La Manifestación del Día Les Lletres desixirá que la ‘Llei Wert’ nun saque a la llingua asturiana del sistema educativu

La manifestación del Día Les Lletres, que como tolos años dende 1987, reivindica peles cais d’Uviéu la oficialidá de la llingua asturiana, va calcar esti añu na necesidá de defender la continuidá d’esta asignatura nel sistema educativu, tres la próxima entrada en vixencia de la nueva llei d’educación, conocida como Llei Wert.

Asina lo esplicaron Carlos Pulgar y Llucía Menéndez, de la convocante Xunta Pola Defensa de la Llingua Asturiana, nuna rueda prensa na que presentaron oficialmente la convocatoria de la manifestación, que va tener llugar esti vienres, a partir de les 19.30 hores, dende la Estación de Renfe d’Uviéu.

Ambos llamaron a la participación ciudadana nel actu y concretamente, Pulgar, pidió a la xente que nun se “relaxe” ante’l fechu de que’l Ministeriu d’Educación se remitiera a la Conseyería d’Educación asturiana pa establecer el papel que va tener la ‘llingua’ dientro del nuevu sistema educativu. “Nun ye nenguna garantía”, criticó.

Por esti motivu, demandó una “solución política” pa esti asuntu, y pal “equistamientu” que dende’l so puntu de vista sufre la situación de la ‘llingua’ asturiana pola acción de la “clase política”. Recordó amás, que dicha solución ye una cuestión de “pura voluntá”.

Pela so parte, Llucía Menéndez dio los detalles de la manifestación. Esti añu va dir encabezada por una ‘bandona’ de gaites, compuesta pa la ocasión por numberosos músicos que s’emprestaron a collaborar. La marcha va acabar énte’l Teatru Campoamor, onde darréu va empezar l’actu institucional de l’Academia de la Llingua Asturiana.

Fonte: Europa Press