Iniciativa pol Asturianu pide’l nome tradicional y popular de “Santuyano” pal nuevu bulevar d’Uviéu

Iniciativa pol Asturianu pide que s’use’l nome tradicional y popular de “Santuyano” pal nuevu bulevar d’Uviéu depués de que se conoza esti llunes que’l nome escoyíu ye l’articial en castellán de “San Julián de los Prados”.

La Vicealcaldesa d’Uviéu, Ana Taboada, en representación del Conceyu d’Uviéu anunció güei llunes pela mañana’l resultáu del procesu participativu ‘Da vida al bulevar’ nel que la ciudadanía podía decidir el futuru nome de la entrada a la ciudá d’Uviéu pela A-66 y ente les distintes opciones, foi la de “San Julián de los Prados” la que más votos algamó.

Y darréu d’ello, apocayá se conociera’l resultáu Iniciativa pol Asturianu, valoraba favoratiblemente l’usu de la participación ciudadana na toma de decisiones nes instituciones pero “camienta que ye importante que siguiendo esta votación nun s’escaeza la toponimia hestórica y, más tovía, cuando’l Conceyu d’Uviéu tien en marcha planes pa la normalización del asturianu asina como pa la recuperación y oficialización de los topónimos tradicionales del conceyu”.

Nesi sen, Iniciativa pol Asturianu recordaba nuna nota de prensa que la zona na que s’inscribe la entrada pela A-66 recibe’l nome, tanto alministrativa como popularmente, de “Santuyano” y asina alcontramos exemplos de la so implantación como ‘Plaza de Santuyano’, ‘Centru d’Estudiu Santuyano’ o la “Ilesia Prerrománica de Santuyano’, declarada Patrimoniu de la Humanidá pola Unesco, ente otros.

El términu “San Julián de los Prados” ye un términu “frutu de la castellanización del nome Santuyano (Santu Iyán > San Julián) y nun tien valor hestóricu y patrimonial. Agora ye’l momentu de caltener la forma popular y da-y vida, ensin contradicir por ello la decisión popular, pues los uvieínos usen de forma mayoritaría la forma Santuyano, y tamos seguros que ven na forma tradicional la meyor forma de llamar a la entrada principal a la ciudá”.

Por ello, Iniciativa pol Asturianu solicita al Conceyu d’Uviéu que siguiendo la votación popular, pero ensin por ello dir escontra les polítiques de recuperación de la toponimia tradicional, que reconoza como nome del bulevar el nome tradicional “Santuyano”nuna muestra del so compromisu cola hestoria, la cultura y el patrimoniu del conceyu uvieín asina como d’un exerciciu de coherencia y respetu nel discursu del gobiernu llocal, yá qu’esta mañana la vicealcaldesa celebraba esta decisión en nome de la recuperación de la tradición y la puesta en valor del patrimoniu, que ye tamién llingüísticu.

Fonte: Asturnews

Les Arriondes/Arriondas. Nun yera pol GPS

Parres: un pasu atrás nuevu na recuperación llingüística

 'Arriondas' apaez nos GPS, al igual que 'Les Arriondes'. La so supuesta ausencia nestos dispositivos yera ún de les escuses daes pa recuperar el topónimu castellanu.

Qu'a los turistes se-yos toma por fatos en munchos sitios ye dalgo bien sabío, pero los visitantes que vienen a Asturies nun suelen entrar nesi perfil de viaxeru desinformáu más pendiente de la comedia o'l chiringuitu que del entornu. Por eso dende un primer momentu l'argumentu de les confusiones que la forma tradicional 'Les Arriondes', oficial dende'l 2009, produz ente los turistes nun se sostién per nengún llau.

Una de les razones que se pudo sentir estos díes pal cambiu nel nome oficial de la villa yera la non apaición de 'Arriondas' nos GPS, dalgo que les redes sociales nun tardaron en desmontar. Asina, un usuariu amosó cómo los GPS de la marca Tomtom, una de les más potentes del mercáu, sí recueyen 'Arriondas', como tamién 'Les Arriondes'. Colos Garmin tamién nun habría problema. D'esta forma nengún turista despistáu podría nun llegar nunca a la capital del Conceyu de Parres si punxera'l topónimu castellanu nel so dispositivu.

Con Google Maps tamién asocede lo mesmo, como se pue comprobar nes imáxenes axuntes a esta noticia.

Semeya del GPS obra de Lluques Pimiangu.Fonte: asturies.com

Intenten castellanizar otra vuelta’l nome llegal de Les Arriondes

Iniciativa pol Asturianu denunciaba esti día la decisión illegal de recuperar el nome castellanizáu de Les Arriondes, que vieno acabante d’aprobar el Conceyu de Parres, colos votos a favor de tolos grupos políticos del (PSOE, Foro, PP ya IX).

La vuelta del topónimu castellanizáu “Arriondas” xunto al popular y tradicional Les Arriondes, recuperáu como oficial en 2009 por decisión del propiu Conceyu, alcordábase esta selmana nel plenu y ensin allegaciones de nengún tipu a la decisión, sigún denuncia esti día Iniciativa pol Asturianu.
La xida ye dicir que la marcha atrás va facese “por razones hestóriques y pol perxuiciu causáu al turismu” a xuiciu de la moción presentada pola agrupación local de Foro Asturias ya Izquierda Xunida, partíos que sigún recuerden dende Iniciativa pol Asturianu “lleven nel so programa autonómicu la oficialidá del asturianu, imposible d’encaxar con esta decisión que da un pasu atrás hestóricu na normalización del asturianu”.

La decisión ye a xuiciu d’Iniciativa pol Asturianu,” illegal dafechu, yá que contradiz al espíritu de la Llei d’Usu del Asturianu de 1998, qu’establecía l’oxetivu de recuperar la toponimia tradicional nun procesu que, ta bien recordalo, anicien los propios conceyos por petición a la Xunta de Toponimia, organismu que fai les investigaciones y lleva al plenu los resultaos pal so discutiniu. Entós, en 2009 naide punxo en dulda que’l topónimu tradicional, el qu’usaren los parragueses pa refirise a la cabeza del so conceyu yera Les Arriondes. Usar les ferramientes qu’establez la Llei d’Usu del Asturianu p'aniciar un cambiu contrariu al espíritu recuperador y normalizador de lo tradicional del testu llegal, va contra derechu”.

Pa Iniciativa pol Asturianu esta ye “una operación que lleva tiempu en marcha, pues dende esta organización reclamóse en numberoses ocasiones l’usu del topónimu oficial Les Arriondes en cartelos y señalítica, inorándose dafechu una petición tres otra. Esto ye lo que güei pue xenerar dalgún problema a les visites, la falta d’una política de recuperación señalítica progresiva. Pela cueta, punxéronse señales nueves y usóse con total impunidá un topónimu derogáu pal usu llegal a lo llargo d’estos años”.

Iniciativa pol Asturianu estudia les midíes a tomar nesti asuntu, pero quier dexar claro que “tolos partíos tán incumpliendo con esta midida los sos programes políticos, que d’una o d’otra manera falen de la promoción del asturianu, pero especialmente grave ye que la propuesta salga d’un partíu que diz defender la oficilidá y que cunte colos votos d’otra formación que tamién la lleva nel programa, como ye Izquierda Xunida. Dende la organización pidiremos a los partíos que tomen midíes contra esta situación, que vaigan en consonancia col so programa”.

Fonte: Asturnews

Denuncien la castellanización continua de la imaxe pública d’organismos del Gobiernu

 Pablo R. Guardado

L’Executivu yá nun sólo nun fai nada pol asturianu, sinón que castellaniza lo poco que tien denominación nel idioma del país. La XDLA ta acabante d’alertar del cambiu del nome y del logotipu de l’Axencia Asturiana de Cooperación al Desarrollu.

Según esplica’l coleutivu cívicu, les comunicaciones qu’unvía esti organismu encargáu de xestionar y controlar les ayudes al desarrollu qu’entama’l Gobiernu ta utilizando un logo nuevu nel qu’apaez la denominación de l’axencia en castellanu, cuando llevaba más d’una década nomándose n’asturianu. “Cuando llega un responsable al que nun-y da más la recuperación del asturianu –como ye'l casu–, esta llingua, ensin más, desapaez de la conseyería”, afirma la Xunta pola Defensa de la Llingua Asturiana (XDLA), que critica l’ausencia de una política normalizadora tresversal nel Gobiernu. Nesti casu concretu, l’organismu depende de Bienestar Social y Vivienda, encabezada por la ex alcaldesa de Llangréu, Esther Díaz, y ta dirixida por Graciela Blanco.

Sicasí, ésti nun ye l’únicu ataque al idioma que se produz recién. Dende última hora d’ayeri, ta na rede la ‘Agenda Cultural de Asturias’, una web entamada por Educación, Cultura y Deporte que pretende apigazar tola ufierta cultural del país. Nella, la llingua asturiana nun ta presente y la toponimia oficial nin siquiera se respeta. “Nun val agora la sida de la falta de presupuestu, disponiendo como dispón esa conseyería d'un Serviciu de Política Llingüística pa traducir los conteníos, nin ye posible que desconozan les formes oficiales de los topónimos qu'ellos mesmos aprobaron nel Boletín Oficial del Principáu d'Asturies hai años y que na mentada web nun se respeten”, alvierten dende la XDLA, coleutivu qu’esixe la rectificación inmediata d’entrambes dos conseyeríes y l'usu públicu del asturianu como muestra del compromisu real cola so recuperación y normalización. Nun ye abondo con dicilo: hai que facelo”.

Fonte: Asturies.com