La conceyala de Cultura acusa a Somos Avilés de querer imponer un “apartheid llingüísticu” a favor del asturianu

Somos Avilés quier más presencia del idioma n'eventos culturales

El ruegu de Somos Avilés trátase nel minutu 2.51.00 del videu.

   El mundo al revés. Yolanda Alonso protagonizó una intervención demencial nel Plenu na respuesta a un ruegu de Somos Avilés. La edil socialista acusó a la formación de querer imponer un “apartheid llinguísticu” favoreciendo a los creadores en llingua asturiana.

   Xune Elipe foi l’encargáu de presentar el ruegu 'Inclusión de Cláusules pal Favorecimientu de la Presencia de la Llingua Asturiana nes Ayudes o Subvenciones Concedíes pa la Organización d’Eventos Músico-lliterario-culturales', que nun primer momentu pretendía ser una moción pero que nun foi aceptada como tal. L’edil de Somos Avilés recordó esta situación, refiriéndose a los ruegos como “un brinde al aire” y adelantó la intención del so grupu de trabayar nesta llexislatura por sacar alantre “unes ordenances d’utilización de la llingua nel conceyu”.

 Tres facer referencia al Estatutu d’Autonomía y a la Llei de Promoción y Usu del Bable/Asturianu, que faculta a los ayuntamientos a promocionar l’idioma, recordó que’l presupuestu pa la llingua asturiana del Conceyu d’Avilés “ye ínfimu; práuticamente nulu”, cifrando les cantidaes destinaes ente 12.000 y 15.000 euros. D’elles, apuntó que se gastaron 1.000 nel primer trimestre y 700 nel segundu, pa depués destacar la so intención “de fuxir del debate de les perres” cola intención de “facer ver que tomar midíes a favor del emplegu de la llingua asturiana nun tien que costar nengún euru” a les arques municipales. “Depende de la voluntá de querer facer eses coses”, continuó.

   L’edil fixo referencia a la “nula presencia” de creadores en llingua asturiana nes actividaes con subvención municipal y punxo d’exemplu, por ser la más reciente, la falta d’autores n’asturianu nel certame de lliteratura fantátista y terrorífica Celsius, que cuenta con una ayuda del Conceyu. Asina, citó a dos referentes a nivel estatal nesti ámbitu como Vicente García Oliva y Adolfo Camilo Díaz, nesti casu creador de la redolada d’Avilés, que nunca tuvieren nel mesmu y que, cola discriminación positiva propuesta por Somos, sí podríen tener güecu nél.

Tamién refirióse a l’ausencia de la lliteratura n’asturianu na estaya nueva del Celsiu dedicada a los neños y neñes: “La lliteratura n’asturianu si de dalgo pue presumir ye de la lliteratura pa neños y neñes. Ye de lo meyor que se ta faciendo nel Estáu y una bona parte ta dedicada lo fantástico”, afirmó.

   Pa finar, Elipe puntualizó que “nun tamos obligando a naide a que meta o incorpore a los eventos qu’organicen a xente qu’emplegue la llingua asturiana. Nun queremos eso. La llibertá de les asociaciones ye absoluta, pero’l Conceyu tien la obligación de velar polos derechos y intereses de la xente qu’emplega la llingua asturiana, porque sin nun lo faen les alministraciones llocales nun lo va facer naide en tol Estáu”.

La réplica       Alonso tomó la pallabra darréu, con un tono atacante dende un primer momentu. “Señor Elipe, ye la primer vegada nesti Plenu, y yá viví munchos, qu’atopo un conceyal qu’aboga polos derechos de los intereses particulares. Equí defendemos los xenerales”, principió. “Lo que vustá ta pidiendo nel ruegu ye que, de dalguna manera, tomemos la decisión de frayar el principiu d’igualdá d’oportunidaes y de concurrencia competitiva de les entidaes; que faigamos una especie d’apartheid llingüísticu favoreciendo solamente aquellos creadores en llingua asturiana, que se beneficiarían de les ayudes públiques”, continuó.

   La conceyala de Promoción Social y Cultura defendió la política llingüística del Ayuntamientu d’Avilés, cola Estaya de la Llingua al frente y coles subvenciones a entidaes qu’entamen actividaes nes que s’empleguen l’idioma, como Esbardu, cifrando la cantidá total destinada pal idioma en 72.000 euros. Nesta cantidá ta incluyíu’l sueldu de la funcionaria responsable de la estaya, que situó nos 45.000 euros.

   Tres el turnu de la conceyala, Elipe convidó a la edil a que ratificara esa cantidá y apuntó que diba ser dalgo a tratar en Plenos próximos. D’igual forma, aseguró que, coles sos pallabres, “acaba d’esborriar d’un plumazu la discriminación positiva”, recordando darréu la esistencia de cláusules d’apoyu a determinaos coleutivos. “¿Va quitalos?”, entrugó.

   Alonso tuvo la intervención cabera, ensin movese nin un milímetru na so postura contraria al ruegu de Somos Avilés y na so defensa de la política llingüística del Conceyu d’Avilés. Fonte: asturies.com

El programa ‘Don de lenguas’ de ‘Comando Actualidad’ deceiciona pol tratu dáu al asturianu

Na semeya, un momentu de la grabación del programa nun ensayu de Dixebra

   “Foi una manipulación descarada”. La emisión del programa ‘Don de lenguas’ del espaciu ‘Comando Actualidad’ de TVE deceicionó pol tratamientu dáu al asturianu. Dos díes de grabación quedaron resumíos en 7 minutos “inconexos” que dexaron fuera cuestiones d’importancia como la lliteratura, la situación del idioma nel sistema educativu o la demanda d’oficialidá.

   Xune Elipe, la persona que facía de filo conductor del reportaxe dedicáu a l’asturianu del programa emitíu anueche en La 1 con un cuota de pantalla del 8,7 por cientu a nivel estatal (1.715.000 espectadores), nun podía dexar d’amosar el so enfadu tres el resultáu definitivu. “Foi una manipulación descarada”, afirma’l cantante de Dixebra, que vio como’l montaxe final “cargóse dos díes de grabación bien estructuraos nel que se reflexaba un verdaderu movimientu de recuperación llingüística”. Al final, el papel d’Elipe como filo conductor, pa lo qu’utilizó’l castellanu por pidimientu del reporteru Ricard Sabaté, nun se vio como tal nos 7 minutos escasos dedicaos al asturianu, que se centraron no rural.

   “Con tolos respetos pa les fales que salieron nel programa, estes peculariedaes llingüístiques nun son comparables col asturianu, aragonés y aranés”, continúa Elipe, que considera especialmente sangrino’l tratu dau a la llingua del Val d’Arán. “Ye oficial nel estatutu catalán, tien lliteratura y ta escolarizáu, y la imaxe que dieron foi la d’una llingua pa falar coles cabres”, critica. Nel casu concretu del asturianu, el responsable de Goxe Producciones quita responsabilidá al reporteru de ‘Comando Actualidad’ y ponla en Madrid. “Sorpendiéronse colo qu’atoparon n’Asturies, que nun pegaba cola idea que teníen pal programa, más folclóricu o rural, y alcontraron que la llingua asturiana tien connotaciones polítiques nel sentíu de qu’hai una proyeición política no que se ta reclamando. Vieron asemeyances nidies a lo qu’asocede en Galicia, Euskadi o Catalunya y eso ye un tema tabú nesta etapa de TVE. Yera una pataca caliente pa ellos”, argumenta pa tratar de comprender el tratu residual dáu al idioma, con una reducción de tiempu comparao col restu de llingües, y asitándolu al final del programa con una estructura “rara; claramente inconexa”.

Entrevistes non emitíes

   Nel montaxe final del espaciu dedicáu al asturianu quedaron ensin salir Samuel Castro y Esther Prieto, responsables d’Ediciones Trabes, que falaron a Sabaté de la producción lliteraria y la necesidá d’oficialidá, asina como imáxenes de cartelos n’asturianu en dellos establecimientos d’Uviéu. Tampoco nun se sacó pallabra dalguna de les declaraciones feches pol guitarrista de Dixebra y maestru de Matemátiques Primi Abella, onde se mostraba mui críticu cola política del Gobiernu con respeuto a la materia de Llingua Asturiana asina como la postura de ministru José Ignacio con respeuto a la especialidá docente, nin del periodista Paco Álvarez sobre la trayeutoria de Dixebra. ‘Comando Actualida’ si fixo referencia a la producción musical con imáxenes de Tutu Estudios y de Sergio Rodríguez y Elipe, pero de manera testimonial.

   No que sí se centró de manera especial el reportaxe foi, como nel restu de fales y llingües, no rural. D’esta forma, Caldones protagonizó les primeres imáxenes pa depués pasar al mercáu de La Pola Siero xunto con Xosé María García Sánchez ‘Llábana’, ún de los primeros profesores d’asturianu cuando nel 1984 principiaba l’enseñu del idioma na escuela. Darréu, les imáxenes pasaron a la casa de Llábana, con imáxenes del horru, del llagar y de la manera de facer ‘Afuega’l Pitu’ acompañaes con pequeñes entrugues referentes al idioma.

   L’espaciu da llueu un saltu a la ciudá, en concreto a Uviéu, a los cursos de la Xunta pola Defensa de la Llingua Asturiana p’adultos que pon Héctor Xil, que tampoco pue ocultar el so desencantu col programa. “Como mínimo puedo dicir que toi deceicionáu por tolo que grabaron y pudieron sacar, y lo que quedó al final”, afirma pa depués calificar la distribución de tiempu como una “tomadura de pelo”. “El reportaxe quedó esgonciáu. Teníemos un argumentu trazáu, con visites a Trabe y con Llábana, y punxeron lo que-yos dio pela gana”, continúa Xil, que cree que los reporteros vieron n’Asturies “dalgo que nun esperaben”

   Nel so casu concretu, “tuvieron grabando media tarde y conmigo conversaron sobre 15 minutos onde tratamos temes como la oficialidá y la situación del idioma na escuela. Al final nun salió nada”, esplica. Sobre les razones d’esti tratu tan sorprendente y el recorte de tiempu, Xil considera que ‘Comando Actualidad’ buscaba un enfoque más rural que nun atoparon y “la historia salíase un poco de madre, polo qu’apostaron poles imáxenes de Caldones”.

Oficialidá "necesaria"

   Esta deceición por parte d’un programa que llevantó un gran interés nel país, como amuesa la so repercusión nes redes sociales, lleva a Elipe a raficase en que “la oficialidá ye necesaria”. “O la llingua asturiana se declara oficial o nunca nos van tomar en serio”, asegura. La xente interesada en ver el programa completu pue facelo na web de "Comando Actualidad".         Fonte: asturies.com

Fina la segunda temporada d'El Club Musical en TPA

Dixebra ye'l grupu que fai la despedida d'esta temporada

Dixebra  en plena actuación

   La segunda temporada del programa El Club Musical (martes, 23:00 h, TPA) llega al so fin teniendo como banda convidada a los avilesinos Dixebra, asina nel últimu capítulu van interpretar dellos de los temes que formen parte del discu que presentaben a principios d’añu, tituláu Tiempos modernos, y que los llevó a tocar per bien de llugares d’Asturies, del Estáu y mesmamente a nivel internacional. Nun van faltar tampoco dellos cantares yá clásicos nel repertoriu d’esta formación veterana, como «Mañana fría», «La danza» o «Nesti mundu traidor».

   Ente los otros conteníos del programa nun poemos escaecer que’l guitarrista y compositor Primi Abella y el cantante Xune Elipe van charrar sobre les connotaciones socio-polítiques d’esti trabayu nuevu, asina como de la so grabación, collaboradores y otres cuestiones sobre’l grupu y el discu. Los esteriores escoyíos fueron el paséu de la ría y les antigües instalaciones ferroviaries asitiaes al final d’él, polo que representen de pasáu y presente pa la villa avilesina.

   Otra manera, esta segunda temporada d’El Club Musical tuvo una acoyida mui bona y valió p’afitalu como’l gran referente musical audiovisual n’Asturies, per él pasaron trece propuestes sonores bien estremaes desarrollaes nel nuestru país, con un equilibriu ente les bandes yá consolidaes y otres emerxentes. Estilos como’l punk, el rock, el hip hop, l’indie, la canción d’autor, el folk o’l jazz tuvieron el so tiempu, asina como una presencia bultable de los grupos y artistes que desenvuelven el so llabor cola llingua asturiana como ferramienta de creación.

   Dende Goxe Producciones, encargada de la so realización, muéstrense persatisfechos y comenten que los cambios introducíos na estructura, na illuminación, nes secciones y nel planu visual tuvieron los resultaos esperaos y nagüen por poder siguir con esta esperiencia que ta valiendo pa dar a conocer la bayura y calidá de la escena musical asturiana.                                                                                                    Fonte: Asturies.com

Torna "El Club Musical"a la TPA

   Esti martes pasáu, a les 22.50 hores, estrenose la segunda temporada de 'El Club Musical',el programa de TPA dirixíu y presentáu por Xune Elipe qu'abría esta serie de 13 programes con Losone y los temes del so álbum debú ‘Umbilical’. Col asturianu como llingua vehicular, esti programa de la televisión pública del país producíu por Goxe Producciones trai novedaes con respeuto a la primer temporada, sobre manera nel campu estéticu y visual.
   Ente les novedaes alcuéntrase una realización “más atractiva y moderna”, a cargu de Javier Lueje, amás de la incorporación d’elementos d’atrezzo nel escenariu, una illuminación renovada, una sintonía nueva compuesta por Jorge Cambareli, más seiciones y un montaxe más dinámicu. Tamién se presenta un logu nuevu y esclusivu, obra del diseñador JM Navarro.

Xune Elipe a la izda, entrevista a dos 

convidaos al programa

   La dinámica va ser la mesma, con una entrevista al grupu convidáu y la interpretación de delles canciones sobre un escenariu, que nesta ocasión va ser el del Teatru El Llar de Los Campos (Corvera), “qu’ufierta unes condiciones acústiques y estétiques perafayadices” comenten dende Goxe. La esceición única ye l’episodiu protagonizáu por Fe de Ratas –va emitise’l martes próximu–, que se grabó na ilesia reconvertida en pista de skate asitiada nel Polígonu d’Asipo (Llanera).
  Pa dar más conteníu al programa, nesta segunda temporada incorpórase una seición na que dellos personaxes rellacionaos col mundu de la música n’Asturies –intérpretes, periodistes, llocutores, fotógrafos, realizadores, productores...– van facer una recomendación, yá sía de llibros, películes, esposiciones, discos o festivales. D’igual forma, nos capítulos finales va incluyise’l comentariu sobre un cómic que tenga ambientación musical, ente otres novedaes temátiques.

Un grupu musical en plena actuación

   Los encargaos d’abrir esti segundu bloque de programes de ‘El Club Musical’ foron Losone, banda que bebe de dellos estilos y que, tres dellos años de conciertos y cambios na so formación, sacó nel 2013 el so primer álbum, ‘Umbilical’ (Algamar Producciones), con un soníu propiu que ta dando muncho que falar dientro y fuera d’Asturies. Tres d’ellos, el públicu va poer conocer de primer mano, tolos martes a les 22.50 hores, a otres munches bandes del país qu’abarquen soníos que van dende’l rock sureñu, el folk, el swing o’l punk a la canción d’autor, el hip hop, l’indie o’l jazz. El llistáu completu d’esta temporada ye’l siguiente: Losone, Fe de Ratas, Silvia Quesada, Eladio Díaz Control Z, La Tarrancha, Tyfpe, Trashtornados, Tejedor, Queen Bitch, Corquiéu, Eye in the sky y Dixebra. Amás, dedícase un programa especial al hip-hop nel que van participar Arma X, 13 Palabras y K-Nalón. Dende Goxe destaquen que’l porcentaxe de grupos qu’empleguen l’asturianu nesta etapa ye “peraltu” y apunten qu’un de los oxetivos del programa ye presentar a la llingua como “un vehículu de comunicación venceyáu a les xeneraciones más nueves y nun contestu de modernidá”.                                                                                          Fonte: Asturnews

Losone abre la segunda temporada de "El Club Musical" na TPA

Na semeya, Gema Palacio, de Losone mientres  un momentu de la grabación del primer capítulu de la segunda temporada d' "El Club Musical"

   Esti martes, a les 22.50 hores, estrénase la segunda temporada de 'El Club Musical' na TPA. El programa dirixíu y presentáu por Xune Elipe va abrir esta serie de 13 programes con Losone y los temes del so álbum debú ‘Umbilical’.

   Col asturianu como llingua vehicular, esti programa de la televisión pública del país producíu por Goxe Producciones trai novedaes con respeuto a la primer temporada, sobre manera nel campu estéticu y visual. Asina, anúnciase una realización “más atractiva y moderna”, a cargu de Javier Lueje, amás de la incorporación d’elementos d’atrezzo nel escenariu, una illuminación renovada, una sintonía nueva compuesta por Jorge Cambareli, más seiciones y un montaxe más dinámicu. Tamién se presenta un logu nuevu y esclusivu, obra del diseñador JM Navarro.

   La dinámica va ser la mesma, con una entrevista al grupu convidáu y la interpretación de delles canciones sobre un escenariu, que nesta ocasión va ser el del Teatru El Llar de Los Campos (Corvera), “qu’ufierta unes condiciones acústiques y estétiques perafayadices” comenten dende Goxe. La esceición única ye l’episodiu protagonizáu por Fe de Ratas –va emitise’l martes próximu–, que se grabó na ilesia reconvertida en pista de skate asitiada nel Polígonu d’Asipo (Llanera). Pa dar más conteníu al programa, nesta segunda temporada incorpórase una seición na que dellos personaxes rellacionaos col mundu de la música n’Asturies –intérpretes, periodistes, llocutores, fotógrafos, realizadores, productores...– van facer una recomendación, yá sía de llibros, películes, esposiciones, discos o festivales. D’igual forma, nos capítulos finales va incluyise’l comentariu sobre un cómic que tenga ambientación musical, ente otres novedaes temátiques.

   Los encargaos d’abrir esti segundu bloque de programes de ‘El Club Musical’ son Losone, banda que bebe de dellos estilos y que, tres dellos años de conciertos y cambios na so formación, sacó nel 2013 el so primer álbum, ‘Umbilical’ (Algamar Producciones), con un soníu propiu que ta dando muncho que falar dientro y fuera d’Asturies. Tres d’ellos, el públicu va poder conocer de primer mano, tolos martes a les 22.50 hores, a otres munches bandes del país qu’abarquen soníos que van dende’l rock sureñu, el folk, el swing o’l punk a la canción d’autor, el hip hop, l’indie o’l jazz. El llistáu completu d’esta temporada  ye’l siguiente: Losone, Fe de Ratas, Silvia Quesada, Eladio Díaz Control Z, La Tarrancha, Tyfpe, Trashtornados, Tejedor, Queen Bitch, Corquiéu, Eye in the sky y Dixebra. Amás, dedícase un programa especial al hip-hop nel que van participar Arma X, 13 Palabras y K-Nalón. Dende Goxe destaquen que’l porcentaxe de grupos qu’empleguen l’asturianu nesta etapa ye “peraltu” y apunten qu’un de los oxetivos del programa ye presenta a la llingua como “un vehículu de comunicación venceyáu a les xeneraciones más nueves y nun contestu de modernidá”.                                                                                        Fonte: Asturies.com

La RPA estrena"Qué facer: Informativu d'ociu y tiempu llibre n'Asturies" esti xueves

   

 Xune  Elipe

   La radio pública asturiana va empezar a emitir dende esti xueves, de 12:30 a 13:00 hores., un programa nuevu en llingua asturiana de nome "Qué facer: Informativu d’ociu y tiempu llibre n’Asturies". L’espaciu, que tien previstu tar n’antena nun principiu nesta temporada de primavera-branu, va desenvolvese en directo con unos conteníos rellacionaos colo que s’entiende como ociu en xeneral, asina va dase tola información necesaria pa enllenar el tiempu llibre de cara al fin de selmana. Nesti sen, nun van faltar referencies a fiestes, mercaos, conciertos, representaciones teatrales, xornaes gastronómiques, lliteraries... "y too aquello que faiga más prestosu un vienres, un sábadu o un domingu".

Miguel Fernandi

   Asina espublicita'l programa Goxe Producciones nuna nota de prensa na que desplicaba tamién esti día que "va tar dirixíu y presentáu por Xune Elipe, contando con collaboradores como’l comentarista deportivu Miguel Fernandi  o’l cocineru y asesor gastronómicu Lluis Nel Estrada, ente otros".

Lluis Nel Estrada

   La intención de "Qué facer" ye ufiertar la información de manera clara y seria, intentando dir más allá de la mera enumberación de datos, afondando nos protagonistes del ociu n’Asturies y creando afición a disfrutar d’esta tierra y del fechu cultural asturianu nel sentíu más ampliu.    Fonte: Asturnews

L'anuariu de la Música Asturiana algama la so decimoquinta edición

La espublización que resume l'añu musical n'Asturies

      L’Anuariu de la Música Asturiana, cumple quince númberos na cai tres la llegada a los puntos de venta de la edición del 2013. El volume inclúi un CD con 19 cantares de dellos estilos.

     La portada d’esti númberu ta dedicada a l’amplia participación asturiana nel XLIII Festival Interceltique de Lorient, que vivió nel 2013 l’añu d’Asturies. Asina, les páxines centrales del anuariu van repasar a fondu  lo que dio de sí la representación del nuesu país nel certame más importante del mundu celta. Otros artículos destacaos son los reportaxes ‘(Sobre) Viviendo de la música’ o’l fotográficu y lliterariu sobre’l discu ‘Tiempos modernos’, de Dixebra; el repás a los diez años de trayeutoria de Skama la Rede; les cróniques dedicaes a los festivales Sol Celta d’Avilés y Arcu Atánticu de Xixón; l’informe ‘Cuando Lluis Llach nun sonaba na radio’, onde se fai una comparanza ente’l tratamientu que les radios públiques autonómiques dan a la música propia de les sos respectives comunidaes; entrevistes a Misiva y Pablo Carrera; y artículos d’opinión dedicaos, ente otres cuestiones, al trenta aniversariu de la Noite Celta de Porcía y a la polémica suspensión del conciertu d’Albert Pla en Xixón. Amás, caltiénense les seiciones ‘Anuncies’ y ‘Collecha’, ente otres.

     Ún de los apartaos más importantes del Anuariu de la Música Asturiana, l’editorial, va centrase nesta ocasión nel mercáu musical asturianu. Baxo’l nome de ‘Consumir música asturiana’, fai reflexones como la siguiente: “La solución a tou esti enguedeyu pasa inevitablemente por un mayor compromisu del poder públicu autonómicu, qu’entienda a la música asturiana non como un hobby d’unos cuantos ‘alloriaos’ o como un productu esclusivamente destináu al ociu, sinón como un posible campu d’actividá económica estable y un factor d’internacionalización d’Asturies perimportante, que pueda valir d’escaparate del país. Pero tamién los músicos tienen que ser conscientes del so papel, resistiendo n’époques de crisis y nun dexando qu’ésta amenorgue la so creatividá y productividá. Ensin escaecer a los sellos discográficos, qu’han d’ufiertar productos atractivos, guapos, con ‘pluses’ más allá de lo meramente musical qu’atrayan al posible comprador”.

    Goxe Producciones ye responsable de la edición del anuariu nesta segunda dómina del mesmu, con Xune Elipe otra vuelta como direutor. El volume, con más 100 páxines a too color, yá ta disponible nos puntos de venta avezaos –como L'Esperteyu (Uviéu); Trisquel, Paradiso y Sestaferia (Xixón); El Cafetón y El Cabanón (Avilés), Palabras de Caramelo (Candás); Cuévano (La Pola Siero); La Esbilla y Ringo Rango (Villaviciosa); o L'Abellugu y Habana (Mieres)– al preciu de 5 euros y incorpora un CD que resume les producciones apaecíes a lo llargo del añu 2013, con diecinueve temes que van de los soníos más tradicionales a los más contemporáneos: tonada, bandes de gaites, folk, canción d’autor y rock, ente otros.
    Fonte:  Asturies.com