N’Ast pide papeletes elleutorales en llingua asturiana

Considera incaltenible la situación d’apartheid llingüísticu esistente nel que se validen les papeletes en llingua asturiana, pero impídese que tean presentes nos colexos elleutorales.

N’Ast, n’escritu presentáu énte la Xunta Elleutoral Provincial solicitó formalmente a la mesma que facilite a tolos asturianos l’exercer el so drechu a votar n’asturianu, emitiendo les papeletes elleutorales de toles candidatures presentaes a estes prósimes elleiciones del 25M en llingua asturiana y distribuyéndoles con normalidá nos colexos elleutorales; "dando acabu d’una vegada a la situación predemocrática que carecemos anguañu", sorrayen.

Ello asina, l'asociación espera que se fine d’una vegada cola contradictoria situación esistente "na que se validen les papeletes en llingua asturiana al empar que s’impide la so presencia nos colexos elleutorales, nuna incaltenible práutica d’apartheid llingüísticu col que se vulneren los llexítimos drechos y llibertaes de los asturianos en materia llingüística"

Fonte: Infoasturies

N’Ast pide repartir papeletes n’asturianu nes puertes de los colexos elleutorales

Presentó un escritu a la Xunta Elleutoral provincial plantegando esta posibilidá nel casu de que persista no que califiquen d’“inxustificable actitú antidemocrática”.

N’Ast, dempués de conocer la decisión de la Xunta Elleutoral provincial “nel sen de que nun va cumplir cola so democrática obligación de garantizar que los asturianos podamos utilizar la nuesa llingua nes prósimes eleiciones del 20 de payares”, al prohibir que les papeletes n’asturianu puean ufrise nos Colexos Ellectorales, úfrese a repartiles a les puertes de los colexos elleutorales.

Enantes de llegar a esti estremu, solicita, sicasí, “que la Xunta Elleutoral asuma la so responsabilidá a la hora de cumplir con preceptos democráticos universales y facilite papeletes en llingua asturiana pa estes próximes elleiciones”, lo que pa N’Ast sedría la única posible garantía de respetu pa colos drechos llingüísticos de los asturianos. Amás esixe a la Xunta Elleutoral que considere válidos los votos que s’emitan nesa llingua.

Fonte: Asturnews

Votación al meyor blogue n'asturianu

Nós yá votamos al meyor blogue fechu n’asturianu. Naguamos porque los blogueros n’asturianu faigan lo mesmo p’arriquecer el fomentu de la llingua propia del nuesu país n’Internet.

Les bases del añu 2009 son les que van darréu:
1 – Namái un blogue y persona por votación. Si tienes dellos blogues, namái pues votar una vegada. Entiéndese que’l blogue (tanto’l que vota, como’l votáu) tán fechos n’asturianu, o l’asturianu ye la llingua vehicular na mayor parte de les entraes.
2 – Cada blogue pue votar con 4, 3 y 2 puntos a los tres blogues que meyor conteníu tengan. Y con 1 puntu al blogue con meyor estética, imaxe o diseñu, pue ser a ún de los anteriores pero enxamás al propiu blogue del votante.
3 – En casu d’empate, ganará’l blogue que tea más actualizáu nel últimu añu (más entraes) y si asina persistiere l’empate, ganaría’l blogue más vieyu.
4 – Han de mandase les votaciones, identificándose col nome del blogue qu’emite’l votu, a votalmeyorblogue@gmail.com

L’últimu día ye’l 31 de xineru zarrándose la receición de mails a les 24 hores. A partir d’ehí, en cuanto tea recompilada tola información, espublizaránse los resultaos de los blogues ganadores.

La Xunta Elleutoral Central nun autoriza'l votu n'asturianu

La Xunta Elleutoral Central nun autoriza’l votu n'asturianu "por nun ser llingua oficial".
La selmana pasada Unidá Nacionalista Asturiana presentó énte la Xunta Elleutoral Central un modelu de papeleta d'esta formación billingüe pa les elleiciones europees del 7 de xunu, neto que'l que s'usa nel restu les comunidaes con llingua propia, col testu en castellanu y n'asturianu. Sicasí, refugóse dar como válida la papeleta propuesta al incluyir testu n'asturianu y "nun ser ésta una llingua oficial".

Dende UNA conseñen que "pretendíase ufiertar un modelo válidu de papeleta a tolos asturianos y asturianes que quixeren exercer el so drechu al votu utilizando la nuesa llingua y pretendíase (nel momentu de la so validación) unviala a tolos votantes qu'al traviés de la so ueb http://www.unida.as/ la solicitaren pa votar asina a UNA n'asturianu”.

Pela mañana UNA recibió la negativa a da-y como válida la papeleta propuesta al incluyir testu n'asturianu y al nun ser ésta una llingua oficial. Dende UNA afiten que'l so "serviciu xurídicu alcuéntrase iguando un recursu que va ser tramitáu esta mesma tarde pa facer por tornar una decisión que calificó de discriminatoria y que coloca a los falantes d'asturianu y a toles persones que quieran utilizar la llingua propia d'Asturies, nuna situación d'inseguranza xurídica ya indefensión." El candidatu d'UNA, Daniel Fernández, afitó tamién que "hasta que nun haiga oficialidá, la ciudadanía asturiana nun va tener los mesmos drechos que'l restu de les persones con llingua propia", y afitó que "con fechos como ésti demuéstrase que tolo que nun seya oficialidá ye un parche inútil que mos conderga a ser ciudadanos y ciudadanes de segunda".