Llaviana instala cartelos indicativos nuevos nos que s’emplega namái’l castellanu

• . El Plenu de Llaviana aprobará la ordenanza d’asturianu

Cartelos nuevos namái en castellanuen en Llaviana

  El Plenu de Llaviana aprobó por unanimidá la Ordenanza Municipal d’Usu de la Llingua Asturiana. El testu, que va pasar agora a esposición pública, incorpora una comisión de siguimientu que va axuntase de manera añal pa velar pol so cumplimientu.

 Cola ausencia d’un conceyal del PSOE, otru d’Izquierda Xunida (IX) y el de Foro, la ordenanza d’asturianu presentada pol equipu de gobiernu socialista salió alantre colos votos a favor de tolos grupos municipales, incluyíu’l Partido Popular (PP). Ésta nació d’un borrador propuestu pol ciudadanu llavianés René Durán, que Somos Llaviana presentó a toles fuercies.

 “Los primeros colos que nos reunimos foi con IX, que presentaron delles propuestes pal testu. Llueu, con estes modificaciones, axuntamos con Foro y el PP, que vieron bien el documentu, polo que quedó asina”, esplica Unai Castaño, voceru de Somos Llaviana. Tres el Plenu de febreru del 2016 l’equipu de gobiernu comenzó a trabayar col borrador presentáu, “pero quedó la cosa parada hasta finales d’añu”, recuerda.

 El martes, finalmente, aprobóse en Comisión el testu definitivu, “que ye’l que presentó’l PSOE con aportaciones del nuesu borrador”, y que s’aprobó de manera inicial ayeri nel Plenu. Agora, tres la próxima espublización nel BOPA pa la presentación de posibles alegaciones enantes, va tornar a la Casa Conceyu pa la so aprobación definitiva.

Satisfaición en Somos Llaviana

 “Tamos contentos, porque, pese a pequeños matices, incorpora les nueses propuestes. Lo importante ye que la ordenanza saliera alantre”, apunta Castaño, que destaca ente elles la creación d’una comisión de siguimientu pa velar porque la ordenanza se cumpla. “Va tener calter añal y nella van tar presentes la téunica del Serviciu de Normalización Llingüística y un representante de cada grupu municipal, que nun tien por qué ser conceyal. Nel nuesu casu va ser René Durán, que foi la persona que comenzó esti trabayu”, esplica’l voceru de la candidatura de xunidá popular.

 D’esta forma, y a la espera de la so aprobación definitiva, Llaviana yá cuenta con una ordenanza que va servir pa regular l’usu del asturianu nel conceyu, asina como’l llabor del Serviciu de Normalización Llingüística, agora mesmu –y hasta fin d’añu–esternalizáu y con una actividá de namái 8 hores selmanales.                                               Fonte: asturies.com

La ordenanza de Llaviana inclúi la creación d’una comisión de siguimientu

Plenu de Llaviana

El Plenu de Llaviana aprobó por unanimidá la Ordenanza Municipal d’Usu de la Llingua Asturiana. El testu, que va pasar agora a esposición pública, incorpora una comisión de siguimientu que va axuntase de manera añal pa velar pol so cumplimientu.

Cola ausencia d’un conceyal del PSOE, otru d’Izquierda Xunida (IX) y el de Foro, la ordenanza d’asturianu presentada pol equipu de gobiernu socialista salió alantre colos votos a favor de tolos grupos municipales, incluyíu’l Partido Popular (PP). Ésta nació d’un borrador propuestu pol ciudadanu llavianés René Durán, que Somos Llaviana presentó a toles fuercies.

“Los primeros colos que nos reunimos foi con IX, que presentaron delles propuestes pal testu. Llueu, con estes modificaciones, axuntamos con Foro y el PP, que vieron bien el documentu, polo que quedó asina”, esplica Unai Castaño, voceru de Somos Llaviana. Tres el Plenu de febreru del 2016 l’equipu de gobiernu comenzó a trabayar col borrador presentáu, “pero quedó la cosa parada hasta finales d’añu”, recuerda.

El martes, finalmente, aprobóse en Comisión el testu definitivu, “que ye’l que presentó’l PSOE con aportaciones del nuesu borrador”, y que s’aprobó de manera inicial ayeri nel Plenu. Agora, tres la próxima espublización nel BOPA, pa la presentación de posibles alegaciones enantes, va tornar a la Casa Conceyu pa la so aprobación definitiva.        Fonte: asturies.com

Alonso anuncia l’asturianu n’infantil y clase billingüe

El conseyeru d'Educación Genaro Alonso

  El conseyeru d’Educación, Genaro Alonso, estrenó’l mes de marzu na Xunta Xeneral del Principáu cola anuncia de la intención del so departamentu de modificar el currículu del segundu ciclu  d’infantil, pa neños ente 3 y 6 años, pa impartir l’asignatura d’asturianu, amás d’impulsar un plan esperimental que va dexar usala como llingua vehicular en determinaes asignatures y cursos de Primaria.

 Alonso sorrayó que sigue abierta la negociación col Executivu de Mariano Rajoy pa la creación de la especialidá docente de Llingua Asturiana y Lliteratura y anunció que’l llunes que vién habrá un conceyu en Madrid pa falar de la cuestión. Tamién faló de l’adaptación del asturianu al Marcu Común Européu de Referencia de les Llingües na so comparecencia.

 El Conseyeru compareció ante la comisión d’estudiu de la Xunta Xeneral sobre’l réxime de protección y promoción del asturianu y les sos distintes alternatives, y na so intervención aseguró que la so Conseyería va ellaborar un decretu que desenvuelva tol procesu d’alquisición, convalidación, pruebes y reconocencia de los distintos niveles de competencia llingüística en llingua asturiana.

 El Principáu peracaba al paecer un plan que, como asocede en comunidaes con llingües cooficiales, va usar l’asturianu como llingua vehicular pal aprendizaxe d’otres asignatures, esto ye, facer clases billingües n’asturianu, como yá les ufierta n’inglés. La Conseyería d’Educación trabaya nun programa piloto del que pocu más avanzó, sacantes va empezar en dellos cursos de Primaria y en determinaes materies.

 Demientres la so comparecencia, Alonso aseguró tamién que sigue abierta la negociación col Gobiernu del PP pa crear la especialidá docente de Llingua Asturiana y Lliteratura y tamién qu’el so departamentu va ellaborar un decretu nel que van concretar les pruebes, les convalidaciones y les reconocencies de los distintos niveles de competencia llingüística en llingua asturiana.Genaro Alonso avanzó les midíes que punxo en marcha’l Gobiernu y les que ta peracabando col propósitu de fomentar, promover y espublizar l’usu del asturianu y del gallego-asturianu. Ente les más novedoses, destaquen les clases billingües n’asturianu y tamién el cambéu del currículu del segundu ciclu d’Educación Infantil, pa impartir l’asignatura d’asturianu nesta etapa.

 Dientro d’esi marcu educativu, la conseyería realizó un detalláu analís sobre’l tratamientu de la llingua asturiana nos llibros de testu y reclamó cambeos a aquelles editoriales en que les sos publicaciones detectar erros. Coles mesmes, unvió una circular a tolos centros educativos, recordando’l estatus llegal de la llingua asturiana y la necesidá de que los manuales afacer a lo establecío na Llei d’Usu y Promoción del Asturianu y a los decretos de currículu.

 La intervención d’Alonso valoró la función de les subvenciones destinaes a la promoción y normalización del asturianu y del gallego-asturianu. Ente otres, les ayudes pa medios de comunicación, educación musical, edición de llibros y entidaes locales. Amás, incidió en que cada añu convoquen premios a la creación en llingua asturiana.Nel apartáu de medios de comunicación, el conseyeru indicó que la conseyería va amontar la collaboración con Radiar Televisión del Principáu (RTPA) p’aumentar la emisión de los programes n’asturianu. Otra faceta importante ye la formación. L’añu pasáu realizóse un cursu de 60 hores pa profesionales de la información. Agora esos cursos van estendese a más sectores y van ufiertase, al traviés del Institutu Asturianu d’Alministración Pública Adolfo Posada y otres instituciones capacitaes, cursos de formación continua pa personal del Principáu.

 Amás, el Gobiernu va intentar publicar nel Boletín Oficial del Principáu (BOPA) d’una versión n’asturianu de les distintes lleis, disposiciones o asunciones.  Alonso recordó tamién que demientres esta llexislatura dinamizose l’actividá de la Xunta Asesora de Toponimia, con 53 conceyos que cunten yá cola toponimia oficial aprobada y publicada nel BOPA, ocho más col espediente de oficialización avanzáu y  trelce en distintes fases del procesu.                                                                                           Fonte: asturnews.com

Llanera aprueba l'espediente toponímicu por unanimidá

Lugo de Llanera, Llugo

 El Plenu refuga aceptar los nomes de llugar Llugo y El Campo Llugo y caltién los topónimos en castellanu: Lugo y La Morgal.

 A falta de la so espublización nel BOPA, la toponimia tradicional de Llanera, esto ye, l'asturiana, pasa a ser oficial. Asina lo decidió'l Plenu ordinariu de payares por unanimidá de tolos grupos municipales: el PSOE, que tien l'alcaldía gracies al apoyu d'Izquierda Xunida y Somos Llanera, el PP y Ciudadanos.

 Sicasí, esta aprobación nun ta llibre de polémica, y ye que los grupos municipales nun autorizaron los nomes tradicionales recoyíos pola Xunta Asesora de Toponimia 'Llugo' pal topónimu castellanu 'Lugo de Llanera', el llugar más pobláu del conceyu, nin 'El Campo Llugo' pa 'La Morgal'. Ente los argumentos daos pol edil de Cultura, Alfredo Rodríguez, pa xustificar esta decisión ta una supuesta falta de tradición lliteraria y el desusu nel emplegu d'estos nomes ente la población.

 El restu de topónimos asturianos pasen agora a ser oficiales, quedando los castellanos derogaos.                                                                                                 Fonte: asturies.com

Les subvenciones a medios de comunicación n'asturianu aumenten en 10.000 euros

• . Cultura reduz les subvenciones a medios de comunicación n’asturianu nun 37 por cientu
• . Les ayudes a la producción editorial n’asturianu aumenten en 8.500 euros

Conseyería d'Educación y Cultura, n'Uviéu

La Conseyería d'Educación y Cultura espublizó nel BOPA les ayudes al asturianu y gallego-asturiano. Caltiénense les trés llinies de subvención, siendo'l presupuestu'l mesmu que nel 2015 pa la producción editorial y discográfica, y aumentando en 10.000 euros pa los medios de comunicación.

Con esta convocatoria frénase la tendencia de recortes de los últimos años, con descensos continuos superiores al 50 por cientu nes ayudes al asturianu. Nesta ocasión la medra ye del 5,26 por cientu gracies a los 10.000 euros más que la conseyería dedica a les ayudes a los medios de comunicación qu'empleguen l'asturianu, pasando de 80.000 a 90.000, pero hai que recordar que la cifra del presupuestu dedicada a esta estaya nel 2013 foi de 168.000 euros.

No que respeuta a les subvenciones a la producción editorial, ésta caltiense en 90.000 euros, y la que correspuende a la discográfica, en 20.000.                    Fonte: asturies.com

Adxuntu	Tamañu
convocatoria_subvenciones_llibros.pdf	143.11 KB
convocatoria_subvenciones_medios_de_comunicacion.pdf	143.52 KB
convocatoria_subvenciones_discos.pdf	135.82 KB

El BOPA espubliza les nueves bases del Premiu al Meyor Cantar

  Esti día apaecen espublizaes nel BOPA les bases que regulen la concesión del «Premiu al Meyor Cantar» con lletra en llingua asturiana o en gallego-asturianu, al que van poder presentase canciones orixinales de cualquier xéneru comercializaes a lo llargo del periodu qu’estableza la convocatoria.

  Nes nueves bases del premiu esclúyense les pieces tradicionales yá existentes y les versiones o adaptaciones d’obres de creación publicaes orixi- nalmente n’otra llingua; y les canciones que nun s’editaren y grabaren la primer vez nel periodu referíu.

  Van poder concurrir a esti premiu los músicos, a títulu individual o dientro de grupos, que s’alcuentren na situación que fundamente la concesión del premiu, concurriendo nellos les circunstancies previstes nestes bases reguladores y na convocatoria, y que cumplan los requisitos establecíos na Llei 38/2003, de 17 de payares, Xeneral de Subvenciones y na convocatoria.

  Los intérpretes o grupos musicales interesaos van poder presentar al premiu una única canción por trabayu discográficu. D’alcuerdu colo dispuesto na Llei 38/2003, de 17 de payares, Xeneral de Subvenciones, artículu 13, apartáu e), los beneficiarios tienen qu’acreitar tar al corriente de les sos obligaciones tributaries y cola Seguridá Social con anterioridá a dictase la propuesta de resolución de Concesión.

  El procedimientu de concesión va entamase d’oficiu pente medies de convocatoria pública, adoptada por Resolución de la Conseyería d’Educación y Cultura publicada nel Boletín Oficial del Principáu d’Asturies. Los premios en metálico van tar suxetos a los impuestos y retenciones según llei.

  Los intérpretes o grupos interesaos tienen que presentar solicitú de participación según modelu normalizáu que s’establez nel anexu de la convocatoria correspondiente. Les solicitúes tienen que se presentar nel Rexistru Xeneral Central de l’Alministración del Principáu d’Asturies (Edificiu Alministrativu, c/ Coronel Aranda, e/n, planta plaza, sector central, Uviéu) o per cualquiera de los medios establecíos nel artículu 38 de la Llei de Réxime Xurídicu de les Alministraciones Públiques y del Procedimientu Alministrativu Común. Si n’usu d’esti derechu la solicitú se remite per corréu, tien que se presentar en sobre abiertu pa que la solicitú la feche y selle’l personal de correos.

  N’acabando’l plazu de presentación d’orixinales, va facese la selección y el fallu y el Serviciu de Planificación Llingüística, dependiente de la Dirección Xeneral de Planificación Llingüística y Normalización de la Conseyería d’Educación y Cultura, va adoptar toles midíes necesaries pal desenvolvimientu d’estes bases y de la so convocatoria, llevando alantre la ordenación, instrucción y resolución del procedimientu.

  El Xuráu va designalu’l Conseyeru d’Educación y Cultura y va tar formáu por un máximu de nueve y un mínimu de cinco persones rellacionaes col ámbitu de la música asturiana. Va tar presidíu pol Director Xeneral de Plani- ficación Llingüística y Normalización, o persona en quien delegue, y va actuar como secretariu/a personal adscrito a la Dirección Xeneral de Planificación Llingüística y Normalización.

  La selección va tener dos fases: La primer fase va consistir nun llabor de preselección onde los miembros del xuráu van puntuar a caún de los con- cursantes que s’axusten a lo estipulao nes bases; les canciones, nun númberu que señale la convocatoria, que llogren la puntuación global más alta van considerase finalistes. Na segunda fase tien que s’escoyer al ganador/a d’ente la llista de finalistes.

  Pa eso los finalistes tienen qu’actuar en directo defendiendo’l tema seleccionáu na Gala musical del «Premiu al Meyor Cantar» y, tres de les actuaciones, va facese públicu —nel trescursu d’esa Gala— el fallu del xuráu.                       Fonte: asturnews.com

Aprúebase l'Axenda Didáctica Escolar

Puen consultase les actividaes concedíes a los centros que les solicitaren

El vienres 26 de xunu publicóse nel Boletín Oficial del Principáu d'Asturies (BOPA) la resolución pola que s'aprueba la programación anual de l'Axenda Didáctica Escolar.

El plazu pa llevar alantre les actuaciones y actividaes nos centros educativos remata'l 20 de payares del 2015.                                                                                     Fonte: asturies.com

• Actividaes axudicaes a centros d'Educación Primaria.

• Actividaes axudicaes a centros d'Educación Secundaria y/o Bachilleratu. 

El BOPA espubliza les nueves bases de les subvenciones pala normalización social del asturianu y del gallegu-asturianu

BOPA núm. 148  de  27.06.2014

    Nel Boletín Oficial del Principáu d'Asturies del pasáu día 27 de xunu del 2014 publicáronse tres resoluciones poles que s'aprueben les bases reguladores de la concesión de subvenciones pa la edición de llibros y discos y pa les actividaes de medios de comunicación n'asturianu o gallego-asturianu. Por estes bases van mandase les convocatories de subvención que se fagan dende ágora.

Les bases recueyen delles novedaes al respective de les calterístiques que van tener los proyeutos interesaos en algamar subvenciones pala normalización llingüística, no que cinca a los medios de comunicación.

Ente los cambeos rexistraos alcuéntrense cuestiones como que namái van almitise los gastos de personal si la persona beneficiaria acreíta la so rellación directa col proyectu y la so acreitación va riquir la presentación de la nómina, los documentos correspondientes d’ingresu de cuotes de seguridá social (tC1 y tC2) y l’acreitación del ingresu na axencia tributaria de les cantidaes reteníes al personal col modelu 111. Nel casu de persones físiques daes d’alta nel réxime especial del trabayu autónomu, el trabayu desenvueltu por elles mesmes pa la execución del proyectu va poder acreitase con una declaración responsable na que se concrete’l plan de trabayu onde consten les hores de dedicación y el costu por hora.

Amás nun va poder incluyise como gastu subvencionable l’importe del iva deducible, cuando la persona o entidá beneficiaria tea obligada a facer declaración del impuestu mentáu; polo tanto, la cantidá que va poder imputase como gastu ye la correspondiente a la base imponible de los justificantes.

Más información: Bases de les subvenciones musicales pa la promoción de la música n'asturianu y gallego-asturianu.

Fonte: Asturnews

L'Ayuntamientu de Bual pidirá la derogación del decretu d'oficialidá de la toponimia del conceyu

La denominación única de la capital del conceyu n'eonaviego aprobada pol conseyu de Gobiernu cunta col refugu de dellos vecinos del municipiu.

Oficializada la toponimia tradicional de Bual | Consulta la toponimia oficial d'Asturies

El Boletín Oficial del Principáu d'Asturies (BOPA) espublizó'l xueves el decretu d'oficialización de la toponimia tradicional del conceyu de Bual. Una midida alcordada pol conseyu de Gobiernu col sofitu del Ayuntamientu, que cunta col refugu d'una parte de los vecinos del municipiu. Al traviés del grupu de Facebook 'Queremos que Boal siga llamandose Boal y no Bual', más de milenta persones piden la derogación del decretu. Tamién tan movilizándose en Twitter, onde la etiqueta #YosoyDeBoal ta sirviendo a los promotores de la iniciativa p'asoleyar el so malestar por esti cambeu.

   La torna a la denominación billingüe Boal/Bual parez ser un fechu. L'asociación Foro Boal 3000 aseguró ayeri na so páxina de Facebook que l'alcalde del municipiu, José Antonio Barrientos González (PSOE), amosóse "estrañáu" ente tantu "movimientu" y, tres revisar les actes d'aprobación de la propuesta de la Xunta Asesora de Toponimia, dixo qu'hubo "un erru d'interpretación" pol que él mesmu y los conceyales pensaben qu'aprobaben la denominación billingüe pa Bual. Según l'asociación, Barrientos llamó a la conseyera d'Educación pa esplicá-y l'erru y aseguró que'l conceyu va presentar un recursu pidiendo la derogación del decretu.

El precedente de Carreño.      El mesmu xueves nel que'l BOPA asoleyaba el decretu d'oficialización de la toponimia tradicional de Bual, espublizábense tamién les modificaciones del decretu de Carreño. El plenu del municipiu solicitó la denominación billingüe pa les localides de Quimarán y El Pieloro y la sustitución de El Riistru por El Riestru tres les quexes de dellos vecinos. Foi la primer vegada que se camudó un decretu d'oficialización tres l'aprobación por parte del Ayuntamientu. Según esplica Vítor Suárez  "asoléyase una modificación de la Toponimia oficial d’un conceyu a cuenta de la falsia polémica afalada por 'La Nueva España' y que xenera un escuru precedente".

   El procesu de revisión toponímica encuádrase na Llei del Principáu d'Asturies 1/98, de 23 de marzu, d'usu y promoción del bable asturianu, qu'establez que los topónimos d'Asturies van tener la denominación oficial na so forma tradicional. La citada llei atribúi al Conseyu de Gobiernu la competencia pa determinar los topónimos de la comunidá autónoma, ensin perxuiciu de les competencies municipal y estatal y conforme a los procedimientos que reglamentariamente determinar en desenvolvimientu de la Llei, previu dictame de la Xunta Asesora de Toponimia del Principáu.

   Fonte: Qué ye ho!

El C. P. Monteana adopta la toponimia oficial: "Colexu Públicu Montiana"

El Colexu Públicu de Montiana adopta la toponimia oficial

Colexu Públicu Montiana, parroquia de Fresno, Xixón

De Monteana a Montiana.
   La escuela del barriu de la parroquia xixonesa de Fresno, que cuenta con 90 alumnos, ta acabante de camudar el nome p’adaptalu a la toponimia oficial. D’esta forma, sigue los pasos d’otros centros, como’l de Xove.

   “El topónimu ye Montiana; ye dalgo llóxico”, esplica Montserrat López Moro, direutora del centru, que principió a mover el cambiu de nome hai más d’un añu. Tres consiguir l’aprobación del claustru, treslladó l’asuntu al Conseyu Escolar –formáu por trés padres, trés profesores, representantes de la Casa Conceyu, una secretaria ensin voz nin votu y la propia direutora–, que dio lluz verde a la modificiación por unanimidá. Finalmente, y gracies a l’asesoramientu de la Direición Xeneral de Política Llingüística, esti mes procedióse a la oficialización del nome n’asturianu pal centru escolar públicu del barriu tres la espublización nel BOPA de la resolución de la Conseyería d’Educación, Cultura y Deporte.

   Con muncha tradición nel enseñu de la llingua asturiana, llegando a tener un 100 por cien d’alumnos matriculaos na materia, el colexu de Montiana cuenta con más del 90 por cientu de los escolinos y escolines dando clase d’asturianu. “Ye necesaria una estabilidá mayor pa los críos; nun se pue camudar de profesor cada añu”, esplica López Moro, que demanda “oposiciones pa profesores de Llingua Asturiana pa Primaria, como se fai col inglés”, dalgo que, apunta, depende namái de la voluntá de los responsables políticos. La direutora, que ta trabayando agora na ellaboración d’una circular pa los padres, tamién llamenta “la poca repercusión mediática” que tuvo’l cambiu de nome del centru.

Felicitaciones d’Iniciativa pol Asturianu
   Ún de los pocos mensaxes que recibió la direición del Colexu Públicu de Montiana vieno d’Iniciativa pol Asturianu, qu’unvió al centru una felicitación. Nella, aprovechó pa convidar a los sos responsables “a siguir dando pasos na visibilidá del asturianu nel centru, talos como siguir faciendo medrar la matriculación na asignatura, usar l'asturianu na páxina web y na rotulación del centru, etc.”. Según considera’l coleutivu cívicu, la decisión d’adoptar la toponimia oficial por parte de la escuela de Montiana “demuestra una vegada más que l'Alministración va mui per detrás de la ciudadanía nel usu de la toponimia tradicional y oficial d'Asturies”, como asocedió col casu de Xove, tamién en Xixón.

   “Iniciativa pol Asturiana aprovecha p'animar a otros centros educativos a dar pasos nesti camín hacia un usu normal del asturianu, que dea a los alumnos y a tola comunidá educativa una visión del asturianu como una llingua que nun s'usa namás nes actividaes de l'asignatura de Llingua Asturiana, sinón en tola ámbitos de l'actividá escolar; como una llingua d'usu normal”, esplica’l coleutivu nun comunicáu.

   Fonte:  Asturies.com

La Conseyería d'Educación va convocar ayudes a la edición de llibros n'asturianu

Cultura convoca les ayudes a la edición de llibros n'asturianu

   La Conseyería d'Educación, Cultura y Deporte va convocar nel presente añu 2013 tres llínies de sovención pa impulsar l'usu del asturianu y del gallego-asturianu, eliminando les partíes pa usu del asturianu pa empreses y p'asociaciones. Les sovenciones pa la edición de llibros acaben d'abrir convocatoria pa empreses editoriales y tienen como finalidá "ampliar el círculu de llectores y l'ámbitu d'espardimientu de la lliteratura asturiana". La partida d'esti añu ye de 100.000 euros. L'añu pasáu entregáronse 84.480 euros nesta llinia.

   Esti añu convocaránse ayudes tamién pa la edición musical a empreses dedicaes a la producción de la música n'asturianu y en gallego-asturianu, que se realice en diversos soportes físicos o dixitales; y pa la promoción del asturianu o'l gallego-asturianu nos medios de comunicación. Van poder solicitar estes subvenciones les empreses titulares de medios de comunicación d'ámbitu asturianu, yá seyan empreses periodístiques, radiofóniques, televisives o d'internet, que produzan espacios onde s'utilice l'asturianu o'l gallego-asturianu.

   Más información:  Convocatoria completa nel BOPA.

   Fonte:  Asturnews.

IX pide que’l BOPA tea n’asturianu

Jesús Iglesias, cabezaleru d’Izquierda Xunida na Xunta Xeneral, va llevar a la cámara asturiana una proposición non de llei pa que’l Gobiernu d’Asturies “adopte los alcuerdos ya implemente les midíes necesaries que garanticen la espublización sistemática nel Boletín Oficial del Principáu d'Asturies (BOPA) de toles disposiciones, resolvimientos y alcuerdos de los órganos institucionales del Principáu, lo mesmo que de les lleis aprobaes pola Xunta Xeneral, n’asturianu y en gallego-asturianu”. Una midida prevista na Llei d’Usu y Promoción del Asturianu de 1998 pero qu’entá nun se llevó alantre.
Izquierda Xunida informó de qu’entrugó yá al Conseyu de Gobiernu per escritu sobre esta cuestión, respondiendo dende la institución executiva con un curtiu “Anguaño nun ta previsto”.

Pa Izquierda Xunida ye un bon momentu pa “cumplir coles previsiones de la Llei d'Usu y más agora, cuando la eliminación de la edición impresa del Boletín Oficial del Principáu d'Asturies amenorga los costos derivaos de tal midida".
L’artículu quintu de la Llei d’Usu de 1998 recueye que les disposiciones, resolvimientos y alcuerdos de los órganos institucionales del Principáu, amás de les lleis aprobaes pola Xunta Xeneral, puean espublizase n’asturianu, per aciu d’edición separtada del Boletín Oficial del Principáu d'Asturies.

Fonte: Asturnews