L’Anguleru aporta a Avilés esti sábadu 12 pa recoyer les cartes de la reciella

  Esti sábadu 12 d’avientu a les 18 hores na Factoría Cultural d’Avilés va celebrase la Folixa de Nadal, la folixa de los llendadores. Una tarde de xaréu onde los protagonista son los neños y les neñes, xunta los y les Llendadores de la Ría d’Avilés.

  Los sos lleales agabitadores de “L’Anguleru” van encargase de recoyer les cartes de la reciella y de repartir, xunto a él, los regalos de Navidá. Amás protexen la nuesa Ría demientres tol añu faciendo llabores de curiáu, llimpieza y repoblamientu (como MAVEA).

  Nesti actu d’alredor d’una hora de duración va presentase la torna del Cuentu L’Anguleru del asturianu al inglés (Torna d’Isabel Val profesora d’inglés y gran defensora de la llingua asturiana), al mesmu tiempu que se desenvuelve la presentación de los Llendadores de la Ría d’Avilés, xunto al Nataliegu, cuentacuentos pa rapacinos y la recoyida de cartes pa L’Anguleru polos Llendadores de la Ría d’Avilés; entregando a los guah.es d’un detallín guapu apurríu pol conceyu d’Avilés y dalguna llambionada.

  Esti actu, nel que collabora Iniciativa pol Asturianu, ta organizáu pola asociación Garabuxada que promueve la celebración de L’Anguleru como personaxe que trai los regalos a los neños y neñes asturianos, frente a otros modelos esportaos. Un personaxe que ta venceyáu a les tradiciones propies y al usu de la llingua asturiana.
Fonte: asturnews.com

'A la gueta los sueños' festexa la Navidá con un reportaxe sobre esta celebración y cola estrena de la seición ‘El requexu de los escolinos’

Paula 5 años de Villamayor y L'Anguleru

     Avérase la Navidá y con ella llega tiempu d’estrenos en ‘A la gueta los sueños’. Asina, los usuarios d’esta revista dixital infantil van poder conocer el significáu de la celebración y les tradiciones d’estes feches nun reportaxe, asina como disfrutar d’una seición nueva, ‘El requexu de los escolinos’, con un especial sobre L’Anguleru con dibuxos de neños y neñes de Piloña, Tinéu y Castrillón.

   L’orixe de la celebración, la cena de Nuechebona, el nataliegu, L’Anguleru, la tradición de los regalos, los villancicos, los aguilandos o mazcaraes d’iviernu y el Día de Reis son los temes que toca esti reportaxe sobre la Navidá. Nella pues amás atopar imáxenes rellatives, videos y enllaces colos que completar la información y sorprender mañana a los tos familiares colos tos conocimientos sobre esta fiesta.

   Esta xornada previa a Nuechebona aprovechamos tamién pa inaugurar ‘El requexu de los escolinos’ una estaya nueva onde podrán vese dibuxos y testos fechos pola reciella. Como nun podía ser d’otra forma, L’Anguleru protagoniza’l primer especial d’esta estaya, nel que collaboraron con nós neños y neñes de Piloña, Tinéu y Castrillón, a los que se sumarán mañana pequeños de Roces (Xixón). Si quies apurrinos los tos dibuxos o testos dedicaos a L’Anguleru –u otros sobre la temática que más te preste– pa que salgan en ‘El requexu de los escolinos’ pues facelo na direición de corréu electrónicu redaccion@asturies.com. D’igual forma, esti espaciu tamién ta abiertu a tolos trabayos que se faigan en clase de Llingua Asturiana y Gallego-asturiano y que los maestros y alumnos quieran compartir con nós y toda la comunidá que forma ‘A la gueta los sueños’.       Fonte: asturies.com

FELIZ NAVIDÁ A TOLOS LOS BLOGUEROS DE FALAR Y LLEER

    Nestes señalaes fiestes  navidiegues deseyar a tolos blogueros, llectores y simpatizantes de FALAR Y LLEER la mayor felicidá posible y tamién munches y perbones noticies de too tipu -cada cual nos sos intereses más prioritarios-  pal nuevu añu 2014 que yá pica.
   Y percima de too muncha salú pa podelo velo tou y consultar esti y munchos otros blogues.
   FELIZ NAVIDÁ.    Xuanxo

ÁSTURA ENTAMA UNA CHARRA SOBRE LES TRADICIONES ASTURIANES DE NAVIDÁ

    La charra mensual sobre cultura del país qu’entama l’asociación Ástura en collaboración col Atenéu Obreru de Xixón va centrase nes tradiciones asturianes de Navidá. Nella van participar Alberto Álvarez Peña y el coleutivu Reciella.

    Baxo’l nome de ‘La recuperación de les tradiciones asturianes de Navidá’, l’etnógrafu va facer un repás por delles tradiciones que se caltienen n’Asturies dende hai sieglos, munches d’elles compartíes por otros pueblos europeos, pero que tán a piques de desaniciase o son desconocíes por una bona parte de la población. Mentes, representantes de l’asociación de families que trabayen en tresmitir a los sos fíos la cultura y la llingua del país van reflexonar sobre les posibilidaes d'incorporación d'estes tradiciones anguaño nes celebraciones xuntos colos neños y neñes, yá sía trabayando na escuela o na propia familia.

    L’actividá va celebrase esta tarde, a les 19.30 hores, na sede del Atenéu Obreru de Xixón, asitiada na cai Cuadonga númberu 7, y tien entrada llibre. Ésta ye la segunda charra qu’entama esta seronda l’asociación cultural Ástura en collaboración con esta entidá –la primera centróse nel software llibre n’asturianu–, cola intención de dedicar una xornada tolos meses a la cultura asturiana.

   Fonte:  Asturies.com