L’asturianu nel ámbitu internacional

Repitímoslo munches vegaes, los problemes del asturianu tán n’Asturies y nos nuesos representantes políticos, asina como pasa nel restu de territorios onde ye llingua propia. La oficialidá sigue siendo’l camín precisu pa poner en marcha un cambiu. Sicasí, pa Iniciativa pol Asturianu trabayar el campu internacional ye dende qu’entamamos el nuesu llabor, un trabayu imprescindible y al que pensamos que nun se pue renunciar. De mano porque la situación del asturianu nun ye única, y ye importante conocer la situación d’otres llingües en momentos asemeyaos del so procesu de normalización.

Del camín d’estos cinco años nes entidaes internacionales nes que participamos (ELEN y ALCEM) yá llegaron dellos frutos: Güei ye muncho más conocida la situación del asturianu n’otros movimientos de reivindicación llingüística europeos, tenemos rellaciones más fuertes con otres comunidaes llingüístiques minorizaes, pero sobre too, l’asturianu ta en tolos foros europeos en pie d’igualdá con otres llingües en situaciones de minorización, oficiales o non.

Esti cambiu reforció la conocencia de la situación del asturianu nel ámbitu estatal, onde la falta d’oficialidá fai tan difícil visibilizanos. Los movimientos reivindicativos d’otres llingües en meyor situación que la de nueso tiénenmos agora más en cuenta.

Pero si hai un llabor importante nesti camín ye’l d’abri-y a la llingua asturiana’l camín de les grandes instituciones internacionales. Gracies a la nuesa participación activa nestes entidaes europees, la llingua asturiana pudo reivindicase en foros como’l Parllamentu Européu o l’Altu Comisionáu de Drechos Humanos de la Organización de les Naciones Xuníes, ente otros.

Güei, magar que’l trabayu principal sigue siendo buscar soluciones a los problemes que tien l’asturianu equí, nos territorios onde ye llingua propia, les presiones esternes nel ámbitu internacional tienen cada vegada más ecu ya incomoden más a los gobiernos d’Asturies, Castiella y Lleón y España.

La última d’estes ferramientes ye’l Protocolu pa la Garantía de los Drechos Llingüísticos, del que participamos na so redacción y que vamos firmar esti sábadu en Donostia en representación de la comunidá asturfalante. Sedrá una ferramienta clave pal llabor reivindicativu y de normalización nos vinientes años, y l’asturianu tuvo’l so papel nesti campu. Aguardemos agora que los nuesos representantes políticos sepan acoyelu como un documentu que los ayude a faer meyor el so trabayu nel ámbitu de la normalización del idioma.

Fonte: Iniciativa pol Asturianu

Juaristi presenta entrugues nueves a la Comisión Europea

Sobre la discriminación llingüística nel Estáu.

L'eurodiputáu de Los Pueblos Deciden, coalición na que ta integrada Andecha Astur, entrugó a la Comisión Europea polos casos de discriminación llingüística nel Estáu y l'apertura posible d’un procedimientu d’infraición contra España tres la presentación del informe d'ELEN, organización de la que forma parte Iniciativa pol Asturianu, al XXIX Conseyu del Altu Comisionáu de Drechos Humanos de la Organización de Naciones Xuníes (ONX). En concreto, les preguntes plantegaes por Josu Juaristi son les siguientes:

• Si la llamada de la CE a España pa que cese la discriminación basada na llingua ye d’aplicación imediata.
• Si, lo mesmo qu’abrió un procedimientu d’infraición contra Eslovaquia n’abril pol incumplimientu de la Llei de la XE escontra la discriminación en rellación colos neños romanís nes escueles, abrirá un procedimientu d’infraición contra España por contravenir les mesmes normes de la XE contra la discriminación, incluyida la Carta pa los Drechos Fundamentales (Art. 21,22) y la Direutiva sobro igualdá racial, señalándose al CE l’encamientu d’ECRI de que la discriminación llingüística ye una triba de racismu direutu ya indireutu.

"Con estes iniciatives algámase que pasu ente pasu vaiga siendo ca vuelta más conocía la situación de represión llingüística sistemática na que mos afayamos, y faciendo qu'España, y la so sucursal n'Asturies, el 'Principado', vaigan quedando ca vuelta más arrequexaos y n'evidencia na falta de respetu a los drechos humanos más ellementales", afirma Andecha Astur.

Fonte: Asturies.com

Iniciativa presenta na sede de l'ALLA l'informe de la so intervención na ONX

Na semeya, Bordallo, González-Quevedo y Galán.

   Inaciu Galán y Marissa Bordallo  llamen a les autoridaes del Estáu español a tomar midíes pa garantizar la fin de la discriminación de les llingües d’Asturies

   Roberto González-Quevedo, secretariu de l’Academia de la Llingua Asturiana (ALLA), encargóse de recibir el dossier y de conducir un actu que se desendolcó na propia sede de la institución col oxetivu de que’l presidente y la responsable d’Activismu nes Redes Sociales d’Iniciativa pol Asturianu presentaren los resultaos de la so visita a Genèva pa participar nel XXIX Conseyu del Altu Comisionáu de Drechos Humanos de la Organización de Naciones Xuníes (ONX).

   Quevedo emponderó “el llabor mui intensu a favor del asturianu na so faceta social” que fai la organización dende la so creación y señaló la disposición de l’Academia d’apoyar “toda iniciativa a favor de la llingua asturiana”.

   Bordallo, mentes, recordó que la cuestión llingüística ye una estaya más de los drechos humanos, “onde nun hai derechos de primera o de segunda”, y calificó la fecha del 26 de xunu como histórica pal idioma. Esi día, el xueves pasáu, ye cuando la situación de la llingua asturiana llegó a la ONX de la mano de European Language Equality Network (ELEN), organización d’ámbitu européu que trabaya na promoción de les llingües minoritaries y de la que forma parte Iniciativa pol Asturianu.

   Na sesión de control a España del Altu Comisionáu de Drechos Humanos de la ONX, a la qu’acudieron Bordallo y Galán, “denunciáronse delles situaciones por parte de diferentes grupos y ONG, como la Llei Mordaza o los problemes na llende de Ceuta y Melilla”, ente otros. “Nós pudimos presentar la situación d’esclusión y desprestixu que sufre l’asturianu y los sos falantes anguaño”, continuó.

   Tamién tuvieron oportunidá de falar col primer secretariu de la Comisión Española Permanente nes Naciones Xuníes, Vicente Cacho, sobre la cuestión asturiana, y visitar el Centru Asturianu de Genèva, dexando víes abiertes a una collaboración conxunta pa la promoción del asturianu.

   “La nuesa llingua importa nel mundu. Tamos convencíos de que, sía cuál sía’l resultáu futuru d’esta aición, foi un fitu que marca l’entamu del ameyoramientu del presente de la llingua de nueso. Un viaxe nel que la responsibilidá nun foi poca; esperamos que los asturianos consideren que tuviemos al altor de les circunstancies”, finó Bordallo.

Desconocimientu de la postura del Gobiernu d’España              Galán, pela so parte, repasó los acontecimientos previos a la presencia’l xueves nel XXIX Conseyu del Altu Comisionáu de Drechos Humanos, como foi la entrega d’un informe énte la ONX a principio d’años al traviés del responsable de Rellaciones Internacionales, Xosé B. Álvarez. “Naquel informe, que presentábemos equí tamién y que yera conxuntu col restu de los idiomes distintos del castellán n’España, denunciábemos la situación de desigualdá de los falantes d’asturianu y galllego-asturianu nel ámbitu d’Asturies, asina como los casos de discriminación sobre ciudadanos por usar o querer usar la so llingua propia en distintos ámbitos”, esplicó.

   “Na nuesa declaración nel plenu del Altu Comisionáu de Drechos Humanos en Xinebra, dimos anuncia de la discriminación llingüística sistemática ya institucionalizada que viven los falantes d’asturianu, y de la que son responsables, tanto’l Gobiernu d’Asturies como’l Gobiernu d’España, incumpliendo la llexislación autonómica y estatal, asina como los trataos internacionales roblaos por España, talos como la Carta Europea de les Llingües Minoritaries, rafiticada pol estáu español en 2001, incluyendo la proteición del asturianu, ya incumplida dende entós de forma constante”, esplicó’l presidente d'Iniciativa, qu’añadió que la embaxadora d’España na ONX “nun respondió a les nueses reivindicaciones nin nun sentíu nin n’otru, y polo tanto desconocemos la postura del Gobiernu d’España, acullá de la continua falta d’acción y cumplimientu de la responsabilidá na promoción y normalización del idioma, que comparte col principal responsable d’esta situación, el Gobienu d’Asturies”.

   L’Altu Comisionáu de Drechos Humanos emitirá agora un informe de lo tratao na sesión del xueves, pero Iniciativa pol Asturianu nun quier dexar pasar el tiempu y va pidir “al Conseyu de Drechos Humanos, col sofitu de los Estaos Miembru, que tomen les midíes necesaries y que llamen a les autoridaes competentes nel Estáu español a rindir cuentes y tomar midíes pa garantizar la fin de la discriminación de les llingües d’Asturies”.

“Les instituciones asturianes han tomar mui en serio esta situación, yá que l’atención d’organismos como l’Altu Comisionáu de los Drechos Humanos de la Organización de les Naciones Xuníes demuestra que la cuestión perxudica la imaxe de la democracia española y asturiana, con situaciones más propies d’estaos con sistemes totalitarios, que d’estaos modernos y plurales onde se respeta la diversidá llingüística de la so población”, finó Galán

“Aspeutos positivos”  Entrugáu pola postura de l’ALLA énte la llexislatura nueva, González-Quevedo apuntó que tovía tán pendiente de la formación de Gobiernu pero apuntó que vio dellos “aspeutos positivos, como que na toma de posesión de los diputamos unos cuantos utilizaron l’asturianu como llingua vehicular”. “L’Academia va tar como siempres faciendo tolo posible pa llograr la meyora de la situación del asturianu a nivel llegal, social y de visibilidá”, concluyó.                                                                              Fonte: asturies.com

Presentación de resultaos de la representación asturiana na 29 sesión del Altu Comisionáu de Drechos Humanos de les Naciones Xuníes

Iniciativa pol Asturianu mandó una delegación a Xinebra pa falar énte l’Altu Comisionáu pa los Drechos Humanos de les Naciones Xuníes

El miércoles a les 12 hores nel llar de l’Academia de la Llingua Asturiana presentaránse los resultaos del viaxe qu’una delegación d’Iniciativa pol Asturianu fixo xunto a la organización ELEN (European Language Equality Network) a la que pertenez, a la sede de les Naciones Xuníes en Xinebra (Suiza) onde’l 25 de xunu celebrábase una sesión de control sobre’l cumplimientu de los Drechos Humanos per parte del estáu español, incluyendo los drechos llingüísticos de los asturfalantes.

Va introducir l’actu un Roberto González-Quevedo, Secretariu de l’Academia de la Llingua Asturiana, esplicando los detalles del viaxe y de les posteriores visites esplicando los resultaos del mesmu, asina como les acciones futures al respective d’esta situación, Inaciu Galán y González, Presidente d’Iniciativa pol Asturianu y Marissa Bordallo, que tuvo xunto al primeru na delegación unviada a la ONX.

Fonte: Iniciativa pol Asturianu

“Ye clara la discriminación sistemática contra les llingües non castellanes”

European Language Equality Network (ELEN), Genèva

   Davyth Hicks, secretariu xeneral d’ELEN, nun duldó n’acusar al Estáu español polos ataques a les llingües diferentes al castellanu. La situación del asturianu va tar presente esti xueves na ONX.

   Según esplicó énte la prensa en Genèva por motivu de la intervención prevista mañana nel XXIX Conseyu del Altu Comisionáu de Derechos Humanos de la Organización de Naciones Xuníes (ONX), l’informe fechu por European Language Equality Network (ELEN) –organización d’ámbitu européu que trabaya na promoción de les llingües minoritaries–, que recueye datos del 2007 al 2013, amuesa “munchos casos de discriminación a posta nel terrén llingüísticu a falantes de catalán, vascu, gallegu, aragonés y asturianu”, ente los que cita inclusive multes policiales y humillaciones nos xulgaos por parte de maxistraos.

   “Considerando la llarga cantidá d’evidencies detallaes nel informe, ye clara la discriminación sistemática contra les llingües autóctones non castellanes nel Estáu español, una discriminación que se tornó institucionalizada”, continuó Hicks.

   Mentes, el vicepresidente d’ELEN,  el valencianu Ferran Suay afirmó que “la discriminación nel Estáu español tanto contra les llingües co-oficiales, como pa col aragonés y l’asturiau, ye inaceptable dafechu y ha de cesar inmediatamente”, pa darréu esixir a la ONX que tome les midíes oportunes pa solucionar esti asuntu.

Iniciativa pol Asturianu, presente en Genèva        La llingua asturiana va tar representada mañana na ONX na sesión na que van tar presentes l’Alto Comisionáu de Derechos Humanos y representates del Gobiernu español, por Iniciativa pol Asturianu, en concreto pol presidente d’esta asociación, Inaciu Galán, y la responsable d’Activismu nes Redes Sociales, Marissa Bordallo. La delegación ibérica complétenla Suay (Acció Cultural del País Valencià), el gallegu Marcos Maceira (presidente de la Mesa pola Normalización Lingüística) y les catalanes Rosa de les Neus Marco y Marga Payola (Plataforma per la Llengua).                                                                                                    Fonte: asturies.com

Adxuntu	Tamañu
Informe d'ELEN presentáu énte la ONX.doc	71.5 KB

Iniciativa viaxa a Xinebra pa falar na ONX sobre l'asturianu

Fadrálo esti xueves 25 de xunu dientro la delegación ibérica d’ELEN Iniciativa pol Asturianu vieno acabante de facer anunciu esta mañana qu'una delegación de l'asociación va participar esti xueves 25 de xunu na misión internacional nel 29 Conseyu de Drechos Humanos celebráu pol Altu Comisionáu de la Organización de les Naciones Xuníes (ONX). Esta visita surde del trabayu entamáu nel ámbitu internacional por Iniciativa y pola pertenencia de la mesma, como representante d’Asturies, a la entidá internacional European Language Equality Network (ELEN) formada por organizaciones en defensa de llingües en peligru de toa Europa. La visita entamó a preparase cuando va unos meses Iniciativa pol Asturianu fizo públicu l’informe que s’apurriera a esti Altu Comisionáu de Drechos Humanos, preparáu pola Vocalía de Rellaciones Internacionales de la organización, dirixida por Xosé B. Álvarez. Agora va ser el momentu nel que se fadrá la so defensa na sesión que dientro d’esti Conseyu va dedicase al cumplimientu de los Drechos Humanos n’España. La delegación ibérica d’ELEN presentará na sesión de control d’esti xueves los casos de discriminación que viven los falantes de les llingües distintes del castellán n’España, incluyendo la situación de violación de drechos humanos llingüísticos que viven n'Asturies los asturfalantes, especialmente negativa pola falta d’oficialidá que namás asturianu y aragonés carecen nel estáu español, magar les recomendaciones feches dende instituciones europees ya internacionales. Los representantes d’Iniciativa pol Asturianu que viaxarán a Xinebra estos díes van participar nuna sesión "onde se fadrá revisión de los Drechos Humanos n’España énte l’Altu Comisionáu y representantes del Gobiernu d’España, que defenderán la so política al respective de les llingües minoritaries. Amás, demientres la so visita, fadrán por dar a conocer la situación del asturianu énte los cientos de representantes internacionales que participarán nesta xornada mundial, na que la propia presencia d’Iniciativa pol Asturianu dexa a les clares la situación d’anomalía llegal ya incumplimientu de los Drechos Humanos que supón la situación llegal de la llingua asturiana, fuera del marcu xurídicu normal de la oficialidá", sigún desplicaben nuna nota de prensa asoleyada esti llunes 22. La delegación que va asistir a Xinebra tará formada pol presidente de la organización, Inaciu Galán, y la responsable d’activismu en redes sociales, Marissa Bordallo. Amás d’esta importante cita, van celebrar un aconceyamientu nel Centru Asturianu de Xinebra, nel que van presentar Iniciativa pol Asturianu a los munchos asturianos emigraos na zona, asina como establecer pontes de collaboración pa la realización d’actividaes y el fomentu del usu del asturianu ente la comunidá asturiana en Suiza. Fonte: Asturnews

La revisión de los drechos llingüísticos nel Estáu español llega a les Naciones Xuníes

Iniciativa pol Asturianu -miembru d'ELEN-, col sofitu de l'ALLA, presentó esti miércoles en rueda prensa l'informe presentáu nes Naciones Xuníes, del que pueden estrayese delles claves:

El pasáu miércoles 21 de xineru en Xinebra (Suiza) llevóse a cabu’l procesu de Revisión Periódica Universal del cumplimientu de los Drechos Humanos nel Estáu español per parte de les Naciones Xuníes (ONX).

Esti procesu tien como oxetivu la revision per parte de trés estaos miembros de la ONX del cumplimientu nun país de la Declaración Universal de los Drechos Humanos (DUDH) y de los alcuerdos y convenios internacionales arreyaos a la mesma. Nesti casu, los estaos del Reinu Xuníu, Sierra Lleona y Macedonia foren los encargaos de revisar la situación del Estáu español.

Col enfotu de dar una visión más realista de lo que lleva asocediendo nesti Estáu les caberes décades, la Rede Europea d’Igualdá Llingüística (ELEN) apurrió un informe onde recoyía dolcenes de casos de violación y discriminación hacia falantes de les llingües diferentes del castellán, ello ye: aragonés, asturianu, catalán, gallegu y vascu.

En dellos casos como’l catalán, los incumplimientos y violaciones de la DUDH yeren mayoritariamente cometíos pola alministración española. Nel casu de la llingua asturiana, l’asociación Iniciativa pol Asturianu (miembru d’ELEN) recopiló más de 25 casos de discriminación nos caberos años, mayoritariamente cometíos per parte de l’alministración pública asturiana y alministraciones llocales. Estos casos diben dende la decision d’un xuez de nun considerer discriminatoriu multar a estudiantes d’una escuela en Villaviciosa con 25 pesetes por cada pallabra que dicíen n’asturianu, a la negación de les alministraciones llocales a almitir instancies nesta llingua, la negación a un ciudadanu asturianu de declarer na so llingua na Audiencia Nacional, o la falta de regularización de la escolarización en llingua asturiana (particularmente nes etapes pre-escolares y de Primaria)

Amás d’ello, tamién recoyía la falta ñidia de les sos obligaciones per parte del Estáu español a la hora de facer cumplir a la Comunidá Autónoma del Principáu d’Asturies y a los Gobiernos llocales la llegalidá vixente (Estatutu d’Autonomía y Llei d’Usu del Bable/Asturianu), qu’obliguen a un tratu igualitariu hacia los falantes d’asturianu al respective del tratu que reciben los que s’espresen en castellán.

A lo cabero, l’informe concluyía que tolos casos recopilaos a lo llargo’l territoriu español amosaben una discriminación sistemática ya institucionalizada, y que la busca de xusticia al traviés de los (hostiles) xulgaos ta yá escosada, lo qu’afita los pegoyos p’apelar a la Corte Europea de Drechos Humanos y al Tribunal de Xusticia Européu y posiblemente L’Haya.

Una delegación d’ELEN tuvo presente nel procesu, onde l’Estáu español espunxo una vision positivista y autocomplaciente de la so realidá interna, a la que los representantes de los trés estaos miembros arrespondieron de forma tolerante y igualmente complaciente.

Maga too esto, los estaos evaluadores sí formularon entrugues y espunxeron la realidá del Estáu no tocante a abusos de drechos fundamentals, como son l’abusu de la fuercia per parte de les autoridaes, les fatídiques polítiques d’aisllamientu de deteníos y la brutalidá de les midíes emplegaes pa refugar la entrada de migrantes desarmaos ya indefensos nes valles de Ceuta y Melilla

Desafortunadamente, Iniciativa pol Asturianu y ELEN camenten que ye inalmisible que nengunu de los estaos revisores se dignare a formular una sola entruga no tocante a los drechos llingüísticos, lo que dexa a es clares la falta de compromisu real per parte de les Naciones Xuníes hacia un drechu fundamental qu’amás ta recoyíu na Declaración Universal de los Drechos Llingüísticos, ellaborada por esta mesma institución y amestada a la Declaración Universal de los Drechos Humanos.

Pa rematar, Iniciativa pol Asturianu quier declarar el so fonderu compromisu hacia la defensa de los drechos fundamentales de los falantes non solo d’asturianu, sinón de toles llingües minorizaes. La próxima cita internacional, na qu’Iniciativa pol Asturianu y ELEN tarán presentes, sedrá nel mes de xunu, en Xinebra, onde la Oficina del Altu Comisionáu pa los Drechos Humanos va evaluar el cumplimientu per parte del Estáu español de la Carta Europea de les Llingües Rexonales o Minoritaries (ECRML), testu que robló y ratificó y qu’inda anguaño ta bien lloñe de cumplir.

Sedrá ellí onde denunciemos los continuaos incumplimientos del Gobiernu d’Asturies y d’España pa col respetu de los drechos civiles de los usuarios d’asturianu, asina como la falta de midíes que favorezan la supervivencia del idioma, talo como se comprometió l’Estáu español na Constitución de 1978 y cola firma en 2001 de Carta Europea de les Llingües Rexonales o Minoritaries.

Volvemos a recordar que la ferramienta necesaria pa entamar a solucionar estos problemes y dar la necesaria seguridá xurídica a los asturianos que tienen por llingua d’usu habitual l’asturianu, ye la reconocencia del asturianu como llingua co-oficial n’Asturies, xunto al castellán, n’igualdá de condiciones. Ye la Xunta Xeneral y les formaciones que tán n’ella, quien tienen la responsabilidá de tomar la inciativa pa que la oficialidá del asturianu seya una realidá, talo y como recomienden les organizaciones ya instituciones internacionales que dende va años vienen analizando la situación sociollingüística y llegal d’Asturies.

Fonte: Infoasturies

Presentación de los datos del informe sobre la situación del asturianu presentáu énte l’Altu Comisionáu pa los Drechos Humanos de les Naciones Xuníes

La situación del asturianu, nes Naciones Xuníes.

Esti miércoles 28 de xineru a les 12 hores nel llar de l’Academia de la Llingua Asturiana presentaránse los datos del informe qu’Iniciativa pol Asturianu apurrió al informe d’ELEN (European Language Equality Network), asociación internacional a la que pertenez esta organización.

Va introducir l’actu Xosé Antón González Riaño, Vicepresidente de l’Academia de la Llingua Asturiana, y esplicando los detalles del trabayu, Inaciu Galán y González, Presidente d’Iniciativa pol Asturianu. Esti informe presentóse la selmana pasada énte l’Altu Comisionáu pa los Drechos Humanos de les Naciones Xuníes en Xinebra (Suiza).

Fonte: Infoasturies

Los Pueblos Deciden presenta na Comisión Europea una entruga sobre la proteición y promoción de les llingües minoritaries y amenaciaes d'Europa

Tres la espublización del informe de La Rede Europea d'Igualdá d'Idiomes (ELEN poles sos sigles n'inglés) sobre“l'esame periódicu universal de la ONX sobre la discriminación y los ataques a falantes de llingües co-oficiales", la coalición Los Pueblos Deciden, por aciu el so diputáu européu, Josu Juaristi, presentó una entruga escrita ante la Comisión Europea.

L'informe de ELEN señala que "la discriminación contra les llingües non castellanes autóctones ye sistémica dientro del sistema estatal español, y que esta discriminación institucionalizóse". La falta de respetu y despreciu contra les llingües co-oficiales ye lamentablemente bien común ente les autoridaes españoles, a pesar de los trataos y convenios internacionales suscritos y ratificaos pol Estáu español.

L'informe analiza una a una la situación de discriminación y ataques que sufren dende l'alministración española'l euskara, el gallegu, el catalán, l'aragonés y l'asturianu y conclúi que los tribunales tienen de protexer a tolos ciudadanos por igual. Amás, señala que "rescampla que la busca de la xusticia al traviés de los tribunales del Estáu español escosóse, lo que da motivos pa una apelación ante'l Tribunal de Drechos Humanos y el Tribunal de Xusticia ya inclusive, posiblemente, ante'l Tribunal de La Haya".

Los Pueblos Deciden preguntó a la Comisión Europea si ye conocedora d'esti informe y si va encamentar al Estáu español a cumplir coles sos obligaciones en virtú de los trataos internacionales y a abandonar una actitú que l'informe califica de "supremacista" nel ámbitu llingüísticu. Josu Juaristi esixe a la Comisión que garantice'l respetu a esti derechu fundamental por que los falantes d'estes llingües nun sía oxetu de discriminación y / o atacaos por autoridaes del Estáu español.

Fonte: Infoasturies

ELEN tresllada al Altu Comisionáu de los Drechos Humanos de la ONX la situación de la llingua asturiana

   La organización internacional ELEN ta acabante de presentar al Altu Comisionáu de los Derechos Humanos de la ONX un informe colos casos principales de discriminación llingüística n'Europa. Ente ellos apaez la situación de la llingua asturiana.

   Iniciativa pol Asturianu, al traviés de la la vocalía de Rellaciones Internacionales, dirixida por Xosé B. Álvarez, collaboró na redaición del documentu treslladando les violaciones de los derechos humanos llingüísticos que viven los asturfalantes. Asina, recueye los casos principales de discriminación y esplica l’estatus llegal del idioma, “que nun tien reconocida la oficialidá magar les recomendaciones feches dente instituciones europees ya internacionales”. A nivel estatal, amás del asturianu, tamién se recueyen situaciones que viven otres llingües gracies a la collaboración de los coleutivos Acció Cultural del País Valencià, Plataforma per la Llengua, Societat Catalana de Sociolingüística, Kontseilua, A Mesa pola Normalización Lingüística, Escola Valenciana y el Consello d'a Fabla Aragonesa.

   European Language Equality Network (ELEN) va defender l’informe nel mes de febreru en Xinebra como parte de la revisión periódica que la Oficina del Altu Comisionáu de los Drechos Humanos de la Organización de les Naciones Xuníes fai sobre'l grau de respetu a los drechos humanos nos países miembros de la ONX. Fonte: Asturies.com

Pieslla'l Congresu d'Idiomes Amenazaos

BARCELONA CLAUSURA EL CONGRESO DE IDIOMAS AMENAZADOS.
Las lenguas minoritarias sitúan al asturiano al borde la extinción.
La asociación afirma que sólo sobrevivirá con la oficialidad. El colectivo aboga por garantizar la enseñanza hasta la universidad.

La Asociación por la Defensa de las Lenguas y las Culturas Amenazadas, que celebró su último congreso entre el 2 y el 4 de julio en Barcelona, pidió por unanimidad que se respetasen los derechos de los hablantes de asturiano. En un resolución hecha pública por la asociación, solicitaron una serie de medidas al presidente del Principado de Asturias, Vicente Alvarez Areces, basándose en "la voluntad de una gran mayoría de asturianos que, después de años, reclama el respeto a sus derechos como hablantes de asturiano".
Entre sus peticiones, destaca la reivindicación de la oficialidad en la próxima reforma del Estatuto de Autonomía, y aseguraron que ésta es la única forma de que la lengua pueda sobrevivir. También pidieron que se garantizase la enseñanza de la lengua a todos los niveles, desde los cursos de Primaria hasta la Universidad.
Además de las ya comentadas, solicitaron que se reconozca la especialidad de lengua asturiana para los profesores de Primaria y Secundaria. Por último, reclamaron la necesidad de que se pongan en marcha medidas eficaces para que la sociedad asturiana pueda utilizar su lengua.
Esta no es la primera vez que la asociación se dirige al Ejecutivo autonómico para pedirle la protección de la llingua, ya que en anteriores ocasiones había hecho público su rechazo al plan de normalización que aprobó el Parlamento asturiano hace unos años, una idea que, a su juicio, no garantizaba su supervivencia. La asociación aseguró en su día que este plan no ofrecía el rango legal suficiente.

La Unesco realiza también una clasificación de las lenguas en peligro de desaparición, en la que aparece el asturiano. En su tercera edición del Atlas de las Lenguas en Peligro en el Mundo, publicado el año pasado y elaborado por la Organización de la ONU, califica la situación del asturiano, y del aragonés, como "peligrosa", debido principalmente a que los niños ya no la aprenden como lengua materna. El estudio también analiza el resto de lenguas que se hablan en España, y destaca que el euskera se encuentra en una situación "vulnerable", ya que, según la Unesco, la mayoría de los niños la hablan pero su uso está restringido a determinados ámbitos. Por su parte, el informe califica el catalán como la lengua minoritaria más fuerte de Europa y también destaca la fortaleza del gallego.

Fonte: La Voz de Asturias

Propuesta de Resolución ONX-Drechos Llingüísticos

Los representantes del Conseyu de Drechos Humanos de les Naciones Xuníes,

1. Reconoz la igual dignidá y valir de toles llingües, en tanto que caúna ye espresión de la identidá de la persona que la fala y de la comunidá a la cuala ésta pertenez,
2. Afita que, na midida que seya respetada la diversidá llingüística tará más garantizada y promovida la convivencia humana, la xunión ente los estremaos seres humanos, que ye fonte d’una paz constructiva ente los pueblos,
3. Pidi a los Estaos y les instituciones internacionales continuar afuntando en toes aquelles polítiques favorables al respetu, la promoción y l'usu social de toles llingües, en tolos ámbitos qu’afeuten la vida individual y colleutiva de les persones,
4. Comprométese, como aportación específica del Conseyu de Drechos Humanos de la ONX, a siguir ocupándose de la tema, porque los drechos llingüísticos puean desendolcase alrodiu’l mundiu, conformemente a los oxetivos conseñaos nel Añu Internacional de les Llingües (2008), y teniendo en cuenta les consideraciones, preocupaciones, vindicaciones, estudios ya iniciatives mentaes, y otros análogos,
5. Demanda que, a curtiu términu (o nel términu de dos años), cola aidanza y sofitu d’esti Conseyu, la ONX aprebe una Declaración Universal de los Drechos Llingüísticos, como complementu necesariu de la Declaración Universal de los Drechos Humanos.

Fonte: Nationalia