L'asturianu vive casos nuevos de discriminación

Na semeya, l'IES Emilio Alarcos

   L’IES Emilio Alarcos niega a un grupu d’alumnes d’ESO l’asignatura de Llingua Asturiana. Mentes, la Cooperativa El Nocéu viose obligada utilizar el castellanu en dellos trámites cola Tesorería Xeneral de la Seguridá Social.

   La indefensión llegal pola falta d'oficialidá que viven los y les falantes d’asturianu provoca dos casos nuevos de discriminación llingüística. Un grupu d’alumnes d’Educación Secundaria Obligatoria (ESO) del IES xixonés Emilio Alarcos principiaron el cursu ensin la posibilidá de dar l’asignatura de Llingua Asturiana. L’argumentu dau pola direición del centru ye la falta d’alumnos pa la creación d’un grupu, dalgo que nun se sostién tres la sentencia del Tribunal Superior de Xusticia d'Asturies qu’eliminaba los ratios, amás del mandatu espresu dau pola Conseyería d'Educación y Cultura pa esti cursu.

   La quexa d’una de les madres d’esti grupu d’alumnes llegó a Iniciativa pol Asturianu, qu’asesoró a esta muyer sobre la llexislación actual y la obligatoriedá que tien el centru de poner un maestru de Llingua Asturiana anque haya namái ún alumnu apuntáu. Tres comunicar al centru el so mal proceder, la direición del institutu camudó la versión y argumentó que la profesora de l’asignatura tien toles hores ocupaes y que la solución ye un cambiu d’escuela, coles molesties que supondría pa la escolina.

Iniciativa pol Asturianu entiende qu’esta ‘solución’ “buscaba a les clares que la neña y la madre desistieren de la petición de cursar Llingua Asturiana”, cuando lo normal sería “solicitar el profesoráu necesariu a la Conseyería d'Educación, si ye que les hores contrataes pa Llingua Asturiana nun son abondo”. “Revisando na información pública de la conseyería pue vese como la profesora de Llingua Asturiana del IES Emilio Alarcos trabaya namás a media xornada, colo que too sedría ampliar la xornada de la profesora o unviar otru docente. Sicasí, estes cuestiones alministratives son independientes de la situación de les alumnes que solicitaron cursar Llingua Asturiana, que nun son responsables d’esta situación sinón suxetos de drechu”, afirma la organización.

   “La Conseyería y l'IES Emilio Alarcos tienen que dar solución d'inmediatu a esta situación y a otres munchos que tán dándose de xuru per Asturies, pero que pola falta d'información de les families y l'alumnáu nunca lleguen a denunciase”, añaden dende Iniciativa pol Asturianu, qu’esta selmana va acompañar a la madre nos trámites de denuncia de la situación énte la direición del centru y la conseyería.

Necesidá de presentar los estatutos en castellanu             Otru casu de discriminación llingüística viviéronla los socios de la Cooperativa El Nocéu, dedicada a l’agricultura ecolóxica en Sariegu. Nel trámite de dase d’alta como trabayadores de la cooperativa énte la Tesorería Xeneral de la Seguridá Social, dependiente del Ministeriu de Trabayu y Seguridá Social, “atopámonos cola imposibilidá de facer cualesquier xestión cola almistración estatal na nuestra llingua propia, empleando na so argumentación l’artículu 4 del capítulu II de la Llei d’Usu y Promoción del Asturianu nel que se llimita l’usu d’esti idioma a l’alministración autonómica”.

   Nuna segunda instancia, una trabayadora refugó recurrir a los estatutos de la cooperativa pa resolver una cuestión llaboral por tar éstos redautaos n’asturianu, obligando a los socios a tornalos al castellanu. “Ye por esto que demandamos que se revierta esta situación de discriminación continua. Les persones qu’optamos por usar el nuestru idioma a la hora d’espresanos, de forma oral o escrita, nun podemos siguir marxinaes d’esta forma tan inxusta. Queremos dexar de ser persones de Segunda a los güeyos de los poderes que siguen reprimiéndonos una y otra vez, cuando lo únicu que pidimos ye que se respeten los nuestros derechos básicos, la llibertá de poder espresanos na nuestra llingua”, apuntaron nuna nota nel qu’afirmen “que l’únicu marcu que puede garantizar los derechos llingüísticos básicos de les persones asturfalantes ye la oficialidá del asturianu”.

   La Xunta pola Defensa de la Llingua Asturiana (XDLA), tres conocer la situación, amosó la so solidaridá con El Nocéu y ufierto-yos “tol nuestru apoyu pa iguar esta situación. Del mesmu xeitu, aprovechamos pa reclamar una vez más la oficialidá, como única manera d'asegurar un mínimu respetu a los derechos de les persones falantes d'asturianu”. Los socios de la cooperativa tamién recibieron el sofitu d’Iniciativa pol Asturianu, que recordó qu’esta discriminación ye “frutu de la falta d’oficialidá pero tamién de la falta de sensibilidá de les alministraciones”.                                                                                   Fonte: asturies.com

Adxuntu	Tamañu
Documentación denegación a la Cooperativa El Nocéu.jpg	90.77 KB

SUATEA denuncia la “discriminación permanente” del profesoráu de Llingua Asturiana

Pablo R. Guardado
L’ausencia de la especialidá y la interinidá de los maestros, xunto col boicó de dalgunos centros y l’actitú de les instituciones, lleva al profesoráu d’asturianu a una “discriminación permanente”. SUATEA denuncia esta situación.

Ente les estorbises más recientes que percibe’l Sindicatu Unitariu y Autónomu de Trabayadores de la Enseñanza d’Asturies (SUATEA) señala’l fechu de que dalgunos centros escolares desaconseyen a padres y alumnos estudiar Llingua Asturiana o Gallego-asturiano, práutica mui común dende va años per parte de ciertos equipos direutivos que torna agora a Secundaria “causada pola competencia ente materies optatives xenerada pol aumentu de la xornada llectiva del colectivu docente, al necesitase más hores pa completar horarios. Pasó yá’l cursu pasáu, sobre manera en Bachilleratu, cuando padres d’alumnos recibieron llamaes telefóniques per parte de los equipos directivos pa ‘indica-yos’ cuála yera la meyor opción pa los sos fíos ente les asignatures optatives de cara a la PAU y/o la so futura formación académica. Nin que dicir tien que l'asturianu yera siempre desaconseyáu. O cuando, habiendo espresamente ratio pa formar grupu, se facía tolo posible por desmontalu pa poder completar l’horariu de profesores d’otra especialidá”. Tamién tien constancia de qu’en “dellos institutos d’educación secundaria, los equipos direutivos nun dieron nenguna información al profesoráu d'asturianu nin al departamentu correspondiente” de la ufierta d'actividaes de la nomada ‘Axenda didáctica escolar’ que pon en marcha la Conseyería d’Educación, Cultural y Deporte, esti añu “con retrasu. “En dellos casos los docentes pudieron enterase per otres víes de tala convocatoria pero en dellos otros non, perdiendo asina la posibilidá d’acceder a tales actividaes”, asegura.

D’igual forma, el sindicatu educativu critica la falta d’apoyu institucional pa la matrícula na materia, yá que dende los centros “ta faciéndose nestos díes propaganda a favor de la matriculación n'asignatures como idioma alemán y francés” y, a diferencia qu’otros años, nun hai campaña a favor de la matriculación n'asturianu. “Si yá ye dura la competencia de la llingua asturiana con llingües estranxeres, si amás nun cunta con nengún tipu de propaganda institucional nel so favor, a diferencia d’otres materies, ta implícitamente trabayándose pa que nun hebia matrícula”. Otru aspeutu indignante ye l’incumplimientu de les ratios, yá que, según la información que manexa SUATEA, tán pidiendo en Bachilleratu ocho alumnos per clase pa poder cursar Llingua Asturiana o Gallego-asturiano, “nuna interpretación restrictiva de la sentencia del TSXA y del recursu perdíu pol Principáu qu'interpreta que l'establecimientu de ratios ye contrariu a derechu na ESO (Llei d'Usu del 98 y Estatutu d’autonomía) dao que la propia llexislación al respectu establez el calter de voluntariedá. Con esto ta allargándose conscientemente una conculcación de derechos en Bachilleratu depués de reconocese la so existencia na ESO, tando pendiente de resolución el recursu presentáu por SUATEA sobre esta cuestión”.

A estos problemes que se tán detectando anguaño hai que sumar otros que vienen d’atrás, como “la falta de definición llegal de la materia, al nun esistir una especialidá de la mesma, asina como la condición interina del 95 por cientu del personal que la imparte”, lo que xenera “una situación de vulnerabilidá que fai posible auténticos atropellos dende va años, y que siguen güei, agravaos amás poles agresiones a la escuela pública de los gobiernos central y autonómicu, que xeneren una competencia ente materies onde la Llingua Asturiana xuega coles cartes marcaes”. Por too ello, la situación del profesoráu de Llingua Asturiana y Gallego-Asturiano “vuélvese particularmente revesosa, agravada amás pol futurible reforciamientu de la potestá de los equipos direutivos d’aprobase l’actual anteproyectu LOMCE, asina como la desidia de l’Alministración asturiana en defender un nuevu marcu llegal pa la Llingua Asturiana y la so presencia nel sistema educativu”, afirmen dende SUATEA.

Fonte: Asturies.com

Reclamación sindical pola fin de la "discriminación" de les llingües autonómiques

Los sindicatos de trabayadores del enseñu (Ste) de la Comunidá Valenciana, Cataluña, Islles Baleares, Galicia, País Vascu y Navarra ficieron públicu ayeri en Valencia un manifiestu nel que denuncien la "inxusta discriminación" de les sos respeutives llingües énte’l castellán y apuesten por xunir esfuercios en favor de "continuar el llabor de normalización llingüística entamada dende'l final de la dictadura".

Los representantes de los sindicatos aconceyaron esta mañana na sede del Stepv na capital valenciana nuna sesión na que s'aprebó'l manifiestu y alcordaron propuestes de trabayu conxuntu pa "promover la normalización llingüística". La creyación d'un espaciu virtual compartíu y la organización d'un seminariu sobre "llingües nacionales" son dalgunes d'elles.

Estes entidaes critiquen nel manifiestu la "evidente discriminación xurídica" de les llingües autonómiques, qu'ocasiona una "grave desventaya pa la xeneralización de la so conocencia y usu, y señalen que los respeutivos procesos de recuperación llingüística entamaos "han dirixise a reestablecer los usos normales y hestóricos que tuvieron la llingua catalana, vasca y gallega nel senu de les sos sociedaes fasta que, por razón de la fuercia, va imponiéndose'l castellán como única llingua oficial del Estáu".

Defenden amás que les persones "puean exercer el so drechu a espresase y ser atendíos na so propia llingua en tolos espacios públicos" de los territorios onde "son propies" y afirmen que "si nun s'asegura una conocencia xeneral del gallegu, vascu o catalán ye imposible" que los ciudadanos que falen estes llingües "puean vivir col so idioma nos territorios nos que son llingua propia" a diferencia de los castellanofalantes.

El testu apoya los programes educativos que tienen como oxetu que "l’alumnáu llogre una bona competencia comunicativa na so llingua propia y lu prepare pa un mundiu multillingüe, dixebradamente de que seya la llingua familiar", énte’l monollingüismu español qu'allabancien dellos grupos de presión o les actuaciones de dalgunos gobiernos".

A lo cabero, establez que los sindicatos comprométensen a afondar nel so trabayu común "p’algamar la normalización del catalán, gallegu y vascu". Nesti sen, señala que "promoverán la so participación nes redes y plataformes de sofitu a les llingües nacionales, dotaránse d'espacios d'intervención conxunta y aconceyarán añalmente pa intercambiar información y alcordar estratexes comunes dirixíes a algamar los sos oxetivos".

Fonte: Europa Press

Rexistru de la discriminación llingüística n'Asturies

Un informe atropa cientos de casos de discriminación nos últimos 30 años y l'Observatoriu de la Discriminación Llingüística n'Asturies siguirá calteniendo'l trabayu de rexistru.

L'Aconceyamientu de Xuristes pol Asturianu, tres abrir na so páxina web un portal pa recoyer denuncies –SOX- naguaben pola igua d’una rellación d’actos "discriminatorios" carecíos polos ciudadanos asturfalantes qu’abarcare dende la vixencia de la Constitución de 1978 fasta "que dalgún día, si llega, acabe l’estáu d’esceición que pa la llingua asturiana punxo en práutica l’Estáu español va yá pa 31 años". Un rexistru, nel que s’atropen "toles agresiones endenantes que la memoria les entierre", que s’actualice "día tres día" con un formatu "que permita’l so fácil espardimientu per dayuri uquiera se trate de los drechos humanos" y seya'l "vergoñosu" y "permanente" testimoniu de "l’agresión llingüística escontra’l pueblu asturianu".

L'AXA venía coricando la idega hai bien de tiempu "pero siempres faltaben les manes", fasta agora que "yá podemos cuntar con un informe qu’atropa cientos de casos de discriminación, na dómina 1979-2009, nun total de más de doscientes páxines".
Pa da-y continuidá al llabor dende l'Aconceyamientu de Xuristes pol asturianu tan sofitando la igua d’una asociación –Observatoriu de la Discriminación Llingüística n’Asturies- na que conviden "a asentar", col grau de compromisu que caún escueya.

Fonte: Infoasturies

SUATEA pide llingua asturiana nel currículu d'Educación Infantil

SUATEA, el sindicatu educativu asturianu, afitó l’ocho setiembre que "deberíemos festexar que les nueses instituciones pasu ente pasu fueron construyendo’l país contribuyendo al so desendolcu socio-económicu y consolidando la so cultura propia; pero en bien poco o más bien en nada se collaboró nello dende l’ámbitu educativu", y pidió la oficialidá del asturianu y la creación de la especialidá de llingua asturiana ente'l profesoráu.
Esti sindicatu conseña que'l cursu pasáu algamóse que "la nuesa llingua entrare nos planes d’estudiu de la Universidá na facultá de Filoloxía y Maxisteriu, lo que permitirá que se siga formando’l profesoráu pa enseñar en tolos niveles educativos obligatorios. Sicasí, esti llogru ye parcial y escasu si tenemos en cuenta les reivindicaciones hestóriques de la so presencia na Universidá, pero supón el primer pasu d’una implantación más amplia nel currículu universitariu".

Según el sindicatu asturianu "paradóxicamente, les titulaciones rellacionaes cola nuesa llingua daes pola universidá son y sedrán papel moyao si nun se reconoz la especialidá de Llingua Asturiana y Gallego-Asturianu. Agora mesmo, el profesoráu con esta especialidá ye discrimináu llaboralmente en tolos ámbitos del sistema educativu, pues nun ye valorada n’igualdá coles otres sí reconocíes: minusvalórase nos baremos d’oposición, tórgase l’accesu a puestos de trabayu del ámbitu socio-llingüísticu en Secundaria, nun se convoquen oposiciones d’esta especialidá … D’esta situación ye responsable’l Gobiernu asturianu."

Discriminación del alumnáu pola llingua

SUATEA denuncia tamién "la discriminación que tamién sufre l’alumnáu de Primaria y Secundaria cuando pa poder recibir clases de la nuesa llingua tienen que constituyir grupos con un númberu mínimu de persones. L’alumnáu d’Infantil nin siquiera se-y reconoz el drechu recibiles, pues el Currículu d’esta etapa nun recueye nengún conteníu de Llingua Asturiana o Gallego-Asturianu". Esta organización amesta que "tien interpuestu un recursu contra él pendiente de resolver xudicialmente".

Amás demanden la "oficialidá del asturianu", que "les places de Llingua Asturiana y Gallego-Asturianu pasen a formar parte de les plantiyes orgániques de los centros, la creación de la especialidá y la convocatoria d'oposiciones", que’l "currículu d’Educación Infantil recueya la nuesa llingua y que demientres nun lo faiga s’atiendan toles demandes d’escolarización nesta etapa fundamental pal deprendimientu en xeneral y el llingüísticu en particular" y que "nos centros s’axeiten Planes Llingüísticos que dean un tratamientu integráu y coordináu de toles llingües que s’enseñen y onde la nuesa llingua seya vehicular en delles arees".

Fonte: Asturies.com

Denuncien discriminación de la llingua asturiana nes oposiciones a mayestru

L'Aconceyamientu de Xuristes pol Asturianu denuncia que'l Principáu convocó un concursu-oposición pal ingresu nel Cuerpu de Mayestros nel que "les espublizaciones rellacionaes cola especialidá feches en cualesquier idioma del mundiu (vivu o muertu) puen algamar fasta 0,35 puntos nel concursu pal accesu al Cuerpu de Mayestros del Principáu d’Asturies, pero si la llingua emplegada na espublización foi la propia del país, l’asturiana, entós la puntuación másima posible ye de 0,15 puntos".

Segun l'AXA "per Resolución de la Viceconseyería de Modernización y Recursos Humanos, de data 23 d’abril, modificada per otres del 30 d’abril y 3 de xunu (BOPA de 24 d’abril, 3 de mayu y 4 de xunu respeutivamente), l’Alministración del Principáu d’Asturies convocó a concursu-oposición pal ingresu nel Cuerpu de Mayestros, estableciendo ente los méritos a valorar na fase de concursu les 'espublizaciones rellacionaes cola especialidá a la qu’opta l’aspirante' (separtáu 3.2.1 del bloque III), fasta 0,35 puntos y les “espublizaciones sobre otra especialidá a la qu’opta l’aspirante” (separtáu 3.2.2 del bloque III), fasta 0,15 puntos. Nada recueyen les bases sobre la llingua emplegada". Por embargu, según Xuristes pol Asturianu "nel intre de xustificar les puntuaciones provisionales de los opositores, l’Institutu Asturianu d’Alministración Pública “Adolfo Posada” -muérganu nel que, casualmente, ocupa un altu cargu funcionarial, per nomamientu a deu, la muyer d’Álvarez Areces- ensin sofitu llegal dalu alcuerda que 'les espublizaciones n’asturianu, magar seyan de la especialidá, baremaránse pel separtáu 3.2.2'".
Encamienten a los opositores a denunciar: Pa esta asociación "la discriminación, arriendes d’inconstitucional, antiestatutaria, provocatible y faltona, ye dafechamente arbitraria porque nun tien sofitu nes bases del concursu-oposición".

Dende l’Aconceyamientu de Xuristes pol Asturianu encamienten, per un llau, "a los opositores afectaos que recurran la Resolución del Institutu “Adolfo Posada”, de 9 de xunetu, no que cinca a la menor valoración de les espublizaciones en llingua asturiana. Pa ello puen cuntar col asesoramientu, tanto en vía alministrativa como contenciosa, de los nuesos xuristes. Per otru a "los sindicatos de la enseñanza que desixan les esplicaciones del casu a la Conseyera d’Alministraciones Públiques y Vocera del Gobiernu, responsable cabera d’esta sangrina discriminación".

Denuncien la discriminación griega escontra les minoríes

Un informe de les Naciones Xuníes afita que turcos, macedonios y xitanos, ente otros pueblos amenorgaos, nun son reconocíos por Atenes, y convida al Estáu helénicu a la proteición de los sos drechos llingüísticos y políticos.
Les Naciones Xuníes denunciaron otra vegada a Grecia la falta de respetu a los drechos colleutivos de les minoríes. Ellaboróse un informe nel que s’afita que Grecia namái reconoz a la minoría relixosa musulmana de Tracia occidental, mentantu ñega la esistencia d’otres identidaes nacionales, llingüístiques o étniques.
Según Le Courrier des Balkans, propónse qu’Atenes afunte haza a la proteición efeutiva "de los drechos al autodetermín, a la llibertá d'espresión y a la llibertá d'asociación" de les minoríes, asina como l'acatamientu de los determinos del Tribunal Européu de los Drechos Humanos. Faise referencia concretamente a les sentencies qu’autoricen la utilización de les pallabres "macedoniu" y "turcu" pa definir a los miembros d'estes comunidaes.
Afita Minority Rights Group qu’en Grecia atópense tamién albaneses, valacos, arvanites, xitanos y pomakos. Grecia nun reconoz oficialmente denguna d'estes minoríes y la única llingua oficial ye’l griegu.
Fai unes selmanes, el Conseyu d'Europa yá criticó al Estáu griegu por "aplicar restricciones a les minories", informa Nationalia.