Echa a andar l'Intercélticu d'Avilés con cinco países representaos

Cartelu del XVIII Festival Intercélticu d'Avilés

   Asturies, Breizh, Alba, Galicia y Éire van tar representaos nel ‘XVIII Festival Intercélticu d'Avilés y Comarca’, que principia’l miércoles y va allargase hasta’l domingu. Son cinco xornaes cargaes de música y tradición.

   Tres mirar hacia Alba na edición pasada, con recepción d’un tartan propiu colos collores de la bandera de la ciudá y d’Asturies, asina como colos del escudu d’armes del país, concedíu pola Scottish Tartans Authority, nesta ocasión l’Asociación Cultural Esbardu nun dedica’l certame a un territoriu en concreto. Sicasí, si tien representación de formaciones procedentes de cinco países, ente ellos la propia Escocia cola presencia de los Alba Pipers. Completen los convidaos l’arpista Camille Levecque (Breizh), Airiños de Fene (Galicia) y l’Ards Comhaltas Ceoltóirí Éireann (Éire). Mentes, la delegación asturiana ta compuesta por L’Esperteyu, Esbardu, la Banda de Gaitas del Centro Asturiano de Oviedo, Perendengue, La Corte de Enverniego, Tuenda y la Orquesta Céltica AsturianaI

   El Mercáu Celta –pese a les dificultaes na so instalación pola presencia hasta ayeri mesmo de casetes de la Feria del Llibru Antiguu y d’Ocasión, finada’l 22 de xunu– va abrir les sos puertes a les 18 hores nel Parque del Muelle. Darréu, y hasta’l domingu, van principiar una cantidá importante d’actividaes nes que la música y les tradiciones son les protagonistes. No que respeuta a los conciertos de la plaza Carlos Lobo, ta anunciada l‘actuación de Tuenda esta nueche (22.30 hores), pa dar pasu mañana a la mesa hora a una sesión de tonada cola participación de Ruben Tamargo, la Xanina d’Aviles, Luis ‘El Camionero’, Jose Luis ‘El Presi’, Loyo de Ca’Antonín, Roberto Selgas, Manuel Arenas, Manuel Pendás y Adolfo Campín, col acompañamientu d’Antonio Esteban a la gaita.

    El vienres, el turnu va ser p’Alba Pipers (22.30 hores), que van introducir la ‘Nueche Céltica’, cola presencia de la Orquesta Céltica Asturiana y la Banda de Gaitas Esbardu, mentes que’l sábadu ta previsto l’espectáculu ‘Lluna Celta’ (23 hores), cola participación de la Escuela de Danza Myriam Chamorro y Mónica Núñez, Alba Pipers, Camille Levecque, Esbardu, Rubén Tamargo, Ards Comhaltas Ceoltóirí Éireann, Borja Casas y Airiños de Fene.

   Corvera tamién va tener el so protagonismu nel festival cola celebración d’actividaes na xornada del sábadu. Asina va haber dos amueses de folclor celta coles agrupaciones gallega y irlandesa presentes nel certame, la Banda Gaites Corvera y el Grupu de Baille Tradicional de Corvera, la primera nel parque de la Marzaniella (18.30 hores) y la segunda nel Centru Social de Tresona (20 hores) y, ente medies, un pasucais. El pieslle del Intercélticu ta previstu pal domingu, a partir de les 19.30 hores, na plaza Carlos Lobo.                               Fonte: Asturies.com

EL XVII FESTIVAL INTERCÉLTICU D'AVILÉS QUE MIRA HACIA ALBA N'ESCLUSIVA

El XVII Festival Intercélticu d'Avilés que mira hacia Alba n'esclusiva

   Esti martes principia’l Festival Intercélticu d’Avilés, que nesta decimosétima edición mira hacia Alba. La cultura escocesa va enllenar la villa hasta’l domingu con un programa d’actividaes que se centra n’esclusiva nesti país celta.

   Ésta ye la novedá principal del certame entamáu pola Asociación Cultural Esbardu, yá que n’ediciones anteriores la organización apostaba por trayer representanción de dellos países. Asina, lo escocés y lo asturiano van xunises per seis díes n’Avilés nun programa nel qu’habrá espaciu pa la música, les tradiciones y el güisqui. Ente les entidaes que participen destaca la la Scottish Tartans Authority, que va conceder al Intercélticu avilesín un tartán propiu colos collores de la bandera de la ciudá y d’Asturies, asina como colos del escudu d’armes del país. Otra manera, les actuaciones musicales van tornar a la plaza de Carlos Lobo.

   Les actividaes del XVII Festival Intercélticu d’Avilés principien a les 12.30 hores cola inauguración oficial nel Palaciu de Valdecarzana y l’apertura, a les 18 hores, d’una esposición dedicada a los tartanes escoceses y la so historia, asina como del Mercáu Celta del Parque del Muelle, a les 18.30 hores. La Isle of Cumbrae RBLS Pipe Band, de Port a' Mhuilinn, va encargase d’animar les cais de la villa dende mañana, mientres que Flung Aboot, Aceltica y Alan Beck van protagonizar les actuaciones musicales de la plaza Carlos Lobo. Ésta, amás, va acoyer mañana, a les 22.30 hores, un conciertu de tonada cola participación de Luis ‘El camionero’, Rubén Tamargo, Loyo de Ca Antonín, La Xanina d’Avilés, José Luis ‘El presi’ y Roberto Selgas.

   El sábadu, l’Intercélticu va desplazase a Corvera, con un pasucais a les 19 hores y una amuesa de folclor celta, media hora más tarde, nel Centru Social de Tresona. Nella van participar la Isle of Cumbrae RBLS Pipe Band, la Banda Gaites Corvera d’Asturies y el Grupu de Baille Tradicional de Corvera.
  Fonte:  Asturies.com