El Conceyu d’Avilés retrasa l’aprobación de les ordenances d’asturianu a “depués del branu”

• . El Conceyu d'Avilés llevará a Plenu l'aprobación definitiva de les ordenances d’usu del asturianu n'abril o mayu

Na semeya la conceyala Yolanda Alonso

 El mes de setiembre ye la fecha na que la conceyala Yolanda Alonso tien previsto llevar a Plenu l’aprobación de la ordenanza d’asturianu, esto ye, con cuatro meses de retrasu colo anunciao en febreru. El borrador del documentu va tratase na Comisión de Promoción y Cultura que tien previsto convocar "na primer quincena de xunu".

 Somos Avilés insistió ayeri na Ordenanza Municipal pal Usu de la Llingua Asturiana nel Conceyu d’Avilés, un añu y un mes depués de que’l Plenu aprobara la so redaición a propuesta de la candidatura de xunidá popular colos votos a favor del PSOE –partíu nel gorbiernu–, Izquierda Xunida (IX), Ciudadanos y Ganemos, y el votu en contra de Partido Popular (PP). Depués de la polémica del mes pasáu, cuando Elipe abandonó la sala poles pallabres faltoses de Fernández Huerga, conceyal d’Urbanismu y Planificación, acusándolu de tener una enfermedá pol emplegar l’asturianu y tener una concepción asturiana d’Asturies, l’edil de Somos Avilés recuperó les dos entrugues pendientes, una d’elles referente a la situación de dicha ordenanza.

 Asina, preguntó ‘¿en que situación s’alcuentra nesti momentu la ellaboración de la mesma?’ y ‘¿cuándo va presentase a esti Plenu pa la so aprobación definitiva?’. “El borrador d’ordenanza yá ta redautáu. La intención que tenemos ye convocar la Comisión de Promoción y Cultura pa que tolos grupos podáis lleela, vela y facer aportaciones”, contestó Alonso, que situó la convocatoria de dicha comisión “na primer quincena de xunu”. Poro, “la idea ye traelo al Plenu depués del barnu, como mui tarde pa setiembre”.

 El compromisu primeru del equipu de gobiernu yera tenelu pal Plenu d’ayeri, yá qu’en febreru Alonso aseguró que “tamos trabayando na ordenanza d’asturianu y la idea ye llevala al Plenu del mes d’abril o mes de mayu. Dalgunes vegaes trabayamos”. Lo cierto ye que l’aprobación definitiva va tardar al menos cuatro meses más de lo anunciao nun primer momentu.                                                                                                    Fonte: asturies.com

CaleyAvilés 2017 dobla’l númberu de visites guiaes n’asturianu pel conceyu

Cartelu CaleyAvilés 2017

 La Estaya de la Llingua d’Avilés entama la segunda edición de CaleyAvilés, actividá consistente en visites guiaes n’asturianu a dellos puntos del conceyu. Esti xueves va tener llugar la primera: percorríu pel cascu históricu comenzando per Sabugo, pela mañana, y pel Muséu de la Historia Urbana d'Avilés, pela tarde.

 L’ésitu de CaleyaAvilés l’añu pasáu llevó al serviciu de normalización llingüística a organizar el doble de visites nesta ocasión, toes elles de baldre previa inscripción nel númberu de teléfono 985.54.55.08 o nel corréu electrónicu estayallingua@ayto-aviles.es, yá que el númberu de places ta llendáu a 25 en cada salida. La Estaya de la Llingua recomienda emplegar calzáu cómodu en toes elles.

 Concidiendo col Día de los Museos, esti xueves va tener llugar la primer salida, que va ser doble. Pela mañana, dende les 10 hores, los asistentes van poder percorrer el cascu históricu comenzando pel barriu de Sabugo, mentes que pela tarde, a les 18 hores, van poder visitar el Muséu de la Historia Urbana d’Avilés. Nesti casu, ye necesario apuntase nel corréu electrónicu museodeaviles@ayto-aviles.es o nel teléfonu 985.56.55.12.

 En mayu va haber otra actividá de CaleyaAvilés, el miércoles 24 dende les 16 hores, col Parque Ferrera como protagonista. En xunu la salida va ser el miércoles 21 (18 hores) nel Parque La Madalena, y en xunetu’l vienres 21 (18 hores) pel cascu históricu. Va zarrar la edición d’esti añu una visita al Barriu de Llaranes, que va tener llugar el 21 d’agostu (18 hores).

Interés en toda Asturies

 CaleyaAvilés tuvo orixe na iniciativa del 2015 d’una visita guiada n’asturianu Parque Ferrera, a la que siguió otra en mayu del 2016 al Muséu de la Historia Urbana d’Avilés. Na primer edición la organización tuvo qu’ampliase el númberu de places en dalgunes salides dada la demanda, con presencia de persones d’otros conceyos del país, sobre manera d’Uviéu y Xixón, qu’asina pudieron conocer meyor, y na llingua llariega, la historia y los requexos del Conceyu d’Avilés.                                                                                        Fonte: asturies.com

El Conceyu d'Avilés llevará a Plenu l'aprobación definitiva de les ordenances d’usu del asturianu n'abril o mayu

• por Pablo R. Guardado

Somos Avilés treslladó un ruegu al gobiernu municipal del PSOE pal emplegu de la llingua asturiana en tola cartelería y avanzar asina nel procesu de normalización. La conceyala de Promoción Social y Cultura, Yolanda Alonso, afirmó que n’abril o mayu va llevar por fin a Plenu l'aprobación definitiva de les ordenances d’usu del asturianu.

Na sesión plenaria celebrada ayeri l’edil Xune Elipe encargóse de treslladar el ruegu rexistráu por Somos Avilés pa que “nes señalizaciones, cartelería, paneles y demás elementos de comunicación y contactu cola ciudadanía dependientes d’esti ayuntamientu se tenga en cuenta la presencia de la llingua asturiana, apaeciendo na rotulación de los mesmos, ensin discriminación o minusvaloración nenguna”. Tres facer llectura del mesmu y poner exemplos de tresversalidá del usu del idioma, destacando la rotulación progresiva bilingüe de los vehículos municipales n’Uviéu, aseguró que “nun pidimos nada que cueste un euru más nin nada que nun se fixere enantes –editar un cartelu n’asturianu cuesta lo mesmo qu’ún en castellanu, apuntara–. Ye sólo una cuestión de voluntá”.

“Nun esperamos del PSOE, nin n’Avilés nin munchísimo menos n’Asturies, un plan llingüísticu mínimamente seriu. Namái pidimos un poco de voluntá y un poco de respetu”, añadió. Na so réplica, Alonso respondió que “voluntá política, tola del mundu; sí qu’hai una apuesta decidida ”, poniendo d’exemplu “un recursu permanente, la Estaya de la Llingua d’Avilés –de la que previamente Elipe defendiera’l so llabor, encabezáu pola so responsable Montserrat Machicado– cuando muncho de los conceyos de la redolada namái tienen personal cuando tienen subvención”.

El momentu más tensu del alderique llegó cuando, tres adelantar un programa de Cultura col Serviciu d’Educación pa trabayar l’asturianu con neños y neñes de 0 a 3 años, la tamién responsable de Promoción Social apuntó que “la señalética sí cuesta dinero”, a lo qu’Elipe respondió qu’eso nun yera lo que se taba tratando. Al tomar la pallabra otra vuelta, l’edil de Somos Avilés criticó “l’usu folclóricu, meramente testimonial y simbólicu, pero non normalizáu” del Conceyu. “Aiciones de tipu aisllaes, como les entamaes pola La Factoría, que tán xenial y tienen la respuesta de públicu que tienen, son d’efectividá reducida si nun lleven apareyaes otres que fidelicen l’apreciu pol asturianu y el so emplegu real, lo que s’algama con una política tresversal de normalización”.

Cuasi un añu de retrasu

Na so intervención cabera, Alonso esplicó’l porqué del mayor preciu de los cursos d’asturianu nes Aules Populares d’Avilés con respeuto a otros idiomes (147,50 euros frente a 110) criticáu por Somos –“págase per hores y los d’asturianu tienen más duración” –, y aseguró que “tamos trabayando na ordenanza d’asturianu y la idea ye llevala al Plenu del mes d’abril o mes de mayu. Dalgunes vegaes trabayamos”.

Nesi sen, Elipe denunciara enantes el retrasu de casi un añu na aprobación definitiva de la ordenanza d’usu del asturianu, que tuvo’l preste del Plenu d’abril del 2016, “pese a qu’intentamos quita-yos trabayu a los funcionarios ufiertando una propuesta d’ordenances adaptaes a la realidad sociollingüística d’esti conceyu”.

Fonte: Asturies.com

La pancarta de "Conceyos pola Oficialidá" al Plenu del Conceyu d'Avilés

• 
  

El plenu del Conceyu d'Avilés tratrará la petición d'escolingar la pancarta de "Conceyos pola Oficialidá".

Nel plenu de güei xueves del Conceyu d'Avilés los Grupos Municipales de Somos Avilés, Izquierda Xunida y Ganemos van pedir a la alcaldesa que respuenda a la petición d'asitiar na fachada de la la Casa de Conceyu de la pancarta de "Conceyos pola Oficialidá" con testu "OFICIALIDÁ pa que nun muerra la nuesa llingua".

El día 6 de mayu, Día de les Lletres Asturianes, conceyales de Somos Avilés asitiaron la pancarta  sobre la fachada de la Casa Conceyu. L'alcaldesa mandó retirar la pancarta porque, entre otros motivos, nun se pidió permisu. Con fecha  de 24 de mayu los Grupos Municipales de Somos Avilés, Izquierda Xunida y Ganemos rexistraron una solicitú na que pidíen que l’Ayuntamientu d’Avilés s’axuntare a la campaña «Conceyos pola Oficialidá», entamada pola organización cívica Xunta pola Defensa de la Llingua Asturiana en collaboración col Conceyu de Bimenes. Al nun tener rempuesta por parte de l'alcaldía, lleven a plenu la solicitú pa que na sesión plenaria se manifieste y dea contestación a la petición.

Na pregunta faese un repasu a los conceyos onde s'asitió la pancarta, destacando que'l conteníu de la pancarta ye una reivindicación polos derechos civiles de los y les asturianofalantes y nun ye un tema partidista o sectariu, como demuestra qu'esta campaña foi sofitada en conceyos con  equipos de gobiernu  pertenecientes a fuercies distintes qu’abarquen prácticamente tol espectru políticu. 

Fonte: Asturies.com

Adxuntu	Tamañu
pregunta_conceyos_oficialida_210716_.pdf	23.71 KB

Alcuentros lliterarios cola reciella n'Avilés

   El prósimu día 31 de mayu de 2016 a les 14:45 hores, nel Espaciu Escénicu de la Factoría d'Avilés,  va presentase'l cuentu El prósimu día 31 de mayu de 2016 a les 14:45 hores, nel Espaciu Escénicu de la Factoría d'Avilés,  va presentase'l cuentu “Samalandrán. Islla de lleendes” dientro del programa de “Alcuentros lliterarios cola reciella”. Entama la Estaya de la Llingua del Conceyu d'Avilés y va llevase a cabu un alcuentru lliterariu ente el autores y los alumnos del Colexo Principáu d'Avilés. dientro del programa de “Alcuentros lliterarios cola reciella”. Entama la Estaya de la Llingua del Conceyu d'Avilés y va llevase a cabu un alcuentru lliterariu ente el autores y los alumnos del Colexo Principáu d'Avilés.

  Na presentación del cuertu tarán Víctor Raúl Pintado Rey –Vitu- (maestro y autor del testu), Raquel Álvarez Iglesias –Niña Rata- (illustradora) y Esther Prieto (codirectora d'Ediciones Trabe). L'actu tará presentáu pol actor Carlos Alba “Cellero”

  L'autor de los testos y maestru avilesín, Víctor Raúl Pintáu Rei –Vitu-, va esplicar a los neños como se xestó esti proyectu didácticu infantil, qu'empezó como una actividá sociocultural del “Grupu infantil Villa Allegre” d'Avilés y col tiempu acabó estendiendo por distintos colexos de too Asturies. Amás de los colexos collaboraron nel proyectu'l Centru de formación del profesoráu d'Avilés-Occidente, y otres entidaes y asociaciones asturianes ente les que destaca'l Grupu d'ornitoloxía MAVEA, grandes conocedor de Ría d'Avilés.

  Per otru llau, la ilutradora xixonesa, conocida como Niña Rata, va enseñar a los neños dellos borradores y dibuxos coloriaos por que los alumnos del Colexo Principáu vean en que consiste'l procesu d'ellaboración de personaxes ya ilustración d'un cuentu.

  Esther Prieto, codirectora de la Editorial Trabe, va esplicar de volao, en que consiste el procesu d'edición y espardimientu de la obra una vegada escoyida pola editorial pa la so publicación.          Fonte: asturies.com

Avilés tendrá unes ordenances d'usu del asturianu

por Pablo R. Guardado

El Plenu del Conceyu d'Avilés aprobó la moción presentada por Somos Avilés pa facer unes ordenances d'usu del asturianu. Tolos grupos municipales votaron a favor a esceición del Partido Popular (PP), que se posicionó en contra.

El PSOE, Somos Avilés, Izquierda Xunida (IX), Ciudadanos y Ganemos sofitaron esta mañana esta iniciativa que va permitir regular l'usu del asturianu nel conceyu y el so tratamientu institucional. La votación, poro, foi de 19 votos a favor por 6 en contra, una mayoría bien amplia que namái nun sofita'l PP, fiel a la so posición actual de torgar cualquier avance na normalización del idioma.

En concreto, la moción de Somos Avilés pretendía "iniciar el procedimientu pa l’aprobación d’una Ordenanza Municipal pal Usu de la Llingua Asturiana nel Conceyu d’Avilés, de desarrollu progresivu y adaptada a la realidá sociollingüística propia". La mesma incluyía una esposición de motivos, onde recordaba que'l conceyu "tien cola llingua asturiana una rellación fonda y intensa dende hai bien de tiempu, que na historia asítianos nel sieglu XI cuando’l rei lleonés Alfonso VI firma’l 'Fueru d’Avilés', una especie de 'constitución' propia, redactada nel incipiente romance d’esta tierra que, según los estudios filolóxicos, ye’l primer testu conocíu en llingua asturiana".

Darréu fai un repás a la relllación d'autores llocales destacaos qu'empleguen l'asturianu, asina como de los pasos daos na normalización fechos n'Avilés y l'usu del idioma que realiza l'Ayuntamientu cola so ciudadanía, destacando que "foi'l primeru de toa Asturies n’aceptar a trámite un proyectu arquitectónicu redactáu n’asturianu nel añu 1988", ensin escaecer el llabor que desendolca la Estaya de la Llingua, "sección municipal que sería la encargada de la supervisión y aplicación efeutiva d’esta ordenanza, con llabores de traducción, correición llingüística y asesoramientu".

Cercanía cola Selmana de les Lletres Asturianes

Somos Avilés destaca que la presentación de la moción en feches cercanes a la celebración de la Selmana de les Lletres (del 2 al 8 de mayu) pensóse "pa valir como apoyu y conmemoración d’esa perimportante efeméride por parte del Conceyu d’Avilés. Creyemos que la relevancia simbólica que tendría la so aprobación na que ye la tercer ciudá d’Asturies representaría ente la ciudadanía una muestra de la querencia y apreciu pola so llingua propia, seya ésta por nacencia o adopción. Búscase tamién axuntar el nome d’Avilés al d’otros conceyos que yá cuenten con normatives llegales asemeyaes n’Asturies y nes comunidaes autónomes nes que s’usa otru idioma amás del castellanu".

Fonte: Asturies.com

Andecha Astur denuncia qu’Avilés nun cumple la llei de toponimia

Andecha Astur denuncia la colocación per segunda vegada de cartelos indicaores que nun respeten la toponimia oficial pesia lo dimpuesto llegalmente nel Decretu 145/2010, 24 de payares, pol que se determinen los topónimos oficiales del Conceyu d’Avilés.Andecha denunciaba esti día nun comunicáu que l’Ayuntamientu d’Avilés sigue emplegando nes siñalizaciones topónimos españolizaos qu’agora mesmo tan fuera de la llegalidá, comu ye’l casu de “Llaranes Viejo”, “Camino de San Lorenzo” y “Las Niñadas”.

Pa enriba dase la circustancia de que los indicaores en custión yá tovieren que ser camudaos nuna ocasión por poner “Llanares Viejo” y “Agera”, pero los nuevos continúen tando incorrechos, non yá por un erru de la empresa contratada pol Ayuntamientu, sinon porque ésti facilitó-yos los nomes de los pueblos castellanizaos ensin respetar la toponimia asturiana, qu’agora mesmo ye la llegal.

Dende Andecha Astur consideren qu’estos fechos son significativos de lo que ye’l despreciu del gobiernu municipal no qu’a cultura asturiana se refier, y del desenfotu del restu de los conceyales que nun respuenden énte estes faltes de respetu a la cultura y la identidá asturiana.

Fonte: Asturnews

Iniciativa pol Asturianu reclama l'usu de la llingua asturiana na páxina web del Conceyu d'Avilés

Iniciativa pol Asturianu presentó yá una quexa dirixida a l’alcaldesa d’Avilés, Pilar Varela

   Iniciativa pol Asturianu llamenta la oportunidá perdida pa la normalización del asturianu na nueva web institucional del Conceyu d'Avilés. El nuevu diseñu del portal estrenóse la selmana pasada n'internet con una versión en castellán y la promesa de dir ufiertando esos conteníos n'otres llingües, entamando pol inglés. Pa l'asociación, ye inaceptable que'l gobiernu municipal escaeza l'asturianu y arrenuncie a normalizar la llingua propia na rede, magar que cunta con un serviciu de normalización n'activu, la Estaya de la Llingua, que bien podría encargase d'esti trabayu.

   Iniciativa pol Asturianu encamienta al gobiernu d'Avilés a iguar de manera inmediata esta situación de discriminación y garantizar los derechos llingüísticos de tola ciudadanía. Nesi sen, dende la organización presentóse yá una quexa dirixida a l'alcaldesa por esti escaezu imperdonable de la llingua asturiana nun espaciu de gran visibilidá como ye la web d'un Conceyu que permite facer munches xestiones en llinia como ye'l d'Avilés.                        Fonte: Infoasturies.net

La XDLA esixe al Conceyu d'Avilés que respete la toponimia oficial

Avilés,  barriu Les Meanes

   Depués de la remodelación que’l Conceyu d’Avilés ta faciendo d’ún de los barrios más céntricos d’Avilés, Les Meanes, l’alministración local acaba d’axudicar el proyectu p’asitiar una estructura de 15 metros de llargor que va acoyer los servicios de tresporte d’autobuses de la zona. El diseñu de la marquesina, de la empresa checa de MMCITÉ + A.S., tamién contempla recoyer unes lletres col nome del barriu avilesín. Sicasí, el proyectu nun recueye’l nome oficial del barriu, Les Meanes/Las Meanas, aprobáu col preste del Gobiernu d’Avilés nel 2009 y del Gobiernu d’Asturies nel 2010. El diseñu de la empresa checa namás va tener la opción Las Meanas, forma única que yá nun existe llegalmente.

   Por too eso, la Xunta pola Defensa de la Llingua Asturiana (XDLA) esixe al Conceyu d’Avilés qu’ordene modificar el diseñu orixinal pa que la marquesina cumpla cola llegalidá en materia toponímica, recoyendo la forma Les Meanes o, nel so casu, la forma oficial Les Meanes/Las Meanas. Hai que recordar que’l procesu d’oficialización de la toponimia asturiana tien como fin la recuperación d'estos nomes, polo que nun vemos meyor forma de visibilizar y poner en valir el nome tradicional del barriu qu’asitiándolo nuna de les zones más transitaes de la ciudá.

   Otra manera, la organización espera que les pantalles que se van instalar na mesma infraestructura colos horarios de los servicios d’autobús tamién respeten los nomes oficiales de los llugares d’Avilés. La XDLA recuerda que’l procesu de recuperación de la toponimia, onde participen espertos y vecinos y que surde por mor del consensu políticu y social, tien como fin que los nomes oficiales nuevos aparezan en tolos documentos y nos carteles indicadores, lo contrario sería dir contra la llexislación vixente.                                                         Fonte: InfoAsturies.net