Morrió Sergio Marqués

Sergio Marqués en 2007
Morrió Sergio Marqués, el Presidente que fizo posible la Llei d’Usu del Asturianu
Na mañana de güei, martes 8 de mayu, l’abogáu y ex Presidente d’Asturies, Sergio Marqués, sufría un infartu al salir a la cai nel so despachu en Xixón. Tres atendelu na cai ye treslladáu al Hospital de Cabueñes mui grave, onde morría darréu a los 65 años. La so vida tuvo dedicada a l’abogacía y a la política, llegando a convertise en Presidente d’Asturies, ente 1995 y 1999, tiempu nel que fizo posible l’aprobación de la primer, y hasta agora única, Llei d’Usu del Asturianu, que se convirtió nun importante sofitu llegal pal idioma.
Sergio Rutilio Marqués Fernández, ñació en Xixón en 1946 y yera Llincencáu en Drechu pola Universidá d’Uviéu. En 1977 forma parte del grupu que funda Alianza Popular en Xixón. Ente 1987 y 1991 ye diputáu y en 1993 conviértese nel vicepresidente del PP d’Asturies, y dempués de la renuncia d’Isidro Fernández Rozada, ye nomáu candidatu a la Presidencia d’Asturies, venciendo por mayoría simple al socialita Antonio Trevín, entós presidente en sustitución del dimitíu José Luis Rodríguez-Vigil.
En 1998 el Partíu Asturianista de Xuan Xosé Sánchez Vicente aprovecha la mayoría simple de Marqués pa forzar l’aprobación d’una Llei d’Usu del Asturianu, mui criticada entós pol sector asturianista de la sociedá, pero que dende entós ye la única ferramienta llegal esistente. Amás aprueba importantes presupuestos pa política llingüísticos, que tardaríen diez años n’igualase.
Los sos problemes con Francisco Álvarez-Cascos, entós vicepresidente d’España y secretariu xeneral del PP estatal, faen que Marqués, alegando que nun se taba respetando l’autonomía del gobiernu asturianu, fuera espulsáu xunto a otros cuatro diputaos el Partíu Popular, creando la Unión Renovadora Asturiana (URAS), que gobernaría hasta 1999 nuna minoría absoluta.
En 1999 preséntase a les elecciones cola URAS, un partíu alredor del que s’axuntaron munchos ex populares pero tamién xente asturianista que venía d’otres formaciones. La URAS de Marqués defendó siempres la oficialidá del asturianu y consiguió trés diputaos, que nun podría revalidar en 2003. En 2007 Marqués foi candidatu per última vegada, xunto al PAS y Xuan Xosé Sánchez Vicente, colos que configuró la coalición Unión Asturianista URAS-PAS, que se fizo con 11 conceyales, pero quedo a unos miles de votos de facese col diputáu. En 2011 foi l’últimu de la llista nacional d’URAS-PAS, como soifitu al candidatu Sánchez Vicente, que tampoco pudo nesta ocasión tornar a la Xunta Xeneral.
Sobre la oficialidá del asturianu dixo, ente otres coses: “-Nun entiendo la oposición a esto, el bable ye unu de los sistemes llingüísticos más antiguos de la hestoria española, yo nun falo bable, pero gustaríame la cooficialidá y voi faer lo que tea na mio mano dende onde proceda pa consiguilo”(7 de marzu 2007,Villaviciosahermosa.com).Fonte:asturnews

El Tribunal Supremu afita la sentencia contra’l cupu mínimu d’8 alumnos pa les clases d’asturianu

La Selmana de les Lletres Asturianes vien con una bona noticia pal enseñu del asturianu. El Tribunal Supremu vien de confirmar, en sentencia del 24 d’abril de 2012, l’anulación del cupu mínimu de 8 persones pa poder recibir clases d’asturianu na Educación Secundaria Obligatoria, dempués d’un procesu entamáu por CCOO y que yá se ganara en primer instancia, llevándolu’l gobiernu d’Areces al Supremu, qu’agora da la razón a los demandantes.
La decisión foi calificada pol sindicatu SUATEA como “una gran noticia pal avance firme na normalización llingüística del nuestru idioma y un frenu a les actuaciones contraries al so desarrollu realizaes pol gobiernu anterior y el d’anguaño”. Dende SUATEA declaren que’l gobiernu actual “magar qu’en declaraciones na prensa se manifiesta favoratible a l’aplicación de la llei d’Usu, na práctica incúmplela dafechu”, pues “caltuvo’l recursu de casación que perdió con esta sentencia por “llealtá institucional” col gobiernu anterior (según xustificaron dellos altos cargos cuando SUATEA-yos pidió la retirada del recursu), cuando nun atendió la demanda de más de 30 alumn@s de les escueles de Bual y Grandas de Salime plantegada dende primeros de cursu y testonamente reivindicada por SUATEA énte’ Xefe de Personal Docente,cCuando solo s’escolariza nesta aria al 12 % del alumnáu d’Educación Infantil y se niega esti derechu a los pas, mas y centros educativos que solicitaron, y cuando se caltién la optatividá d’elección ente Llingua-Asturiana y otres aries como segunda llingua estranxera, aniciu profesional, proyectos…, contra’l criteriu de voluntariedá recoyíu nel artículu 4 l’Estatutu Autonomía d’Astsuries y la mesma Llei d’Usu”, espliquen.
Dende SUATEA esixen la inmediata execución de la sentencia y la so aplicación amplia en tolos niveles educativos pal cursu que vien, la ellaboración per parte de la Conseyería d’Educación d’unes instrucciones clares d’inscripción y matriculación nesta aria pa tolos centros y niveles educativos respetando esta sentencia y la Llei d’Usu.
Xuristes pol Asturianu calificó la decisión del tribunal como “otra sentencia más escontra la represión del gobiernu d’Areces al asturianu” énte una decisión política que pa Xuristes “nun tenía defensa nin xacíu dalgunu (y penriba, conderguen a l’Alministración al pagu d’unes costes de 3.000 euros)”.

Fonte: asturnews

Cascos desendolcará normativamente la Llei d'Usu del Asturianu

DAMIÁN BARREIRO. UVIÉU -
Nel pasáu debate d’investidura, Francisco Álvarez-Cascos, presidente nuevu d’Asturies, comprometióse a «desarrollar» la Llei d’Usu y Promoción del Asturianu de 1998. Estes pallabres nun paecen dir muncho más allá de les de los dirixentes de la FSA, que siempres punxeron como tope de la so política llingüística l’articuláu d’esta Llei. Pero amás d’esi compromisu de cumplir cola llexislación, hai una diferencia nominal nes pallabres de Cascos: mentes que dende’l PSOE siempres dixeron «aplicar» la Llei d’Usu, Cascos faló de «desarrollar», lo que pue entendese como que’l Gobiernu de Foru Asturies va dir más allá del articuláu actual y amplialu al traviés de normes de rangu menor.

Polo menos, los espertos asina lo entienden: «Desendolcar una llei significa llevala más allá de lo que yá existe», desplica Nicolas Bartolomé Pérez. Esti abogáu y miembru de l’Academia de la Llingua opina qu’esta norma necesitaría concretase al traviés de reglamentos que dean seguranza xurídica y permitan avanzar nel procesu de normalización, «qu’a la fin ye l’espíritu de la Llei». El xurista esclaria que toles normes necesiten un desarrollu, «y más esta, que tien un articuláu ambiguu y dexa too en manes de la voluntariedá de l’Alministración».

Desenvolvimientu llegal
De momentu, les úniques midíes que surdieron de la Llei d’Usu foron los decretos que regulen el procesu de fixación de la toponimia y los qu’aprueben los currículos d’asturianu na ESO y Bachilleratu, anque estos últimos interpretaos de manera restrictiva. Asina, onde la Llei fala de voluntariedá, los decretos establecen la optatividá. Otra manera, el Plan de Normalización 2005-2007 tomó como ún de los sos referentes esta Llei. Bartolomé Pérez esplica que más que planes de normalización, «qu’a la fin nun se cumplen», la cuestión sedría reglamentar la presencia del idioma na Educación y na Alministración, «dos de los pegoyos fundamentales d’un procesu de normalización llingüística».

El xurista desplica que l’usu del asturianu énte l’Alministración ye dalgo que permite la Llei, «pero fasta’l momentu siempres tuvo una interpretación restrictiva». Pa esti abogáu, ún de los aspectos fundamentales a la hora de normalizar una llingua ye que tolos ciudadanos que quieran usala puean facelo en llibertá, «pero surde un problema si nos alcontramos con funcionarios reticentes». José Manuel Pérez, espertu en temes llingüístico-llegales, comenta que pa iguar estos conflictos podría facese un decretu que regulara l’usu nos rexistros: «Tendría que recoyer si tien qu’haber solicitúes billingües en toles Conseyeríes o si la rempuesta alministrativa pue dir nos dos idiomes, anque a efeutos llegales namás tenga validez en castellanu».

Fonte: Les Noticies

Piden que'l Principáu cumpla cola Llei d'Usu nel enseñu

Suatea pide a l'Alminitración asturiana que cumpla cola Llei d'Usu no que se refier al ámbitu educativu y acabe colos recortes nes plantiyes d'asturianu y gallego-asturianu. Amás, desixen que s'igüen tolos currículums, incluida la d'Educación Infantil, «pa que se recueya esplicitamente'l nuesu padrimoniu llingüísticu y mentes nun lo faigan s'atiendan toles demandes».

Pal sindicatu educativu, l'entamu del cursu pue titulase «fuera de la llei» al nun cumplir cola llexislación vixente sobre la materia. «Entamó'l cursu y la mayoría los centros nun ufiertaron al alumnáu d’infantil la enseñanza d'asturianu, munchos centros solicitaron ufiertar estes enseñances y dende’l Serviciu Inspeición, cola supervisión del Conseyeru, denegóse esta pitición», señalen. Según el sindicatu, nel ámbitu de los recortes nes plantiyes les places ufiertaes de llingua en Primaria mermaron en 16 y cerca del 50% son a media xornada. «Estos recortes en personal tradúcense na merma de la calidá de la enseñanza coles ratios al máximu en Primaria y la eliminación de l’atención al alumnáu d’Infantil en delles de les poquísimes escueles onde los y les escolines d’esta etapa recibíen enseñu de llingua, porque solo’l 12% del alumnáu d’Educación Infantil recibía’l cursu pasáu clases de Llingua o Gallego-Asturianu», afirmen.

Suatea califica la situación de la Educación Secundaria y Bachilleratu de «llaceriosa». Según afirmen, ye consecuencia de la competencia del aria con otres «al ser non solo voluntaria sinón tamién optativa, contraviniendo asina la Llei d'Usu.

Fonte: Les Noticies