Cursu 'Ser asturianos. Mitu, identidá y hestoria'

Esti cursu entamáu pol Muséu del Pueblu d'Asturies va averanos a la percepción d'Asturies que  foi forxándose a lo llargo del tiempu.

El Muséu del Pueblu d´Asturies presenta un cursu tituláu 'Ser asturianos. Mitu, identidá y hestoria' que va impartir Fe Santoveña Zapatero mientres los meses de marzu, abril y mayu. Va Tener una duración de 20 hores distribuyíes en diez sesiones.

¿Qué idea tenemos los asturianos de nós mesmos? A lo llargo de la Hestoria, hubo distintes maneres d'entender en qué consisti ser asturianos, pero esta idea non solo forxámosla n'Asturies, sinón que nella influyó la imaxe que los non asturianos tienen de nós. Somos como somos, pero tamién como nos ven los demás.

Esti cursu va averanos a la percepción d'Asturies que  foi forxándose a lo llargo del tiempu, encetándola dende l'Antropoloxía Social y Cultural. Van analizase les socesives semeyes que se propunxeron, la parte que tienen de realidá y el mitu que sobre esa realidá se construyó y pervive hasta los nuesos díes.

La duración del cursu va ser de 20 hores en diez xornaes (los díes 2, 9, 16, 23 y 30 de marzu; 6, 20 y 27 d'abril; y 4 y 11 de mayu) y nun horariu de 18 a 20 hores. El matrícula puede facese enantes del 24 de febreru nesti enllaz. El preciu del cursu ye de 20€,

Fé Santoveña Zapatero (Vibañu, Llanes), historiadora y antropóloga, de los llibros 'Vida sexual en la Asturias tradicional' (2006), 'Balada triste de los teyeros de Llanes' (2009), y 'Vestidos de asturianos. 150 años de fotografía e indumentaria en Asturias' (2013). Anguaño trabaya na publicación de la so tesis Traje tradicional, indumentaria popular y construcción del cuerpo en Asturias (1860-1920).

Programa:

1- El Reino de Asturies y la Edad Media. Realidad y mito.
2- El mundo renacentista. La obra de Luis Alfonso de Carvallo.
3- Hidalgos de baja condición. Asturies en el siglo XVIII.
4- Las guerras napoleónicas. Los esforzados “hijos de Pelayo”.
5- El movimiento romántico. La construcción cultural de una Asturies tradicional.
6- El auge de la industria y la minería. La Asturies del proletariado rebelde.
7- La Asturies del Movimiento. Franquismo y asturianismo folclórico.
8- El revisionismo crítico del mito de Asturies en la transición. El nacimiento de la Autonomía.
9- Astures contra Roma. El auge de las ucronías (novela/leyendas histórica alternativa) en el proceso identitario.
10- Conclusiones sobre el mito del carácter asturiano.

Fonte: YeXixon.com

Una carrera de families pol asturianu, novedá nel IV Día de la Reciella

 por Pablo R. Guardado

El domingu 2 d'ochobre'l Muséu del Pueblu d'Asturies va acoyer una edición nueva del Día de la Reciella. La novedá principal d'esti añu va ser la celebración de la carrera de families pol asturianu 'Entaína', que pretende simbolizar la entrega del testigu de la tresmisión del idioma.

Deportes, conciertos, gastronomía, ecoloxía, talleres, lliteratura, xuegos, comida, bébora y pintacares son los ingredientes d'esta xornada qu'entama 'Reciella. Families pol Asturianu' con un ésitu grande dende hai cuatro años y de la qu'Asturies.com ye empresa collaboradora. Cola programación definitiva entovía pendiente de zarrar, 'Entaína' va ser la principal atracción d'esta edición, como se destaca nel cartelu de la folixa, diseñáu por Marco Recuero.

Nél cartel pue vese la entrega d'un testigu en forma de 'A' d'una persona adulta a una neña, en referencia al "propiu idioma y la tresmisión de xeneración en xeneración, aspectu nel que tamos especialmente enfotaos y enfotaes dende los entamos de l’asociación". La xente interesao en participar pue inscribise cubriendo'l formulariu disponible na web de Reciella.

Fonte: Asturies.com

En mayu llega Acampeciendo Fest a Xixón

Cartelu de Verdeando Fest en Xixón

   Acampeciendo Fest naz pa que toos podamos saber un poconín a cerca de lo que ye’l veganismu, el crudiveganismu, el vexetarianismu, la vida sana y les intolerancies, pero d’una manera risondera y en familia.

  Per otru llau, va haber un apartáu especial dedicadoa los celíacos, una y bones ellos formen agora mesmu, una parte de la nuesa sociedad muy importante a la que nos gustaría dar el so protagonismu.

  Acampeciendo pretende aunir nuna fin de selmana llenode sensaciones y emociones, un festival de música, bonos vezos, xornaes de reflexión y conocencies, charres, show cookings, zona market y actividaes en familia.

  Si quies visitar nun ambiente distinto a loque tamos avezaos, adquiriendo conocencies sobre una forma de vidamás saludable y tolerante col mediu ambiente, Acampeciendo Fest te va gustar…Creyer, te va faer sentir meyor, conocer otru tipu d’estilos de vida, de hábitos y si yá formes parte del llau saludable de la vida, conocer xente nuevo y compartir esperiencies.                                                                                            Fonte: asturies.com

López afala a les families pa que’l “Día de la Reciella seya tolos díes del añu”

por Pablo R. Guardado 

La conceyala d’Educación y Cultura de Xixón acompañó nel actu de presentación d’esta xornada a Alberto Fidalgo, de ‘Reciella. Families pol Asturianu’. Va celebrase esti domingu nel Muséu del Pueblu d’Asturies con delles actividaes programaes.

Ana Montserrat López Moro emponderó en primer llugar el llabor de Reciella, asociación que tien como finxos “la tresmisión xeneracional del asturianu nel ámbitu social y familiar” y cola col Conceyu de Xixón vien collaborando nos años últimos, pa depués enumerar estes iniciatives conxuntes, que van continuar nesti cursu. “Animamos a les families a usar l’asturianu en toles situaciones y en tolos momentos, porque ellos son el futuru del asturianu. Que’l Día de la Reciella seya tolos díes del añu”, destacó la edil.

Pela so parte, Fidalgo apuntó que’l III Día de la Reciella “vien enlleno d’actividaes, con un programa que nun va defraudar”, y definiólo como “un día pa que les families asturianes disfruten d’un tiempu d’ociu n’asturianu colos sos fíos y les sos fíes”. En definitiva, “un día pa pasalo bien n’asturianu”.

Pa neños y neñes de 2 a 10 años

L’actividá va principiar el domingu a les11 hores con un taller de xuegos tradicionales asturianos entamaos pola Asociación Cultural Esbilla, pa depués dar pasu al meudía al dúu Mestura y les sos ‘Palabres de carambelu”. Neños y pas van poder disfrutar darréu d’un taller del cocineru Lluis Nel Estrada, previstu pa les 13 hores, de nome ‘Descubriendo los nuesos quesos’, pa lo que ye necesario inscribise previamente’l mesmu domingu pela mañana na tienda del aire de Reciella.

Tres una posa pa xintar, que se va poder facer na barra con productos asturianos que va instalase nel tendayu del Muséu del Pueblu d’Asturies, a les 16 hores va celebrase una gymkhana per tola instalación baxo’l nome de ‘Lletres nel muséu’. Llueu va ser turnu del baille tradicional cola Escuela de Música Tradicional La Quintana y el taller ‘Xugando cola música’, que precisamente depués va ufrir una actuación. Pa finar la xornada, a les 19 hores va haber una danza prima.

Amás d’esta programación, van entamase delles actividaes paraleles, como un pintacares –que va tener el costu d’un euru–, televisión n’asturianu con ‘Presta asgaya’ de TPA o la esposición ‘Agora Quini, agora’. Tamién van instalase puestinos de música y llibros de lliteratura infantil o xuvenil.

Toles actividaes son de baldre y tán destinaes principalmente pa neños y neñes con edaes comprendíes “ente los dos y los diez años”, apuntó Fidalgo, que destacó que n’ediciones anteriores llegaron a pasar alredor de 1.000 persones pel Muséu del Pueblu d’Asturies pa participar nel Día de la Reciella. Reciella recuerda que los pequeños han de tar acompañaos siempre por un adultu en too momentu.

Fonte: Asturies.com

Esposición Chocolate y publicidá n'Asturies nel Muséu del Pueblu d'Asturies

Esposición nel Muséu del Pueblu d'Asturies hasta'l 31 de marzu de 2016

   La fabricación de chocolate n'Asturies remontar al sieglu XVII. Ente 1860 y 1960 esistieron n'Asturies más 300 fábriques de chocolate, y ente 1925 y 1945 foi la cuarta productora d'esti alimentu n'España, detrás de les provincies de Barcelona, Valencia y Madrid. Les fábriques taben partíes por casi tolos conceyos d'Asturies: les ciudaes de Xixón, Uviéu y Avilés, la mayor parte de les villes y numberosos pueblos.

   Hasta mediaos del sieglu XIX, el chocolate ellaborábase artesanalmente con metates o molinos de mano, y a partir de 1853 empieza a fabricase con máquines movíes a vapor. Ye col so industrialización cuando'l chocolate empieza a xenerar una abondosa publicidá con impresos comerciales, envoltorios, cartelos, álbumes y cromos, según oxetos no que s'anunciaben les distintes marques. Esta industria aguiyó'l diseñu y les artes gráfiques n'Asturies. Fueron bien famosos los álbumes de la marca “La Cibeles” (Uviéu y Siero) realizaos por “Alfonso”, Alfonso Iglesias de Vivigo (Navia, 1910-Uviéu, 1988), según los de “La Primitiva Indiana”, “La Herminia”, "Kike" y "Aguirre", de Xixón, y"Agustina", d'Uxo (Mieres).

   La esposición amuesa un conxuntu representativu de toos estos materiales sol títulu de “Chocolate y publicidá n'Asturies”.

   El catálogu de la esposición complementar con un interesante monografía sobre les fábriques de chocolate n'Asturies, trabayu realizáu pola investigadora Claudia Prieto Rodríguez, con un aproximamientu históricu, a manera de presentación, de José Ramón Fernández-Tresguerres. Fonte: http://museos.gijon.es/Muséu del Pueblu d'Asturies

• Chocolate y publicidad en Asturias [catálogo de la exposición]
• Las fábricas de chocolate en Asturias

Preséntase'l cartelu del III Día de la Reciella

El domingu 4 d'ochobre nel Muséu del Pueblu d’Asturies

Como tolos años l’oxetu d’esta xornada ye poder pasar un día completu en familia nun espaciu y nun contestu nel que la música, los talleres, les actividaes y hasta la comida seya n’asturianu.
Nos próximos díes Reciella va dar conocer el programa d’actividaes, que dende la organización anuncien que yá ta zarráu.

Na organización d'esti añu collaboren 40 Primaveres, Asturies.com, Xunta pola Defensa de la Llingua Asturiana, Iniciativa pol Asturianu,Sestaferia Centru Social, La Gijonesa, Escuela de Música Tradicional La Quintana, RTPA, Ediciones Trabe, Impronta, EDITORIAL PINTAR-PINTAR, Asociación Cultural Esbilla y Dúu Mestura.

Como tolos años sofiten l'eventu Muséu del Pueblu d'Asturies,Oficina de Normalización Llingüística de Xixón y Fundación Municipal de Cultura y Educación; y Caxa Rural d'Asturies. Fonte: Asturies.com

De vuelta a Asturies dende Méxicu

Cartelu sidra El Gaitero (1898) recuperáu nel 2015

  El Muséu del Pueblu d'Asturies consigue en Puebla un cartelu publicitariu de sidra axampanao de 'El Gaitero' del añu 1898.

  Esta xoya tuvo'l so orixe nel taller de Litografía Moré Hermanos y Cª, con sede en Xixón, pa depués cruciar el 'charcu' hacia tierres mexicanes. Ehí tuvo hasta que, por casualidá y al traviés de les redes sociales, responsables del muséu conocieran de la so esistencia. "Ye un cartelu del qu'hasta agora nun se conocía exemplar nengún y una muestra de calidá grande del trabayu de la importante industria llitográfica xixonesa del sieglu XIX, de la que se conserven mui pocos cartelos", apunten dende la conceyalía d'Educación y Cultura.

  Tres ponese en contautu col so propietariu, Antonio Ramírez Priesca, responsable de la casa d'antigüedaes La Quinta de San Antonio, esti descendiente d'asturianos nun duldó en donar el cartelu de 114 centímetros d'altor y 77 d'anchura de Valle, Ballina y Fernández al Muséu del Pueblu d'Asturies, onde va tar espuestu na recepción hasta'l 2 d'agostu.
Fonte: asturies.com

El Muséu del Pueblu d’Asturies acueye los alcuentros de mocedá ‘¡Saca la llingua!’

Tendayu del Muséu del Pueblu d'Asturies, Xixón

   Alredor de 350 escolinos de Llingua Asturiana d’once institutos xixoneses van participar esti martes nos XII Alcuentros de la Mocedá cola Llingua: ¡Saca la llingua!. El Muséu del Pueblu d’Asturies acueye un añu más esta actividá na que’l nuesu idioma ye protagonista.

   Dende les 9.30 hores, y hasta les 13.45 hores, los rapacinos y rapacines van poder disfrutar “d’una xornada lúdico-pedagóxica na que s’intenta averar la llingua asturiana a la mocedá de manera prestosa”, apunten dende la Fundación Municipal de Cultura, Educación y Universidá Popular. Pa ello van entamase xuegos tradicionales como la rana, la llave, el dexabolu, los zancos, los aros, el tiru al palu, la pesca la botella, el tiru cuerda, la peonza, carrera de panoyes o carrera de llecheres, y talleres de fotografía, rap, doblaxe y toponimia, asina como una ‘gymkhana’. Tolos institutos tienen asignaos trés talleres, que van dir faciendo de manera rotativa.

   Una de les actividaes más prestoses que se van desendolcar nel Muséu del Pueblu d’Asturies va ser ‘#ElCantarDelVasu’ qu’entamó’l proyeutu Xuncir y que ta teniendo un ésitu mui grande ente los escolinos. Pa finar la xornada, ta prevista una actuación de La Bandina nel tendayu.
Fonte: asturies.com

L'aniciu de l'antropoloxía n'Asturies y James W. Fernández

El Caderalgu americanu entama un clicu nel Muséu del Pueblu d'Asturies Esti martes 24 de marzu, a les 19 hores, va entamar nel Muséu del Pueblu d'Asturies un programa de conferencies enforma interesante nel que van participar los tres primeros antropólogos que vinieron a estudiar Asturies y lo asturiano nos años 70. Esti ciclu de conferencies que lleva por títulu "L'aniciu de l'antropoloxía n'Asturies" va entamar col testimoniu autobiográficu de James W. Fernández, Caderalgu eméritu de la Universidá de Chicago que va entamar les conferencies cola entitulada "Una vida entre vidas. Etnografía y etnología en Asturias. Depués de James W. Fernández va toca-y a la Caderalga d'Antropoloxía Social de la Universidá Complutense María Cátedra que falará'l martes 14 d'abril de "Los vaqueiros y yo. El ritual de paso de una joven antropóloga" y el ciclu va pesllalu'l tamién Caderalgu de la Complutense José Luis García nel martes 12 de mayu con "Cuarenta años d'Antrología Social en Asturias". James W. Fernández, María Cátedra y José Luis García fueron los trés primeros antropólogos que vinieron a Asturies a faer trabayu de campu a principios de los años setenta del sieglu pasáu. El primeru venía d'una universidá norteamericana y los dos últimos de la Universidá Complutense de Madrid. Y agora piden-yos nel Muséu que cúntennos la so esperiencia y el so trabayu d'investigación naquellos años n'Asturies y los estudios que siguieron faciendo sobre los asturianos hasta'l día de güei. El Muséu del Pueblu d’Asturies entama esti ciclu de conferencies cola collaboración de l'Asociación Asturiana d'Antropoloxía y Patrimoniu Etnolóxicu. Fonte: Asturnews

El II Día de la Reciella yá tien programa

El Día la Reciella, aventu qu’organiza l’asociación “Reciella: Families pol asturianu” y que va tener llugar esti domingu 5 d’ochobre nel Muséu del Pueblu d’Asturies, yá tien programa zarráu. Lo mesmo que na primer edición, celebrada nel mes de setiembre del añu pasáu, la programación, qu’entama a les 11 la mañana y rematará a les 7 la tarde cola danza prima, ta enllena d’actividaes de toa triba, simpre col asturianu como idioma vehicular. Asina a partir de les 11.00 la mañana les asociaciones Trebeyos y Esbilla, van empobinar dos espacios con xuegos medievales y tradicionales asturianos respectivamente. Un poco más alantre, a les 12.30 la mañana, ta prevista la exhibición infantil de Bolos organizada en collaboración cola Federación Asturiana, y que tendrá la bolera del Muséu del Pueblu d’Asturies como escenariu. Na mesma van participar neños y neñes federaes de la Peña Morcín, actuales subcampeones infantiles d’Asturies na modalidá de cuatriada. Dempués de la xinta, que podrá realizase nel mesmu recintu al instalase un puestu de comida y bébora, el programa de tarde va entamar cola participación de los promotores de“El cantar del vasu“, iniciativa que tien por oxetu, pente medies del xuegu del vasu, visibilizar la importancia de la tresmisión xeneracional del idioma. Una vuelta ximielgaos los vasos col cantar melgueru que los acompaña, ye tiempu de siguir cola música pente medies del taller d’instrumentos tradicionales dirixíu pol músicu David Varela, qu’entamará a les 17.00 hores de la tarde. Una hora dempués, y como ramu a la xornada, tendrá llugar nel escenariu situáu nel Tendayu del Muséu’l conciertu acústicu de Pop Piquiñín, pal que tienen preparaes dos sorpreses: la participación de convidaos mui especiales y l’adelantu de dellos temes de “Nun mos gusten los llunes“, el so segundu discu n’asturianu. Amás de toes estes actividaes, nel espaciu del Tendayu y el prau central van asitiase dellos puestos: los de lliteratura infantil y xuvenil de les editoriales Trabe y Pintar-Pintar, el de laRede de Normalización Llingüística nos conceyos y el propiu de l’asociación Reciella, con información sobre l’asociación y dellos materiales nuevos y pintacares poniendo color a la Reciella a les 12 y 16.00 hores. PROGRAMA: DÍA DE LA RECIELLA 2014 11.00 Xuegos Medievales (Trebeyos) y Xuegos Tradicionales Asturianos (Esbilla) 12.30 Exhibición Infantil de Cuatriada Bolera del Muséu del Pueblu d’Asturies POSA y XINTA 16.00 “El cantar del vasu” Prau central 17.00 Taller d’Instrumentos Tradicionales Tendayu 18.00 Pop Piquiñín n’Acústico Tendayu 19.00 Danza Prima Prau central Amás: llibros, música, pintacares… Fonte: Asturnews

El Muséu del Pueblu d'Asturies cuelga l'"Atles Sonoru de la Llingua Asturiana" n'internet

  Los cinco volumes del "Atles Sonoru de la Llingua Asturiana”, editaos pol Muséu del Pueblu d’Asturies-Rede de Museos Etnográficos d'Asturies ente 2003 y 2010, tán yá accesibles on line na páxina web de la Rede de Museos Etnográficos d'Asturies (www.redmeda.com). Los 63 documentos sonoros editaos reproducen con calidá dixital les distintes modalidaes llingüístiques d'Asturies (oriental, central y occidental) por aciu relatos narraos de viva voz por falantes naturales de cada zona.

   Pa facilitar l'audición y comprensión d'estos relatos, cada documentu sonoru va acompañáu de la so correspondiente trescripción testual. La so consulta ye llibre y gratuita nesti enllaz.

   Esta serie de documentos sonoros entiende una área xeográfica que percuerre'l territoriu asturianu d'oriente a occidente por aciu grabaciones realizaes en 26 conceyos (Ibias, Degaña, Cangas, Ayande, Tinéu, Somiedu, Miranda, Grau, Yernes y Tameza, Teberga, Quirós, L.lena, Riosa, Morcín, Mieres, Ayeri, Llangréu, Samartín del Rei Aurelio, Llaviana, Sobrescobiu, Casu, Ponga, Amieva, Cangues d’Onís, Onís y Cabrales). Anguaño, dende l'Arquivu de la Tradición Oral del Muséu del Pueblu d’Asturies ta trabayándose na edición d'una serie nueva de documentos sonoros que va entender les distintes “falas” de los 17 conceyos que formen la contorna del Eo-Navia, y que se va incorporar llueu a la edición on line del Atles Sonoru de la Llingua Asturiana”.

    L'oxetivu del Atles Sonoru de la LLingua Asturiana” ye amosar les distintes variantes vives de la llingua asturiana por aciu l'audición de relatos orales, lleendes, cuentos populares, romances y cantares que, gracies a la so edición sonora, convertir nuna manifestación tanxible del patrimoniu cultural inmaterial d'Asturies.                     Fonte: Asturnews                                                 Más información: Enllaz n'Internet

El Muséu del Pueblu d'Asturies homenaxea'l vienres 23 al gaiteru que revolucionó la construcción de la gaita nos años 80

   Esti vienres 23 de mayu, a les 12 hores, va descubrise nel Muséu del Pueblu d'Asturies una placa na memoria del gaiteru y constructor de gaites Alberto Fernández Velasco y va presentase una de les primeres gaites que salieron del so taller, vendida al Muséu de la Gaita polos sos familiares. El fallecimientu d'Alberto Fernández Velasco (1942 - 2011) constituyó un acontecimientu de notable repercusión nel ámbitu de la cultura asturiana y especialmente nel de la música tradicional, nel que gociaba d'una escelente reputación por cuenta de la so dilatada carrera como artesanu fabricante de gaites.

Alberto Fernández Velasco

  Alberto Fernández, padre del también pernomau gaiteru Alberto Fernández Varillas, destacó polos preseos que lleven la so firm,a pola calidá de la factura de les sos gaites, pola so precisa afinación y pol excelente tímbe d'eses gaites, llogrando compatibilizar con ésitu les traces más tradicionales de la sonoridá de les gaites asturianes colos estándares acústicos del nuesu tiempo.

   Anque na so familia nun había tradición musical, Alberto Fernández Velasco aficionose a la música asturiana siendo bien neñu, mercando la so primer gaita cuando tenía dieciséis años. En 1968 treslladose a Xixón pa trabayar como ebanista, oficiu qu'abandonaría pa dedicase a la gaita, faciendo la primera en 1979 según el modelu tradicional del reputáu artesanu Ántonio Álvarez Vega, “Cogollu”, del conceyu de Les Regueres.

   Convencíu de que'l punteru de la gaita precisaba ameyorar no referente a la so sonoridá, empezó a investigar nel campu de l'acústica pa desenvolver preseos que, calteniendo la característica sonoridá de les antigües gaites asturianes, siguieren criterios académicos no referente al so afinación. Fixo'l so primer punteru con escala temperada en 1985 y, de magar, les sos gaites convirtiéronse nes preferíes de munchos gaiteros solistes, tando presente en bona parte de les ediciones del Festival Intercélticu de Lorient dende 1986. La so mayor innovación foi'l punteru cromáticu de dos octaves, desenvueltu a partir de 1988.  Fonte: Asturnews

El Muséu del Pueblu d'Asturies alquier 4 retratos de llabradores pintaos por Prado Norniella nel 1917

   El Muséu del Pueblu d’Asturies acaba d'incorporar a la so coleición cuatro retratos de llabradores asturianos realizaos en 1917 pol pintor José Prado Norniella (Cualloto, Uviéu, 1875 – Madrid, 1937). Los retrataos son la madre, el padre, l'hermanu y la cuñada del pintor, toos vecinos del pueblu de Cualloto (conceyu d'Uviéu). Son olios sobre llenzu y miden 40 x 40 cm.

Les cuatro semeyes pueden vese a partir de güei nel Muséu

   La semeya de la madre foi pintada del natural el 25 d'abril de 1817 y lleva la inscripción siguiente: "Semeya de la mio madre al cumplir 92 años. Nació'l 24 d'abril de 1825”. La semeya del padre ye la única que ta pintada a partir d'una fotografía fecha en febreru de 1904, el mesmu añu en que finó; na semeya apaez la siguiente inscripción: "Semeya del mio padre al cumplir 79 años. Nació'l 12 de febreru 1825 - † 8 marzu de 1904”.

   Les semeyes de llabradores son perrraros na hestoria del arte asturiano. Hai representaciones de llabradores na pintura costumista de fines del sieglu XIX y nel sieglu XX, pero siempres representaos como tipos o escenificando trabayos rurales; sicasí, son bien escasos les semeyes d'individuos concretos pertenecientes a esti grupu social. El campesináu solo va aportar al xéneru de la semeya a partir de la xeneralización de la fotografía y, inclusive, esti accesu va ser tardíu, a partir de los últimos años del sieglu XIX y sobremanera nel sieglu XX, cuando la fotografía abarátase y empieza a estendese por tol territoriu.

   Les cuatro semeyes pueden vese a partir de güei nel Muséu del Pueblu d’Asturies nel espaciu dedicáu a “Últimes alquisiciones”, onde van tar espuestos hasta'l mes de xunetu.

   El Muséu del Pueblu d’Asturies continua cumpliendo d'esta manera coles funciones básiques d'un muséu, que son l'alquisición, caltenimientu, estudiu y espardimientu del patrimoniu cultural.  Fonte: Asturnews

37 restoranes participen nel festival "Xixón de sidra 2013"

Xixón de sidra 2013

   

Arranca "Xixón de sidra" cola participación de 37 restoranes
Dende esti xueves y hasta el próximu 20 d'ochobre, la villa de Xovellanos celebra "Xixón de Sidra", un completu programa cola bébora del país acompañada d'ensundioses propuestes gastronómiques, que van ufiertar les 37 sidreríes que participen anguaño nel festival al pie de los más de 34 llagares que se sumaron al cartelu. La fiesta sidrera escuerre superar les 62.000 botelles que fueron vendíes l'añu pasáu.    "Xixón de Sidra" foi presentáu'l miércoles nel Muséu del Pueblu d'Asturies y ta entamáu por Fenicia Marketing Gourmet, ye concebíu yá polos llagareros asturianos como un puntu de referencia dientro de la cultura rexonal. Esti festival convierte a les sidreríes asturianes en centros d'actividá social y gastronómica, demostrando, asina, qu'estos establecimientos son más que meros llugares d'alcuentru, onde la cultura del escanciáu ye bien importante.    Los llagareros piensen qu'esti eventu'l públicu puede conocer toles sidres qu'anguaño se producen n'Asturies. L'ésitu de la quinta convocatoria d'esti porograma reparar en qu'ente que en 2012 fueron 34 establecimientos los participantes, anguaño yá se algamar la cifra de 37. Cada restorán va acoyer el palu» de sidra del llagar que-y foi asignáu, ufiertando una botella y una cazuela o cazuelona de comida tradicional asturiana de creación propia al preciu únicu de 3 y 4 euros, en función del tamañu de la especialidá culinaria.      Fonte:  Asturies.com

El folclor de Degaña coles panderetes Arcides y María González

El folclor de Degaña, recoyíu nun discu coles pandereteres Arcides y María González como protagonistes

   ‘Arcides ya María, pandereteras de Trabáu (Degaña)’ ye’l títulu del discu últimu asoleyáu pol Muséu del Pueblu d’Asturies. Ésti recueye’l folclor de Degaña al traviés de 37 pieces interpretaes por estes dos hermanes pandereteres.

   “Esti discu ye mui importante porque Degaña ye un conceyu bastante desconocíu, yá que xente como Lomax o García-Matos nun fixeren grabaciones de campu na zona”, esplica Fernando Ornosa, responsable del Archivu de Música Tradicional del Muséu del Pueblu d’Asturies. L’álbum, que se presentó esta mañana nes instalaciones museístiques, permite sentir un repertoriu bayorosu compuestu por 37 pieces ente les que se pueden atopar bailles a lo suelto como 'Las castañuelas', 'La muñeira', 'L’amudar' y 'La jota'; agarraos como 'La rumba' y 'El valse'; cantares d’aguilandu; villancicos; cantares de ronda; y añaes.

   Toles grabaciones fixéronse en Trabáu, pueblu de les hermanes Arcides (1930) y María (1932) González González, ente los años 1995 y 2012 y constitúin una amuesa completa de lo que ye’l folclor d’esti conceyu del suroccidente del país. “Tamos mui contentes y tamién mui arguyoses”, señaló María a Asturies.com, que, al igual que la so hermana, nunca pensó protagonizar un discu “a les nueses edaes”. Sobre los momentos de grabación, apuntó que siempre abrió les puertes de la so casa a los investigadores pa que sintieren el so repertoriu, anque reconoció que, nun primer momentu, sorprendióse de qu’eses pieces musicales foren d’interés.

   Dalgunos d’esos cantares sonaron esta mañana en Xixón, ánde se desplazaron les dos pandereteres. Foi nun actu nel que tamién tuvieron presentes Ornosa; Xosé Manuel Riesgo, direutor de la Fundación Municipal de Cultura, Educación y Universidá Popular; y Leticia González Menéndez; investigadora nel Departamentu d’Historia del Arte y Musicoloxía de la Universidá d’Uviéu. Tres l’actuación d’Arcides y María, tamién interpretaron delles pieces cola pandereta Lorena Rodríguez ‘Chou’ y la propia González Menéndez, amosando asina’l relevu xeneracional na música tradicional asturiana.

   El trabayu que protagonicen les hermanes de Trabáu ye’l discu númberu 15 de la serie 'Fontes sonores de la música tradicional asturiana' qu’asoleya l’Archivu de la Música Tradicional del Muséu del Pueblu d’Asturies. Esta serie creóse col enfotu d’esparder el repertoriu tradicional calteníu na memoria de los músicos y cantantes asturianos.

   Fonte: Asturies.con