Carballeira esplica cómo los gatos conquistaron la Tierra de manera silenciosa nel so llibru nuevu

  AsturtOOns ta acabante d'espublizar 'Cuando los gatos conquistaron la Tierra', llibru nel qu'Enrique Carballeira esplica lo que naide quixo contar: cómo estos seres peludos tomaron el nuesu planeta. La editorial presenta un formatu novedosu de 'llibru+CD' pa poder disfrutalu en dispositivos electrónicos.

  "Ehí los tenemos. Conquistaron millones de cases en tol mundu. Fixéronse los dueños de los sofás, de les cocines, de los armarios, de les terraces... Viven como marqueses. Peinámoslos y acariciámoslos a toes hores. Tol día durmiento, comiendo y afayándose en cualesquier requexu...", alerta Carballeira sobre una invasión silenciosa de la que casi naide se decató hasta la fecha.

  Nesti llibru, l'autor piloñés esplica bien toda esta historia, que te va resultar bien prestosa si te gusten los gatos; inclusive tamién si nun te dan más. Pa ello AsturtOOns presenta un formatu novedosu, consistente nun volume de 40 páxines en blancu y negru, con munches ilustraciones y dos páxines de bocetos, y un CD col llibru en formatu Ebook-PDF, con ilustraciones a color, pa que lu puedas cargar nel ordenador, na tablet, nel llector de llibros o nel móvil.

  El so preciu ye de 6 euros y pue adquirise en llibreríes y tamién al traviés de la direición de corréu electrónicu asturtoons@gmail.com                                                  Fonte: asturies.com

"L'Arume de la tierra", d'Enrique Carballeira, gana'l Premiu Alfonso Iglesias de Cómic en llingua asturiana

Enrique Carballeira, responsable de la Editorial Asturtoons y ganador del VI Premiu Alfonso Iglesias de Cómic en llingua asturiana

   L'escritor y periodista Enrique Carballeira gano'l ganó la sesta edición del Premiu Alfonso Iglesias de Cómic en Llingua Asturiana, que concede la Conseyería d'Educación, cultura y Deporte y ta dotáu con 3.000 euros.

   El xuráo encargáu de valorar les obres presentaes, formáu pol dibuxante Netu, l'escritor y guionista Chechu García y el técnicu en materia llingüístico Luis Casteleiro, reunióse güei baxo la presidencia de la directora xeneral de Política Llingüística, Ana María Fueyo.

   A esti galardón podíen presentase cómics d'estilu, tratamientu y tema llibres, escritos en llingua asturiana, y con una estensión mínima de cincuenta páxines, siempre que fueren inéditos y non premiaos n'otros concursos.

   Ente les obres presentaes, el xuráo decidió, por unanimidá, conceder el premiu al cómic "L'arume de la tierra", del que destaca "l'usu de los recursos propios del llinguaxe del cómic, la calidá gráfica y el manexu de los tiempos narrativos al serviciu d'una historia con trasfondo actual". L'autor, Enrique Carballeira, presentóse al concurso col seudónimu Mozer.

   Enrique Carballeira (L'Infiestu, 1970) ye periodista, escritor, diseñador, ya ilustrador. Collaborador avezáu d'Onda Cero y del diariu El Comerciu, escribió dellos llibros pa públicu infantil, cómic y cuentos p'adultos.

   Nel ámbitu d'humor gráficu, ye autor de la tira selmanal "Les coses de Nardo y Quina", qu'apaez dende va dos décades nos periódicos El Nora y El Fielatu. amás nos últimos años punxo en marcha dellos proyectos editoriales, talleres d'escritura. illustración y llingua asturiana, asina como delles iniciatives audiovisuales y d'animación.                                          Fonte: europapress.es

Asturtoons presentó los sos nuevos llibros en Blimea

   

 

Presentación por Asturtoons en Blimea

    

    Ayeri xueves la Casona del Bravial de Blimea acoyó la presentación de les últimes novedaes de la editorial Asturtoons, los títulos “Una mascota pa Carola” d’Enrique Carballeira, “El misteriu del Vassilius Destounis” de Jorge Fernández” y “El misteriu de les histories que s’escribíen soles” de Xavier Frías Conde.

   Nel actu de presentación participaron los escritores Enrique Carballeira y Jorge Fernández, que tuvieron acompañaos pola conceyal de Cultura de Samartín del Rei Aurelio, Gema Suárez Torre, y por Hugo Cortina, el responsable de la Oficina de Normalización Llingüística del conceyu. Carballeira , periodista, ilustrador y escritor de L’Infiestu ye autor d’otros llibros infantiles como “El cuélebre y el principín medranosu” o “El día de los charcos”, por citar dalgunos. Pela so parte, Jorge Fernández ye maestru y pedagogu, autor de narrativa curtia, testos teatrales y lliteratura infantil, con títulos como “El lladrón de galletes” o “Einstein y la relatividá”, ente otros.

   Los autores sorrayaron el mal momentu qu’atraviesa’l mercáu editorial y la dificultá que supón caltener vivu un proyeutu d’estes carauterístiques nesta situación. Al final del actu hubo un alderique colos asistentes y los escritores firmaron exemplares de los sos libros.

   Con esti actu púnxose’l ramu a la esposición “Asturtoons y les Lletres Asturianes”, que pudo visitase nesti centru cultural dende’l pasáu 5 de mayu, y na que se fizo un repasu del llabor d’esta empresa dedicada a la lliteratura infantil asturiana cuando ta a puntu de cumplir 10 años. Alredor d’esta esposición tamién se llevaron a cabu actividaes con varios centros escolares del conceyu, onde los escolinos pudieron charrar colos autores sobre estos nuevos libros.         Fonte:  Asturnews

Xavier Frías y Enrique Carballeira presenten en Grau: Mio ma ye un dragón coloráu

Xavier Frías Conde y Enrique Carballeira presenten llibru nel Colexu Públicu  Bernardo Gurdiel de Grau

"Mio ma ye un dragón coloráu"

    Editorial Asturtoons presentará esti xueves, 2 de mayu, nel colexu Públicu Bernardo Gurdiel de Grau el nuevu llibru en llingua asturiana, de Xavier Frías Conde, tituláu Mio ma ye un dragón coloráu. L'actividá cuntará cola participación de los neños de quintu y sestu cursu del tercer ciclu de primaria y entamará a les doce y media del mediudía. Nel actu tamién participará l'ilustrador del llibru, Enrique Carballeira.

   Autor y ilustrador falarán colos neños del colexu, firmarán exemplares y presentarán esti nuevu volume de 32 páxines ilustráu a color. Mio ma ye un dragón coloráu ye una hestoria onde nun falta la intriga -y sobre too muchos sacos d'humor- qu'enllenen les páxines y determinen les situaciones nes que participen los sos protagonistes. ¿Y si descubrieses un día que to madre ye un dragón coloráu? ¿Qué pasaría?

   Fonte:  Asturnews.