La fonoteca aragonesa The Booksmovie graba a poetes n'asturianu y gallego-asturiano

Diez creadores asturianos participen n'asturianu y gallego-asturiano na iniciativa entamada pola fonoteca aragonesa The Booksmovie que se presenta esti martes n'Asturies coincidiendo col Día Mundial de la Poesía (21 de marzu). Los propios autores son los encargaos de lleer los sos testos pa esti proyeutu que va tener continuidá.

Trátase d'un llabor "bien valoratible" que pretende facer visible, en soporte virtual, la poesía d'ayeri y de güei y de dellos autores, yá sían consagraos, noveles o clásicos de la poesía. Pa ello, la fonoteca asitiada en Zaragoza vien desenvolviendo un trabayu de grabación de voz de poetes de toles llingües del Estáu, amás d'otres como'l danés, inglés, noruegu o esperantu, que lleen una obra o escoyeta d'obres propies, asina como de persones que reciten poesía clásica.

Los responsables de The Booksmovie tuvieron el pasáu mes de payares n'Asturies pa grabar a autores asturianos pertenecientes a l'Asociación d'Escritores d'Asturies, que collabora nesta iniciativa. Asina, nueve escritores recitaron n'asturianu (Ángeles Carbajal, Inaciu Galán, Berto García, María Esther García, Roberto González-Quevedo, Marisa López Diz, Miguel Rodríguez Monteavaro, Susana Sela y Luis Manuel Suárez) y ún en gallego-asturiano (Moisés Cima), que se presenta na web de la iniciativa dientro de la estaya 'Galego', a los qu'hai que sumar otros 21 escritores asturianos qu'empleguen el castellanu.

Presentaciones n'Avilés y Uviéu

La primer de les dos presentaciones programaes n'Asturies esti 21 de marzu va ser n'Avilés, en concreto a les 18 hores n'El Parche. Ésta va consistir na participación de responsables de The Booksmovie pa esplicar la iniciativa (actu previstu pa les 18.30 hores) y un recital poéticu, a lo que va siguir la proyeición, de manera ininterrumpida, de les grabaciones feches n'Asturies nuna gran pantalla hasta les 22 hores.

N'Uviéu, mentes, el llugar escoyíu ye'l Salón de Té del Teatru Campoamor, onde amás de la propia presentación y del recital, va celebrase un conciertu de vigulín a cargu de Fernando Fernández González. Dambes actividaes lleven el nome de 'Voz de poema'.
Fonte: asturies.com

Los escritores d'Asturies y España alíense

   L'Asociación d'Escritores d'Asturies (AEA) y l'Asociación Colexal d'Escritores d'España (ACE) han firmao un conveniu de collaboración pol cual dambos coleutivos comprometense a desenvolver aiciones conxuntes nel ámbitu cultural, principalmente na so aguada lliteraria.

  Ente les actuaciones contemplaes nel conveniu destaca la collaboración na cesión d'espacios p'actividaes de la ACE y na collaboración en xuraos, premios, antoloxíes, seminarios o cualesquier otra actividá que tenga que ver cola presencia y espardimientu de les obres y trabayos de los miembros de dambes dos instituciones.
   El conveniu tien una duración d'un añu.                                                                         Fonte: lne

Abiertu'l plazu pa presentar candidatures pa los XVI Premios de la Crítica d'Asturies

  Hai estaya de meyor obra narrativa n'asturianu, asina como de poesía.

  La Asociación d'Escritores d'Asturies convoca los XVI Premios de la Crítica d'Asturies y los XI Premios de les Lletres, amás del Premiu a la Meyor Columna Periodística. Hasta'l 30 de xunetu cualquier persona física o xurídica pue mandar candidatures pa los meyores trabayos del 2015, pa lo qu'han de remitise a la direición del coleutivu: Hotel d'Asociaciones Santuyano, na cai Fernández Ladreda 48, 33011 d'Uviéu.

  Los XVI Premios de la Crítica convócanse en cuatro estayes: narrativa n'asturianu y castellanu, y poesía n'asturianu y castellanu. Na edición del 2015, Roberto González-Quevedo llevó'l gallardón con ‘Hestoria de la ḷḷiteratura primera en Pesicia’ y Alejandro Fernández-Osorio col poemariu 'Magaya'.

  María Esther García López, presidenta de l'Asociación d'Escritores d'Asturias, anima tolos autores "a presentase a estos premios que contribúin a dignificar la lliteratura fecha n'Asturies, tanto en castellanu como n'asturianu”. Nel documentu axuntu a esta noticia pue consultase, en castellanu, les bases de tolos gallardones.                       Fonte: asturies.com

Adxuntu	Tamañu
bases_premios_de_la_critica_2016.doc	92.5 KB

Fernández-Osorio y González-Quevedo, gallardonaos polos Premios de la Crítica d’Asturies

  El de Viḷḷayana lleva’l premiu qu’entrega l’Asociación d’Escritores d’Asturies na modalidá de poesía por ‘Magaya’. Mentes, l’escritor nacíu en Palacios de Sil repite gallardón en narrativa con ‘Hestoria de la ḷḷiteratura primera en Pesicia’.

Alejandro Fernández-Osorio

  Alejandro Fernández-Osorio debutó como escritor en llingua asturiana con ‘Magaya’, obra que ye reconocida agora pola Asociación d’Escritores d’Asturies nos XV Premios de la Crítica d’Asturies na so modalidá de poesía en llingua asturiana. La mirada emocionada y irónica a los oríxenes fecha pol autor residente en Madrid mereció la unanimidá del xuráu conformáu por Leopoldo Sánchez Torre, Roberto González-Quevedo y José Luis Argüelles, con María Esther García López, presidenta de la entidá qu’entrega los premios, como secretaria –con voz y ensin votu-.

  Éstos destacaron la “novedá espresiva” que supón ‘Magaya’, “un regreso a los raigaños personales y familiares pa trazar, a veces dende la ironía, una potente metáfora del país al empar que tresciende la anéudota costumista”. Otra manera, el ganadora na estaya de castellanu foi, tamién por unanimidá, Rodrigo Olay por ‘La víspera”

Na variante occidental                   No que respeuta a la modalidá de narrativa en llingua asturiana, el ganador foi Roberto González-Quevedo con ‘Hestoria de la ḷḷiteratura primera en Pesicia’, na que l’autor “creó una lliteratura mítica y desconocida pa toos, la de l’antigua Pesicia”. Nesta ocasión el xuráu tuvo conformáu por Conchita Quirós, José Ramón Iglesias y don José Luis Remis, con Ángel García Prieto como secretaria.

Roberto González-Quevedo

  Tamién por unanimidá decidieron conceder el gallardón a esta obra escrita na variante occidental del idioma con un estilu “axustáu, llimpiu y nidiu”. Nel 2002, González Quevedo yá llevara esti méritu por ‘Pol sendeiru la nueite’ Mentes, la merecedora del premiu en llingua castellana d’esta edición foi Carmen Cabeza por ‘Raquel bajo la lluvia y otros relatos’.

  El restu de categoríes del que se conocieron los ganadores foi Manolo Abad, nel de columna periodística, y Olvido García Valdés, que llevó’l Premiu de les Lletres d’Asturies, qu’entreguen los socios de l’Asociación d’Escritores d’Asturies. La entrega de tolos gallardones va facese’l vienres 15 de xineru, a les 19.30 hores, nel Aula Magna de la Universidá d’Uviéu.                                                                                     Fonte: asturies.com

Critiquen a l'Asociación d'Escritores por suprimir l'asturianu nos Premios de la Crítica

La Xunta Pola critica a l'Asociación d'Escritores por suprimir la categoría d'asturianu de los Premios de la Crítica


La Xunta pola Defensa de la Llingua Asturiana (XDLA) llamentó esti xueves fondamente la decisión final de l'Asociación d'Escritores d'Asturies de nun incluyir nos XIII Premios de la Crítica d'Asturies a los escritores en llingua asturiana.

Al traviés d'una nota de prensa, recuerda que esta asociación d'escritores "venía convocando dende l'añu 2003 delles categoríes pa les obres publicaes n'asturianu nel añu anterior a la convocatoria, pero esti añu namás se puen presentar a concursu les obres en castellanu". "L'Asociaciónargumenta, ente otres cuestiones, la falta d'obres en llingua asturiana concurrentes a concursu, lo que pa nós nun ye más qu'una demostración d'inorancia o despreciu al bon facer de los y les escritores porque a lo llargo del 2011 publicáronse 141 obres n'asturianu, númberu bultable qu'echa embaxo cualquier argumentación sobre la escasez de producción lliteraria nel idioma autóctonu", critica la Xunta.

Refuga también l'argumentu de la crisis ecónomica, pues "persabemos que les editoriales, instituciones y persones interesaes collaboraben cola asociación de manera que'l costu económicu de les categoríes d'asturianu venía siendo prácticamente inesistente".

Dende la Xunta pola Defensa de la Llingua Asturiana, consideren que "más bien lo qu'hai ye pocu o nengún interés en fomentar la lliteratura n'asturianu dende esta asociación: lo que s'escuende, daveres, ye una actitú prexuiciosa pa col idioma y qu'esti premiu valora más la forma (la llingua) que'l fondu (la calidá lliteraria)".

Considera la Xunta "especialmente grave que seya l'Asociación d'Escritores d'Asturies la que discrimine la llingua asturiana cuando son sabedores de que nun se pue falar de lliteratura n'Asturies ensin incluir a los y les escritores na llingua propia".

Por too esto, la Xunta pola Defensa de la Llingua Asturiana, vese "obligada" a convocar, de forma escepcional, los "Premios Críticos de les Lletres Asturianes, que van reconocer en cuatro categoríes -lliteratura infantil y xuvenil, narrativa, poesía y ensayu- les obres publicaes a lo llargo del 2011 n'asturianu y gallego-asturianu. Un xuráu de persones espertes en caúna de les materies va ser l'encargáu d'otorgar estos Premios". La entrega de premios va facese'l vienres 30 de payares, a les 19.30 hores, na galería d'arte El Texu (c/ El Postigu Baxu 13, d'Uviéu).

Fonte: Europa Press