30/12/11

Un billingüismu claramente desequilibráu


Xose González
Dase n’Asturies una situación de bilingüismu claramente desequilibráu y perfeutamente definíu pola coesistencia de dos llingues "castellanu y asturianu" nel mesmu espaciu social asina como pol usu d’éstes per parte de los ciudadanos, col castellanu nuna posición dominante y l’asturianu con mui poques oportunidaes d’emplegu normal. El primer enzancu col que nos atopamos ye que nes capes cimeres de la sociedá asturiana "progresistes o conservadores" se sigue prefiriendo l’usu del idioma castellanu en tolos ámbitos "publicos y privaos" y en tolos rexistros "orales y escritos". Hai tamién persones mui influyentes: intelectuales, criadores d’opinión, etc., que consideren "normal" l’actual situación llingüística y nun ven la necesidá d’una normalización, nin midíes correutores de nenguna mena.

Esta influyencia del castellanu fai que l’asturianu se desprestixe y s’empobreza y que se tea dando un frañimientu na so tresmisión de pas a fíos, colo que l’usu de la llingua asturiana na vida cotidiana va amenorgando de xeneración en xeneración. El procesu dexenerativu al que ta abocada la nuesa llingua vien dau pola desastrosa politica llingüística desendolcada n’Asturies nos últimos años, toles midíes llevaes a cabu foron frutu d’una planificación llingüística pocu seria. Un gran desdexamientu caracterizáu poles prudencies polítiques, nun hubo otra política llingüística que la de dexar que la situación diglósica se caltenga nes sos carauterístiques básiques ye decir: el castellanu nuna posición dominante y l’asturianu con mui poques oportunidaes d’emplegu normal.

Esta situación de billingüismu produz una riestra d’efeutos no que se refier al emplegu normal d’una y otra llingua. Nel casu del castellanu estos efeutos son claramente positivos con una estructura llingüistica ensin dañar y un repertoriu compuestu de variedaes tantu sociales como estilístiques. "El castellanu al ser la única llingua con calter d’oficialidá n’asturies" exerce de llingua dominante, normalmente allugada a la sociedá y emplegada dafechu en tou tipu de situaciones asina como: n’alministración, nos medios de comunicación y n’enseñu, los ciudadanos na so condición d’usuarios del castellanu tienen tolos drechos cívicos protexíos.
No que se refier al asturianu estos efeutos tienen un calter negativu yá que non solo vense amenorgaes les sos ocasiones d’emplegu sinón qu’amás vese deteriorada la so estructura llingüística. "L’asturianu al nun ser oficial" exerce de llingua marxinada y polo tantu anormalmente allugada a la sociedá, emplegada pa temes poco trescendentes y por supuestu desaverada del usu alministrativu, de los medios de comunicación y con una presencia permenguada n’enseñu, los falantes d’asturianu na so condición d’usadores del idioma alcuentrense llegalmente desprotexios.
La causa de que l’asturianu tea nuna situación mala nun ye culpa del castellanu, sinón de la falta d’igualdá d’oportunidaes que se produz nel usu social de dambes llingues. La normalidá social de la llingua daría pasos de xigante si los políticos utilizaren les midíes polítiques que tienen al so algame, "tienen los medios pero lo que falta ye la intención". Pa que l’asturianu puea dir superando la situación que lu conderga a un posible desaniciu, son necesaries unes midíes de normalización social de la llingua asturiana que tean inxertaes nun marcu llegal y xurídicu afayadizu y formen parte d’un proyeutu de politica llingüística coherente y globalizador.

Los falantes d’asturianu tienen drechos llingüísticos que son inalienables y que los poderes públicos tán comprometíos a garantizar. Nun hai sociedá moderna, eficiente y respetosa con tolos sos miembros si s’establecen categoríes de ciudadanía y graduaciones nos drechos en función de la llingua que s’usa. cada persona tien drechu a escoyer llibremente y ensin imposiciones de nengún tipu utilizar l’asturianu o’l castellanu como principal ferramienta d’espresión, esti ye’l criteriu elemental col que resolver el panorama de la controversia llingüística d’Asturies.
Los politicos tienen que comprometese d’alcuerdu col so deber a "poner la oficialidá del asturianu nel centru del debate politicu", toles actuaciones institucionales desendolcaes n’Asturies han tratar l’asturianu cola dignidá que requier una realidá civil y cultural de la so importancia. L"’algame del estatus d’oficialidá del asturianu" xunto col castellanu ye’l únicu camín pa que el mayor padremuñu cultural que tien el país siga vivu y salga de la llacerosa situación na que s’alcuentra, "namái l’oficialidá del asturianu" pue garantizar y homologar los drechos llingüisticos de tolos asturianos de mou que dexemos de una vegada de ser ciudadanos de segunda.
Si se caltienen les actuales circustancies el castellanu pasará a ser la primer llingua pa la mayor parte de los asturianos, esto quiere dicir la desapaición del asturianu como sistema llingüisticu usáu n’Asturias. Dende llueu nun se pue zarrar los güeyos ante una realidá tan dramatica como la que tamos viviendo, ye politicamente irresponsable allargar por más tiempu la desproteición de los drechos llingüisticos de les persones o lo que ye peor dexar morrer el nuesu patrimoniu llingüisticu.

Fonte: Aruelu.com

2 comentarios:

  1. Xosé González ta bien acertáu, paez que teamos sufriendo entá, nesta tema de la llingua, les reminiscencies del antiguu réximen que yá creíamos sumíes y la nuesos políticos paecen atopase bien a gustu d'esta manera.
    La prueba ye que nun s'acolumbra intención aparente d'asumir los cambeos necesarios en pos d'un auténticu bilingüismu oficial qu'iguale racionalmente a tolos efectos los derechos y deberes del asturianu respectu del castellán que los asitie nel mesmu planu llegal y xurídicu.

    ResponderEliminar
  2. Tamos nun presente inciertu y a la espera d'un futuru billingüismu equilibráu pola oficialidá, tamos nun tiempo d'espera y tamién de cambeos pal gobiernu de Cascos y de la llingua... ¡esperemos!

    ResponderEliminar

Los comentarios tán pendientes de moderación. Espublizaránse lo primero dable.