12/3/10

Desixen la reconocencia de la pluralidá llingüística del Estáu nel pautu educativu

Los grupos parllamentarios de PNV, BNG, ERC y ICV anunciaron güei que nesti momentu nun firmaríen el testu del pautu d'educación por, ente otres coses, la necesidá de que se reconoza la pluralidá llingüística d'España. Tres la reunión conxunta col ministru d'Educación, Ángel Gabilondo, p'axustar el documentu ellaboráu pol Gobiernu p'algamar el Pautu Social y Políticu pola Educación, tolos grupos aseguraron que "güei" nun roblaríen el testu porque, al so xuiciu, queden "munchos" aspeutos por consensuar.

El PNV, representáu pol diputáu Aitor Esteban, manifestó'l so "desconciertu" énte la xunta de güei nel Ministeriu d'Educación, que calificó de "caos", y porque esti testu non sólo tien que ser negociáu colos grupos, sinón tamién colos axentes "varios" del sistema educativu y les comunidaes autónomes. Coles mesmes, alvirtió que "lo que ye güei" el so grupu "nun lu roblaría" porque tovía queden cuestiones por concretar, como la reconocencia de les llingües cooficiales na enseñanza frente a la "fiebre del inglés".

"Ye insultante que nun se contemple de manera categórica nel documentu que l'Estáu español ye plurilingüe", recalcó'l voceru de los independentistes catalanes, Joan Tardá, pal que sin un pautu "de llingües", ye "imposible" un pautu educativu. "Que nun cuenten colos republicanos si nun reconoz nel testu la enseñanza plurilingüe", sentenció. Na mesma llinia mostróse la vocera nacionalista de BNG, Olalla Fernández Dávila, que pidió'l "respetu" pola pluralidá llingüística y defendió la educación pública, igual que'l representante d'ICV Jordi Guillot.

Fonte: Europa Press

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.