La pancarta de "Conceyos pola Oficialidá" al Plenu del Conceyu d'Avilés

• 
  

El plenu del Conceyu d'Avilés tratrará la petición d'escolingar la pancarta de "Conceyos pola Oficialidá".

Nel plenu de güei xueves del Conceyu d'Avilés los Grupos Municipales de Somos Avilés, Izquierda Xunida y Ganemos van pedir a la alcaldesa que respuenda a la petición d'asitiar na fachada de la la Casa de Conceyu de la pancarta de "Conceyos pola Oficialidá" con testu "OFICIALIDÁ pa que nun muerra la nuesa llingua".

El día 6 de mayu, Día de les Lletres Asturianes, conceyales de Somos Avilés asitiaron la pancarta  sobre la fachada de la Casa Conceyu. L'alcaldesa mandó retirar la pancarta porque, entre otros motivos, nun se pidió permisu. Con fecha  de 24 de mayu los Grupos Municipales de Somos Avilés, Izquierda Xunida y Ganemos rexistraron una solicitú na que pidíen que l’Ayuntamientu d’Avilés s’axuntare a la campaña «Conceyos pola Oficialidá», entamada pola organización cívica Xunta pola Defensa de la Llingua Asturiana en collaboración col Conceyu de Bimenes. Al nun tener rempuesta por parte de l'alcaldía, lleven a plenu la solicitú pa que na sesión plenaria se manifieste y dea contestación a la petición.

Na pregunta faese un repasu a los conceyos onde s'asitió la pancarta, destacando que'l conteníu de la pancarta ye una reivindicación polos derechos civiles de los y les asturianofalantes y nun ye un tema partidista o sectariu, como demuestra qu'esta campaña foi sofitada en conceyos con  equipos de gobiernu  pertenecientes a fuercies distintes qu’abarquen prácticamente tol espectru políticu. 

Fonte: Asturies.com

Adxuntu	Tamañu
pregunta_conceyos_oficialida_210716_.pdf	23.71 KB

Xixón Sí Puede súmase a 'Conceyos pola Oficialidá'

Ayuntamientu de Xixón, nel centru Mario Suárez del Fueyo

 Demanda l'aplicación con "rigor" del Plan de Normalización Social del Asturianu.

 Conceyales de Xixón Sí Puede (XsP) y miembros de la Xunta pola Defensa Asturiana, coleutivu que ta moviendo la campaña #quelaponganelbalcón dientro de la iniciativa 'Conceyos pola Oficialidá' qu'entama xunto col Ayuntamientu de Bimenes de cara a ganar apoyos en tol país pa la declaración d'oficialidá del 2 de xunetu, mostraron ayeri la pancarta frente a la Casa Conceyu de Xixón. Con esta aición, la candidatura de xunidá popular amuesa el "so sofitu a la oficialidá de la llingua asturiana", según afirma nun comunicáu.

 D'igual forma, recuerda "que ye hora d'aplicar con rigor el Plan de Normalización Social del Asturianu aprobáu pol Conseyu Asesor de la Llingua por unanimidá y que foi'l resultáu d'un ruegu de XsP. La normalización del asturianu ye'l camín pa que la convivencia de dambes dos llingües, l'asturianu y el castellanu, n'igualdá de condiciones permita la sobrevivencia del asturianu, un patrimoniu cultural que tenemos la responsabilidá de protexer n'Asturies pa evitar el so desaniciu".

 La pancarta de 'Conceyos pola Oficialidá' yá tuvo colingada en Bimenes, Grau y Morcín, y ta pendiende de la respuesta del pidimientu fechu a Alcaldía por Somos Avilés pa ponela nel balcón de la Casa Conceyu avilesina                                                          Fonte: asturies.com