28/3/12

El coleutivu Hesperya llanza ‘E-sguil’, un proyeutu d’edición dixital n’asturianu



El coleutivu Hesperya ta a puntu d'espublizar, en formatu e-book, una nueva coleición de lliteratura en llingua asturiana. Los sos primeros títulos van ser Dende tan lloñe, d’Héctor Pérez Iglesias; La solombra del flacu, de Rubén d´Areñes y Destruimientu del xardín, de Sofía Castañón.

E-sguil naz como una coleición de ebook’s n’asturianu. Les nueves teunoloxíes y el nuevu panorama editorial rellacionáu con elles demanden un apueste solvente y calidable. Nel casu concretu de la lliteratura en llingua asturiana, con un enorme potencial y una categoría oldeada, el formatu dixital puede dexar un importante aumentu nel espardimientu y conocencia de la creación actual.

Hesperya nació como un coleutivu d’estudiantes de Filoloxía na Universidá d’Uviéu en 2006. Les sos actividaes nesa primer etapa fueron la edición d’una revista lliteraria, la puesta en marcha d’un grupu de teatru y l’organización d’actos culturales que dinamizasen la vida del campus. A día de güei, el coleutivu sigue cola espublización de la so revista nuna segunda etapa, edita delles coleiciones de poesía y organiza l’Alcuentru Nacional de Poetes Mozos “La Ciudad en Llamas”.

Dende l’añu 2008, el coleutivu vien desenvolviendo un proyeutu editorial que nació de la mano de dos coleiciones poétiques en papel: Hesperya de Poesía y El flonderu entusiasta. Agora dan un pasu más nel so papel como editorial cola inauguración d’esta nueva coleición de llibros en formatu lletrónicu, que de xuru va cuntar con numberosos llectores. El proyeutu col sofitu de la Obra Social de Caja Rural.

Los títulos qu’inauguren esta coleición son obra de tres voces destacaes ente les más nueves de la poesía n’asturianu.

Fonte: biblioasturias.com

1 comentario:

Los comentarios tán pendientes de moderación. Espublizaránse lo primero dable.