Cartelu del Taller de Radio de Corvera
El Conceyu de Corvera entama un taller de radio de baldre pa la mocedá llocal. Ésti va desenvolvese del 8 al 30 de xunetu, los martes y miércoles, siempre en llingua asturiana. El cursu divídese nuna parte teórica y otra práutica n’Onda Corvera.
L’oxetivu d’esta iniciativa ye “acercar a la mocedá esti mediu de comunicación al traviés d’estratexes qu’afalen la investigación, la espresión y l’intercambiu d’información, amás d’establecer una canal de comunicación abierta y cooperativa”. D’igual forma, tamién pretende “contribuir al conocimientu de la llingua asturiana y al desarrollu de les posibilidaes espresives de la mesma”. En definitiva, “usar la radio como ferramienta pal tiempu llibre de la mocedá de Corvera, cola fin de desenvolver una nueva manera de deprendizaxe y participación: activa, abierta, crítica y solidaria”, ensin escaecer el fomentu del interés de los mozos polo qu’asocede nel conceyu, según apunten dende l’Ayuntamientu
.
Los conteníos del taller de radio son los siguientes: ‘Introducción a la historia de la radio. La radio n’Asturies: pasáu, presente y perspectives’; ‘El programa de radio: estudiu y creación del guión radiofónicu; ellaboración del cuadru técnicu de les secciones; búsqueda de materiales; redacción de noticies; preparación d’entrevistes; configuración de secciones. Un casu prácticu: el magazine’; ‘El mundu técnicu de la radio: usu de los aparatos técnicos de la radio; representación del cuadru radiofónicu; control y escaleta del programa radiofónicu’; Locución y narración; diferenciación de rexistros; la tertulia y el papel de moderador; la llectura de testos’; y ‘El papel de la música na radio: efectos sonoros; sintoníes; la realización d’una sección y d’un programa musical’. Pa desendolcar estos temes, el taller va dividir les 3 hores selmanales en dos teóriques y una práutica, esta última en grupos de seis persones.
L’horariu concretu de les clases ye martes y miércoles de 11.30 a 13.30 hores, destinando sesenta minutos a caún de los grupos práuticos, que van desplazase al estudiu d’Onda Corvera pa recibiles de la mano d’un profesional de la emisora. Mentes, les trés hores teóriques van dase nel Centru Sociocultural de Les Vegues, con Rafael Rodríguez Valdés, responsable de la Casa de la Llingua y ex secretariu de Colectivo Radiofónico Asturiana, amás de collaborador del programa ‘Paraísu Natural’ de RPA o direutor de ‘El Corrector’ en Radio Kras, como maestru. P’apuntase al taller y recibir información ye necesario ponese en contauto cola Oficina d’Información Xuvenil o’l Serviciu de Normalización Llingüística, asitios nel Centru Sociocultural de Les Vegues, nel teléfonu 985.51.40.01 o nel corréu electrónicu oij@ayto-corvera.es. La fecha llende ye’l llunes y ye requisitu necesariu tener ente 14 y 19 años. Fonte: Asturies.com
.jpg)