La pancarta de "Conceyos pola Oficialidá" al Plenu del Conceyu d'Avilés

• 
  

El plenu del Conceyu d'Avilés tratrará la petición d'escolingar la pancarta de "Conceyos pola Oficialidá".

Nel plenu de güei xueves del Conceyu d'Avilés los Grupos Municipales de Somos Avilés, Izquierda Xunida y Ganemos van pedir a la alcaldesa que respuenda a la petición d'asitiar na fachada de la la Casa de Conceyu de la pancarta de "Conceyos pola Oficialidá" con testu "OFICIALIDÁ pa que nun muerra la nuesa llingua".

El día 6 de mayu, Día de les Lletres Asturianes, conceyales de Somos Avilés asitiaron la pancarta  sobre la fachada de la Casa Conceyu. L'alcaldesa mandó retirar la pancarta porque, entre otros motivos, nun se pidió permisu. Con fecha  de 24 de mayu los Grupos Municipales de Somos Avilés, Izquierda Xunida y Ganemos rexistraron una solicitú na que pidíen que l’Ayuntamientu d’Avilés s’axuntare a la campaña «Conceyos pola Oficialidá», entamada pola organización cívica Xunta pola Defensa de la Llingua Asturiana en collaboración col Conceyu de Bimenes. Al nun tener rempuesta por parte de l'alcaldía, lleven a plenu la solicitú pa que na sesión plenaria se manifieste y dea contestación a la petición.

Na pregunta faese un repasu a los conceyos onde s'asitió la pancarta, destacando que'l conteníu de la pancarta ye una reivindicación polos derechos civiles de los y les asturianofalantes y nun ye un tema partidista o sectariu, como demuestra qu'esta campaña foi sofitada en conceyos con  equipos de gobiernu  pertenecientes a fuercies distintes qu’abarquen prácticamente tol espectru políticu. 

Fonte: Asturies.com

Adxuntu	Tamañu
pregunta_conceyos_oficialida_210716_.pdf	23.71 KB

La pancarta de 'Conceyos pola Oficialidá' dexa Grau y aporta a Morcín

• 
  

por Pablo R. Guardado

Ta encolingada dende esti vienres del balcón de la fachada de la Casa Conceyu.

Nun apara. Tres Bimenes y Grau, y con un pasu intermediu per Avilés, onde ta solicitáu'l permisu pa desplegala del edificiu consistorial, la pancarta de 'Conceyos pola Oficialidá' aporta a Morcín. Conceyales y miembros de la Xunta pola Defensa de la Llingua Asturiana (XDLA), entamadora d'esta iniciativa xunto col Ayuntamientu de Bimenes, colingáronla esta mañana del balcón.

Esta iniciativa forma parte de la campaña #quelaponganelbalcón y tien como oxetivu sumar fuercies de cara a la declaración d'oficialidá que va facer Bimenes el 2 de xunetu, al empar de dar puxu a la reivindicación d'esti derechu fundamental dende los conceyos.

Fonte: Asturies.com

Grau recibe la pancarta de 'Conceyos pola Oficialidá'

Por Pablo R. Guardado

 Tres facer una parada n'Avilés el llunes y a la espera de la respuesta del Ayuntamientu sobre'l pidimientu formal de Somos Avilés pa colingala de la Casa Conceyu, la pancarta de 'Conceyos pola Oficialidá' sigue col so viaxe pel país. La próxima parada va ser Grau esti xueves a la espera d'aportar a Morcín
.

 Militantes de la Xunta pola Oficialidá de la Llingua Asturiana (XDLA), impulsores de la inciativa xunto col Conceyu de Bimenes, y miembros de la corporación moscona van colingala a les 19 hores de la fachada de la casa consistorial, tomando'l relevu precisamente de Bimenes na campaña #quelaponganelbalcon. L'oxetivu ye visibilizar el compromisu de más d’un cientu de cargos municipales de casi la metá de los conceyos asturianos cola reivindicación de la oficialidá del asturianu y del gallego-asturiano cola vista puesta na declaración prevista en Bimenes del 2 de xunetu.

Conceyos pola oficialidá en Grau

 Según los datos que manexa la XDLA, el númberu de votos que sumaros los alcaldes y ediles que sofiten la iniciativa 'Conceyos pola Oficialidá' superen los 130.000 votos, con representación de toles formaciones polítiques, "incluyida la de la propia alcaldesa d’Avilés", la FSA-PSOE. La concentración del llunes frente a la Casa Conceyu d'Avilés tuvo la presencia de conceyales d'Izquierda Xunida y Ganemos, amás de los de Somos Avilés. Fonte: Asturies.com

La XDLA va llevar la pancarta de 'Conceyos pola Oficialidá' a Avilés

• por Pablo R. Guardado

Miembros de la Xunta pola Defensa de la Llingua Asturiana (XDLA) van llevar la pancarta de 'Conceyos pola Oficialidá' esti llunes a Avilés dientro del percorríu qu'ésta va facer per toda Asturies. La intención ye pidir permisu pa colingala de la Casa Conceyu, pa lo que van contar col sofitu de los ediles de Somos Avilés.

Bimenes, impulsora de la campaña 'Conceyos pola Oficialidá' y de la iniciativa de la campaña #quelaponganelbalcon xunto col coleutivu cívicu con vistes a la declaración de la oficialidá nel conceyu yerbatu'l prevista pal 2 de xunetu, foi'l primer ayuntamientu en mostrar la pancarta, la selmana pasada, del so edificu consistorial. Agora, a la espera de treslladala a otros conceyos que solicitaren la so exhibición, como Grau o Morcín, fai la segunda parada n'Avilés.

A les 18 hores los miembros de la XDLA y los cinco ediles de Somos Avilés que firmaron la carta de la iniciativa 'Conceyos pola Oficialidá' van axuntase n'El Parche, frente a la Casa Conceyu tres la pancarta. Mentes, de forma paralela, van pidir de manera formal al gobiernu municipal la colocación de la mesma nel corredor de la Casa Conceyu d’Avilés en feches venideres.

Yá nel Día de les Lletres Asturianes, los conceyales de candidatura de xunidá popular colingaron una pancarta propia reclamando la oficialidá, que tuvieron que retirar a la hora y media por mandáu de l'alcaldesa, Mariví Monteserín. Según señalen dende la XDLA, la sida de la socialista ye "que se trataba d’un mensaxe partidista, demostrando asina’l so calter autoritariu y poco sensible cola cultura asturiana, a la qu’había respetar por mor del so cargu".

Más de cien cargos de cuasi la metá de conceyos

"Que la oficialidá nun ye un oxetivu partidista nin localista nin elitista demuéstralo’l fechu de que la iniciativa 'Conceyos pola Oficialidá' cuenta yá con más d’un cientu de conceyales de cuasi la metá de los conceyos d’Asturies, que fueron escoyíos nes pasaes elecciones municipales dientro de candidatures qu’algamaron en xunto más de 130.000 votos d’electores d’Asturies, y ente los que s’alcuentren persones de cuasi toles formaciones polítiques, incluída la de la propia alcaldesa d’Avilés", añaden dende'l coleutivu cívicu.

Fonte: Asturies.com

Bimenes pon nel balcón la primer pancarta de la Campaña “Conceyos pola Oficialidá”

Esti viernes pela tarde militantes de la Xunta pola Defensa de la Llingua Asturiana y miembros de la corporación de Bimenes colingaron una pancarta nel corredor de la casa conceyu de Bimenes. L’acción enmárcase dientro de la campaña “Conceyos pola Oficialidá” y trata de facer visible’l compromisu de los cargos públicos municipales d’Asturies cola reivindicación de la oficialidá del asturianu y del gallego-asturiano.

La pancarta va tar colingada esta selmana na fachada de la casa conceyu de Bimenes pero ensiguida va arrancar pa un percorríu pela xeografía asturiana, demostrando qu’esta llucha tien apoyos per tol pais. Hai yá unos cuantos conceyos que pidieron ser los siguientes d’esta manifestación y la campaña entamaba a espardese peles redes embaxo’l hashtag #quelaponganelbalcon.

La iniciativa “Conceyos pola Oficialidá“ entamáronla la Xunta pola Defensa de la Llingua Asturiana y l’equipu de gobiernu del Conceyu de Bimenes cola vista puesta na Fiesta de la Oficialidá, que’l 2 de xunetu d’esti añu celebra la so edición númberu venti. Nes primeres selmanes sumáronse a la declaración d’intenciones inicial más de 100 conceyales de cuasi la metá de los conceyos d’Asturies. Los últimos en declarar la so adhesión: dellos miembros de les corporaciones de Cuideiru y Ibias nel día d’ayeri.

La Xunta pola Defensa de la Llingua Asturiana y el Conceyu de Bimenes cuenten con llegar agora a tolos Conceyos pa entamar aína les conversaciones que de xuru van permitir la formulación d’acciones y posicionamientos políticos conxuntos. De ser asina los resultaos faríense públicos na Fiesta de la Oficialidá y llevaríense a la práutica enantes d’acabar la llexislatura.

Fonte: Asturnews

Somos Avilés encolinga una pancarta na Casa Conceyu reclamando la oficialidá

Pancarta nel Ayuntamientu d'Avilés

  A les 10.30 hores d'esti vienres, Día de les Lletres Asturianes, Somos Avilés encolingó una pancarta na fachada de la Casa Conceyu de la villa reclamando la oficialidá. Alcaldía ordenó retirala y, al nun contar con permisu, los conceyales zarraos nel despachu del grupu municipal decidieron retirala sobre'l meudía una vegada algamáu l'oxetivu.

  La pancarta, bien visible dende too El Parche, reza 'Oficialidá. Pa que nun muerra la nuestra llingua', y con ella Somos Avilés pretende reivindicar los derechos llingüísticos de tolos asturianos y asturianes nesta xornada tan especial pa les nueses lletres. A la media hora de colocase nes ventanes del despachu del grupu municipal, Alcaldía yá llamó pa retirala, pero los trés ediles enzarraos pretenden negociar pa qu'ésta permanezca tola xornada hasta la hora de marchar a Uviéu a participar na manifestación de la Xunta pola Defensa de la Llingua Asturiana (XDLA), con salida a les 19.30 hores de la Estación del Norte (Renfe).

  "Na Casa Conceyu yá se colgaron munches pancartes reclamando derechos xustos, pero ye poner una reclamando los nuesos derechos llingüísticos y rápidamente yá la quieren quitar", apuntaba a Asturies.com l'edil Xune Elipe dende'l despachu del grupu municipal na Casa Conceyu. Elipe permanez enzarráu nel mesmu xunto con Yolanda Suárez Castro y Eva Fernández Alonso. Primi Abella y David Salcines nun pudieron participar de l'aición por motivos llaborales.

Hora y media colgada     Al pocu d'encolingala, la Policía Llocal yá acudiera a la zona a comprobar de qué se trataba y treslladaba'l fechu a Alcaldía. La propia alcaldesa Mariví Montserín llamó a Salcines pa pidi-y que la retiraren y responsables municipales acudieren al despachu pa solicitar lo mesmo. "Teniendo mieu que nos la confiscaren y nun poder llevala a la manifestación, y una vez algamáu l'oxetivu d'esta aición propagándística que pretendía visibilizar el conflicu llingüísticu esistente n'Asturies nes instituciones, quitámosla", esplicó Elipe, qu'insistía que la mesma "pretendía reclamar un derechu básicu como ye'l de poder utilizar una de les llingües del país".

  L'edil reconcía que nun solicitaren permisu pa ponela, contando con que nun diben recibir el preste, y anunciaba que pal añu qu'entra sí teníen previsto facelo "a ver qué pasa". Otra manera, Elipe destacó'l bon recibimientu de l'aición ente la ciudadanía, "que paraba a falar con nós", y confirmó l'enfotu de Somos Avilés de siguir "col so trabayu normalizador nel día a día, pa tomar un papel más reivindicativu cuando s'avere la Selmana de les Lletres Asturianes.                                                                                                 Fonte: asturies.com