 y 21 de febreru, va cuntar cola participación de setenta compañíes nacionales ya internacionales que van amosar na ciudá asturiana les sos últimes producciones escéniques, dirixíes a la infancia. Los distintos escenarios oficiales de la Feria van acoyer alredor de 150 representaciones de la mano de compañíes procedentes d'España, Arxentina, Bélxica, Francia, Bulgaria, Holanda ya Italia. Ente tolos trabayos, destaquen los siete estrenos absolutos que la organización incluyó na programación de la nueva edición.

   Consolidáu como un alcuentru de referencia y de xunta pa los numberosos programadores, distribuidores y ceadores qu'alleguen a Xixón mientres estes feches, FETEN 2014 va sirvir a toos estos profesionales p'analizar los nuevos enclinos creativos y trabayar pa impulsar un mercáu cultural que fortaleza'l sector, frente a les dificultaes de sostenibilidá de les artes escéniques.

   Amás de cuntar con una importante presencia internacional, la Feria Europea d'Artes Escéniques pa Neños y Neñes escoyó los espectáculos de compañíes procedentes de 15 comunidaes autónomes del nuesu país. Les casi 150 representaciones, creaes a partir de diverses disciplines artístiques, como la danza, los títeres y oxetos, la música, el circu o la maxa, ente munches otres, van tener llugar nos distintos escenarios oficiales de la Feria y en delles de les cais y places más emblemátiques de Xixón.

   Siete compañíes españoles van amosar mientres FETEN 2014 los sos espectáculos empobinaos a los más pequenos en calidá d'estrenos absolutos. Ye'l casu de la compañía asturiana Factoría Norte que va presentar l'espectáculu de cai 'Llumeru'. Pela so parte, los castellán y lleoneses Teloncillo Teatru, qu'apocayá llograben el Premiu Nacional d'Artes Escéniques pa la Infancia y la Mocedá, recalen en Xixón con una nueva producción de pequenu formatu, 'Niales'; ente que los cántabros La Machina Teatru van ufiertar en primicia 'El neñu corpuspín'. Los valencianos Teatre del Bleu y La Pavana Compañía de Teatre van poner n'escena 'Dong Dong Quixote' y 'L'home invisible', respectivamente. Completen l'apartáu d'estrenos les compañíes de Marina Bollaín (Madrid) y Marie de Jongh (País Vascu) que van llevar a los escenarios de Xixón el musical 'El Duende Calcetu' y el montaxe de títeres y actores 'Kibubu'

   La Feria Europea d'Artes Escéniques pa Neños y Neñes de Xixón, FETEN, ta entamada pola Fundación Municipal de Cultura, Educación y Universidá Popular y el Conceyu de Xixón.

Fonte:  Asturnews.com

Iniciativa pol Asturianu participará nel Conseyu Asesor de Normalización Llingüística de Xixón pero denuncia “más d’un añu de retrasu”

La organización Iniciativa pol Asturianu va participar de l'actividá del órganu asesor del Conceyu de Xixón en materia de Política Llingüística. Dende Iniciativa señalen que l'asociación foi convidada va más d'un añu, nun siendo efectiva la mesma hasta agora, dempués de numberosos retrasos que dende'l puntu de vista de la organización "namás buscaron retrasar la puesta en marcha de l'actividá d'esti órganu", lo que demuestra la falta d'interés d'esta alministración por cuntar cola opinión de los estremaos colectivos xixoneses que participen del Conseyu. L'órganu, formáu por partíos, sindicatos y asociaciones culturales, empresariales, etc. tien l'oxetivu de asesorar al Conceyu de Xixón. Cola última reforma de los sos estatutos, Iniciativa pol Asturianu y otres organizaciones de reivindicación llingüística entren a formar parte de la entidá con un represante por cada asociación, ensin remuneración dala. Iniciativa pol Asturianu tará presente nesti Conseyu cola intención de facer un llabor constructivu, pero tamién sollerte a los pasos atrás que puedan dase no que cinca al usu del asturianu en Xixón, onde nos últimos años pudieron vese dellos pasos atrás y onde nun s'avanza nel cumplimientu de la ordenanza d'usu y promoción del asturianu, que s'incumple cásique dafechu dende la so aprobación. Poro, conviden a los ciudadanos de Xixón a face-yos llegar les sos reclamaciones y propuestes sobre normalización llingüística, col envís de poder llevales a esti foru, qu'asperen seya una ferramienta útil pa que se dean pasos alantre nel usu del asturianu nel conceyu de Xixón. Fonte: Infoasturies

Van presentar la obra ganadora del Premiu d'Ensayu ya Investigación "Fierru Botas" del Conceyu de Xixón

Preséntase la obra ganadora del Fierro-Botas d’ensayu 2012

 

    La presentación de la obra ganadora del Premiu d'Ensayu ya Investigación "Fierro-Botas" del Conceyu de Xixón, “La botella de Xixón. Oríxenes y desendolcu hestóricu de la botella de sidra d'Asturies”, d'Inaciu Hevia Llavona va presentase esti xueves 14 de febreru a les 19:30 hores nel Salón de Recepciones de la Casa Conceyu, cola presencia del conceyal de Cultura, Carlos Rubiera.

   "La botella de Xixón. Oríxenes y desendolcu hestóricu de la botella de sidra d’Asturies" ye la obra ganadora del quintu premiu Fierro Botas, y ye un trabayu d’investigación al rodiu d’un elementu cimeru de la cultura asturiana, como ye la botella de sidra, sobre’l qu’hai pocos estudios fechos. Inaciu Hevia Llavona (Xixón, 1965) ye etnógrafu y collaborador d’estremaes publicaciones especializaes onde tien asoleyaos dellos artículos, principalmente de tema hestóricu y etnográficu dende va más de quince años.

   El premiu, concedíu por mayoría del xuráu, quixo premiar lo novedoso del tema, rescamplando sobre manera la conxugación que l’autor fai ente’l patrimoniu cultural y etnográficu, la cultura popular y la industria; asina como l’apueste que fai por dar al mundu una mayor conocencia de Xixón y d’Asturies.

Fonte:  Asturnews.