17/9/11

L'Academia de la Llingua afita que-y "toca" a la conseyera d'Educación puxar pola especialidá docente d'asturianu


La presidenta de l'Academia de la Llingua Asturiana, Ana Cano, reclamó esti vienres a la nueva conseyera d'Educación, Ana Isabel Álvarez, que dea pasos dende l'executivu autonómicu pa la "reconocencia de la especialidá de llingua asturiana al profesoráu qu'imparte esta materia nes distintes árees de la enseñanza non universitaria".

Mientres el pieslle de la Universidá de Branu (Uabra) de l'Academia de la Llingua, y l'actu d'entrega de diplomes a los cerca de 150 participantes nos cursos de Cangas, Cano refirióse a esti asuntu. Nel actu tuvo presente la conseyera, el reutor de la Universidá d'Uviéu, Vicente Gotor, y l'alcalde de Cangas, José Luis Fontaniella.

Nel so discursu, Cano considera qu'agora-y toca a la "conseyera", de quien destacó la so "sensibilidá escontra esta cuestión", "tomar les midíes afayadices pa qu'esti problema se resuelva ceo". Si nun se fai asina, la presidenta de l'Academia entiende que "se ta capacitando pa exercer un oficiu reguláu por llei, que s'exerza esi oficiu y, d'otra manera, a los profesionales que lu tán exerciendo nun se-yos reconoz".

Dende'l so puntu de vista, "ye un sinsentíu". Asina, comparó la situación cola del aranés, "pa una población de 10.000 habitantes, a los que correspuende un 22% de llingua materna aranesa, y 1.200 alumnos escolarizaos n'infantil, primaria y secundaria". "Asturies, tien más d'un millón d'habitantes y más de 130.000 alumnos na educación non universitaria", matizó la presidente de la institución.

La conseyera nun se refirió a esti asuntu na so intervención. Destacó, sicasí, "l'ésitu de la UBRA", y mostró l'interés del so gobiernu en siguir dando "pasos curtios pero seguros" en favor de la defensa de la llingua asturiana. Asina, mentó los casi 18.000 alumnos de primaria y casi 4.000 de secundaria que na presente temporada llectiva van cursar "llingua" asturiana.

El reutor, pela so parte, enumberó delles meyores universitaries en favor de la 'llingua' asturiana, como la creyación de la Comisión de Normalización Llingüística Universitaria, o l'almisión de tesis doctorales n'asturianu, aspeutos que formen parte, según el so discursu, del so "firme compromisu" cola defensa de la llingua asturiana.

L'alcalde, pela so parte, entamó la so intervención en 'fala' lleyendo unos versos de Berta Piñán, y apoyó "el trabayu dacuando inciertu en favor de la sobrevivencia de la nuesa llingua".

Antes de les intervenciones, toes n'asturianu, los alumnos participantes foron recoyendo los sos diplomes acreitativos, nos ocho cursos ufiertao esti añu: elemental, avanzáu, capacitación pa la traducción, aplicaciones d'internet, Xuegos y tradiciones populares, historia d'Asturies, Aniciu a la investigación toponímica y cursu de gallego-asturianu.

Fonte: Europa Press

6 comentarios:

  1. La presidente Ana Cano tien tol apoyu de la xente asturiano na especialidá docente d'asturianu.

    ResponderEliminar
  2. Esti problema tien que resolvese dafechu y ensin demores pol bien de la llingua nel so camín pola pronta oficialidá.

    ResponderEliminar
  3. lo que nun me queda claro ye en qué faló l'alcalde de Cangas de Narcea: "entamó la so intervención en 'fala'".
    Ye como si l'alcalde de Valladolí "empezara su intervención en habla".

    ResponderEliminar
  4. La conseyera paez que sí que tá pola llabor de la oficialidá de la llingua asturiana y tol partíu de Cascos también, verémoslo en breve

    ResponderEliminar
  5. La oficialidá tá prósima, tiempu al tiempu.

    ResponderEliminar

Los comentarios tán pendientes de moderación. Espublizaránse lo primero dable.