Andecha Astur lleva la discriminación llingüística al Parllamentu Européu

Una delegación d’Andecha Astur participa nes “Xornaes de trabayu estratéxicu n’Europa – Los Pueblos Deciden”, y aconceya con representantes de la Comisión y el Parllamentu européu.

La delegación va tratar de los temes qu’agora mesmo tán activándose nel Parllamentu Européu al traviés del eurodiputáu de Los Pueblos Deciden, Josu Juaristi. Concretamente na xornada del miércoles, Llucía Fernández taba esponiendo la situación de discriminación que vive la llingua asturiana, exemplarizándola col reciente casu de discriminación elleutoral de les pasaes elleiciones nacionales y de conceyu nes que se retiraren les papeletes d’Andecha Astur por tar n’asturianu. Fonte: Asturnews

Juaristi presenta entrugues nueves a la Comisión Europea

Sobre la discriminación llingüística nel Estáu.

L'eurodiputáu de Los Pueblos Deciden, coalición na que ta integrada Andecha Astur, entrugó a la Comisión Europea polos casos de discriminación llingüística nel Estáu y l'apertura posible d’un procedimientu d’infraición contra España tres la presentación del informe d'ELEN, organización de la que forma parte Iniciativa pol Asturianu, al XXIX Conseyu del Altu Comisionáu de Drechos Humanos de la Organización de Naciones Xuníes (ONX). En concreto, les preguntes plantegaes por Josu Juaristi son les siguientes:

• Si la llamada de la CE a España pa que cese la discriminación basada na llingua ye d’aplicación imediata.
• Si, lo mesmo qu’abrió un procedimientu d’infraición contra Eslovaquia n’abril pol incumplimientu de la Llei de la XE escontra la discriminación en rellación colos neños romanís nes escueles, abrirá un procedimientu d’infraición contra España por contravenir les mesmes normes de la XE contra la discriminación, incluyida la Carta pa los Drechos Fundamentales (Art. 21,22) y la Direutiva sobro igualdá racial, señalándose al CE l’encamientu d’ECRI de que la discriminación llingüística ye una triba de racismu direutu ya indireutu.

"Con estes iniciatives algámase que pasu ente pasu vaiga siendo ca vuelta más conocía la situación de represión llingüística sistemática na que mos afayamos, y faciendo qu'España, y la so sucursal n'Asturies, el 'Principado', vaigan quedando ca vuelta más arrequexaos y n'evidencia na falta de respetu a los drechos humanos más ellementales", afirma Andecha Astur.

Fonte: Asturies.com

La Xunión Europea responsabiliza al Estáu español pola violación de los drechos llingüísticos

Afirma que compete al Estáu español garantizar los drechos de les minoríes nacionales.

En rempuesta a les entrugues realizaes por Los Pueblos Deciden, coalición de la que forma parte Andecha Astur, tres l’informe de la Rede Europea pola Igualdá Llingüística, na que se recueyen casos concretos d’ataques, violaciones y discriminación escontra los falantes de asturianu y otres llingües del Estáu, la Comisión Europea respuende que nun tien competencies xenerales nesta tema y que compete a los Estaos miembros interesaos (l’Estáu español nesti casu) el “utilizar tolos preseos xurídicos a la so dimposición pa garantizar los drechos de les minoríes nacionales que viven nos sos territorios”.

La Rede Europea pola igualdá Llingüística (ELEN, poles sos sigles n’inglés), aniciada en 2011 pa protexer y dar puxu a les llingües rexonales, minoritaries y en pelligru d’esapaición d’Europa, representa 44 d’estes llingües de 21 países europeos. El 21 de xineru de 2015, la ELEN participó nel desame periódicu universal del Conseyu de Drechos humanos de les Naciones Xuníes y presentó’l so informe sobre casos concretos d’ataques, violaciones y discriminación escontra los falantes de catalán, vascu, gallegu, asturianu y aragonés ente 2007 y 2013.

L’informe conclúi que la discriminación escontra les llingües autóctones distintes del castellán ye sistémica nel sistema estatal español y llegó a istitucionalizase, pesia los estremaos trataos y convenios internacionales suscritos y ratificaos pol Estáu español.

Fonte: Infoasturies.net

Bruxeles acueye un alderique sobre llingües minoritaries

Esti martes 24 de febreru celébrase nes sales del Parllamentu Européu un alderique políticu alrodiu de la situación na que s'alcuentren les llingües minoritaries n'Europa, nel que van participar numberosos representantes de minoríes llingüístiques de toa Europa. El casu asturianu nun va formar parte de les conferencies principales, pero Andecha Astur tien encamentao al eurodiputáu de Los Pueblos Deciden, Josu Juaristi, que presente'l casu de la llingua asturiana pa que seya considerada col debíu procuru. A les 9 la mañana ya se pronunciaron les pallabres d'apertura de la Conferencia que corrieron al cargu de Csaba Sógor, miembru del Parllamentu Européu pol Grupu del PPE; Herbert Dorfmann, Miembru del Parllamentu Européu pal EPP; y Jill Evans, miembru del Parlamentu Européu pelos Verdes-ALE. Tres del entamu, a les 9,30 tuvo llugar el discursu d'introducción, que versara nsobre "El panorama llegal pa la protección de les llingües minoritaries n'Europa", al cargu de Vicent Climent-Ferrando, de la Rede pa la Promoción diversidá llingüística (NPLD). El restu del programa entamó 10 minutos depués col primer panel: Idioma, Identidá y Poder, nel que de faló de "La política llingüística na construcción de narratives nacionales", por parte de Zoltán Kántor, Institutu d'Investigación de les comunidaes húngares nel Esterior. Tamién s'aldericó sobre "La preservación de la llingua minoritaria y la identidá, nel casu de la comunidá turca en Grecia" por Sebahattin Abdurrahman, Federación de Tracia occidental turcos n'Europa (ABTTF) y del "Llinguaxe y la política en Bélxica: ¿llecciones que deprender?" Por Rudi Janssens, de la Universidá Llibre de Bruxeles - BRIO. El segundu panel "Afalagando la diversidá: Caminando p'alantre", incluyía les conferencies "La Comunidá Laden en Tirol del Sur: l'aprendizaxe d'idiomes y el diálogu social" por Paul Videsott, de la Universidá Llibre de Bolzano; "Revitalizar el llinguaxe de la Baxa Serbia: el proyeutu Witaj: esperiencies y ventayes del métodu d'inmersión" por Hannes Wilhelm-Kell, Lausatian Alianza; y "Lo que la XE pue y tien de faer pa les llingües minoritaries" por Johan Häggman, espertu multillingüismu, enantes na Dirección Xeneral de Traducción de la Comisión Europea. A les 11 fízose'l pieslle d'esti alderique que tuvo llugar nel Parllamentu Européu (Bruxeles) Sala A5Y-3, na Rue Wiertz 60-1047 de Bruxeles. Esti seminariu ye una iniciativa de la UNPO en collaboración col Centre Maurits Coppieters, l'Alianza Llibre Europea, el Grupu de los Verdes-ALE nel Parllamentu Européu y el Grupu del PPE nel Parllamentu Européu. La Conferencia tuvo sofitada financieramente pol Parllamentu Européu. Fonte: Asturnews

Los Pueblos Deciden presenta na Comisión Europea una entruga sobre la proteición y promoción de les llingües minoritaries y amenaciaes d'Europa

Tres la espublización del informe de La Rede Europea d'Igualdá d'Idiomes (ELEN poles sos sigles n'inglés) sobre“l'esame periódicu universal de la ONX sobre la discriminación y los ataques a falantes de llingües co-oficiales", la coalición Los Pueblos Deciden, por aciu el so diputáu européu, Josu Juaristi, presentó una entruga escrita ante la Comisión Europea.

L'informe de ELEN señala que "la discriminación contra les llingües non castellanes autóctones ye sistémica dientro del sistema estatal español, y que esta discriminación institucionalizóse". La falta de respetu y despreciu contra les llingües co-oficiales ye lamentablemente bien común ente les autoridaes españoles, a pesar de los trataos y convenios internacionales suscritos y ratificaos pol Estáu español.

L'informe analiza una a una la situación de discriminación y ataques que sufren dende l'alministración española'l euskara, el gallegu, el catalán, l'aragonés y l'asturianu y conclúi que los tribunales tienen de protexer a tolos ciudadanos por igual. Amás, señala que "rescampla que la busca de la xusticia al traviés de los tribunales del Estáu español escosóse, lo que da motivos pa una apelación ante'l Tribunal de Drechos Humanos y el Tribunal de Xusticia ya inclusive, posiblemente, ante'l Tribunal de La Haya".

Los Pueblos Deciden preguntó a la Comisión Europea si ye conocedora d'esti informe y si va encamentar al Estáu español a cumplir coles sos obligaciones en virtú de los trataos internacionales y a abandonar una actitú que l'informe califica de "supremacista" nel ámbitu llingüísticu. Josu Juaristi esixe a la Comisión que garantice'l respetu a esti derechu fundamental por que los falantes d'estes llingües nun sía oxetu de discriminación y / o atacaos por autoridaes del Estáu español.

Fonte: Infoasturies