Laura Menéndez Fernández y Javier Bengoechea lleven el primer ‘Indumentaria’

Na imaxe, d'izquierda  a derecha, Martínez Fuente y Fernández González, terceros clasificaos; Bengoechea y Menéndez Fernández, ganadores; y Caso del Torno y Alonso, segundos.

 Semeya fecha por Ojos de Hojalata.

  Esti domingu celebróse en Grau'l Día’l Traxe’l País, al qu’acudieron más de doscientes persones vistíes col so paxellu tradicional. 40 d’ellos participaron nel concursu ‘Indumentaria’, que ganó Laura Menéndez Fernández y Javier Bengoechea.

  Constantino Menéndez, Consuelu Ríu, Fe Santoveña y Ana Villanueva encargáronse a primer hora d’evaluar a les homes y muyeres que s’apuntaron a ‘Indumentaria’. Foi na capiella los Dolores, momentu nel que los participantes tamién vivieron una sesión fotográfica a cargu del estudiu Ojos de Hojalata.

  Darréu, un numberosu públicu desplazáu a Grau pa disfrutar del Día’l Traxe’l País, a los que se sumaron los munchos visitantes del mercáu dominical de la villa moscona, pudieron disfrutar de la guapura de los paxellos nuna pasarela instalada na Plaza los Dolores. Tres el desfile diéronse a conocer a los ganadores nes dos categoríes: traxe de muyer, que foi pa Laura Menéndez Fernández, y d’home, pa Javier Bengoechea. Dambos llevaron 200 euros y una lliga de llana esclusiva.

  El segundu puestu, mentes, mereciólu Marina Caso del Torno y Miguel Ángel Alonso Guerra, y el terceru Maribel Fernández González y Jonathan Martínez Fuente. La so recompensa foi de 150 y 100 euros, de manera respeutiva, premios patrocinaos pola Caja Rural d’Asturies.

Va tener continuidá

  Tanto’l concursu como la xornada festiva en xeneral tuvieron animaos con música y baille gracies a la pareya de gaita y tambor que formen Arsenio González y Manolo Díaz, el violinista Dolfu Fernández y l’acordión d’Octavio Trapiello. Amás, collaboraron con delles pieces Xosé Antón Fernández ‘Ambás’ y Ramsés Ilesies.

  El bon ambiente vivíu y la respuesta de públicu y ciudadanos vistíos col paxellu tradicional llevó a la conseyera de Festeyos, Elsa Suárez, a confirmar que l’añu qu’entra va repetise esta esperiencia ideada pola empresa de xestión cultural, comunicación y diseñu gráficu B. Alto. Inclusive apuntó’l so deséu de que’l Día’l Traxe’l País s'asentara dientro del calendariu festivu del conceyu.                                                                                    Fonte: asturies.com

Grau recibe la pancarta de 'Conceyos pola Oficialidá'

Por Pablo R. Guardado

 Tres facer una parada n'Avilés el llunes y a la espera de la respuesta del Ayuntamientu sobre'l pidimientu formal de Somos Avilés pa colingala de la Casa Conceyu, la pancarta de 'Conceyos pola Oficialidá' sigue col so viaxe pel país. La próxima parada va ser Grau esti xueves a la espera d'aportar a Morcín
.

 Militantes de la Xunta pola Oficialidá de la Llingua Asturiana (XDLA), impulsores de la inciativa xunto col Conceyu de Bimenes, y miembros de la corporación moscona van colingala a les 19 hores de la fachada de la casa consistorial, tomando'l relevu precisamente de Bimenes na campaña #quelaponganelbalcon. L'oxetivu ye visibilizar el compromisu de más d’un cientu de cargos municipales de casi la metá de los conceyos asturianos cola reivindicación de la oficialidá del asturianu y del gallego-asturiano cola vista puesta na declaración prevista en Bimenes del 2 de xunetu.

Conceyos pola oficialidá en Grau

 Según los datos que manexa la XDLA, el númberu de votos que sumaros los alcaldes y ediles que sofiten la iniciativa 'Conceyos pola Oficialidá' superen los 130.000 votos, con representación de toles formaciones polítiques, "incluyida la de la propia alcaldesa d’Avilés", la FSA-PSOE. La concentración del llunes frente a la Casa Conceyu d'Avilés tuvo la presencia de conceyales d'Izquierda Xunida y Ganemos, amás de los de Somos Avilés. Fonte: Asturies.com

Los Aguilandeiros de San Xuan de Villapañada van percorrer la parroquia 70 años dempués

Aguilandeiros de San Xuan de Villapañada

   Asturies recupera otra mazcarada. Trátase de Los Aguilandeiros de San Xuan de Villapañada, nel conceyu de Grau, que la mañana del día 28 d’esti mes van percorrer la parroquia depués de 70 años d’ausencia.

   “Los informantes tienen ente 80 y 90 años”, apunta Xosé Antón Fernández ‘Ambás’, ún de les persones que ta detrás d’esti llabor de recuperación de la mazcarada d’una parroquia que destaca por tener un albergue de pelegrinos, yá que perhí pasa’l camín de Santiago, y por ser una zona na que se falaba bron. “Gracies al trabayu de campu que fiximos Ramsés Ilesies y yo, al grupu de baille tradicional Xeitu d’Uviéu y a la parroquia, cola que tuvi una xunta pa involucralos na recuperación, tenemos un montaxe pal 28 d’avientu, Día de los Inocentes”, apuntá’l músicu y investigador. La salida ta prevista pa les 10.30 hores del albergue de San Xuan pa llevar a los amazcaritaos en tractor per tolos llugares de la parroquia –amás de San Xuan, Acebéu, La Llinar y Rozadas– “y va ser espectacular”, promete.

   Nesta primer edición participen trés mozos del pueblu, ente ellos el gaiteru, anque la intención ye que la xente de la zona s’enganche y que l’añu qu’entra tome’l relevu. Munchos nun conocíen la tradición “y tán mui ilusionaos por contar con esta actividá cultural”. “Los personaxes son perinteresantes”, continúa Ambás, “dos parexes de maragatos, que van vistíos de manera colorista y baillen; ún que se llama l’escobón, que va con un cucuruchu y enagües blanques, y lleva un ramu de lloréu. Ésti ye’l que llega a la puerta y pide llicencia: ‘¿barremos o nun barremos?’. Si dan aguilandu, barre; y si barre, baillen los maragatos. Llueu va’l gaiteru, que nun va vistíu, la dama y el galán; tamién el diablu, con una cornamenta de vaca na cabeza y un forcáu, que ye’l del que más s’alcuerden los vieyos –xunto al osu– porque ye’l terror. L’osu va cubiertu enteru de pieles d’oveya, lleva una llueca mui grande detrás y va amarráu con una cadena que lleva un paisanu cola cara de negro, l’amu l’osu, que lu manda baillar o tirase al suelu; y ésti escápase y va pola xente. Depués tán dos personaes que se repiten en munches mazcaraes, la vieya y el vieyu; ella pare, y pare un páxaru… El médicu, que mira si la vieya ta preñada o non; el cura, que bendiz tolo qu’estroza’l diablu; y una cenicera, un home vistíu de muyer con un sacu que va tirando ceniza”.

   Los Aguilandeiros, tres percorrer la parroquia, van aportar a San Xuan, frente a la ilesia, pa facer la función. Depués va celebrase una xinta popular cola que finar una xornada histórica pa San Xuan de Villapañada y pa too Grau, yá qu’ésta ye la única mazcarada del conceyu.    Fonte. Asturies.com

Misiva edita "Gran Mentira" y actuación V Santa Fest

Misiva edita 'Gran mentira’ y celébralo con una actuación nel moscón V Santana Fest

 

Grau vive les fiestes de Santiago y Santana y, per quintu añu consecutivu, celebra una nueche dedicada al punk, al hardcore y al hip-hop. Trátase del Santana Fest, onde repiten los llocales Misiva, que tán acabantes d’editar ‘Gran mentira’.
Esti álbum ye’l segundu llarga duración de la banda moscona de punk-rock, que graba los sos cantares tanto n’asturianu como en castellanu. Compuestu por 13 temes rápidos y reivindicativos, esti trabayu ta inspiráu “na xestión política de los últimos años y nel sistema capitalista en xeneral”, según señala na so páxina web. La discográfica valenciana Maldito Digital, qu’edita en formatu dixital y distribúi nes plataformes principales, encárgase dende güei de llevar esti discu a tol mundu tanto en doble CD como en dixital. Enantes, el grupu colgara na so páxina web l'adelantu de diez cantares d'esti trabayu.
Misiva va celebrar mañana esti pasu alantre na so carrera musical en casa con una actuación nel V Santana Fest. Los moscones van tar acompañaos nel escenariu instaláu nel frontón de Grau por McRifle y Efri, The New Ones, The Attack of The Brain Eaters y Tragic Vision. Los conciertos van principiar a les 21 hores y la entrada ye llibre.
Otra manera, la formación de Grau ye ún de los cuatro finalistes que van pelear por ganar la primer edición de FestiAmas tres ganar la semifinal de la fastera occidenta énte grupos del nivel de Bacotexo, Losone y La Bande du Poilet Fou. La final va tener llugar mientres les fiestes uviedines de San Mateo y nella van participar, xunto con Misiva, Seu (oriente) y Ofensivos y Last Days of Eden (fastera central). La fecha prevista ye'l domingu 15 de setiembre nel escenariu de la plaza de la Catedral.

Fonte:  Asturies.com

Xavier Frías y Enrique Carballeira presenten en Grau: Mio ma ye un dragón coloráu

Xavier Frías Conde y Enrique Carballeira presenten llibru nel Colexu Públicu  Bernardo Gurdiel de Grau

"Mio ma ye un dragón coloráu"

    Editorial Asturtoons presentará esti xueves, 2 de mayu, nel colexu Públicu Bernardo Gurdiel de Grau el nuevu llibru en llingua asturiana, de Xavier Frías Conde, tituláu Mio ma ye un dragón coloráu. L'actividá cuntará cola participación de los neños de quintu y sestu cursu del tercer ciclu de primaria y entamará a les doce y media del mediudía. Nel actu tamién participará l'ilustrador del llibru, Enrique Carballeira.

   Autor y ilustrador falarán colos neños del colexu, firmarán exemplares y presentarán esti nuevu volume de 32 páxines ilustráu a color. Mio ma ye un dragón coloráu ye una hestoria onde nun falta la intriga -y sobre too muchos sacos d'humor- qu'enllenen les páxines y determinen les situaciones nes que participen los sos protagonistes. ¿Y si descubrieses un día que to madre ye un dragón coloráu? ¿Qué pasaría?

   Fonte:  Asturnews.

El gochu asturcelta yá tien los sos estatutos n'asturianu

La asociación de criadores de cerdo asturcelta adopta la llingua como lenguaje compartido en sus estatutos

Grau, S. ARIAS

La Asociación de Criadores de Gochu Asturcelta (ACGA) adoptó ayer la llingua asturiana como lenguaje de sus estatutos junto al castellano. Así lo decidió la asamblea anual de la organización, reunida en la Casa de Cultura de Grau. «Queríamos poner por escrito la realidad de nuestra asociación, hay personas que hablan en asturiano y otras en español, así le estamos dando el doble de capacidad de comunicarnos», afirmó José Manuel Iglesias, presidente de ACGA.

Iglesias puso un ejemplo. El secretario de ACGA «habla asturiano y tiene dificultades para traducir todas las actas, así que hemos decidido tomar esta iniciativa y esperamos que cunda el ejemplo en el resto de asociaciones», afirmó. Porque, tal y como piensa, «si queremos que el asturiano sea oficial tenemos que empezar en casa».

Tras la asamblea se celebraron dos charlas. Una de Alejandro Argamentería, del Servicio Regional de Investigación y Desarrollo Agroalimentario (Serida), sobre forrajes y piensos. La otra corrió a cargo de Juan Menéndez, veterinario de ACGA, sobre las posibilidades de ayudas públicas. Iglesias explicó que el negocio del gochu asturcelta va en alza. «Hay más demanda que animales y queremos decir que el gochu está aquí y es rentable», concluyó.

Fonte: La Nueva España

Grau entama un actu poéticu-musical con motivu de la Selmana de les Lletres Asturianes

Con motivu de la celebración de la XXXIV Selmana de les Lletres Asturianes, la Conseyería d’Educación, Cultura y Deporte y el Aula de Les Metáfores organicen en Grau el llunes 29 d’abril un actu poéticu-musical a les 19:30 hores na Capiella los Dolores de Grau y con entrada llibre.

La XXXIV Selmana de les Lletres Asturianes nesta ocasión va tar dedicada a la escritora Nené Losada Rico (Ḷḷuarca, 1921-2009). La obra y la figura de l’autora de Valdés, una de les poetes más reconocíes de la nuesa lliteratura, va ponese en valir con una serie d’actividaes a lo llargo de tola selmana en delles llocalidáes asturianes.

Fonte: Asturnews

VII Certame de Cartes d'Amor

El Foru de Creación y Llectura de la Biblioteca Municipal de Grau y l'Asociación Cultural Valentín Andrés convoquen el Sétimu Certame Lliterariu de Cartes de Amor San Valentín, al que pue presentase una obra orixinal, inédita y non premiada n'otros concursos, en xéneru epistolar, sobre l'amor en cualesquier de les sos manifestaciones, bien en prosa, en versu o en dambes modalidaes, incluyendo versiones en cualesquier materialización gráfica, incluyíu'l cómic.Los testos habrán tar n’asturianu o en castellán.

Les cartes habrán presentase en formatu físicu hasta’l 16 de xineru de 2012 a les 21 hores, con una estensión d’ente una y trés fueyes per una sola cara. Les obres han llevar títulu y van acompañase de los datos completos del autor (incluyíu un teléfonu de contautu), llevándose o mandándose per corréu a Biblioteca Municipal de Grau “Valentín Andrés Álvarez”, Cai Cuetu de la Muria e/n, 33820 Grau (Asturies), indicando nel sobre “Certame de Cartes d'Amor”.
L'anunciu de la carta ganadora del concursu va tener llugar el día de San Valentín de 2012, polos mesmos medios en que se convocó'l concursu. La carta ganadora va recibir como premiu 150 €, un diploma acreitativu y la so espublización na revista “Las Hojas del Foro”.

http://culturagrado.blogspot.com/2011/11/vii-certamen-de-cartas-de-amor.html

Fonte: Asturnews

Biblioteques de poesía en catalán y n'asturianu en Grau

El día 14 d'abril, de magar les 19:00 hores na Capiella los Dolores de Grau, va tener llugar la inauguración de la Biblioteca de Poesía Asturiana de l'Aula de les Metáfores, una iniciativa que se suma a la biblioteca de poesía catalana cola que yá cuntaba la institución moscona. La Biblioteca de Poesía Asturiana va convertise esi día nuna realidá gracies al patrociniu de la Conseyería de Cultura, que va sumar a los fondos yá esistentes na Aula, más de 300 volumes donaos pola Dirección Xeneral de Política Llingüística, que va siguir apurriendo dacuando exemplares a una coleición que suma nesti momentu más de 400 y que va axuntar les referencies ineludibles de la poesía asturiana de tolos tiempos, dende Antón de Marirreguera a Antón García.

Van compartir espaciu na Biblioteca los clásicos de la poesía asturiana como’l Padre Galo, Constantino Cabal, Teodoro Cuesta o Xuan María Acebal, los autores del Surdimientu, Xuan Xosé Sánchez Vicente, Manuel Asur, Xuan Bello, Berta Piñán, Antón García, Pablo Antón Marín Estrada, Lourdes Álvarez o Esther Prieto, y los más nuevos continuadores d'esa tradición, como Xandru Fernández, Vanessa Gutiérrez, Pablo Texón o Héctor Pérez Iglesias. La Biblioteca va poner a dimposición de los llectores tamién les antoloxíes más importantes que se ficieron fasta la fecha, les principales traducciones y les revistes y demás espublizaciones periódiques que recueyen amueses de poesía n'asturianu.

Nel actu d'inauguración van intervenir los representantes de la Conseyería, el Conceyu de Grau y la Fundación Aula de les Metáfores, pa dar pasu de siguío a un conciertu nel que se van interpretar cantares basaos en testos de dalgunos de los más destacaos poetes asturianos.
L'alcuerdu suscritu cola Conseyería de Cultura y Turismu contempla tamién la realización conxunta d'actividaes de promoción de la poesía asturiana. Nesi sen, destaca la collaboración de l'Aula de les Metáfores na próxima Selmana de les Lletres Asturianes, dedicada al escritor llangreanu Mánfer de la Llera. El 5 de mayu, a les 20:00 hores na Capiya de los Dolores, trés poetes que se cunten ente los más representativos de les socesives xeneraciones del Surdimientu, Xuan Xosé Sánchez Vicente, Xuan Bello y Vanessa Gutiérrez, van lleer poemes propios y van esponer la so valoración de la obra y la figura del poeta homenaxáu.

Fonte: Asturnews

Aprebóse'l Minor d'asturianu na Universidá d'Uviéu

El Conseyu de Gobiernu del Principáu aprebó los nuevos graos universitarios, ente los que ta ‘Llingües Modernes y les sos Lliteratures’, nel que s’inclúi’l Minor d’Asturianu.
Asina, el Principáu dio-yos el preste a los decretos pa la implantación de les enseñances oficiales de 22 graos na Universidá d'Uviéu, lo que supón el camudamientu de les titulaciones esistentes a los planes del Espaciu Européu d'Educación Superior, que van entrar en vigor el próximu cursu 2010-11.
Asina, aprobaron pa la Facultá de Filoloxía los cuatro nuevos graos; ‘Estudios Clásicos Románicos’, ‘Estudios Ingleses’, ‘Llingua Española y les sos Lliteratures’ y ‘Llingües Modernes y les sos Lliteratures’, nel que s’incluye'l Minor de Llingua Asturiana, como un bloque d’ocho asignatures y 48 creitos.
El so plan d’estudios, qu’entrará en vigor en 2011-2012, contempla seyes asignatures d’estudiu de les característiques del propiu idioma, una d'historia de la llingua, onde se darán les claves de la sociollingüística y una cabera de lliteratura.
L’aprebación d’esta mención d’asturianu foi motivu d’una crisis dientro de la Facultá de Filoloxía, que llevó a la dimisión de la presidenta de l’Academia de la Llingua, Ana Cano, como Decana, tres que se refugara la presencia del asturianu dientro de los estudios reglaos por una enmienda del profesor Félix Fernández de Castro.
Meses depués, la Xunta de la Facultá aprobó, col votu de la propia Ana Cano, la propuesta del decanu en funciones, José Antonio Martínez, d'una minor d’asturianu de 48 creitos. Sicasí, dende’l propiu movimientu de reivindicación llingüística nun hubo consensu sobre’l títulu.
Asina, la Xunta pola Defensa de la Llingua dixo que la Minor yera claramente insuficiente, porque caltién a la llingua asturiana nun estatus marxinal, en comparanza col rangu qu'ocupen el restu llingües con estudios reglaos de filoloxía.

Mientres, el Conceyu Universitariu pol Asturianu (CUPA), espresó la so felicitación a la Xunta de Facultá de Filoloxía pola aprobación de la propuesta, calificándolu de pasu hestóricu pal asturianu.
Anguaño, los estudios reglaos d’asturianu tovía tienen que pasar el preste de l’Axencia Nacional d’Evaluación de la Calidá y l’Acreitación (ANECA), que pel momentu nun punxeron denguna oxeción a la titulación.
Del mesmu mou, la Minor, al igual que tolos estudios universitarios, van analizase añu a añu y puen desaniciase en cualesquier momentu si nun tienen demanda. Del mesmu mou que si quiten otres y salvase la d’asturianu, pue dir ganando tarrén.

Fonte: Asturies.com

Grau acoyerá'l mayor fondu de poesía catalana fuera del so dominiu territorial

La villa de Grau va acoyer el mayor fondu bibliográficu de poesía catalana fuera del dominiu territorial d'esti idioma (Cataluña, el País Valencianu y les Islles Baleares). Va tar na biblioteca del Aula de les Metáfores de la villa moscona, y va abrir al públicu de magar la seronda.

Trátase d'una iniciativa frutu d'un conveniu robláu ente la Fundación Aula de les Metáfores, l'Institut Ramon Llull y la Institució de Lletres Catalanes.
En virtú del mesmu, esiste'l compromisu d'instalar nel espaciu moscón una coleición de poesía catalana que, según el direutor del Aula, Leopoldo Sánchez Torre, "nun esisten en denguna población fuera del dominiu catalán". Tovía nun ye posible cifrar el númberu de volumes que se van treslladar, pero'l representante de la Fundación adelantró que'l fondu va cuntar colos autores más destacaos de tola hestoria de la lliteratura catalana.
Asina, citó dende nomes de la época medieval, como Ausiàs March, fasta escritores actuales, como Joan Margarit, amás d'otros desapaecíos yá nel pasáu sieglu, como Josep Carner o Joan Maragall.

Los volumes de toos ellos va tar dimpuestos pal públicu en xeneral na biblioteca de la Fundación, abierta los martes y xueves de 17.30 a 19.30, si bien, baxo pidimientu previu al responsable de la Biblioteca municipal, esti espaciu pue abrise en cualquier otru momentu de la selmana.
Sánchez Torre considera que la "poesía catalana ye riquísima y cunta con una calidá estraordinaria", si bien la mayor parte de los sos autores nun son mui conocíos fuera de les sos fronteres llingüístiques. Sicasí, señaló casos como'l de Joan Margarit, que gocia d’una "gran proyeición pública".
Amás del fondu, l'Aula organiza delles actividaes públiques, como la llectura de poemes, na que participen autores catalanes convidaos pa la ocasión.
La idega de la Fundación ye roblar convenios asemeyaos con otros territorios con llingua propia. El prósimu podía ser Galicia, que tamién cunta con una "amplia tradición".

Fonte: Europa Press