Venti años de la revista 'Asturies, memoria encesa d'un país'

Na tarde del vienres 24 presentóse nel Club de Prensa de La Nueva España’l númberu 36 de la revista 'Asturies, memoria encesa d’un país', editada pola Fundación Belenos.

Yera un actu especial, yá que se cumplíen los 20 años de presentación nel mesmu llugar del númberu 1, cita que, como remembró’l presidente de la Fundación Belenos, Lisardo Lombardía, contó cola inesperada presencia del premiu nobel irlandés Seamus Heaney.

Esti proyeutu editorial  que xunto coles otres actividaes desendolcaes pola Fundación Belenos como son los llibros  'Cartafueyos de Belenos', los Seminarios d’Estudios Asturianos, o les esposiciones feches, vien a a ser una parte fundamental na recuparación, conocimientu y tresmisión de lo que ye Asturies (pueblu, vezos, hestoria, cultura, y llingua), y el so encadarmientu na cultura atlántica y celta. Como decién nel entamu del so númberu 1 de la revista, “ellí tará la revista Asturies tentando de faer comprensible un presente, un tiempu escuru, onde los indicadores de futuru pal nuesu país, son más qu’abegosos, son más que desesperanzadores”.

L’actu d’esti vienres contó cola presencia del direutor xerenal de Planificación Llingüística y Normalización, Fernando Padilla, que destacó la importacia, non sólo de la revista, sinón del trabayu desendolcáu pola Fundación Belenos a lo llargo d’estos años.

Inaciu Llope, miembru del conseyu editorial de la revista, quiso dexar claro que la espublización ta abierta a toles persones que colos sos estudios o investigaciones tengan dalgo que aportar al conocimientu d’Asturies. Como dicen nel entamu d’esti últimu numberu, la revista ye un “instrumentu pa dotar de materia un discursu d’identidá sóledu que llea afechisco les rengleres del presente y nun viva’l futuru cola resignación de los venciós”.

Un repasu a los anfibios n’Asturies y la so relación coles tradiciones populares,  el llegáu atropáu nel tabularium artis asturiensis, ayalgues, y  la esposición 'Celtes'  en Londres y Edimburgu, son dellos de los temes asoleyaos nesta edición, según amosó Ástur Paredes, coordinador editorial de la mesma, faciendo un repasu a les temátiques y los sos autores.

Fonte: Asturies.com

La Compaña del Ronchel presenta la so revista Friúz

La Compaña del Ronchel, asociación cultural maliaya que trabaya por dai puxu a la llingua asturianana Comarca la Sidra, vieno acabante de presentar el primer númberu de la Revista Friúz.La revista dixital, nesti primer númberu empobinase a comentar los 40 apellíos mas nomaos nel conceyu maliayu y a repasar la vida y la obra de Concepción Íñiguez de la Fuente, “una escritora bablista desconocida d’Amandi”.

L’Asociación cultural La Compaña del Ronchel ye nomada en toa Asturies por repartir lletres de pan pa conmemorar el Día de les Lletres Asturianes. Esta iniciativa entamóla nel añu 2004 l’’asociación  pal ámbitu del conceyu de Villaviciosa, y dende va tiempu encárgase de facelo’’l Serviciu de Normalización llingüística de la Comarca de la Sidra, ampliandola a los seis conceyos que formen la Mancomunidá y cola ayuda de la Conseyería de Cultura y Turismu.

Ye una actuación que vien cuntando con gran aceptación dende'’l so entamu y a la que se pretende da-y continuidá, como forma de promoción del Día de les lletres asturianes a nivel comarcal, y de revalorización de la nuesa historia lliteraria.                       Fonte: Asturnews

L'Academia de la Llingua Asturiana espubliza'l númberu 112 de Lletres Asturianes

Por segundu añu consecutivu, l'Academia de la Llingua Asturiana aprovechó la selmana na que se celebra'l Día Mundial del Llibru pa entamar a esparder la so revista más popular y con mayor posu científicu, Lletres Asturianes, qu'aporta con esti númberu al 112. Esti númberu 112 recueye dellos trabayos d'investigación d'un total de 11 autores, de los que la mayoría ya foron protagonistes de les Xornaes Internacionales d'Estudiu y Trabayu que se desenvuelven cada añu n'ochobre. Nellos, tóquense temes como la toponimia,la morfoloxía nominal, l'asturianu y les nueves teunoloxíes, la etimoloxía asturiana, el mirandés o l'asturianu ente les lllingües romances. Lletres Asturianes ye’l Boletín de l’Academia de la Llingua Asturiana y espubliza dos númberos añales, entamando la so hestoria nel añu 1982 y aportando nel añu 2011 a la rede Internet, con una versión dixital d’accesu llibre que pue consultase dende’l númberu 105. Amás de les secciones que davezu s'atopen nesta revista científica,. como Reseñes Bibliográfiques, Notes y anuncies o Llibrería Asturiana, el númberu 1102presenta un total de 10 trabayos que s'averen a distintos campos de conocimientu. Rosabel San Segundo Cachero presenta un trabayu sobre "El neutro de materia en la morfología nominal del asturiano del concejo de L.lena"; Alberto Gómez Bautista fala de "A formação de palavras em mirandês e a obsolescência linguística"; Anne-Marie Chabrolle-Cerretini filo sobre "La lengua asturiana en los textos lingüísticos francófonos" y Pablo Suárez García escribe sobre "L’arte la guerra. Sobre’l léxicu bélicu na nuesa llingua". Los otros trabayos d'esti númberu preséntenlos Inaciu Hevia Llavona ("Léxicu asturianu de la sidra con delles desplicaciones etimolóxiques y comentarios"), Xulio Llaneza Fernández ("Estudiu de la toponimia de Santa Bárbola (Samartín del Rei Aurelio). La hidrotoponimia (II)"): José Miguel Lamalfa Díaz ("«Cuando examen les abeyes»: Primer testu lliterariu n’asturianu y la so importancia na historia de la lliteratura"); Vicente García Oliva ("Vides paraleles (que converxen nun puntu) de don Xuan Junquera Huergo y don Xosé Napoleón Acebal"); Marta Mori d'Arriba & María Prieto Grande ("Percepciones y conciencia del asturianu en dellos estudiantes d’español pa estranxeros de la Universidá d’Uviéu: implicaciones educatives") ya Inaciu Galán y González ("Delles aportaciones pa una hestoria de la publicidá n’asturianu"). Fonte: Asturnews

Lletres Asturianes 110 aportó pel Día del Llibru

L'Academia de la Llingua Asturiana aprovechó la selmana na que se celebra'l Día Mundial del Llibru pa entamar a esparder la so revista más popular y con mayor posu científicu, Lletres Asturianes, qu'aporta con esti númberu al 110. Esti númberu 110 recueye dellos trabayos d'investigación d'un total de diez autores, que los que la mayoría ya foron protagonistes de les Xornaes Internacionales d'Estudiu y Trabayu. Nellos, tóquense temes como la toponimia, l'asturianu y les nueves teunoloxíes, la etimoloxía asturiana, o l'asturianu ente les lllingües romances. Lletres Asturianes ye’l Boletín de l’Academia de la Llingua Asturiana y espubliza dos númberos añales, entamando la so hestoria nel añu 1982 y aportando nel añu 2011 a la rede Internet, con una versión dixital d’accesu llibre que pue consultase dende’l númberu 105. Amás de les secciones que davezu s'atopen nesta revista científica,. como Reseñes Bibliográfiques, Notes y anuncies o Llibrería Asturiana, el númberu 110 presenta un total de 10 trabayos que s'averen a distintos campos de conocimientu. Miguel Metzeltin presenta una investigación sobre "L’asturianu ente les llingües romances", mentantu que Xosé Lluis García Arias averase otra vuelta a la "Etimoloxía asturiana y etimoloxía hispánica" y Clara Elena Prieto Entrialgo afonda nel usu de "Per, por y para nel asturianu medieval" con una "guía pa nun se perder". Darréu, nesti númberu tamién se pue lleer a Pablo Suárez García falando sobre "La deturpación toponímica n’Asturies" a Héctor García Gil apuntando "Delles notes d’exonimia próxima" y a Xosé Bolado García escribiendo "al ritmu de los díes de la vida propia" con una interesante "mirada circunstancial sobre poesía nueva". Amás, Pablo Rodríguez Medina escribe sobre "Les llechares: una aproximación a la primer poética de Rubén d’Areñes", Xuan Santori Vázquez averanos al "Determín de comportamientos xeneracionales nel Surdimientu a la lluz de pruebes paramétriques pal contraste de variables", entesacándolo de la so recién presenta tesis. Y les nueves tecnoloxíes tienen nel trabayu d'Inaciu Galán y González "L’asturianu y les nueves teunoloxíes: datos d’una encuesta d’usos llingüísticos" que nos amuesa la realidá de la mocedá asturino na rede de redes. Pa finar esti númberu 110, Andrés Martínez Vega escribe sobre "Los pecheros asturianos a fines de la Edad Media. Una referencia en la pobla de Siero". Fonte: Asturnews

La revista Vértigu presentó n'Uviéu la so versión impresa

Esti vienres 17 de xineru presentabase en sociedá na capital d'Asturies la edición en papel de Vërtigu, web cultural que lleva un tiempu asoleyando en llingua asturiana información de toa mena. Y facíalo con un númberu especial, con exemplares llimitaos, y con una fiesta, no que yera la so puesta de llargu cola so versión impresa. La presentación tenía llugar na Sala Whipoorwill, esti vienres 17 de xineru, dende les 22.30 hores, cola participación de David Rionda, como maestru de ceremonies, Losone, Nacho García, Alvarito, Pablo X. Suárez, Alba Ynomas, pinchadiscos de la casa y dalguna qu'otra sospresina más. La entrada foi llibre, y poniendo un bote pa los músicos, vas poder marchar pa casa con un exemplar especial de Vërtigu. Fonte: Asturnews

Formientu presenta'l so númberu 12 esti sábadu en La Manzorga de Xixón

El recital que va celebrase nel actu de presentación del númberu 12 de la revista Formientu va cuntar con dellos autores y la música a la viola de Naomi Suárez. Nesta publicación fundada en 2006 asoleyense testos lliterarios n'asturianu d'autores de menos de trenta años. La revista, dirixida por Inaciu Galán dende la so fundación en 2006, sigue apostando por ser cantera de nuevos autores en llingua asturiana, dándolos a conocer y apurriendo un espaciu pa los sos testos. El viniente sábadu 11 de xineru va presentase nel espaciu cultural La Manzorga, en Xixón (cai del Carmen 20), de magar les 19 hores y cola presencia d'autores, que darán llectura y comentarán los testos de la revista. Na seición "Cuando... yera autor mozu" apaez nesti casu un testu de Pachín de Melás. Na sección búscase dar a conocer la obra escrita por autores clásicos o contemporáneos, escrita demientres la so mocedá. El poema asoleyáu nesta ocasión espublizólu l'autor xixonés con 22 años. Nesti númberu apaecen testos d'Alberto Cla, Andrés Astur Treceño, Laura García Calvo, Cristina Menéndez Martín, Fonsu Suárez, David Carrasco Díaz, Naomi Suárez González, Ismael Carmona García, Nayar Crespo Sánchez, Jaime Martínez Menéndez, Pablo M. Testa, Alba Llaneza Pulido, María García Díaz, Blanca Fernández Quintana y Xurde Álvarez Antón. Amás, ta ilustráu pol xoven fotógrafu y cineasta Pablo Casanueva. Toos ellos tienen menos de trenta años y asoleyen la so obra n'asturianu. Fonte: Infoasturies

Furmientu asoleya'l númberu 35 d'El Llumbreiru

L'asociación zamorana asoleya un númberu nuevu de la so espublización trimestral. Furmientu vien d'asoleyar el númberu 35 de la so espublización trimestral, denomada "El Llumbreiru". Nesta edición recueyen l'artículu de José alfredo Hernández alrodiu "Personaxes de la mitoloxía popular zamorana"; tamién hai espaciu pa la lliteratura n'Asturllionés, cola espublización de testos de Fernando Pessoa tornaos por Jesús González. Otros conteníos que conformen el númberu son l'actualidá cultural, sopa lletres, y les XII Xornaes de Cultura Tradicional. Furmientu ye una asociación cultural zamorana empobinada a la llucha pola dignificación y recuperación del patrimoniu llingüísticu d'esa tierra, con especial enfotu haza la llingua asturllionesa por ser "la que s'atopa nun estáu de mayor abandonu". Ún de los pegoyos d'esi trabayu ye la espublización El Llumbreiru, qu'anque ye de baldre, puede recibise en casa mediante la soscripción, echando asina un gabitu económicu pa la so continuidá. Información y descarga de baldre del númberu 35 Fonte: Infoasturies

El Centru Asturianu de Madrid acueye una presentación d'Iniciativa pol Asturianu y Formientu

La organización va tar presentándose a los asturianos en Madrid esti xueves 4 de xunetu, a partir de les 19 hores. Sedrá nel Centru Asturianu de Madrid, asitiáu na cai Farmacia, 2, a pocos metros de la Gran Vía, nel centru de la ciudá. Nel actu va presentase tamién la revista Formientu, cola presencia d'autores mozos y de Xosé Bolado, escritor y miembru de l'Academia de la Llingua Asturiana.

Nel actu va participar tamién Inaciu Galán y González, direutor de la revista Formientu y presidente d'Iniciativa pol Asturianu.

Formientu ye una revista asturiana ñacida en 2006 que publica la obra d'autores n'asturianu de menos de 30 años, buscando una anovación continua y un relevu xeneracional na lliteratura asturiana. Esta "cantera" lliteraria lleva asoleyada la obra de más de 80 autores nestos años.

Fonte: Asturnews

Presentación del númberu 8 de “N’Ast. Cartafueyos d’Ensayu”

El prósimu vienres, 14 d’avientu, va presentase públicamente’l númberu 8 de la revista “N’Ast. Cartafueyos d’Ensayu”. L’actu de presentación, abiertu a toes aquelles persones que quieran dir, va tener llugar en Xixón, nel Llar Social L’Ayalga (cai Decanu Prendes Pando, 11, baxu), a les 20'00 hores, y nel mesmu participarán tanto miembros de l’Asociación Cultural N’Ast, coleutivu qu’asoleya la revista, como dellos de los autores qu’andechen cola mesma.

Nesta octava entrega de los cartafueyos d’ensayu, pa la que se cuntó col sofitu de la Conseyería d’Educación, Cultura y Deporte, recuéyense los trabayos “Nacionalidá y marxismu. Estratexa y táutica de los pueblos nel so camín haza la lliberación nacional y de clas” (Fonsu Fernández Román); “Gausón Fernande: el paxellu ye símbolu intemporal d’asturianía” (entrevista fecha por José Luis Campal Fernández); “Hestoria d’una espublización nacionaliega: El Fielatu” (Daniel Cueli Canto); “Pregón de la XIII Fiesta de la Oficialidá de la Llingua Asturiana. Bimenes - 2009” (Roberto González-Quevedo González). Pieslla los conteníos d’esti númberu l’ensayu “Un proyeutu unitariu pal nacionalismu asturianu” (Marcos Abel Fernández Marqués), recuperáu de la revista El Fielatu onde s'asoleyó va venti años.

Daniel Cueli Canto ___________

Direutor de “N’Ast. Cartafueyos d’Ensayu”

Revista "Asturies", númberu 32

Belenos asoleya un nuevu númberu de la revista “Asturies”

La Fundación Belenos ta acabante asoleyar el númberu 32 de la so revista, “Asturies, memoria encesa d’un país”. Amás de les estayes habituales, como “Memoria Gráfica d’Asturies” (nesta ocasión dedicada al pueblu mariñán de Llastres), “L’Estoxu” y “Cartafueyos de Belenos”, la revista inclúi dellos trabayos etnográficos d’investigación. “Asturies, memoria encesa d’un país” yá pue mercase nes principales llibreríes del país a un preciu de 15 euros.

La espublización recueye los trabayos que vienen darréu: “El mayéu Busián (L.lena): orixe d’una braña na Edá del Bronce” (Jorge Camino Mayor), “Los torques d’Argul (Pezós)” (Alberto Álvarez Peña y Alfonso Fanjul Peraza), “Les cases soportalaes d’Avilés y les sos «mirilles»” (Manuel Mallo Viesca), “Delles considerances alredor de Xosé Faes «capitán de los carlistes, resurrección de Pelayo»” (Javier Cubero de Vicente), “Peslleres, maniyes y picaportes. Artesanía del fierro nes puertes de les cases asturianes” (Inaciu Hevia Llavona y Alberto Álvarez Peña), “Don Pelayo, primer rei de los astures. Testimoniu d’una saga escaecida: la hermana de Don Pelayo” (Gausón Fernande Gutierri), “El potru, un elementu etnográficu escaecíu” (Daniel Cueli Canto), “Normes xenerales pal usu y disfrute de la sidra” (Inaciu Hevia Llavona) y “El Son d’Arriba y los Cantos de Ramos nel Val.le de Naviegu (Cangas del Narcea)” (Santos Nicolás Aparicio).

Fonte: Asturnews

Asoleyáu'l Lletres Asturianes 106

Yá ta disponible la versión dixital del númberu 106 de Lletres Asturianes, el boletín de l’Academia de la Llingua Asturiana. L’ALLA espubliza una versión dixital dende va dellos númberos y la institución tien como oxetivu xubir tolos númberos a la rede. Pel momentu yá pueden consultase tolos asoleyaos dende l’añu 2000. Nesti númberu, como vien siendo vezu, hai espaciu p’artículos venceyaos a la filoloxía asturiana, recoyendo dalgunes de les comunicaciones presentaes nes pasaes Xornaes Internacionales d’Estudiu, celebraes n’Uviéu a finales de 2011.

Fernando Sánchez Miret abre’l númberu col artículu “Los problemas de la diptongación del asturleonés a la luz de la Romanística”, la presidenta de l’Academia, Ana María Cano González Fala de “L'antroponimia asturiana y el procesu de castellanización documental”, mientres que’l caderalgu Xosé Lluis García Arias revisa “La toponimia de Cantabria vista dende l'asturiana”, y Martín Sevilla Rodríguez comenta delles cuestiones sobre “Los topónimos asturianos Tamoca/Caloca”.

La profesora Clara Elena Prieto Entrialgo fala de los nomes comerciales de sidra y vinu en “Onimia empresarial asturiana: el sector del vinu y de la sidra”, Fernando Bello Garnelo céntrase na “Toponimia y antroponimia en la zona de Las Médulas (León)”, mientres que Xabiel Fernández García da un repás a “Los llugares de pasu. Una aproximación antrópica cola toponimia”.

José Luis González Escribano adiéntrase nel campu de “La estructura de la 'frase nominal' en asturiano”, mientres Cristina García-Sampedro Clérigo fai un “Estudio codicológico sobre el Libro del Prior”. Nel campu de la lliteratura encuádrase l’aportación de Xuan Santori Vázquez-Azpiri, col artículu “La lliteratura de les escritores asturianes. Perspectives d'un trabayu d'investigación sociollingüística”, basáu en parte del trabayu de la so tesis, presentada apocayá.

El lleonés y académicu Nicolás Bartolomé Pérez fala de la llexislación de la comunidá vecina con “L'artículu 5.2. del Estatutu d'Autonomía de Castiella y Lleón” y el periodista Cristobal Ruitiña repasa “La llingua asturiana na televisión autonómica. Presencia, audiencia y estándar”, pesllando’l númberu un espaciu pa noticies y novedaes bibliográfiques n’asturianu o n’otres llingües, siempres que cinquen al estudiu del idioma d’Asturies.

Más información: Accesu al númberu 106 de Lletres Asturianes

Fonte: Asturnews

La revista Faceira númberu 2 ta na so páxina web

El númberu 2 de la revista Faceira yá ta disponible na páxina web de Furmientu, asociación zamorana que trabaya pola recuperación de la nuesa llingua. La revista ta empuntiada a la investigación y divulgación del patrimoniu cultural del Reinu de Llión y la creación lliteraria n’asturlleonés.

Nesta edición faise un repás a la Llingua y lliteratura en Llión, por Nicolás Bartolomé Pérez, Tiégui Manuel Pires Albes robla’l reportaxe “Un rincón stur-lliones an Pertual”, mientres que Fernando Álvarez-Balbuena García fala de “Les relaciones ente los movimientos de reivindicación llingüística d’Asturies y Llión”.

Na parte lliteraria, Miguel Ángel del Cueto presenta un rellatu na variedá senabresa, tituláu “L’unicorniu ñegru”, mientres qu’apaecen otres obres d’Ana Ferrero, José Alfredo Hernández y Miguel Ángel González.

Más información: Descarga la revista de baldre

Fonte. Asturnews

Presentóse la revista d'ensayu N'Ast, númberu 7

Esti vienres, 16 de marzu, a les 20 hores cellebróse nel Centru Social L’Ayalga la presentación del númberu últimu de la revista de l’Asociación Cultural N’Ast. Esta nueva edición cunta coles firmes de Carlos Blanco, que presenta un artículu sobro Asturies vista a la lluz de los plantegamientos d’Oswald Spengler; de Xuan Porta, con un trabayu sobro l’osu na cultura asturiana; d’Inaciu Galán, nun analís del papel de les llingües indíxenes y del castellán nos procesos d’independencia d’América del Sur; de Xaviel Vilareyo, que torna tamién a les páxines de la revista con un trabayu toponímicu; d’Isaac G. de la Arada, que presenta un artículu nuevu de calter eminentemente científicu sobre los procesos d’almacenamientu d’hidróxenu; y d’Eduardo Abad, con un trabayu etnográficu sobro la fragua de Fonteta.

Amás de los artículos d'ensayu, recuéyense’l “Manifiestu pola documentación hestórica asturiana espoliada” y dos entrevistes: a Daniel Cueli, direutor de la revista, y a Javier Cubero, responsable d’organización de N’Ast, asoleyaes enantes n’Asturnews.

Pa zarrar la revista, inclúise’l testu del pregón XII Fiesta de la Oficialidá de la Llingua Asturiana en Bimenes (2008) escritu y lleíu por Xuanxo Mariño.

El CS L’Ayalya ta asitiáu nel baxu 11 de la cai Prendes Pando de Xixón.

Fonte: Asturnews

Asoleyada la revista Asturies, númberu 31

La Fundación Belenos ta acabante d’asoleyar el númberu 31 de la so revista, “Asturies, memoria encesa d’un país”.

Amás de les estayes habituales, como “L’Estoxu”, “Cartafueyos de Belenos” o “Memoria Gráfica d’Asturies” (nesta ocasión dedicada al conceyu d’El Franco), la espublización recueye los trabayos que vienen darréu: “Una escultura magdaleniense inédita procedente del aviru La Viña, La Mazanea (Uviéu)” (Antonio Juaneda), “Fueu y agua nel orixe de los santuarios castreños: saunes y pedras formosas” (Ángel Villa), “Una posible tésera d’hospitalidá afayada n’Asturies. Les rellaciones d’hospitalidá ente los astures y otros pueblos céltitos” (Jesús F. Torres), “Cordoveiru, una aldea celta con historia” (Fernando Inclán), “Osos, llobos y santos proteutores” (Berto Peña), “Quemes rituales de monigotes: la quema’l xigante y la quema la xana” (Xe M. Sánchez), “Llavaderos na Comarca de la Sidra, Piloña y Siero” (Daniel Cueli) y “Os corrales pra os llobos n’Allande” (César Alonso). La revista yá se pue mercar nes principales llibreríes del país a un preciu de 15 €.

Fonte: Infoasturies

‘N’Ast. Cartafueyos d’ensayu’, númberu 7

Pablo R. Guardado
L’Asociación Cultural N’Ast asoleyó’l númberu 7 de la revista ‘N’Ast. Cartafueyos d’ensayu’. Ésti inclúi un ‘Manifiestu pola documentación hestórica asturiana espoliada’ impulsáu pol coleutivu.

El manifiestu, que tien l’apoyu d’ocho organizaciones, centra esti númberu de los cartafueyos y vien acompañáu de dos entrevistes: a Daniel Cueli, direutor de la revista, y a Javier Cubero, responsable d’organización de N’Ast. Yá na estaya d’ensayos, los llectores van atopar nesti exemplar les firmes de Carlos Blanco, que presenta un artículu sobre Asturies vista a la lluz de los plantegamientos d’Oswald Spengler; de Xuan Porta, con un trabayu sobre l’osu na cultura asturiana; d’Inaciu Galán, nun análisis del papel de les llingües indíxenes y del castellán nos procesos d’independencia d’América del Sur; de Xaviel Vilareyo, que torna tamién a les páxines de la revista con un trabayu toponímicu; d’Isaac G. de la Arada, que presenta un artículu nuevu de calter eminentemente científicu sobre los procesos d’almacenamientu d’hidróxenu; y d’Eduardo Abad, con un trabayu etnográficu sobre la fragua de Fonteta (Ayande). Pa zarrar el númberu, inclúise’l testu del pregón XII Fiesta de la Oficialidá de la Llingua Asturiana en Bimenes (2008) escritu y lleíu por Xuanxo Mariño.

Les persones interesaes en facese con esta edición nueva de los cartafueyos d’ensayu de N’Ast pueden facelo na sede del coleutivu (L’Ayalga), asitiada na cai Prendes Pando númberu 11 de Xixón, o al traviés del corréu lletrónicu nast.oficialida@gmail.com. Nunos díes tamién va tar a la venta nes llibreríes Paradiso (Xixón) y Ojanguren y Cervantes (Uviéu).

Fonte: Asturies.com

Formientu númberu 9 ya Iniciativa pol Asturianu

Esti xueves va cellebrase un actu nel que se van recaldar fondos pa Iniciativa pol Asturianu. La revista de lliteratura Formientu va despidir l’añu y a dellos de los sos autores más vieyos nun actu que se va cellebrar nel chigre L’Ayalga, de Xixón, esti xueves 29 d’avientu de magar les 8 la tarde. Va presentase'l númberu 9 de la revista.

Dende Iniciativa pol Asturianu, queremos poner en valir la lliteratura asturiana y collaborar con esta revista ye un bon preséu pa ello.

Nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Testos narrativos d’Abel Martínez, Jorge Fernández García, Pablo A. Quiroga Prendes, Rubén Rey Menéndez ya Inacio Rodríguez-Solar. Amás de dos crítiques de llibros, feches por Iván Cuevas y José Ángel Gayol sobre «Les últimes pallabres» y «Pequeñu álbum de familia».

Tolos ingresos pola venta de revistes que se faigan esi día van tar destinaos al llabor d'Iniciativa pol Asturianu, asina que ye una bona oportunidá tamién pa mercar revistes y usales como regalu de Navidá.

Fonte: iniciativapolasturianu.org

Yá pue lleese la nueva revista dixital de l'ALLA "Ciencies"

Esti martes presentábase nes Xornaes Internacionales d’Estudiu la revista dixital “Ciencies”, un proyeutu a comuña ente la Universidá d’Uviéu y l’Academia de la Llingua Asturiana que quier afondar nes posibilidaes del asturianu nel campu de la ciencia y la teunoloxía, dende un puntu de vista divulgativu. El so direutor Carlos Lastra, esplicó los detalles d’esta publicación que s’abre con dellos artículos o reportaxes sobre’l Campu San Francisco d’Uviéu, les llibélules d’Asturies, el cáncer y los xenomes, les races autóctones y los nanomateriales, ente otres temes.

La revista va espublizase namás en versión dixital, que va poder consultase dende les páxines de l’Academia y de la Universidá.

Más información: Descarga la revista "Ciencies" de baldre

Fonte: Asturnews

L'ALLA edita la revista dixital de divulgación científica en llingua asturiana "Ciencies"

L'Academia de la Llingua edita n'internet 'Ciencies', revista de divulgación científica en llingua asturiana.

Esti miércoles sal, al traviés d'internet, 'Ciencies. Cartafueyos asturianos de Ciencia y Teunoloxía', una revista de formatu dixital y periodicidá añal, dedicada a la divulgación del conocimientu científicu y teunolóxicu, y editada en íntegramente en llingua asturiana.

Esti primer númberu presentóse esti llunes en rueda de prensa. Compareció'l direutor de la espublización, Carlos Lastra, el vicerrector d'Investigación de la Universidá d'Uviéu, Santiago García, y la directora de l'Academia de la Llingua Asturiana, Ana Cano, institución qu'apadrina la publicación.

'Ciencies' tará disponible, en formatu PDF, na páxina web de l'Academia de la Llingua Asturiana a partir d'esti miércoles. Ye, en pallabres de la propia Cano, una "revista dixital que tien como oxetivu espardir na sociedá asturiana los avances y investigaciones científiques y teunolóxiques, emplegando pa ello la llina y con una perspeutiva divulgadora que favoreza la comprensión de los temes per parte de los llectores interesaos nestos ámbitos".

Asina, el so primer númberu ufre reportaxes dedicaos a temes como los nanomateriales, los xenomes y el cáncer, o les races autóctones asturianes, amás de temes como'l patrimoniu xeolóxicu ástur o l'espaciu mediuambiental asturianu y la so fauna. En total, son nueve los artículos ufiertaos ellaboraos por diferentes autores.

Cano destacó la importancia d'esta espublización nel llabor de normalización de la llingua asturiana. Asina, señaló que "si la llingua alquirió calter de normalidá nos ámbitos lliterariu y periodísticu, nun se pue dicir lo mesmo del científicu y el teunolóxicu, onde l'emplegu del asturianu ye muncho más pequeñu, y de xuru poles dificultaes propies del usu d'una llingua minoritaria y pol menor númberu d'usuarios y conocedores de la mesma nesos ámbitos".

Carlos Lastra, pela so parte, foi l'encargáu d'esgranar, al traviés d'un estensa esposición, los diferentes artículos ufiertaos nesti primer númberu, mientres que'l vicerrector mostró la so satisfacción pol entamu d'esti proyeutu: "como asturianu, como científicu y como vicerrector".

Fonte: Europa Press

Presentación de "Ciencies. Cartafueyos asturianos de ciencia y teunoloxía" I

L’ALLA va presentar el llunes el primer númberu de ‘Ciencies’.

Esti llunes, al meudía, va tener llugar la presentación del prímer númberu de ‘Ciencies. Cartafueyos asturianos de ciencia y teunoloxía’. Esta espublización, de calter añal, surde col oxetu d’esparder socialmente los avances científicos y teunolóxicos.

Dirixida por Carlos Lastra, la portada d’esti primer númberu ta dedicada al campu San Francisco d’Uviéu, “el primer xardín históricu d’Asturies’. Nella tamién se destaquen los artículos ‘Patrimoniu xeolóxicu astur’, ‘Xenomes y cancer’, ‘Les llibélules d’Asturies’, ‘Los nanomateriales, una revolución teunolóxica’ y ‘Siete races, un país: l’asturcón y la cabra bermeya’.

Unos conteníos interesantes que van dase a conocer el llunes nun actu nel llar de l’Academia de la Llingua Asturiana (ALLA) nel que ta prevista l’asistencia de Lastra; d’Ana María Cano, presidenta de la institución académica; y de Santiago García Granda, vicerrector d’Investigación de la Universidá d’Uviéu, amás de los investigadores qu’espublicen nesti primer númberu de ‘Ciencies’ y una representación del comité científicu de la revista. Hai que destacar qu’esta presentación va ser el preludiu de les XXX Xornaes Internacionales d’Estudiu de l’ALLA qu'entamen el martes, día 8, y que van allargase hasta’l xueves, día 10.

Fonte: Asturies.com

Asoleyada la versión dixital de la espublización lleonesa Xeitu

L’asociación cultural lleonesa Faceira pon a disposición de tolos interesaos, los seis númberos de la fueya divulgativa Xeitu que, ente los años 1996 y 1999, sacara a la lluz l’asociación Facendera pola llingua.

Xeitu foi la primera publicación fecha en tierres lleoneses n’asturianu dafechu y señaló l'entamu d’un tiempu nuevu na reivindicación d’esta llingua.

http://faceira.org/2011/10/xeitu-fueya-informativa-de-l%E2%80%99asociacion-cultural-%E2%80%9Cfacendera-pola-llingua%E2%80%9D/

Fonte: Asturnews