Owen Jones tuitea n'asturianu

Asturies

 

| 

14 Avientu, 2015 por Redacción

L'autor de Chavs súmase al actu central de Podemos n'Uviéu

Podemos Asturies anunció hai unes hores que l'autor de Chavs, La demonización de la clase obrera y home de referencia de la nueva esquierda británica y europea sumábase al actu central d'Uviéu que va facese dende les 19.00 nel Palaciu de los deportes de la capital d'Asturies.

Jones, incluyó un tuit na so cuenta oficial na que dicía "Faime muncha ilusión tar mañana n'Asturies con @PodemosAsturies y@Pablo_Iglesias_  y col resto de compañeres".

Xunto a Owen Jones, van intervenir Sofía Castañón, Íñigo Errejón, Ana Taboada, Emilio León ya  Irene Montero, no que dende Podemos defínese como "una xornada histórica p'Asturies". Pablo Iglesias nun podrá acudir finalmente al tener que reestructurar la so axenda pa poder acudir al funeral de los dos policíes asesinaos en Kabul nun ataque talibán a la embaxada española na capital afgana.

Fonte: Asturies.com

L’asturianu, octava llingua minoritaria más utilizada en Twitter

L’asturianu, octava llingua minoritaria más utilizada en Twitter según Indigenous Tweets

Kevin Patrick Scannell, profesor del Departamentu de Matemátiques y Informática de la Saint Louis University, sitúa a l’asturianu como la octava llingua minoritaria más utilizada en Twitter. La primera de la clasificación ye l’eusquera. La web Indigenous Tweets, dedicada a la presencia de les llingües minoritaries en Twitter y creada pol propiu profesor estauxunidense, cifra’l númberu d’usuarios qu’empleguen la llingua asturiana nesta rede social tan popular en 749. Estes persones punxeron en circulación 254.257 ‘tweets’ o mensaxes, lo que coloca al asturianu como la octava llingua minoritaria más utilizada en Twitter. La clasificación ye liderada pol eusquera, con 17.042 usuarios y 4.629.179 de mensaxes, siguíu del criollu haitianu (14.267 y 3.801.664) y del galés (14.218 y 2.461.608). Tán tamién perriba de la llingua asturiana’l pampangu (Filipines), el frisón, el setswana (Botsuana, Sudáfrica, Zimbabue y Namibia) y el gaélicu (Éire). Nesta clasificación nun apaez nin el catalán nin el gallegu, mientres que l’aragonés rexistra 80 usuarios y 54.292 ‘tweets’. Otra manera, la llista inclúi'l montañés, variante del astur-lleonés, baxo’l nome de 'cántabru', con 13 usuarios y 28.523 mensaxes. Fonte: Asturies.com

Yá pue usase Twitter col asturianu como llingua vehicular

Iniciativa pol Asturianu firma un conveniu con Splitweet que permite usar Twitter n’asturianu

La organización Iniciativa pol Asturianu ta acabante firmar un conveniu con Splitweet, un xestor de cuentes de Twitter pol que la plataforma ufre dende agora una versión n’asturianu de tol sistema, lo que permite usar Twitter dafechu n’asturianu, pudiendo xestionar amás delles cuentes al mesmu tiempu. El sistema permite usar Twitter dende la plataforma Splitweet con tolos mesmos servicios qu’esisten na web d’esta rede social. Dende Iniciativa pol Asturianu espliquen qu'abren asina "una llínia de trabayu na que van firmase alcuerdos con empreses pa que fomenten l’usu l’asturianu". L’asturianu súmase asina a los cuasi 30 idiomes nos que ta disponible Splitweet, anque ye unu de los únicos 7 que tien la torna del sistema al 100%, xunto a inglés, castellán, catalán, danés, hindi y suecu.
Mientres, otres llingües con millones de falantes como’l chinu, el rusu, el portugués o l’italianu tán tovía en niveles de torna inferiores al del idioma d’Asturies. La torna corrió a cargu de la organización Iniciativa pol Asturianu y nun cuntó con nengún tipu d’ayuda pública, mientres que l’encontu tecnolóxicu úfrelu Splitweet. Dende Iniciativa pol Asturianu esperen que Twitter tamién use l’asturianu en futures ediciones "agora que ta entamando a poner en marcha les plataformes n’otres llingües, como catalán o gallegu". Dende la organización asturiana va trabayase nesti campu, pues considérase imprescindible pa la normalización del idioma.
Más información: Usa Twitter n'asturianu equí

Fonte: asturnews