Barbero fala de 'El viaxe a la lluz' en Villaviciosa

Cartelu d'alcuentros col autor, "El viaxe a la lluz"

  Tres celebrar un alcuentru con llectores en Nava'l mes pasáu, agora ye'l turnu de los aficionaos de la capital maliaya.

  Ruma Barbero va protagonizar esta iniciativa dientro de los Talleres de Llectura n’Asturianu de Villaviciosa, qu’entama’l Serviciu de Normalización Llingüística de la 'Comarca de la Sidra',  esta tarde a les 19 hores nel aula del segundu pisu del Centru Cultural Capistrano. El músicu y dibuxante va aldericar colos presentes sobre 'El viaxe a la lluz', obra ganadora del VII Premiu Alfonso Iglesias de cómic, correspondiente al añu pasáu.

  Construyida a partir de vivencies reales de la so familia materna en Ponga, esta novela gráfica de Barbero adiéntrase na historia de los fugaos nos duros años de la posguerra española.                                                                                                    Fonte: asturies.com

Profesionales del diseñu utilicen la so creatividá en defensa de los refuxaos

por Pablo R. Guardado

Una campaña busca dar a conocer el drama de los refuxaos y al empar concienciar a la población sobre’l falsu discursu xenófobu que garra fuercia en dellos puntos d’Europa. ‘Refugio contra barbarie’ compónse de diez cartelos d'illustradores asturianos.

Esta iniciativa naz de la Coordinadora d’ONGD d’Asturies, el Conseyu de la Mocedá del Principáu d’Asturies y la Federación Asturiana de Conceyos tres les imáxenes que pudimos ver recién sobre les consecuencies de la guerra que sufre Siria dende hai años y qu’afeuta a la so población, obligada a escapar de la situación que se vive nel so país, escoyendo en munchos casos Europa como destín. “Persones refuxaes esisten dende hai munchu tiempu en munches partes del mundu, tantes como conflictos o catástrofes asoceden nestos mesmos llugares. Pero ye anguaño cuando se faen más visibles, yá qu’entren masivamente en suelu de la nuesa Europa, que, a pesar de la so obligación ética de cercanía a la ciudadanía y coherencia colos sos valores fundacionales de solidaridá, desaniciu de la probeza y proteición de los derechos humanos, paez nun tar al altor”, espliquen los responsables de la campaña.

Los casos de racismu y xenofobia que se tán viviendo nestos últimos meses énte los refuxaos sirios, xenerando “idees preconcebíes y equivocaes de que la xente sal de sos cases destruyíes de forma voluntaria pa non volver y, de paso, arrebatanos el nuesu bienestar”, son pa estes organizaciones una “barbarie”. “Nada más lloñe de la realidá, culpabilizar a los coleutivos de persones refuxaes de la crisis económica ye tremendamente inxustu y inhumanu”, añaden.

Tamién n’asturianu

En ‘Refugio contra barbarie’ participen diez illustradores con creaciones en defensa de los refuxaos, con presencia de la llingua asturiana gracies a Ruma Barbero. El dibuxante xixonés participa con ‘Aclarándonos’, un orixinal cartelu nel que xuega coles pallabres refugar y refuxar.

Completen la llista de collaboradores de la campaña Montse Matos, Fran Yebra, Javi Guerrero, Marco Recuero, Juaco Amado, Ralf Thomas, Forma, Nacho Quesada y Goyo. Les sos creaciones yá se pueden ver en mupis d’Uviéu, Avilés y Llangréu, amás d’en postales repartíes polos conceyos del país.

Manifiestu

Esta iniciativa vien acompañada por un manifiestu que se pue consultar na páxina web de la campaña. Nél se reclama que “la obligación d’Europa ye protexer a les persones y respetar los derechos humanos” y s’empondera “la disposición qu’esiste por parte del Gobiernu del Principáu, los conceyos, les entidaes sociales y los movimientos ciudadanos, pa coordinar aiciones que permitan ufrir la proteición adecuada a les persones refuxaes, garantizando-yos unes condiciones de vida digna y una integración plena na nuesa comunidá, y mientres el so periodu de permanencia”.

Semeya obra d’Eloy Antuña, fecha en Sama y colgada en Facebook por Ruma Barbero.

Fonte: Asturies.com

Xixón enllena les aules de superheroínes

L'actividá “El cómic n’asturianu”, organizada pola Oficina de Normalización Llingüística de Xixón na que van participar al rodiu de 260 neños y neñes de 9 colexos entamó recién enllenando les aules de superheroínes.

“El cómic n’asturianu” ye uná actividá nueva qu’entama nesti cursu escolar 2015-2016 dientro del Programa d’Espardimientu y Normalización de La Llingua Asturianana qu’organicen dende la Oficina. El dibuxante Ruma Barbero va falar a los los escolinos y escolines de cómics asoleyaos n’asturianu, de dibuxantes renomaos y pa rematar fadrá desplicaciones sobre como ye’l procesu de facer un cómic.

Fonte: asturnews

Ruma Barbero usa'l crowdfunding pa espublizar "Moyando'l culu"

El músicu y dibuxante Ruma Barbero fai un importante apueste pol sistema del crowdfunding p'asoleyar esti branu una recopilación de les tires de prensa que tien camentao dir espublizando cada día dende'l 1 de xunetu hasta'l 31 d'agostu. Les tires dirán apaeciendo na web moyandolculu.com y a la fin del branu, al entamu del mes d'ochobre de 2015 a más tardar, saldrá'l llibru recopilatoriu coles 62 tires col que se puen facer los que collaboren nesta campaña de crowdfunding que se fai cola web de Verkami. "Moyando'l culu" ye una tira de prensa braniega de humor blancu, escrita en llingua asturiana na que los protagonistes son una reciella de neños y neñes de 7 años más o menos, n'Asturies mientres les vacaciones de branu. La tira tien, sigún l'autor, " un envís positivu y vital qu'intenta espeyar la diversidá de neños y neñes qu'hai anguaño y ta dirixía a tolos públicos". Los que firmen na campaña de crowdfundig van poder facese con llibros recopilatorios coles 62 tires aparecíes ente'l 1 de xunetu y el 31 d'agostu, tires orixinales dedicaes, dibuxos orixinales dedicaos d'un de los personaxes, apaecer nos agradecimientos del llibru ya, inclusu, con exemplares de dellos trabayos anteriores de Ruma Barbero, firmaos y dedicaos, como "Aguantando Cachones" o "La Chelita". Les aportaciones económiques usaránse pa espublizar les tires nun llibru recopilatoriu a la fin del branu. Talamente como se diz na web de crowdfunding, el llibru recopilatoriu va editase nun formatu clásicu pa los recopilatorios de tires de prensa, 21 x 9 cms. en papel de gran calidá de 150 gramos con unes tapes en cartulina gráfica de 280 gramos y encuadernación rústica cosida. Les tires orixinales tan feches nun formatu de 42 x 15 cms. en papel Canson de cómic de 250 gramos, con rotuláu manual y entintaes con tinta china a pincel. Y los dibuxos orixinales que se van dar a los que merquen na campaña tan fechos en formatu DIN A4 en papel Canson de cómic de 250 gramos, con rotuláu manual y entintaos con tinta china a pincel. Pa los que nun conozan la obra anterior de Ruma Barbero, "Aguantando Cachones" ye un llibru de 56 páxines de 17 x 24 cms. en papel de gran calidá de 150 gramos con unes tapes en cartulina gráfica de 280 gramos y encuadernación rústica cosida. Y "La Chelita" ye una novela gráfica de 160 páxines de 17 x 24 cms. en papel de gran calidá de 150 gramos con unes tapes en cartulina gráfica de 280 gramos y encuadernación rústica cosida. Ruma Barbero (Somio, Xixón, 1971) Llicenciáu en Belles Artes pola Universidá de Salamanca. Pertenez a los grupos de folk Felpeyu y Los Citriquinos. Nel mundu del cómic diose a conocer na revista escolar El Maguillo y en El Llapiceru. Participó na editorial Cactus Comics onde asoleyó Los Aguarones, xunto con Xosé Antón García Sampedro “Son”. Nel añu 2003 algama’l primer premiu del Concursu de comics de la Comarca de la Sidra pol trabayu Marcianaes, títulu qu’usa pa la tira cómica que asoleya nel selmanariu Les Noticies nel periodu del 2004 al 2010. Nel añu 2009 gana’l premiu Alfonso Iglesias de Cómic en Llingua Asturiana por Manzajú, afitándose como ún de los grandes del mundu de la viñeta asturiana. Fonte: Asturnews

Ruma Barbero presenta la so novela gráfica "La Chelita" y la so recopilación d'historietes "Aguantando Cachones"

Ruma Barbero

   El dibuxante y músicu del grupu Felpeyu, Ruma Barbero, presenta esti vienres en Candás (Carreño) la so novela gráfica La Chelita y la so escoyeta d'historietes 'Aguantando Cachones'.

      L'actu va tener llugar a partir de les 20.00 hores nel pub Creisi, y forma parte del programa d'actos del festival Rebolleres Rock, que va celebrar la so sesta edición el sábadu, a partir de la mesma hora, nel Prao Gervasia de Candás, coles actuaciones de Reincidentes, Skama la Rede, Escuela d'Odiu y Rock'n'Guah.es.

 

Portada de "La Chelita"

   La Chelita recueye les vivencies que cooperantes internacionales y antiguos guerrilleros alluguen del conflictu d'El Salvador. 'Aguantando Cachones' arrexunta les historietes que l'autor foi publicando nel blogue del mesmu nome.
Fonte: europapress.es

Barbero lleva al papel les histories del blogue "Aguantando cachones"

    Les 39 histories cuntaes por Ruma Barbero dende ochobre del 2011 hasta xunetu del 2013 nel so blogue ‘Aguantando cachones’ dan el saltu al papel. L’autor xixonés ta acabante d’espublizar un llibru de mesmu nome que les recueye.

   “De la qu’estudiaba bachilleratu’l mio pá nel Antiguu Institutu Xovellanos de Xixón, piraba les clases de ‘Formación del Espíritu Nacional’ pa dir aguantar cachones a La Escalerona colos compañeros de clase. Esto ye, a ver quién yera l’últimu en marchar de la qu’españaba la fola contra’l muru. Esti fechu paecióme dende siempre una metáfora bien prestosa”. Asina se presenta’l blogue ‘Aguantando cachones’, xerme d’esta obra espublizada por Tierra Llibros.

    “‘Aguantando cachones’ entamélu col envís de dir sacando histories curties que tenía en mente va tiempu. Histories reales o de ficción que nun daríen pa facer en munches páxines, pero que sí son la cuenta pa sacales de dientro en periodos de menor actividá, cuando tas per exemplu faciendo'l guión d'un llibru llargu, y asina, de pasu, nun perder mano de dibuxar. Lo del papel foi un añadíu, a mi sigue prestándome'l papel y a muncha xente tamién”, esplica Barbero.

   La obra, que cuenta con un prólogu mui sentíu de Boni Pérez, incorpora 39 histories en 52 páxines de cómic, la cabera d’elles, fecha en xunetu “cuando naide cuntaba con qu'aguantare casi mediu añu más”, dedicada a Nelson Mandela. Éstes falen de too, “dende un cantar de Tom Waits hasta una lletra qu'escribí pa Los Ciquitrinos –grupu nel que toqué a lo llargo d'once años– que nunca llegamos a musicar, pasando per histories que me pasaron a mi, a los mios collacios o a la xente la mio familia. Lo normal ye que seyan histories que yá cunté munches vegaes a la xente más cercano y poro, narrativamente téngoles yá mui pulidines. Van quedando anotaes nun archivín hasta qu'un día, según col humor, la mala lleche o la señaldá que te llevantes, acaben nel blogue”, señala.

   De momento, Barbero yá celebró delles presentaciones en Xixón que “tán resultando bien”. “Hai xente que nun sabía de la páxina, otres persones lleéranles toes nel blogue y teníen ganes de teneles en papel. Amás llego cola inercia de ‘La Chelita’, cola que tovía nun paré de facer promo y sálenme unes dedicatories bien guapes”, asegura. ‘Aguantando cachones’, na so edición de papel, ta disponible nos puntos avezaos de venta; tamién va ser posible mercala nos actos de presentación próximos que l’autor xixonés anunciará nel so blogue.

   Fonte: Asturies.com