Mostrando entradas con la etiqueta Centros Asturianos. Mostrar todas las entradas

11/2/16

Los centros asturianos celebren el Día de la Llingua Materna esti vienres 19 de febreru

"El cuidáu y la responsabilidá de calterner una llingua materna como la nuestra ye un llabor de toos/es y un apueste de futuru”. Con esti slogan, la Conseyería d’Educación anima esti vienres 19 de febreru a toles comunidaes educatives a celebrar el Día de la Llingua Materna.

Por cuenta de la celebración del Día Internacional de la Llingua Materna, dende la Conseyería d’Educación y Cultura anímase como tolos años a toles Comunidaes Educatives del Principáu d’Asturies a participar na llectura y reflexón de los manifiestos que s’acompañen.

Los manifiestos que puen descargase falen de la Conferencia Xeneral de la UNESCO que proclamó en payares de 1999 que’l 21 de febreru de cada añu diba celebrase’l Día Internacional de la Llingua Materna. Y asina, dende l’añu 2000, acútase esta fecha pensada pa promover el multillingüismu y la diversidá cultural.

Nesti añu 2016, y acordies colos oxetivos establecíos na Axenda de Desenvolvimientu Sostenible pal 2030,la UNESCO escueye un lema nuevu pal Día de la Llingua Materna: Educación de calidá, llingua (llingües) d’enseñanza y resultaos d’aprendizaxe. La intención que tien la UNESCO ye dexar bien a les clares la importancia de tolos idiomes, y n’especial les llingües maternes, p’algamar una educación de calidá.L’usu de les llingües minoritaries, asegura l’organismu internacional, aumenta la calidá de la educación, meyorando les capacidaes de comprensión y creatividá; y favorez, nes interacciones del aula, un arriquecimientu de les rellaciones sociales y de les estratexes comunicatives.

Y asina, “el dominiu y l’usu de toles llingües, tamién de la llingua asturiana, ameyora la competencia nesti ámbitu y en tolos aspectos onde’l llinguaxe ye una ferramienta necesaria pa entender, compartir, rellacionase y aprender. N’Asturies tenemos una llingüa materna, l’asturianu, que podemos aprender na escuela, nel institutu o en casa. Que podemos escuchala na música o lleela nos cuentos y nos llibros. Falar l’asturianu ye, en definitiva, abrir una puerta al conocimientu de lo nuestro, ye abrir una ventana a otres llingües romániques y ye abrir los güeyos a un mundu enllenu de posibilidaes“. Fonte: asturnews.com

21/9/15

Los Centros asturianos celebraron el Día d’Asturies

Aprés-midi "Folklore" sur la Grande Place

Esta fin de Selmana, munchos centros asturianos espardíos per el mundu, como los de Bruxeles na Grande-Place o Barcelona nes sos instalaciones, celebraben el Día d’Asturies con actuaciones folclóriques y romeríes asturianes.

En Bruxeles, vistiose como tolos años al Menneken Pis cola montera y el traxe asturianu y la capital europea tuvo su tradicional “Après-midi “Folklore”sur la Grande-Place”. Asturianos que viven na capital belga aconceyaronse na Grande-Place, centru neurálxicu de la ciudá y danciaron unos bailles tradicionales como se fai davezu cada añu. Esti añu foron munchos los asturianos que pasearon los sos traxes tradicionales pol centru de Bruxeles.

Asturianos dancen col traxe tradicional na Grande-Place de Bruxeles

Asturianos dancen na Grande-Place

Acompañáu pol director de l’Axencia Asturiana d’Emigración, Luis Miguel Fernández Romero, d’aquella, el conseyeru de Xusticia, Seguridá Pública y Relaciones Esteriores, Francisco Javier García Valledor, foi l’últimu representante gubernamental que disfruto en 2006 d’esta xornada na capital belga.

N’aquel momentu celebrábase la fiesta del Día d’Asturies colos emigrantes asturianos residentes en Bruxeles institucionalmente col nomatu de “Día d’Asturies na Emigración”, dempués de les ediciones anteriores de Bonos Aires y Madrid.

Aquel sofitu institucional y emocional a los asturianos del mundu quedo desaniciáu dafechu tres de la xida del gobiernu d’IX.

En Barcelona, a lo llargo de tola fin de selmana actuó’l grupu Xeitu nes instalaciones del propiu Centru Asturianu y nel Born y el sábado y el domingu convocáronse una bona montonera d’actividaes. Asina, esti sábadu 19 de Setiembre, tres de l’actuación de Xeitu na Plaza Comercial nº12, del Centru Comercial del Born y el pregón de tolos años, hubo una Fabada de convivencia nel Centru Asturiany y pola tarde delles actuaciónes músicales (coros y tonada).

Y el domingu celebrose la tradicional Romería de la Santina, entamada cola Conexón Mundial de Radioaficionaos a les ocho la mañana. El Triangular de Fútbol Sala, la gaita y el tambor tradicionales en forma de pasacais, la Misa con ofrenda floral y la non menos tradicional Puya’l Ramu. A les 12 hores hubo una amuesa de Música Tradicional asturiana y Tonada Asturiana, a les 14 hores la xinta nel prau y pela tarde xuegos y deportes asturianos. Fonte: asturnews.com

1/9/15

Iniciativa entama una campaña pal usu de la llingua nos Centros Asturianos

La vocalía d’Asturies Esterior d’Iniciativa pol Asturianu vieno acabante entamar una campaña cola que quier empobinar a los Centros Asturianos la necesidá de que nes celebraciones del Día d’Asturies la llingua asturiana tenga una presencia nomada, como correspuende a cualaquier celebración que tenga a Asturies y la so cultura como motivu.

Iniciativa pol Asturianu va facer llegar a tolos centros asturianos material publicitariu como cartelos onde se fai alcordanza de la necesidá d’usar llingua y precisamente “porque ye un patrimoniu de nós, nel Centru ASTURIANU, usa la llingua d’ASTURIES, nel Día d’ASTURIES (y siempre…)”. Fonte: Asturnews

22/7/13

Iniciativa pol Asturianu presentóse en Madrid

El Centru Asturianu de Madrid foi l'espaciu escoyíu esti mes de xunetu pa la presentación de la organización Iniciativa pol Asturianu a los asturianos residentes nesta ciudá. La Secretaria del Centru Asturianu, Pilar Riesco, presidió l'actu, nel que tamién se presentó la revista Formientu, y que cuntó cola participación de Xosé Bolado, escritor y miembru de l'Academia de la Llingua Asturiana, y d'Inaciu Galán, presidente d'Iniciativa pol Asturianu.

Nel actu participaron dellos los asturianos que se sumaron a la organización dende Madrid, faciéndose socios, como espliquen dende la organización, que comenta qu'amás, "entamáronse conversaciones cola directiva del Centru Asturianu de Madrid pa entamar y recuperar actividaes alredor de la llingua asturiana, como la celebración del Día de les Lletres Asturianes en Madrid o'l so concursu de rellatos. Iniciativa pol Asturianu fizo amás una donación de llibros y revistes n'asturianu pa la Biblioteca Asturianista del Centru, asitiada nel centru de Madrid".

Dende Iniciativa pol Asturianu faen una valoración mui positiva del actu y de les conversaciones calteníes con miembros del Centru Asturianu de Madrid, institución que cunta con miles de miembros.

Fonte: asturnews

falar y lleer