RPA va radiar n'asturianu l'Uviéu-Alcorcón

El Lealtad-Somozas tamién va poder sentise na radio asturiana y vese pela TPA dientro de la programación especial pola Selmana de les Lletres del ente públicu de comunicación.

Miguel Fernandi va ser l'encargáu de radiar pa la RPA'l partíu que va enfrentar el vienres 5, Día de les Lletres Asturianes, nel Carlos Tartiere Nuevu al Uviéu col Alcorcón, correspondiente a la xornada 37 de Segunda División. L'aniciu del partíu ta previstu pa les 20 hores y el comentarista va tener, como ye vezu, l'apoyu na retresmisión d'Armando.

El domingu 7 al meudía, mentes, Fernandi va tener como compañeru a Nacio González en TPA nel choque de Les Caleyes que va enfrentar al Lealtad y al Somozas na penúltima xornada del grupu 1 de Segunda División B. Nesti casu, Fernando García de Dios va comentar el choque ente asturianos y gallegos en RPA en llingua asturiana.
Fonte: asturies.com

L'editorial del Anuariu de la Música Asturiana 2016 céntrase nel papel qu'ha de xugar la RPA

La espublización demanda un tratamientu "tresversal" a la música del país na programación de la radio pública. El númberu nuevu preséntase nel Llar La Llegra.

"La música propia del país ha tener un tratamientu fondu, seriu, permanente y tresversal na so programación", afirma la editorial del Anuariu de la Música Asturiana 2016, que lleva'l nome de 'Una radio musicalmente asturiana'. Nél la revista qu'espubliza Goxe Producciones y que fai repás a l'actividá musical del país analiza fondamente qué papel ha de xugar la RPA na difusión de la música tradicional y la fecha nes llingües del país, con una presencia anguaño cásique nula.

La portada d'esti añu protagonízala l'artista revelación, Rodrigo Cuevas, qu'echa una mirada al 2016, cuando se convirtió nun fenómeno de mases. Otros artículos destacaos son los reportaxes entitulaos '¿La tercer revolución del folk asturianu?', sobre les tendencies y estilos nuevos que tán surdiendo nel panorama folk del país; 'Política musical asturiana: análisis, revisión y propuestes', onde protagonistes destacaos de la escena asturiana falen de too ello; o 'Música na maleta', que trata sobre'l llabor de los músicos asturianos emigraos.

Tamién hai espaciu pa informes, como 'La segunda xeneración moza', que se centra nes voces más nueves de la tonada, y pa entrevistes. Nesta ocasión, amás de la que protagoniza Cuevas, inclúinse otres a Vicente Díaz, a Marisa Valle Roso y al gaiteru Bras Rodrigo.

Completen los conteníos del Anuariu les cróniques sobre'l Premiu al Meyor Cantar y sobre la participación asturiana nel Desfile de San Patriciu de Nueva York, y la seición 'Collecha', onde apaecen les producciones del añu 2016, ventiséis en total, centraes fundamentalmente na tonada y la música pa neños. Esta cantidá ta "mui per debaxo de les d’hai unos años", según comenten dende Goxe Producciones.

D'igual forma, hai que destacar los collaboradores d'esti númberu nuevu, coles firmes d'Ismael Arias, Ruma Barbero, Alberto Álvarez Peña, Inaciu Llope y Adolfo Camilo Díaz.

Discu con 17 cortes

Como tolos años, l'Anuariu de la Música Asturiana, que torna a ser de baldre, inclúi un CD con composiciones de tolos estilos, dende la tonada, el folk o'l rock, a les bandes de gaites o la canción d’autor. En total son diecisiete cortes que conformen una amuesa de la producción musical asturiana del 2016 y que protagonicen L'Aldu, Señor Cabrales, Salón Bombé, Taranus, Rodrigo Cuevas, Pop Piquiñín, LaKadarma, Amieva o L-R.

La presentación de la revista celebróse, nel uvieín Llar La Llegra. Nella participaron los sos responsables, Xune Elipe, Damián Barreiro y Xicu Ariza, que protagonizaron un alderique sobre la situación de la música asturiana. D'igual forma distribuyóse los primeros exemplares del anuariu y entamóse un mercadín de discos nel que miembros de grupos o discográfiques pueddieron vender la so producción.

 Fonte: Asturies.com

La XDLA dulda si tien sentíu caltener la TPA y la so xeneración de deuda

Na semeya d'arquivu, Antonio Virgili 

  “¿Tien sentíu que paguemos una radio que ta pa poner lo mesmo que pue sonar en Cadena Dial o Los 40?” Con esta entruga retórica la Xunta pola Defensa de la Llingua (XDLA) asoleyaba esti llunes día 2 un comunicáu nel que se plantegaba si ye’l momentu de reflexonar alrodiu la utilidá de caltener la TPA y los costos económicos que supón.

  El movimientu de reivindicación llingüística siempre defendió la existencia d’una canal autonómica, pero nun comunicáu asoleyáu ayeri llunes, la XDLA , pidía reflexonar si  “nestes condiciones, onde RTPA namás ta al serviciu de los caprichinos d’Antonio Virgili y pa incumplir la llexislación vixente, ye’l momentu de facer un llamáu a la sociedá asturiana pa que reflexone sobre si tien sentíu mantenelos”.

  El comunicáu entamaba faciendo alcordanza de qu’acabamos l’añu nel que RTPA tuvo celebrando una década d’existencia y plantegando que “no que tien que ver col compromisu que marca la llei cola difusión de la llingua propia, foron diez años con munches sombres y mui poques lluces. Con too, nun vamos dir tan p’atrás; vamos quedar nos últimos 365 díes. Y ye qu’hai poco más d’un añu viemos a un conseyeru d’Educación y Cultura afirmando que RTPA diba dexar d’usar l’asturianu pa facer chancia. Tamién viemos a un director xeneral de RTPA asegurando que yera partidariu del usu del nuestru idioma nos medios públicos. Y viemos a una mayoría de la Xunta Xeneral aprobando’l proyectu d’un plan de dignificación que falaba d’usar la radio y la televisión públiques como ferramienta de normalización llingüística”.

  

  Sicasí, pasaron 365 díes y “a pesar de los reportaxes trunfalistes sobre tolo bono que supuestamente fixeron en TPA nestos últimos años, col usu del nuestru idioma too sigue igual. L’asturianu namás val pa les pingarates, pa da-y un toque de color y d’humor a una emisora que bien podría emitir dende Madrid -por muncho que nos echen en cara que de vez en cuando van peles caleyes, como si eso yá valiera pa xustificar la so existencia-. Asina, l’usu de la toponimia oficial va p’atrás, nun aparecen programes d’entretenimientos nuevos con un tratamientu dignu pa la cultura asturiana, l’idioma sigue arrequexáu nos usos diglósicos ensin nengún procuru cola corrección y calidá, la programación infantil n’asturianu emítese ensin promoción nos fines de selmana -nuna canal onde l’espectador mediu tien más de 50 años-… “

  Nestes condiciones, la RTPA funciona “como’l güertu priváu d’Antonio Virgili y amigos, los que diseñen una programación con pocu o nengún interés, amás de mui baxa calidá. A pesar de too esto, la oposición calla gracies a unos puestos directivos nuevos a repartir a deu ente PSOE, PP y IX. ¿De qué valen les promeses electorales énte la posibilidá de colocar a ún de los nuestros nel conventu? Eso sí, pa llavar la cara echamos dalgún partíu o película n’asturianu de manera residual y con muncha improvisación. Sicasí, parez qu’a los asturianos esto nun-yos val”.

  Y ye que la TPA vuelve zarrar añu rexistrando mínimos históricos, mentes que RPA parez nun existir pa la mayor parte de la ciudadanía: “los asturianos -los pocos que vemos y sentimos RTPA- asistimos plasmaos a una televisión onde l’usu del idioma ye, amás de marxinal, diglósicu, vulgar y centráu no folclórico. Nel casu de la radio, l’asturianu aparez como pingarates a lo llargo de la programación, mentes que la música nesti idioma parez nun existir. ¿Tien sentíu que paguemos una radio que ta pa poner lo mesmo que pue sonar en Cadena Dial o Los 40?”

  El Comunicáu fina con una dura crítica al papel d’aculturación de la TPA: “Estos medios nun son más qu’una ferramienta de sustitución llingüística y d’aculturación. El movimientu de reivindicación llingüística siempre defendió la so existencia, pero nestes condiciones, onde RTPA namás ta al serviciu de los caprichinos d’Antonio Virgili y pa incumplir la llexislación vixente, ye’l momentu de facer un llamáu a la sociedá asturiana pa que reflexone sobre si tien sentíu mantenelos, amás de pagar la deuda xenerada polos sos xestores”.                                                Fonte: asturnews.com

'Pasín a pasu', programa especial de RPA pola Selmana de les Lletres

A les 16 hores, conducíu por Damián Barreiro

Damián Barreiro Maceiras

  Pasín a pasu' trátase d'un magazine cultural producíu por Goxe Producciones nel que'l periodista avilesín, ex redautor d'Asturies.com, va repasar tolos díes hasta'l vienres, a lo llargo d'una hora, l'actualidá y el patrimoniu de la llingua asturiana, amás de tola so producción cultural. "Too ello pa concienciar a los miembros de la nuestra comunidá llingüística de que son los únicos garantes de la continuidá del patrimoniu llingüísticu d'esta tierra", espliquen.

  Barreiro va entrevistar a persones y entidaes que de forma voluntaria o dende'l sector empresarial y institucional trabayen pa que l'asturianu "gane espacios d'usu na sociedá asturiana de güei". Tamién va haber espaciu pa los músicos y lliteratos qu'utilicen l'asturianu como ferramienta de trabayu, con especial protagonismu pa los ganadores de los Premios Lliterarios 2015 qu'entama la Conseyería d'Educación y Cultura.

  Per otru llau, nel programa namás se va escuchar música n'asturianu, yá sían novedaes discográfiques o temes pasaos. Amás d'esto, una axenda d'actividaes diaria va informar de tolos actos que s'entamen por mor de la Selmana de les Lletres.

  P'acabar, delles persones famoses van mostrar a l'audiencia la so palabra favorita na nuestra llingua materna.                                                                           Fonte: asturies.com

'Naguando' entama una etapa nueva en RPA

L'espaciu n'asturianu conducíu pol Naciu Varillas pasa a les 21.30 hores y estrénase con una entrevista al conseyeru Alonso.

D'esta forma, 'Naguando' pasa a tener entidá propia al dexar de ser un espaciu dientro de 'El tren de RPA' pa funcionar como un programa en sí. Asina, va emitise a diariu, de llunes a vienres, a les 21.30 hores, con 30 minutos de llargor.

Pa esta nueche, con motivu de la estrena d'esta etapa nueva, Varillas va entrevistar al Conseyeru d'Educación y Cultura, Genaro Alonso. Amás, el programa va contar cola collaboración de periodistes y escritores tolos díes, tando los llunes dedicaos al fútbol coles firmes de Pablo R. Guardado, redautor d'Asturies.com, y de Pablo Texón.

Fonte: Asturies.com

Iniciativa propón escoyer la meyor noticia de 2015

  Nuna votación que vien entamando dende l’añu 2013 la RPA, cola collaboración de l’asociación Iniciativa pol Asturianu, propónse escoyer la meyor noticia de 2015.La propuesta tien por oxetivu conocer les noticies del añu que los internautes consideren meyores pal futuru de la llingua asturiana. El llistáu fízose teniendo en cuenta les propuestes de los asociaos y asociaes d’Iniciativa pol Asturianu pa reflexonar sobre los pasos alantre nel procesud e normalización a lo lllargo de 2015.

  Pa la votación escoyéronse 17noticies de tolos ámbitos de la vida social, cultural y política d’Asturies, que foran positives pal asturianu y que se dieran nel añu 2015. En 2013 l’ésitu d’Asterix n’asturianu y en 2014 “Los bolechas”, programa infantil na nuesa llingua en TPA, fueron les noticies escoyíes.

  El resultáu de la votación popular va desvelase dientro del programa “Noche tras noche”, de RPA, el viniente 18 de xineru, a partir de les 23 hores. Y los interesaos puen votar hasta cinco noticies candidates nesta páxina d’encuestes de Docs de Google hasta’l 17 de xineru.                                                                  Fonte: asturnews.com

L'Uviéu-Almería y SpórtingB-Burgos, n'asturianu pela RPA

Real Uviéu, equipu asturianu en segunda división de la Lliga española

 La radio pública súmase a la campaña 'Col asturianu, xugamos nel mesmu equipu'.

 Miguel Fernandi va comentar el partíu del equipu azul, tercer clasificáu a dos puntos del ascensu direutu que marca l'Alavés, contra'l sorprendente colista de la categoría, l'Almería. El choque va celebrase'l domingu a les 19.15 nel Carlos Tartiere Nuevu, anque la RPA va coneutar col campu uviedín a les 18.30 hores.

Real Sporting de Xixón, equipu en división d'honor de la Lliga española

 Tamién va radiase n'asturianu'l Spórting B-Burgos d'esti sábadu a les 15.45 hores en Mareo. RPA yá retresmitiera enantes partíos en llingua asturiana, tanto del Uviéu como del Sporting, anque siempre de manera puntual.                                            Fonte: asturies.com

RPA va emitir programación especial pola Selmana de les Lletres Asturianes

La emisora pública asturiana RPA va emitir a lo llargo de la Selmana de les Lletres, ente’l llunes 4 y el vienres 8 de mayu, una programación especial por cuenta d’esta efeméride.

 Trátase d’una propuesta fecha dende Goxe Producciones que consiste nun paquete de quince pieces d’una duración de diez minutos, nelles van tratase temes como: 40 años de Conceyu Bable, historia de la llingua asturiana, la so situación na enseñanza, la creación lliteraria, la normalización social, la tresmisión xeneracional, la reivindicación llingüística, la música asturiana, el gallego-asturianu o los premios lliterarios del Gobiernu d’Asturies. En formatu de reportaxe van tratándose toos estos asuntos, cola participación de más de trenta intervinientes de los más variaos campos, casu de Xosé Lluis García Arias, Xuan Xosé Sánchez Vicente, Lluis Xabel Álvarez, Ana Cano, Xulio Viejo, Penélope Miranda, Ramón d’Andrés, David Guardado, Iris Díaz Trancho, Pablo Xuan Manzano, Antón García, Esther Prieto, Ingnaciu Llope, Ismael Arias, Nacho Fonseca o Yolanda Huergo, ente otros munchos.

De les quince pieces cinco van dedicase a ufiertar l’axenda diaria d’actos entamaos per toa Asturies que tienen como protagonista a la XXXVI Selmana de les Lletres, a dar una recomendación lliteraria y a una entrevista especial con profesionales d’ámbitos estremaos que falen n’asturianu del so llabor y esperiencies, ente ellos l’actriz María Cotiello, el deportista Fernando González o’l cocineru Lluis Nel Estrada; quierse con ello dar una visión de normalidá na comunicación en llingua asturiana, amosando’l so valir como ferramienta d’espresión válida pa la sociedá actual.

La emisión d’estos espacios va facese en distintos horarios, siempre depués de los informativos, repitiéndose a lo llargo de la selmana. Otra manera, tamién van tener reflexu nes redes sociales, onde va dir dándose información sobre ellos.

L’equipu encargáu d’iguar esta programación especial ta formáu polos periodistes Xicu Ariza y Damián Barreiro, la llocutora Mely Fernández, el técnicu Xuan Xosé Mariño, el músicu Sergio Rodríguez y el productor Xune Elipe, que quieren facer constar la so satisfacción pol resultáu final y animen a la so escucha, al traviés de la que va tenese una visión xeneral y completa de la situación actual del nuestru idioma.

Fonte: Infoasturies

El desenllaz de "La guerra de los mundos", el sábadu en RPA

 

Asocedió'l  sábadu  n'Asturies

    El gran teatru del mundu' de RPA emite mañana la segunda y cabera parte de 'La guerra de los mundos', la más conocida producción de radioteatru de la historia, basada na obra d'Herbert George Wells. A partir de les 22 hores va poder sentise'l desenllaz d'esta historia cola qu'Orson Wells aterrorizó nel 1938 a Estaos Xuníos con una supuesta invasión estraterrestre y que Dolfo Camilo Díaz adaptó en llingua asturiana pal programa que dirixe na radio pública del país.

    Na versión asturiana de 'La guerra de los mundos', la historia trescurre n'Asturies n'actualidá y xente bien conocío como Xune Elipe, Camilo Sousa, Alberto Vecino o'l vicealcalde de Corvera, Iván Fernández, faen d'ellos mesmos rellatando la invasión. Tamién participen actores como Antón Caamaño, Silvino Torre, Ana Belén León, Katia Borlado, Alberto Rodríguez, Sonia Santos o José Ramón Oliva, ente otros. "La ironía ta mui presente, nun xueu hiperrealista enllenu de guiños a l'actualidá", esplica Camilo Díaz.           Fonte: Asturies.com

Sherlock Holmes, en "El gran teatru del mundu" de RPA

 

Sherlock Holmes na RPA

    L'espaciu 'El gran teatru del mundu', que s'emite los sábados a les 22 hores en RPA, presenta una versión n'asturianu de 'Un escándalu en Bohemia', aventura de Sherlock Holmes dirixida por Dolfo Camilo Díaz y protagonizada pol actor Luis Barrera, nel papel del popular detective inglés, y pola actriz corverana María López Barrio, como Irene Adler.

    L'argumentu trata sobre un noble enmascaráu que pide a Holmes y Watson que salven a una de les cases reales d'Europa de la ruina; una historia de cómo un gran escándalu amenazó con afectar al Reinu de Bohemia y cómo los meyores planes de Sherlock Holmes foron derrotaos pol inxeniu d'una muyer, Miss Irene Alder.

   Camilo Díaz, que pon la voz a Watson, avanza una producción d'una hora de llargor "mui cinematográfica, con munchu ritmu y especialmente axustada al orixinal de Conan Doyle". D'igual forma, anuncia que nel programa va entrevistar a Eladio de Pablo, direutor de la Escuela Superior de Teatru d'Asturies, y a Alejandro Calvo, viceconseyeru de Cultura.           Fonte:  Asturies.com

La RPA estrena"Qué facer: Informativu d'ociu y tiempu llibre n'Asturies" esti xueves

   

 Xune  Elipe

   La radio pública asturiana va empezar a emitir dende esti xueves, de 12:30 a 13:00 hores., un programa nuevu en llingua asturiana de nome "Qué facer: Informativu d’ociu y tiempu llibre n’Asturies". L’espaciu, que tien previstu tar n’antena nun principiu nesta temporada de primavera-branu, va desenvolvese en directo con unos conteníos rellacionaos colo que s’entiende como ociu en xeneral, asina va dase tola información necesaria pa enllenar el tiempu llibre de cara al fin de selmana. Nesti sen, nun van faltar referencies a fiestes, mercaos, conciertos, representaciones teatrales, xornaes gastronómiques, lliteraries... "y too aquello que faiga más prestosu un vienres, un sábadu o un domingu".

Miguel Fernandi

   Asina espublicita'l programa Goxe Producciones nuna nota de prensa na que desplicaba tamién esti día que "va tar dirixíu y presentáu por Xune Elipe, contando con collaboradores como’l comentarista deportivu Miguel Fernandi  o’l cocineru y asesor gastronómicu Lluis Nel Estrada, ente otros".

Lluis Nel Estrada

   La intención de "Qué facer" ye ufiertar la información de manera clara y seria, intentando dir más allá de la mera enumberación de datos, afondando nos protagonistes del ociu n’Asturies y creando afición a disfrutar d’esta tierra y del fechu cultural asturianu nel sentíu más ampliu.    Fonte: Asturnews

Nuevu programa informativu n'asturianu na RPA

La RPA estrena "Qué facer: Informativu d’ociu y tiempu llibre n’Asturies" esti xueves La radio pública asturiana va empezar a emitir dende esti xueves, de 12:30 a 13:00 hores., un programa nuevu en llingua asturiana de nome "Qué facer: Informativu d’ociu y tiempu llibre n’Asturies". L’espaciu, que tien previstu tar n’antena nun principiu nesta temporada de primavera-branu, va desenvolvese en directo con unos conteníos rellacionaos colo que s’entiende como ociu en xeneral, asina va dase tola información necesaria pa enllenar el tiempu llibre de cara al fin de selmana. Nesti sen, nun van faltar referencies a fiestes, mercaos, conciertos, representaciones teatrales, xornaes gastronómiques, lliteraries... "y too aquello que faiga más prestosu un vienres, un sábadu o un domingu". Asina espublicita'l programa Goxe Producciones nuna nota de prensa na que desplicaba tamién esti día que "va tar dirixíu y presentáu por Xune Elipe, contando con collaboradores como’l comentarista deportivu Miguel Fernandi o’l cocineru y asesor gastronómicu Lluis Nel Estrada, ente otros". La intención de "Qué facer" ye ufiertar la información de manera clara y seria, intentando dir más allá de la mera enumberación de datos, afondando nos protagonistes del ociu n’Asturies y creando afición a disfrutar d’esta tierra y del fechu cultural asturianu nel sentíu más ampliu. Fonte: Asturnews

La XDLA valora los "pasos alantre" del asturianu na RPA

La radio autonómica va retresmitir esti sábadu’l SD Compostela-Real Oviedo nesti idioma.

La Xunta pola Defensa de la Llingua Asturiana (XDLA) felicitó güei a la Radio del Principáu d'Asturies (RPA) pola dar "otru pasín más" na normalización de la llingua, en referencia a la retresmisión esti sábadu d'un partíu de fútbol n'asturianu: el SD Compostela-Real Oviedo. Nun comunicáu, la organización dá-y la norabona a la direición de RPA y espera qu’esta iniciativa nun quede nun casu aisláu. "Esperamos que bien llueu podamos ver partíos de fútbol, vueltes ciclistes y competiciones bolístiques nel nuestru idioma na televisión". La XDLA reseña que dende qu'empezaron les emisiones, los medios de comunicación autonómicos usaron estes retremisiones pa fidelizar l’audiencia y pa consiguir la máxima difusión del idioma propiu y destaca el llabor fechu por emisores como Radio Sele y Radio Vetusta que radiaron partíos de fútbol n’asturianu y que cuntaron cola bona acoyida d’audiencia y aficionaos.

   La RPA emite dende'l 17 de marzu un boletín informativu de llunes a vienres n'asturianu, con una duración d'aprosimao diez minutos y presentáu por Naciu Varillas. Un informativu xeneralista “p'afuxir dafechu de la idea d'usar el bable namái p’asuntos venceyaos cola cultura o temes llingüísticos”, como esplicó'l periodista en declaraciones a Asturies.com.    Fonte: Qué ye ho!

RPA va emitir dende’l llunes un boletín de noticies diariu n’asturianu

Pablo R. Guardado El periodista Naciu Varillas va ser el responsable de presentar el primer boletín de noticies n’asturianu de la RPA na historia de la emisora. L’actualidá en llingua asturiana na radio pública va dase a les 13 hores, de llunes a vienres. “Vamos facer un informativu xeneralista. Queremos afuxir dafechu de la idea d’usar el bable namái p’asuntos venceyaos cola cultura o temes llingüísticos”, asegura Varillas, qu’esti llunes va protagonizar un fechu históricu pa la llingua del país. Asina, nun habrá diferencia ente’l conteníu del boletín de les 12 o de cualquier otru ‘en puntu’ de la emisora pública, namás la llingua vehicular. “Vamos caltener los ‘jingles’ –melodía que s’utiliza como marca de los informativos o programes– y principiar con un ‘Ye la 1. Noticies RPA’, pa darréu tocar tolos temes informativos. Queremos da-y normalidá al asturianu”, esplica. Como vien siendo vezu dientro del ente públicu de comunicación, la iniciativa de qu’haya un espaciu en llingua asturiana dientro de la programación sal de los propios trabayadores, nesti casu de Varillas. El periodista de plantiya de la RPA, presentador tamién del únicu programa n’asturianu esistente anguaño na emisora, ‘Naguando’ (de llunes a vienres alredor de les 11.45 hores), algamó esti espaciu pa la llingua del país tres falar cola direición de RTPA, que nun punxo pega nenguna a la iniciativa. “Va ser un reblagu pistonudu pa la normalización del idioma”, afirma Varillas, que recuerda que, hasta la fecha, l’únicu informativu qu’hebo foi de calter cultural, l’espaciu ‘Batura’, presentáu por Vanessa Gutiérrez. Ensin dulda, un primer pasu pa dar presencia y normalidá a la llingua asturiana na radio pública del país. Fonte: Asturies.com

La XDLA cifró l'asturianu nun 4,6% na TPA y nun 1'8% na RPA

La XDLA cifra nun 4,6% la emisión d'espacios n'asturianu na TPA y nun 1'8% na RPA 

Carlos Pulgar y Miguel Monteavaro

   La Xunta pola Defensa de la Llingua Asturiana cifró nun 4,6% y nun 1,8% respectivamente la parte d'emisión en llingua asturiana que s'emite na televisión y na radio autonómiques mientres el 2012, niveles asemeyaos a los que la Televisión Español de la época de Franco dedicaba al catalán.

   Asina lo recueye nuna nota prensa que se refier al Informe sobre l'usu del asturianu en RTPA 2013', documentó que presentaron güei oficialmente Carlos Pulgar y Miguel Monteavaro, como voceros de la organización. Nel mesmu critícase además que nun existe emisión n'asturianu nin nos informativos nin na programación infantil, y que la mayor parte de les emisiones nesta llingua dedíquense a espacios de carácter tradicional o folclóricu.

   Según señala la nota prensa, la organización recuerda que, ocho años depués de les primeres emisiones, "el porcentaxe de programación nel nuestru idioma queda nel 4,6% na TPA y un 1,8% na RPA _datos engordaos gracies les repeticiones, mentes que na web rtpa.es, l'asturianu cuasi nun existe".

   "La cifra de programes n'asturianu ye asemeyada a la de la TVE franquista col catalán: permisividá n'espacios pequeños sobre cultura tradicional que lleguen con cuentagotes a los espectadores. Por eso, ensin arrenunciar a qu'Asturies tenga una radiotelevisión dafechu n'asturianu, pa la XDLA resulta evidente la urxencia d'aumentar el porcentaxe d'espacios tanto na radio como na televisión", añade la Xunta.

 

30 hores al mes

   La organización señala amás que "nun hai programación diaria n'asturianu, la emisión nel nuestru idioma nun llega nin a les 30 hores al mes y nel restu de la programación nun hai una continuidá qu'ayude a reforcial'efectu normalizador de los espacios n'asturianu, dalgo que choca col éxitu de los programes d'entretenimientu nesta llingua".

   Propón tamién "más atención a la industria cultural n'asturianu en tola programación, sobre manera nos informativos", y considera especialmente grave "l'ausencia de programación infantil n'asturianu, dalgo que supondría una importante fonte de trabayu gracies al establecimientu d'una industria del doblaxe n'Asturies".

   "Ye de reseñar que toles televisiones autonómiques del Estáu español dediquen un porcentaxe importante d'emisión a los espacios infantiles na llingua propia _nel peor de los casos nun baxen del 25%_, mentes qu'en TPA l'espaciu ye del 0%", critica la formación. Per otru llau, "l'asociación de defensa del asturianu considera especialmente grave'l vetu a esta llingua nos espacios informativos y deportivos", añade.

   La XDLA ve como dalgo prioritario que nel Ente Públicu exista un "proyectu de normalización llingüística y cultural d'Asturies, con un llingüista que s'encargue de velar polos bonos usos del asturianu na programación, y un departamentu encargáu d'asesorar y velar pol bon cumplimientu de la llexislación llingüística, amás de proponer la emisión d'espacios nel nuestru idioma y emitir informes sobre esta programación".

   Pa rematar, la XDLA ve con preocupación "l'usu diglósicu del asturianu que promueve RTPA en munchos espacios y mesmamente na publicidá corporativa, que se fai en castellanu anque seya de programes n'asturianu". "Ye mui frecuente la presencia de programes onde l'usu del asturianu déxase namás pa la oralidá mentes que la rotulación ta en castellanu o onde nun se mira d'ofrecer un modelu cuidáu y correctu d'asturianu, sinón una llingua amestada o caricaturizada", critica la organización, pa la que se trata de "estilos de llingua que podíen tener el so espaciu, pero güei son la mayoría de lo qu'ofrez RTPA y van en contra del papel exemplarizante dende'l puntu de vista llingüísticu que tenía que xugar l'Ente públicu".

   Fonte:  EuropaPress.es

RPA entama a emitir el programa 'Sones'

La Radio del Principáu d'Asturies (RPA) va empezar a emitir l'espaciu 'Sones', que yá s'emite semanalmente na televisión pública asturiana (TPA). La radio y la televisión autonómiques van ofrecer esti domingu, 29 de xineru, a les 22.00 hores la segunda semifinal del XV Concursu Cuenca del Caudal dende l'Auditoriu Teodoro Cuesta de Mieres.
Sonia Fidalgo y Alberto Cienfuegos presenten esta semifinal, qu'inclúi les actuaciones de les meyores voces del cantar asturianu, cinco intérpretes na modalidá femenina y seis, na masculina: Marisa Valle Roso, María Sánchez BLanco, Águeda Riera, Pilar Barreñada, María Teresa González Soto, Juan Robledo, Rogelio Suárez, Andrés Cueli, Héctor Braga, Fernando García Nuño y Manuel Roza Llera. Amás, l'espaciu cuenta cola participación del gaiteru Pablo Carrera.

Fonte: europapress n'asturianu

Fueya lletrónica de la rtpa