N'Ast considera que'l casu de Castrillón ye "una incoherencia más d’IX pa cola llingua asturiana"

N'Ast considera que la situación de Maria Esther Díaz -nun puede emplegar l'asturianu nos plenos- ye "triste y llamentable". Dende l'Asociación Cultural sentencien que "tres sintir les declaraciones feches apocayá nel programa radiofónicu Iniciativa pol Asturianu nes ondes por María Esther García López, Conceyala de Cultura del Ayuntamientu Castrillón y reconocía escritora en llingua asturiana, nes que se quexaba de que nes sos intervenciones nos Plenos municipales nun podía emplegar l’asturianu porque la persona encargada de redautar l’acta nun la entendía, N’Ast nun pue más que calificar la situación de triste y llamentable". P'argumentalo señalen que "nun duldamos, en dengún momentu, nin de la trayeutoria como defensora de la llingua asturiana nin del llabor como Conceyala de Cultura d’Esther García, pero sí de la so coherencia política como cargu públicu d’una organización, Izquierda Unida, que lleva tiempu amarutándose d’asturianista pero que cuando-y toca defender de verdá la oficialidá o la normalización social del asturianu saca’l culu p’atrás". Nesi sen, consideren qu' "un exemplu nidiu tenémoslu nesti casu protagonizáu pola propia Esther García –que recuerda abondo al recién de les multes de la Policía Llocal de Mieres, onde tamién gobierna IU– y ye que, como se suel dicir, ye ella la que tien “la sartén pel mangu” y per ende la solución, porque pa eso forma parte del equipu gobiernu del Ayuntamientu Castrillón: ¿cómo ella y los sos compañeros y compañeres puen permitir cosa tala d’una persona subordinada?", entrúguense dende N'Ast. Pa finar, completen la so argumentación espeyando que "la persona que tien que facer l’acta de lo tratao nel Plenu –xeneralmente la qu’ocupa la Secretaría municipal– nun tien necesariamente qu’entender lo que diz la señora conceyala, sólo trescribilo, y eso nun debe de ser mui complicao teniendo en cuenta que fala n’asturianu, non en chinu. Sicasí, y si’l problema ye real, l’Ayuntamientu Castrillón bien podía entamar cursos d’asturianu empobinaos a los sos trabayadores pa qu’esto nun asoceda, o aprobar unes Ordenances Municipales que regulen l’usu del asturianu nel Conceyu y qu’amparen la necesidá de que los y les trabayadores de l’Alministración municipal conozan la llingua asturiana". Fonte: Infoasturies

García: "Cola oficialidá llegaría la preparación del funcionariáu, alfabetización y demás ferramientes"

    María Esther García, conceyala de Cultura de Castrillón por IX,declaró nún de los programes últimos de ‘Iniciativa pol Asturianu nes ondes’ que nun podía utilizar l’asturianu nel Plenu. Afirma que cola oficialidá nun se daría esti casu.

María Esther García, conceyala de Cultura de Castrillón

     Pa la escritora en llingua asturiana la razón de que se dea ésta situación débese a l’ausencia d’oficialidá del idioma. “Cola oficialidá llegaría la preparación del funcionariáu, alfabetización y demás ferramientes”, asegura, pa depués defender el llabor de la funcionaria del Conceyu de Castrillón: “Quiero dexar claro qu’en nengún momentu quixi cargar pa nada la responsabilidá nesta funcionaria que trescribe les actes del Plenu, yá que nun tien la culpa de nun tar alfabetizada n’asturianu”.

    D’igual mou, apunta que les sos intervenciones nel Plenu son escases, al nun ser vocera, “y cuando daquién tien bona intención y nun obra a mala fe,  hai que facilita-y les coses”. “Esto namás pue atayase cola oficialidá de la Llingua”, continúa García, “porque daría pie pa que, pasu ente pasu, el personal de los distintos estamentos ya instituciones del Principáu tuvieren preparaos pa esribir y trescribir n’asturianu. Pero, sobre too, que nadie punxera torgues llegales a la so utilización. Porque güei por güei, hailes”.

    García, que fixo la campaña tanto pa les eleiciones llocales como pal Senáu n’asturianu dafechu, recuerda’l so compromisu pa col idioma, como amuesa la so trayeutoria profesional como escritora, investigadora y profesora, y apunta que va siguir interviniendo n’actos públicos utilizando la llingua del país. D'igual forma, señala que va siguir trabayando pol asturianu dende'l so cargu pese a les torgues qu'atopa dende la institución, gobernada por Izquierda Xunida (IX), como espresa na entrevista qu'ufrió nel programa 'Iniciativa pol Asturianu nes Ondes' que presenta y dirixe Samuel Gradín.  Fonte: Asturies.com