La convocatoria d’ayudes a la edición pieslla la puerta a nuevos autores y editoriales

  Esti miércoles espublízase nel BOPA la resolución de 10 de septiembre del 2015 pola que la Conseyería d’educación y Cultura aprueba la convocatoria de subvenciones en réxime de concurrencia competitiva pa la promoción del llibru n’asturianu y en gallego- asturianu, con novedades y un montu total de 90ooo euros, un 10,41% más que nel 2014,

  Les bases dexen bien a les clares que namái les editoriales qu’espublizaren nos caberos 5 años más de 3 proyectos editoriales tienen dalguna posibilidá d’algamar ayudes. Y nel casu de los autores, sólo los que tengán 5 o más llibros, van cuntar con dalguna posibilidá d’algamar ayudes. Esto quier dicir que nestos momentos, la Conseyería fai apueste pol caltener la producción de los autores más veteranos y pernomaos qu’apostar pol contenía y calidá de les nueves aportaciones lliteraries, puesto que tolos proyectos d’obres originales n’asturianu, van tener el máximu de puntuación, seyan del xéneru que seyan y tengan la calidá lliteraria que tengan.

  La convocatoria autoriza un gastu destináu a esta convocatoria, por importe de 90.000 euros,con cargu a l’aplicación presupuestaria 14.04.422r.472.018, de los Presupuestos xenerales del Principáu d’asturies pal exerciciu 2015, lo que ta un 10% perembaxo de los 100.000 que se presupuestaron en 2013.

  Esta convocatoria pública de subvenciones va desenvolvese teniendo como oxetu la concesión de subvenciones, en réxime de concurrencia competitiva, pa la promoción del llibru n’asturianu y en gallego-asturianu pente medies d’ayudes económiques a empreses editoriales pa la edición de llibros orixinales o traducíos d’otres llingües (con una tirada de 500 exemplares; y con una estensión que nun seya inferior a 50 páxines, nun siendo en llibros infantiles y xuveniles) y que pol so interés y calidá ayuden a la normalización social de la llingua y al arriquecimientu de la nuestra cultura, faciendo posible la constitución d’un fondu bibliográficu en llingua asturiana o gallego-asturianu. Nes obres traducíes, l’ayuda va ser tamién pa los gastos derivaos de la traducción.

  Ensin perxuiciu de la posible presentación de dellos proyectos por cada solicitante, en nengún casu l’importe de l’ayuda concedida a cada persona, entidá o empresa beneficiaria va poder superar la cantidá máxima de 25.000 €. Nesi casu, y cola mira de nun pasar d’esa cantidá, van entendese desestimaos automáticamente los proyectos presentaos por una mesma entidá solicitante que sacaren peor puntuación en comparanza colos sos proyectos meyor puntuaos.

Pero lo más significativo de la convocatoria ye que paecen afitase les torgues a l’apaición de nuevos autores y nueves editoriales ente los que puen algamar ayudes. De mano, la llende económica ye como dicíemos enrriba de 25 mil euros por editorial solicitante, lo que dexa la posibilidá de repartir namái qu’ente cuatro editoriales tol presupuestu.

Y d’otru lláu, les bases dexen bien a les clares que namái les editoriales qu’espublizaren nos caberos 5 años más de 3 proyectos editoriales tienen dalguna posibilidá d’algamar ayudes. Y nel casu de los autores, sólo los que tengán 5 o más llibros, van cuntar con dalguna posibilidá d’algamar ayudes.

  Concretamente va puntuase la trayectoria de la empresa editorial, o de profesionales d’ella que s’encarguen del proyectu, n’actividaes d’edición de llibros hasta un máximu de 10 puntos, señalándose:

▪  Trayectoria mui consolidada, cola xestión y edición de más de diez proyectos editoriales nos cinco años anteriores a la convocatoria: 10 puntos.

▪  Trayectoria bien consolidada, cola xestión y edición d’ente seis a diez proyectos editoriales nos cinco años anteriores a la convocatoria: 7 puntos.

▪  Trayectoria abondo consolidada, cola xestión y edición d’ente trés a cinco proyectos editoriales nos cinco años anteriores a la convocatoria: 5 puntos.

▪  Trayectoria non consolidada: 1 puntu.

Y no que cinca a la trayectoria del autor o de la autora y/o traductor o traductora n’ámbitu de la lliteratura n’asturianu o gallego-asturiano hasta un máximu de 15 puntos, indicándose:

▪  Autor/a o traductor/a con más de cinco llibros espublizaos y que fore ganador/a de dalgún de los premios lliterarios n’asturianu o gallego-asturianu que convoca’l Gobiernu del Principáu d’asturies: 15 puntos.

▪  Autor/a o traductor/a con más de cinco llibros espublizaos y que fore ganador/a de dalgún de los pre- mios lliterarios n’asturianu o en gallego-asturianu que convoquen entidaes locales o entidaes ensin ánimu d’arrequecimientu radicaes nel Principáu d’asturies: 10 puntos.

▪  Autor/a o traductor/a con cinco o más llibros espublizaos: 8 puntos.

▪  Autor/a o traductor/a con menos de cinco llibros espublizaos: 5 puntos.

▪  Autor/a o traductor/a ensin llibros espublizaos, pero con contribuciones en revistes lliteraries: 3 puntos.

▪  Autor/a o traductor/a ensin obra conocida: 1 puntu.                          Fonte: asturnews.com

Preséntase'l cartelu del III Día de la Reciella

El domingu 4 d'ochobre nel Muséu del Pueblu d’Asturies

Como tolos años l’oxetu d’esta xornada ye poder pasar un día completu en familia nun espaciu y nun contestu nel que la música, los talleres, les actividaes y hasta la comida seya n’asturianu.
Nos próximos díes Reciella va dar conocer el programa d’actividaes, que dende la organización anuncien que yá ta zarráu.

Na organización d'esti añu collaboren 40 Primaveres, Asturies.com, Xunta pola Defensa de la Llingua Asturiana, Iniciativa pol Asturianu,Sestaferia Centru Social, La Gijonesa, Escuela de Música Tradicional La Quintana, RTPA, Ediciones Trabe, Impronta, EDITORIAL PINTAR-PINTAR, Asociación Cultural Esbilla y Dúu Mestura.

Como tolos años sofiten l'eventu Muséu del Pueblu d'Asturies,Oficina de Normalización Llingüística de Xixón y Fundación Municipal de Cultura y Educación; y Caxa Rural d'Asturies. Fonte: Asturies.com

Cursos d'Iniciativa pol Asturianu

Iniciativa pol Asturianu pon en marcha un ambiciosu programa de cursos d'alfabetización per tol territoriu d'Asturies

Iniciativa pol Asturianu lleva organizando cursos d'asturianu dende la fundación de la organización. Los cursos en Xixón y n'Uviéu son habituales, asina como los cursos a distancia. Amás hebo delles esperiencies formatives n'otros llugares, como València. Agora, y na esmolición por llegar al máximu númberu de persones interesaes por alfabetizase o deprender asturianu, la organización fai un esfuerciu organizativu y de recuersos pa poner en marcha clases d'asturianu en 15 cursos en conceyos d'Asturies, incluyendo un cursu de gallego-asturiano n'Ibias, asina como'l so programa habitual d'enseñu a distancia al traviés d'una plataforma Moodle.

Los cursos van celebrase d'una punta a otra d'Asturies, dende Ribeseya a Ibias, pasando peles villes orientales de Les Arriondes o Cangues d'Onís, les grandes ciudaes d'Avilés, Xixón y Uviéu, o les cuenques mineres, con cursos en Sotrondio, Mieres, Llangréu y La Pola (L.lena). Súmense tamién llugares como Posada (Llanera), Candás (Carreño) y Valdesoto (Siero), nel mayor programa de cursos d'asturianu puestu en marcha por una organización asociativa.

La vocación d'esti programa de cursos ye la de tener continuidá nel tiempu y cuntar col escelente profesoráu formáu que collabora cola organización pa poner en marcha estos cursos, asina como con entidaes llocales que collaboren cola organización de los cursos. Esti programa d'alfabetización tien el sofitu de l'Academia de la Llingua Asturiana, qu'otorga los diplomes acreitativos a la fin del cursu.

Dende Iniciativa pol Asturianu tamos mui satisfechos de ser quien a poner en marcha esti ambiciosu programa que tamos seguros que va cuntar col sofitu de la sociedá asturiana. Animamos a tolos interesaos a matriculase nos cursos hasta'l 16 d'ochobre. Entamando los cursos na selmana del 19 al 25 d'esi mesmu mes.

La matriculación pue facese al traviés d'un formulariu al que s'accede calcando equí: https://docs.google.com/…/19liCZRnFmqvISIm2o1M2lOv…/viewform

Fonte: Iniciativa pol Asturianu

L’escritor zaragozanu Ignacio Martínez de Pisón gana’l Nacional de Narrativa con ‘La bona reputación’

L'escritor zaragozanu Ignacio Martínez de Pisón, Premiu Nacional de Narrativa 2015

 Ignacio Martínez de Pisón ye’l flamante Premiu Nacional de Narrativa 2015 pola novela La bona reputación (Seix Barral). El xuráu integráu por representantes académicos y críticos consideró que la novela ye “una semeya del mundu xudéu-español en Melilla na dómina del Protectoráu y el complexu desenvolvimientu d’una rede de relaciones familiares nel marcu d’un relatu estensu bien fiel a la tradición novelesca”.

 La bona reputación cunta l’aportar d’una familia de padre xudíu sefardín na Melilla de la dómina del Protectoráu y el so percorríu vital hasta la Transición, qu’inclúi la so marcha de la ciudá a Málaga y Zaragoza.

 Pisón amosose sosprendíu porque dempués de tar los tres años que tardó n’esribir la novela, “conviviendo” cola familia protagonista, la reconocencia llegó-y cuando ta somorguiáu n’otra familia, sobre la que va xirar la so próxima novela. La hestoria desenvolverase en Madrid y Barcelona y trata de “un probe home que se gana la vida asonsañando a Demis Roussos”.

 La bona reputación enceta la fuxida de los xudíos na España franquista, un éxodu de 25 mil persones que, anque con otros protagonistes, ye dafechu vixente anguaño. La cuestión identitaria ta bien presente en parte de los personaxes que se ven envueltos nel procesu de fuxida pa escontra’l nuevu estáu d’Israel.                                         Fonte: asturnews.com

L'asturianu vive casos nuevos de discriminación

Na semeya, l'IES Emilio Alarcos

   L’IES Emilio Alarcos niega a un grupu d’alumnes d’ESO l’asignatura de Llingua Asturiana. Mentes, la Cooperativa El Nocéu viose obligada utilizar el castellanu en dellos trámites cola Tesorería Xeneral de la Seguridá Social.

   La indefensión llegal pola falta d'oficialidá que viven los y les falantes d’asturianu provoca dos casos nuevos de discriminación llingüística. Un grupu d’alumnes d’Educación Secundaria Obligatoria (ESO) del IES xixonés Emilio Alarcos principiaron el cursu ensin la posibilidá de dar l’asignatura de Llingua Asturiana. L’argumentu dau pola direición del centru ye la falta d’alumnos pa la creación d’un grupu, dalgo que nun se sostién tres la sentencia del Tribunal Superior de Xusticia d'Asturies qu’eliminaba los ratios, amás del mandatu espresu dau pola Conseyería d'Educación y Cultura pa esti cursu.

   La quexa d’una de les madres d’esti grupu d’alumnes llegó a Iniciativa pol Asturianu, qu’asesoró a esta muyer sobre la llexislación actual y la obligatoriedá que tien el centru de poner un maestru de Llingua Asturiana anque haya namái ún alumnu apuntáu. Tres comunicar al centru el so mal proceder, la direición del institutu camudó la versión y argumentó que la profesora de l’asignatura tien toles hores ocupaes y que la solución ye un cambiu d’escuela, coles molesties que supondría pa la escolina.

Iniciativa pol Asturianu entiende qu’esta ‘solución’ “buscaba a les clares que la neña y la madre desistieren de la petición de cursar Llingua Asturiana”, cuando lo normal sería “solicitar el profesoráu necesariu a la Conseyería d'Educación, si ye que les hores contrataes pa Llingua Asturiana nun son abondo”. “Revisando na información pública de la conseyería pue vese como la profesora de Llingua Asturiana del IES Emilio Alarcos trabaya namás a media xornada, colo que too sedría ampliar la xornada de la profesora o unviar otru docente. Sicasí, estes cuestiones alministratives son independientes de la situación de les alumnes que solicitaron cursar Llingua Asturiana, que nun son responsables d’esta situación sinón suxetos de drechu”, afirma la organización.

   “La Conseyería y l'IES Emilio Alarcos tienen que dar solución d'inmediatu a esta situación y a otres munchos que tán dándose de xuru per Asturies, pero que pola falta d'información de les families y l'alumnáu nunca lleguen a denunciase”, añaden dende Iniciativa pol Asturianu, qu’esta selmana va acompañar a la madre nos trámites de denuncia de la situación énte la direición del centru y la conseyería.

Necesidá de presentar los estatutos en castellanu             Otru casu de discriminación llingüística viviéronla los socios de la Cooperativa El Nocéu, dedicada a l’agricultura ecolóxica en Sariegu. Nel trámite de dase d’alta como trabayadores de la cooperativa énte la Tesorería Xeneral de la Seguridá Social, dependiente del Ministeriu de Trabayu y Seguridá Social, “atopámonos cola imposibilidá de facer cualesquier xestión cola almistración estatal na nuestra llingua propia, empleando na so argumentación l’artículu 4 del capítulu II de la Llei d’Usu y Promoción del Asturianu nel que se llimita l’usu d’esti idioma a l’alministración autonómica”.

   Nuna segunda instancia, una trabayadora refugó recurrir a los estatutos de la cooperativa pa resolver una cuestión llaboral por tar éstos redautaos n’asturianu, obligando a los socios a tornalos al castellanu. “Ye por esto que demandamos que se revierta esta situación de discriminación continua. Les persones qu’optamos por usar el nuestru idioma a la hora d’espresanos, de forma oral o escrita, nun podemos siguir marxinaes d’esta forma tan inxusta. Queremos dexar de ser persones de Segunda a los güeyos de los poderes que siguen reprimiéndonos una y otra vez, cuando lo únicu que pidimos ye que se respeten los nuestros derechos básicos, la llibertá de poder espresanos na nuestra llingua”, apuntaron nuna nota nel qu’afirmen “que l’únicu marcu que puede garantizar los derechos llingüísticos básicos de les persones asturfalantes ye la oficialidá del asturianu”.

   La Xunta pola Defensa de la Llingua Asturiana (XDLA), tres conocer la situación, amosó la so solidaridá con El Nocéu y ufierto-yos “tol nuestru apoyu pa iguar esta situación. Del mesmu xeitu, aprovechamos pa reclamar una vez más la oficialidá, como única manera d'asegurar un mínimu respetu a los derechos de les persones falantes d'asturianu”. Los socios de la cooperativa tamién recibieron el sofitu d’Iniciativa pol Asturianu, que recordó qu’esta discriminación ye “frutu de la falta d’oficialidá pero tamién de la falta de sensibilidá de les alministraciones”.                                                                                   Fonte: asturies.com

Adxuntu	Tamañu
Documentación denegación a la Cooperativa El Nocéu.jpg	90.77 KB

La Biblioteca del Congresu ufre grabaciones de Premios Nobel hispanos

Premios Nobel hispanos

   Grabaciones de personalidaes de la lliteratura hispanoamericana lleendo les sos obres n’español como Borges, Juan Ramón Jiménez o Gabriel García Márquez, van poder escuchase n’internet na web de la Biblioteca del Congresu d’Estaos Xuníos.

   La iniciativa forma parte de la celebración del Mes del Heriedu Hispanu, qu’empezó esti martes y va durar hasta’l próximu 15 d’ochobre, sigún fizo anuncia la Biblioteca del Congresu que ye la segunda más grande del mundu, dempués de la Biblioteca Británica.

   Unos cincuenta grabaciones atópense yá na rede, ente les que destaca l’audiu del escritor arxentín Jorge Luis Borges recitando poemes en 1958,. Tamién atoamos la llectura que l’español Juan Ramón Jiménez, Premio Nobel de Lliteratura en 1953, fizo de les sos obres ente 1947 y 1949, y una lectura de 1977  del colombianu Gabriel García Márquez y Premio Nobel en 1982 y otra de 1972 de la poetisa chilena Gabriela Mistral, Premiu Nobel en 1945.

   Les grabaciones proceden del Archivu de Lliteratura Hispana Grabada en Cinta, de la institución estadounidense, que contien cerca de 700 documentos sonoros d’escritores procedentes de 32 países en llingües como l’español, portugués, francés o catalán. Fonte; asturnews.com

Los Centros asturianos celebraron el Día d’Asturies

Aprés-midi "Folklore" sur la Grande Place

    

  Esta fin de Selmana, munchos centros asturianos espardíos per el mundu, como los de Bruxeles na Grande-Place o Barcelona nes sos instalaciones, celebraben el Día d’Asturies con actuaciones folclóriques y romeríes asturianes.

 En Bruxeles, vistiose como tolos años al Menneken Pis cola montera y el traxe asturianu y la capital europea tuvo su tradicional “Après-midi “Folklore”sur la Grande-Place”. Asturianos que viven na capital belga aconceyaronse na Grande-Place, centru neurálxicu de la ciudá y danciaron unos bailles tradicionales como se fai davezu cada añu. Esti añu foron munchos los asturianos que pasearon los sos traxes tradicionales pol centru de Bruxeles.

Asturianos dancen na Grande-Place

Acompañáu pol director de l’Axencia Asturiana d’Emigración, Luis Miguel Fernández Romero, d’aquella, el conseyeru de Xusticia, Seguridá Pública y Relaciones Esteriores, Francisco Javier García Valledor, foi l’últimu representante gubernamental que disfruto en 2006 d’esta xornada na capital belga.

N’aquel momentu celebrábase la fiesta del Día d’Asturies colos emigrantes asturianos residentes en Bruxeles institucionalmente col nomatu de “Día d’Asturies na Emigración”, dempués de les ediciones anteriores de Bonos Aires y Madrid.

Aquel sofitu institucional y emocional a los asturianos del mundu quedo desaniciáu dafechu tres de la xida del gobiernu d’IX.

  En Barcelona, a lo llargo de tola fin de selmana actuó’l grupu Xeitu nes instalaciones del propiu Centru Asturianu y nel Born y el sábado y el domingu convocáronse una bona montonera d’actividaes. Asina, esti sábadu 19 de Setiembre,  tres de l’actuación de Xeitu na Plaza Comercial nº12, del Centru Comercial del Born y el pregón de tolos años, hubo una Fabada de convivencia nel Centru Asturiany y pola tarde delles actuaciónes músicales (coros y tonada).

  Y el domingu celebrose la tradicional Romería de la Santina, entamada cola Conexón Mundial de Radioaficionaos a les ocho la mañana. El Triangular de Fútbol Sala, la gaita y el tambor tradicionales en forma de pasacais, la Misa con ofrenda floral y la non menos tradicional Puya’l Ramu. A les 12 hores hubo una amuesa de Música Tradicional asturiana y Tonada Asturiana, a les 14 hores la xinta nel prau y pela tarde xuegos y deportes asturianos.                                                             Fonte: asturnews.com

La Reciella de la Factoría: 'Cuentos grandes pa pies piquiñinos'

Olga Cuervo va contar histories n'asturianu pa los más piquiñinos.

A les 18.30 hores nel espaciu escénicu de la Factoría Cultural d'Avilés.

Entrada llibre.

Entama la Estaya de la Llingua d'Avilés en collaboración con 'Reciella. Families pol Asturianu'.

Fecha: 

Viernes, 25/09/2015                                                                                   Fonte: asturies.com

La Biblioteca de Mieres entama talleres de llectura

El Serviciu de Normalización Llingüística, en collaboración cola Biblioteca “Vital Aza” de Mieres del Camín y la Biblioteca P.M. Atenéu de Turón, va entamar un nuevu cursu  del ciclu “Alcuentros con  autores” (Club de Llectura n’asturianu).

Esti ciclu d’alcuentros literarios consistirá na entrega mensual d’un llibru d’un autor o autora n’asturianu  y l’alcuentru  lliterariu colos mesmos al fin de mes. Ábrese’l plazu d’inscripción a lo llargo del mes de setiembre, confirmándose l’aniciu nel mes d’ochobre.

Los alcuentros van desarrollase na  Biblioteca P. M. Atenéu de Turón y na Biblioteca  “Vital Aza” de Mieres del Camín, ufiertándose esti añu la novedá de la creación del Club de llectura n’asturianu na Biblioteca “Vital Aza” de Mieres del Camín, contando cola esperiencia y bona acoyida del ciclu “Alcuentru con autores” que, dende va años, vien desarrollándose nel Atenéu de Turón y diversificando  l’actividá pa que se puea disfrutar d’ella en diferentes llugares del conceyu.

La inscripción va ser hasta’l 30 de setiembre nel Serviciu de Normalización Llingüística de la Casa de Cultura “Teodoro Cuesta”, de llunes a vienres: de10 a14 hores. O bien per corréu escribiendo a llingua@ayto-mieres.es o al ateneudeturon@gmail.com.

Fonte: Asturnews

La discriminación llingüística sigue perende

Dende la Cooperativa El Nocéu denuncien esti día  la situación de discriminación llingüística que sufren énte la Tesorería Xeneral de la Seguridá Social, dependiente del Ministeriu de Trabayu y Seguridá Social, al nun ser almitíos los so estatutos por tar redactaos n’asturianu, siendo obligaos a presentalos en castellanu.

Discriminando otra vuelta a cuantos ponen en práutica la Llei vixente nel Principáu d’Asturies, l’Alministración del Estáu ufierta otra vuelta la evidencia de que namái cola oficialidá se respeten derechos fundamentales de los asturianos,sigún denuncia esta Cooperativa.

Nuna nota de prensa asoleyada esti vienres, la cooperativa desplica qu’al intentar dase d’alta como trabayadores de la cooperativa, “atopámonos cola imposibilidá de facer cualesquier xestión cola almistración estatal na nuestra llingua propia, empleando na so argumentación l’artículu 4 del capítulu II de la Llei d’Usu y Promoción del Asturianu nel que se llimita l’usu d’esti idioma a l’alministración autonómica. Nuna segunda instancia, na qu’una trabayadora d’esti organismu debía recurrir a los estatutos pa resolver una cuestión llaboral, ésta nun quixo nin garralos pol fechu de tar escritos n’asturianu”.

Ye por esto que demanden que se revierta esta situación de discriminación continua: “Les persones qu’optamos por usar el nuestru idioma a la hora d’espresanos, de forma oral o escrita, nun podemos siguir marxinaes d’esta forma tan inxusta. Queremos dexar de ser persones de segunda a los güeyos de los poderes que siguen reprimiéndonos una y otra vez, cuando lo únicu que pidimos ye que se respeten los nuestros derechos básicos, la llibertá de poder espresanos na nuestra llingua. Asina ye que l’únicu marcu que puede garantizar los derechos llingüísticos básicos de les persones asturfalantes ye la oficialidá del asturianu“. Fonte: asturnews.com