El BOPA espubliza les nueves bases del Premiu al Meyor Cantar

  Esti día apaecen espublizaes nel BOPA les bases que regulen la concesión del «Premiu al Meyor Cantar» con lletra en llingua asturiana o en gallego-asturianu, al que van poder presentase canciones orixinales de cualquier xéneru comercializaes a lo llargo del periodu qu’estableza la convocatoria.

  Nes nueves bases del premiu esclúyense les pieces tradicionales yá existentes y les versiones o adaptaciones d’obres de creación publicaes orixi- nalmente n’otra llingua; y les canciones que nun s’editaren y grabaren la primer vez nel periodu referíu.

  Van poder concurrir a esti premiu los músicos, a títulu individual o dientro de grupos, que s’alcuentren na situación que fundamente la concesión del premiu, concurriendo nellos les circunstancies previstes nestes bases reguladores y na convocatoria, y que cumplan los requisitos establecíos na Llei 38/2003, de 17 de payares, Xeneral de Subvenciones y na convocatoria.

  Los intérpretes o grupos musicales interesaos van poder presentar al premiu una única canción por trabayu discográficu. D’alcuerdu colo dispuesto na Llei 38/2003, de 17 de payares, Xeneral de Subvenciones, artículu 13, apartáu e), los beneficiarios tienen qu’acreitar tar al corriente de les sos obligaciones tributaries y cola Seguridá Social con anterioridá a dictase la propuesta de resolución de Concesión.

  El procedimientu de concesión va entamase d’oficiu pente medies de convocatoria pública, adoptada por Resolución de la Conseyería d’Educación y Cultura publicada nel Boletín Oficial del Principáu d’Asturies. Los premios en metálico van tar suxetos a los impuestos y retenciones según llei.

  Los intérpretes o grupos interesaos tienen que presentar solicitú de participación según modelu normalizáu que s’establez nel anexu de la convocatoria correspondiente. Les solicitúes tienen que se presentar nel Rexistru Xeneral Central de l’Alministración del Principáu d’Asturies (Edificiu Alministrativu, c/ Coronel Aranda, e/n, planta plaza, sector central, Uviéu) o per cualquiera de los medios establecíos nel artículu 38 de la Llei de Réxime Xurídicu de les Alministraciones Públiques y del Procedimientu Alministrativu Común. Si n’usu d’esti derechu la solicitú se remite per corréu, tien que se presentar en sobre abiertu pa que la solicitú la feche y selle’l personal de correos.

  N’acabando’l plazu de presentación d’orixinales, va facese la selección y el fallu y el Serviciu de Planificación Llingüística, dependiente de la Dirección Xeneral de Planificación Llingüística y Normalización de la Conseyería d’Educación y Cultura, va adoptar toles midíes necesaries pal desenvolvimientu d’estes bases y de la so convocatoria, llevando alantre la ordenación, instrucción y resolución del procedimientu.

  El Xuráu va designalu’l Conseyeru d’Educación y Cultura y va tar formáu por un máximu de nueve y un mínimu de cinco persones rellacionaes col ámbitu de la música asturiana. Va tar presidíu pol Director Xeneral de Plani- ficación Llingüística y Normalización, o persona en quien delegue, y va actuar como secretariu/a personal adscrito a la Dirección Xeneral de Planificación Llingüística y Normalización.

  La selección va tener dos fases: La primer fase va consistir nun llabor de preselección onde los miembros del xuráu van puntuar a caún de los con- cursantes que s’axusten a lo estipulao nes bases; les canciones, nun númberu que señale la convocatoria, que llogren la puntuación global más alta van considerase finalistes. Na segunda fase tien que s’escoyer al ganador/a d’ente la llista de finalistes.

  Pa eso los finalistes tienen qu’actuar en directo defendiendo’l tema seleccionáu na Gala musical del «Premiu al Meyor Cantar» y, tres de les actuaciones, va facese públicu —nel trescursu d’esa Gala— el fallu del xuráu.                       Fonte: asturnews.com

Designáu’l xuráu de les ayudes a creadores de La Factoría Cultural

 Tán previstes 7 ayudes de 2.000 euros caúna nes siguientes disciplines: arte plástico, arte gráfico, arte escénico y creación dixital y audiovisual.

 La Factoría Cultural va potenciar la cultura y la producción artística al traviés d’una convocatoria d’ayudes a la creación contemporanea pa la realización de proyectos artísticos de cualquier disciplina, de manera individual o grupal. La Comisión d’Evaluación yá foi designada y va axuntase el próximu llunes 28. “Queremos financiar el trabayu de les persones creadores y entamadores que promueven y lleven a cabo creaciones artístiques”, en palabres de la conceyala de Cultura, Yolanda Alonso.

 Coles mires de promover la producción artística de persones y colectivos locales, la Factoría Cultural ufierta les sos instalaciones a los creadores por que lleven a cabu les sos propuestes d’espresión, creación y pensamientu, “lo que va dexar impulsar l’arte y la creatividá n’Avilés y n’Asturies, favoreciendo la industria cultural, la relación ente les distintes cañes de la cultura y el so acercamientu a los públicos”, según esplicó Alonso.

 El plazu de presentación de les solicitúes y la documentación remató’l sábadu 19 d’avientu. Más información na Factoría Cultural (Avenida de Portugal, 13), teléfonu 985 54 86 17.

 Los artistes escoyíos tendrán de desenvolver la so obra nun períodu de seis meses y la resultancia final va poder amosase nos eventos culturales entamaos pol Conceyu d’Avilés nos distintos espacios de la ciudá.

 Van otorgase un máximu de 7 ayudes con una dotación de 2.000 euros caúna d’elles nes siguientes disciplines artístiques:

- 2 ayudes a la producción y l’estudiu rellacionáu col arte plástico (pintores, escultores y ceramistes).

- 2 ayudes a la producción y l’estudiu rellacionáu col arte gráfico (grabadores, ilustradores, fotógrafos y diseñadores gráficos).

- 2 ayudes a la producción y l’estudiu rellacionáu col arte escénico (baillarinos, actores y músicos).

- 1 ayuda a la producción y l’estudiu rellacionáu cola creación dixital y audiovisual (artistes plásticos, gráficos o escénicos qu’utilicen les nueves tecnoloxíes na producción y estudiu de la so obra).                                                                                      Fonte: asturnews.com

Les actividaes al rodiu del Liet International empiecen esti vienres.

   Les actividaes al rodiu del Liet International van principiar el vienres con una conferencia n'Uviéu.


   El sábadu, a les 21.15 hores, va tener llugar na Llaboral el festival Liet International. Sicasí, les actividaes paraleles van principiar el vienres cola conferencia ‘Les llingües minoritaries n'Europa. La música y la cultura como elementu recuperador’.

   Ésta va tener llugar nel salón d’actos de la Biblioteca de la Facultá de Filosofía y Lletres de la Universidá d’Uviéu, a partir de les 10.15 hores, cola participación del direutor del Secretariáu de la Carta Europea pa les Llingües Minoritaries del Conseyu d'Europa, Alexey Kozhemyakov; el direutor de Gaelic Arts & Cultura y representante d’Alba nel concursu, Brian Ó hEadhra; la presidenta de l’Academia de la Llingua Asturiana, Ana María Cano; l’autor del llibru ‘Rock music in minority languages’ y investigador del friulanu, Marco Stolfo; y la direutora de Política Llingüística, Ana Fueyo. El primeru en tomar la pallabra va ser Kozhemyakov, pa falar de ‘La Carta Europea pa les Llingües Rexonales y Minoritaries 1992-2012. Venti años depués. Llogros y nuevos retos’, pa continuar el representante escocés, que va analizar el desarrollu de la cultura gaélica n’Alba. Pela so parte, Cano va tratar sobre la ‘Normativización y normalización de la llingua asturiana’ y Stolfo de les ‘Llingües que roncaroleen y músiques fuertes na Europa unida na diversidá’. Por último, Fueyo va esponer la ‘Evolución de la música n'asturianu nes últimes décades. Apoyu institucional y Liet International 2012’, pa depués zarrar l’actu Ó hEadhra con una actuación musical.

   Pela tarde, nel Valey Centru Cultural de Castrillón, ta previsto un conciertu de los representantes de Fryslân y Breizh nel Liet International, esto ye, Yldau y Lleuwen, de manera respeutiva, amás del propiu Ó hEadhra. Les actuaciones, que tienen entrada de baldre hasta completar l’aforu, van principiar a les 20.30 hores

   L’actividá del sábadu yá va centrase dafechu na Llaboral. A les 12.30 hores va proyeutase nel paraninfu el documental ‘Lingue in Musica’, que va ser presentáu pol so direutor, el friulanu Marco d’Agostini. Amás, les persones que s’averen a esta instalación xixonesa van poder disfrutar nel patiu, a partir de les 11 hores, de la V Copa Cantábrica de Liriu qu’enfrenta a les seleición d’Asturies d’esti deporte tradicional cola gallega de billarda. Hasta’l momentu, Galicia suma trés títulos d’esti tornéu por ún del nuesu país. Mentes, pela tarde, va tener llugar una conferencia-taller sobre’l proyeutu Hiahoka (18 hores), p’aprender eusquera mediante’l cantu.

   Once participantes: L’actu principal d’estes dos xornaes va ser, como nun podría d’otra mena, el Liet International, nel que van participar once artistes o bandes en representación de dellos territorios europeos con llingua propia. La llista de competidores ta compuesta por: Asturiana Mining Company (Asturies), col cantar ‘Si nun conoces Vaḷḷouta’; Claudia Crabuzza y Claudio Gabriel Sanna (L’Alguer); Jo No Kongnos (Friû); Enkore (Euskal Herria); Yldau (Fryslân); The Voodooeletric (Neddersassen/Saxonia Baxa); Lleuwen (Breizh); Ivan Belosludtsev & 4cp (Udmurt Elkun); Inger Karoline Gaup (Sami); Dopu Cena (Còrsica); y Brian Ó hEadhra (Alba). Tamién ta anunciada l’actuación de Dixebra, fuera de concursu, mientres el discutiniu del xuráu.

   Fonte:  Asturies.com

IV Certame Lliterariu na variedá pal.lueza del asturianu

Xeitu convoca’l cuartu certame lliterariu na variedá pal.lueza del asturianu


El Club Xeitu convoca per cuartu añu consecutivu'l Certame Lliterariu na variedá pal.lueza del asturianu 'Guzmán Álvarez', col que s'intenta revitalizar la llingua vernácula del monte occidental ástur-lleonés. Dende l'asociación cultural l.lacianiega, anímase a toes aquelles persones interesaes a participar, una y bones l'oxetivu del mesmu ye la revitalización y divulgación d'esta variedá del idioma.

El concursu, abiertu a cualesquier persona interesada, ta dotáu con un premiu de 200 euros p’aquella obra en prosa o en versu, que resulte escoyida pol xuráu. Les obres han presentase enantes del 1 de mayu, faciéndose dempués públicu'l fallu del xuráu mientres el mesmu mes de mayu. La obra gallardonada va espublizase nel boletín añal de 'Xeitu'. Les bases completes del certame pueden vese na páxina web del Club.

Esti concursu, empecipió va trés años, mereciendo'l primer añu los premios la poesía 'Al Aviséu', d’Irma González-Quevedo Pedrayes, y el rellatu 'Carta desd'el Vatse', de Guadalupe Lorenzana Rodríguez. Una y otra consiguieron los gallardones de los años siguientes, Guadalupe Lorenzana en 2010 cola so obra 'La sulombra d'él', ya Irma González-Quevedo en 2011 cola poesía 'Escuridá'.

El certame ta promovíu pol Club Xeitu y nél collabora la Diputación de Lleón-Institutu Lleonés de Cultura. La figura de Guzmán Álvarez, filólogu babianu que da nome al concursu, foi revitalizada por Xeitu nos últimos tiempos, especialmente en 2010 cola conmemoración del centenariu de la so nacencia, cuando se redactó un manifiestu públicu de reconocencia suscrita por más de 60 persones venceyaes a la cultura. Igualmente, lleváronse a imprenta delles espublizaciones sobre la so figura y obra y desenvolviéronse actividaes centraes na mesma temática.

Más información: Bases completes del concursu

Fonte: Asturnews