CSI, SUATEA, CCOO y UGT refuguen el nuevu currículu d'ESO y Bachilleratu y reivindiquen la oficialidá del asturianu

Consideren que'l nuevu currículu conderga'l futuru del asturianu nes etapes cimeres del sistema educativu. Les cuatro fuercies sindicales roblen el viniente comunicáu conxuntu:

L'actual Conseyera d'Educación fixo públicu'l compromisu de creación de la especialidá de Llingua Asturiana a lo llargo de la presente llexislatura. A escasu tiempu de qu'ésta termine, les organizaciones sindicales SUATEA, Fete-UGT, Fe-CCOO y CSI, vemos frustrada esa espectativa y pa con ella la posibilidá de normalizar la situación de los docentes qu'imparten esta asignatura.

Na última resolución de la Xunta de Personal Docente non Universitariu, aprobada por unanimidá, esixíase la tramitación pela vía d'urxencia de la creación d'esta especialidá, cuestión especialmente importante nun contestu d'inminente aprobación d'un nuevu decretu estatal d'Especialidaes y de la inmediata aplicación del nuevu currículu LOMCE na enseñanza Secundaria y Bachilleratu.

Lloñe d'esto, la situación na que nos atopamos ye d'incertidume absoluta sobre la posibilidá d'avanzar na regularización de l'asignatura. Tres la respuesta del Ministeriu y la falta d'iniciatives concretes per parte de la Conseyería asturiana, el profesoráu va siguir avocáu a la so situación d'inestabilidá lo que repercute negativamente na calidá de la enseñanza.

Con too esto, la situación entá pudo dir a peor. L'alministración pon sobre la mesa una propuesta de currículu que supón una agresión directa a la presencia de la Llingua asturiana y del Gallego-asturianu na educación Secundaria y el Bachilleratu. Ye una propuesta qu'incumple la Llei d'Usu y marxina l'asignatura como nunca se fixera hasta agora.

Per un llau va competir con gran númberu de materies, per otru va esixise, pa ser cursada en cursos cimeros habela estudiáu con anterioridá, y como colofón, ve amenorgáu'l so horariu de 4 hores selmanales a 1 nel Bachilleratu.

Ye indefendible la posibilidá d'impartir con un mínimu calidá esta enseñanza y menos entá cumplir col currículu que para ella foi asignáu n'esti mesmu decretu. Una hora selmanal ye una burlla tantu pa los profesionales que tendrán d'impartila como pal alumnáu qu'opte al so aprendizaxe.

Na práctica, esti apueste de l'alministración educativa supón condergar, al curtiu plazu, el futuru del asturianu nes etapes cimeres, y tener nel futuru una incidencia negativa na escolarización nel restu d'etapes educatives. En tou casu manifiesta la nula intención de contribuyir al fomentu de la recuperación, desenvolvimientu y promoción del usu de la nuesa llingua, elementos que, xuntu col establecimientu de los medios qu'amparen el derechu de los cuidadanos a conocelo y usalo, constitúin l'oxetivu que marca la Llei d'Usu y promoción.

Consideramos que declarar oficial a la Llingua asturiana ye, nestos momentos, la midía que podría solucionar el so estatus nel ámbitu educativu y la única apuesta rial que impedirá la degradación total hasta la so desapaición.

Fonte: Infoasturies

SUATEA denuncia que "la Conseyería d’Educación vuelve a degradar la presencia de la llingua asturiana nel sistema educativu"

Señalen que'l borraor del nuevu currículu d’educación secundaria p’Asturies "reduz la carga horaria y dexa l’asignatura nuna situación tovía más precaria". 

Los borraores de decretu pelos que se regula n’Asturies el currículu d’educación secundaria (ESO y Bachilleratu) tán suponiendo una nueva agresión a la presencia de la llingua asturiana y del gallego-asturiano nel sistema educativu asturianu. Al marxe de les valoraciones xenerales y les referentes a otres materies que merecen toos dos testos, que suponen l’aplicación n’Asturies d’una llei nefasta como la LOMCE, no que toca a la llingua asturiana rescampla que:

1)    La materia apaez somorguiada nuna montonera d’asignatures optatives, lo que torga la so escoyeta per parte del alumnáu.

2)    Oblígase al alumnáu que garre l’asignatura nos cursos superiores a tenela estudiao los anteriores. Teniendo en cuenta que la materia d’asturianu sufre constantemente, y hasta bien avanzáu’l cursu, que-y saquen alumnos pa otres materies, o que directamente nun se los dexe matriculase por tener que facer hores de refuerzu n’otres materies, topámonos con que podría dase la situación de qu’un alumnu o alumna pase los cuatro años de la ESO ensin poder cursar l’asignatura queriendo facelo toos ellos.

3)    En bachilleratu l’asignatura baxa de 4 hores selmanales a 1, y compite cola materia de Relixón. Nun fai falta desplicar la barbaridá pedagóxica que supón una asignatura, y amás en bachilleratu, de la que namás s’imparte una hora a la selmana.

4)    La permanencia de les ratio mínimes en bachilleratu supón otra torga más pa la pervivencia de la materia.

Nesi sentíu, SUATEA quier amosar el so esmolecimientu pola situación que s’abriría, d’aprobase esti decretu, tanto pal alumnáu como pal profesoráu que la imparte, que sigue ensin ver aprobada la especialidá docente, tan necesaria pa la so estabilidá y que supondría una meyora evidente de les sos condiciones y de les de la propia materia.

Por too ello, SUATEA convoca asamblea específica pal profesoráu de llingua asturiana pal miércoles 25 de marzu a les 17:30 nel IES Aramo, d’Uviéu. Y dao qu’esta situación de degradación de la materia ye compartida con otres, convócase tamién otra xeneral de profesoráu pal mesmu día y llugar a les 18:30.

Con una lexislatura a piques de rematar, la conseyera n’exerciciu, Ana González, paez querer despedise del sistema educativu asturianu dexando’l mesmu mal tastu que dexaron los sos antecesores no que toca a la llingua del país.

Fonte: Infoasturies 

La permanente del Conseyu Escolar del Estáu inclúi la especialidá d'asturianu nel decretu d'especialidaes

Esti martes 3 de febreru del 2015 celebróse la reunión de la permanente del Conseyu Escolar del Estáu pa facer el dictame al Real Decretu d’Especialidaes de la Educación Secundaria.

Esti dictame va incluyir, depués de la votación d’una enmienda que sacó un apoyu mayoritariu, la posibilidá de criar la especialidá de Llingua Asturiana a petición de la comunidá autónoma.

El testu de la enmienda ye esti:

“4. En aquellas comunidades autónomas en las que existan lenguas no oficiales que gocen de protección oficial y formen parte del currículo, los cuerpos de catedráticos de enseñanza secundaria y de profesores de enseñanza secundaria podrán tener asimismo, a petición de la Comunidad Autónoma y según necesidades educativas, la especialidad propia de la lengua respectiva. Las administraciones correspondientes determinarán la atribución docente a dichas especialidades por analogía con lo dispuesto en este real decreto para la especialidad de lengua castellana y literatura.”

 Pa SUATEA -miembru del Conseyu- "con esta decisión el Conseyu Escolar del Estáu da otru pasu alantre na criación de la especialidá de Llingua Asturiana. Ye una decisión coherente con resoluciones aprobaes apocayá y qu’esponen, ensin resquiebra nenguna, la opinión y criteriu de la comunidá educativa sobre esti tema. Ye una postura que’l gobiernu nun puede tapecer y que lu debería llevar a tresformar esta petición nuna realidá si nun quiere degradar el papel que correspuende a un órganu estatal como ye’l Conseyu Escolar".

Poro, consideren que "ye una gran noticia pal conxuntu de la sociedá asturiana y especialmente pal profesoráu de llingua asturiana que ve ca vez más cerca la equiparación profesional col restu del colectivu docente. Dende SUATEA congratulámonos d’ello dao que ye una reivindicación histórica del nuesu sindicatu".

Fonte: Infoasturies