4/3/12

Iniciativa pol Asturianu encamienta a los partíos l'emplegu elleutoral l'asturianu


Iniciativa pol Asturianu encamienta a los partíos políticos a emplegar l'asturianu en campaña.

Tamién apurren delles propuestes sobre política llingüística.

L'asociación Iniciativa pol Asturianu anunció l'unvíu d'una carta a les distintes formaciones polítiques que se presenten a les elleiciones del prósimu 25 de Marzu na que-yos soliciten l'emplegu del asturianu a lo llargo del procesu elleutoral. Dende Iniciativa pol Asturianu despliquen que "l'asturianu, como elementu patrimonial de tolos asturianos ha tenese en cuenta a la hora de dirixise a ellos, tanto dende les instituciones públiques, como dende les privaes, y ye por ello que se pide a les fuercies polítiques qu’usen l’asturianu nos sos anuncios elleutorales en valles, televisión, radio, redes sociales, amás de nes intervenciones públiques de los sos llíderes".

Prosiguen argumentando que "Nun ye la primer vegada que partíos políticos usen l’asturianu en campaña, y pidimos agora que se dea normalidá a la nuesa llingua nel procesu elleutoral, pues esta ha ser patrimoniu de toos, recordando amás a les fuercies polítiques, que les encuestes sociollingüístiques recueyen la voluntá de los asturianos de que los sos políticos s’espresen, polo menos dacuando, na nuesa llingua".

Respeuto a les propuestes a desendolcar en cuantes a política llingüística, l'asociación desplica "qu’hai munches posibilidaes pa facelo ensin qu’esto suponga nengún gastu pa l’alministración". Tamién recordaron a les fuerces polítiques que "l’estatus d’oficialidá, si bien nun ye una solución definitiva pal idioma d’Asturies, ye imprescindible p’asegurar el futuru del asturianu"

Fonte: Infoasturies

2 comentarios:

  1. Bona xera vindicativa pa una xunidá d'aición asturiana. Norabona a Iniciativa pol Asturianu por pidir a los partíos la campaña elleutoral n'asturianu y a N'Ast por pidir que les papeletes n'asturianu tean nos colexos elleutorales.

    ResponderEliminar
  2. Ye llóxicu y normal, alantre col votu n'asturianu..

    ResponderEliminar

Los comentarios tán pendientes de moderación. Espublizaránse lo primero dable.