El Festival Arcu Atlánticu de Xixón principia’l vienres con un programa bayurosu abiertu a toles edaes
Presentaciónde la programación na Casa Conceyu de Xixón
Per 10 díes, Xixón va tornar a virar la so mirada hacia’l mar. El segundu Festival Arcu Atlánticu va ufrir, dende’l vienres al 4 d’agostu, decenes d’actividaes pa tolos públicos que busquen potenciar la cultura atlántica común.
El maxestuosu salón de recepciones de la Casa Conceyu de Xixón foi’l llugar escoyíu pa celebrar la presentación de la programación completa del certame, actu nel que’l castellanu tornó a ser llingua vehicular, coles esceiciones úniques de les intervenciones d’Humberto Gonzali y Pablo Canal. El conceyal d’Educación, Cultura, Mocedá y Fiestes, Carlos Rubiera, encargóse de dar la bienvenida a los representantes de los coleutivos diferentes que collaboren na programación del Festival Arcu Atlánticu, yá que l’Ayuntamientu xixonés decidió continuar cola acertada fórmula de trabayar con asociaciones y entidaes na ellaboración d’actividaes.
Rubiera cedió en primer llugar la pallabra a Xosé Nel Riesgo, direutor de la Fundación Municipal de Cultura, Educación y Universidá Popular de Xixón –entidá encargada de coordinar tola programación–, que, en primer llugar, quixo emponderar el llabor fechu polos téunicos y trabayadores municipales na organización del Festival Arcu Atlánticu. Darréu, Riesgo mostróse mui críticu cola postura amosada por Izquierda Xunida-LV y el PSOE na xunta rectora de la Fundación celebrada ayeri, calificando de “indecente” la posición mostrada pola representante de la coalición nella, Natalia Tielve. La intención de Foro yera ampliar el presupuestu de la entidá mediante un remanente de Tesorería de 229.650 euros col qu’afrontar delles obres d’urxencia pa salvaguardar el patrimoniu cultural xixonés, pero los votos en contra de les dos formaciones d’izquierda y l’astención del PP impidió la so aprobación. IX-LV y PSOE, organización ésta última qu’amosó otra vuelta’l so refugu al Festival Arcu Atlánticu, considen qu’estes perres van destinaes al certame, pero, tres la presentación, Riesgo aseguró a los periodistes presentes que diben a actuaciones necesaries y urxentes, y acusó a la izquierda xixonesa de “poner en peligru’l patrimoniu cultural de la ciudá” cola so postura.
Decenes d’actividaes previstes
María Álvarez, del área municipal de Cultura, enumeró una bona parte de les decenes d’actividaes previstes pa estos diez díes de festival, sobre manera les que se van desendolcare na nomada Avenía Atlántica, esto ye, nel tramu ente la punta Liquerique y los Xardinos de la Reina, ocupando tamién la Plaza’l Marqués. Nesti espaciu habrá güecu pa la llingua asturiana gracies a la Oficina Municipal de la Llingua, con cuentacuentos pa neños y neñes y una especie de ‘photocall’ pa que los asturianos s’averen un poco más al so idioma y los visitantes conozan la llingua del país. Na Avenía Atlántica tamién van tener espaciu grupos musicales de Xixón y corales, amás d’otres munches actividaes culturales.
José Ramón González Sáiz, del Colectivo Interferencies, destacó’l fechu de sacar la cultura a la cai que consigue’l Festival Arcu Atlánticu, dexándola “al alcance de toos”, y señaló que con iniciatives como ésta, Xixón “adquier más que nunca la dimensión de ciudá de la cultura”. Amás, recordó qu’esti añu cúmplanse 150 años de la obra ‘Cinq semaines en ballon’ del bretón Jules Verne, escritor nacíu en Naunnt/Nantes, ciudá a la que se dedica esti añu’l certame, anque l’actividá que programa’l so coleutivu céntrase en ‘Vingt mille lieues sous les mers’ (1869). En concreto, trátase de la presencia del batiscafu del capitán Nemo, fondiáu na punta Liquerique y ellaboráu por La Casita del Cuco.
Verne tamién va centrar gran parte de les actividaes entamaes pola Asociación Cultural L’Arribada. Éstes divídense en trés estayes, según espuso Gonzali, nes que la llingua asturiana tienen una posición predominante. La primera tien al escritor bretón como protagonista; la segunda, céntrase na lliteraturar francesa; y la tercera, n’otres tipos d’artes venceyaos a la lliteratura, como la música o’l cine. Una programación mui estensa, que va tener aniciu’l sábadu (18 hores) cola arribada de congresistes nel ‘Cimavilla I’ a El Muelle, un pasucais cola Banda Gaites Castrillón y la llectura coleutiva de ‘La vuelta al mundu n’ochenta díes’ de Verne na escalera 8 d’El Muro, que van tar colgada n’Asturies.com dende mañana. Por último, Gonzali anunción la creación de la Sociedá Verniana de Xixón, la cuarta d’esti tipu esistente nel Estáu.
Bolos-playa en San Llorienzu
Una de les novedaes principales del certame va ser la instalación d’una bolera portátil ente les escaleres 14 y 15 de la playa de San Llorienzu, una iniciativa que tien orixe nuna idea del xugador asturarxentín Alfredo Fernández Vigón, de la Peña Hogar de Ciares, y que ye la primer vegada que se fai, según señaló Octavio Rodríguez, presidente de la Federación Asturiana de Bolos. Nella van desendolcase, dende’l llunes, partíes de cuatriada d’exhibición y el II Tornéu Festival Arcu Atlánticu, que va vivir la gran final el vienres. L’actividá na bolera va principiar toles xornaes a partir de les 19 hores.
Tamién van tener un protagonismu especial nel Arcu Atlánticu les mazcaraes tradicional gracies a la collaboración de l’Asociación pa la Recuperación de Los Sidros y Les Comedies ‘El Cencerru’, de Valdesoto. Asina, agrupaciones procedentes de dellos puntos de la Península Ibérica van animar les cai de Xixón y de dalgunos de los cinco conceyos que participen nesta edición del certame, siendo l’actu principal el desfile previstu pal sábadu, a partir de les 20 hores, n0El Muro a asemeyanza de los que se celebren tolos años en Lisboa y Zamora. Les mazcaraes que van participar son l’Antruejo de Villanueva de Valrojo (Zamora), Folión y Boteiros de Vilariño de Conso (Ourense), Folión y Boteiros de Viana do Bolo (Ourense), Los Jurrus d’Alixa (Lleón), Toros y Guirrios de Velilla de la Reina (Lleón), Antruido de Riaño (Lleón), Antruido de Riello (Lleón), Los Guilanderos de Tinéu, Os Reises de Tormaleo y Los Sidros y La Comedia de Valdesoto. Los sierenses, amás, van amenizar el vienres el Paseú de Begoña, a partir de les 21 hores, xunto col Folión y Boteiros de Vilariño de Conso.
Na so intervención, Canal destacó que con estes actividaes el públicu va poder ver “una representación de lo que ye cada fiesta”, animándolos a que se desplacen pa que les conozan nel so llugar d’orixe, con tola so esencia. Tamién señaló que la recuperación de les mazcaraes “ayuda a los pueblos a recuperar les sos tradiciones, a que los vecinos que tán fuera abran les sos cases y a que la población se meta un poco más na cultura tradicional”.
Pa zarrar l’actu, Ramón García Ovide, presidente de l’Asociación de Amigos del Fado del Principado de Asturias, animó a los visitantes y portugueses residentes n’Asturies a disfrutar de la programación prevista alredor d’esti estilu tan propiu de Portugal, na que destaca l’actuación de los musicos Enmanuel Soares y Andréia Matias, nel Escenariu Atlánticu de l’Avenía Atlántica, el sábadu 3 d’agostu a les 19.30 hores. Tamién va haber espaciu pa la cultura y gastronomía portuguesa, centrada na ciudá de Lisboa, nel Campu Valdés mientres tol festival, otra vuelta de la mano de Progestur, entidá cultural que caltién una perbona rellación col Conceyu de Xixón.
Fonte: Asturies.com
