Fernández-Osorio y González-Quevedo, gallardonaos polos Premios de la Crítica d’Asturies

  El de Viḷḷayana lleva’l premiu qu’entrega l’Asociación d’Escritores d’Asturies na modalidá de poesía por ‘Magaya’. Mentes, l’escritor nacíu en Palacios de Sil repite gallardón en narrativa con ‘Hestoria de la ḷḷiteratura primera en Pesicia’.

Alejandro Fernández-Osorio

  Alejandro Fernández-Osorio debutó como escritor en llingua asturiana con ‘Magaya’, obra que ye reconocida agora pola Asociación d’Escritores d’Asturies nos XV Premios de la Crítica d’Asturies na so modalidá de poesía en llingua asturiana. La mirada emocionada y irónica a los oríxenes fecha pol autor residente en Madrid mereció la unanimidá del xuráu conformáu por Leopoldo Sánchez Torre, Roberto González-Quevedo y José Luis Argüelles, con María Esther García López, presidenta de la entidá qu’entrega los premios, como secretaria –con voz y ensin votu-.

  Éstos destacaron la “novedá espresiva” que supón ‘Magaya’, “un regreso a los raigaños personales y familiares pa trazar, a veces dende la ironía, una potente metáfora del país al empar que tresciende la anéudota costumista”. Otra manera, el ganadora na estaya de castellanu foi, tamién por unanimidá, Rodrigo Olay por ‘La víspera”

Na variante occidental                   No que respeuta a la modalidá de narrativa en llingua asturiana, el ganador foi Roberto González-Quevedo con ‘Hestoria de la ḷḷiteratura primera en Pesicia’, na que l’autor “creó una lliteratura mítica y desconocida pa toos, la de l’antigua Pesicia”. Nesta ocasión el xuráu tuvo conformáu por Conchita Quirós, José Ramón Iglesias y don José Luis Remis, con Ángel García Prieto como secretaria.

Roberto González-Quevedo

  Tamién por unanimidá decidieron conceder el gallardón a esta obra escrita na variante occidental del idioma con un estilu “axustáu, llimpiu y nidiu”. Nel 2002, González Quevedo yá llevara esti méritu por ‘Pol sendeiru la nueite’ Mentes, la merecedora del premiu en llingua castellana d’esta edición foi Carmen Cabeza por ‘Raquel bajo la lluvia y otros relatos’.

  El restu de categoríes del que se conocieron los ganadores foi Manolo Abad, nel de columna periodística, y Olvido García Valdés, que llevó’l Premiu de les Lletres d’Asturies, qu’entreguen los socios de l’Asociación d’Escritores d’Asturies. La entrega de tolos gallardones va facese’l vienres 15 de xineru, a les 19.30 hores, nel Aula Magna de la Universidá d’Uviéu.                                                                                     Fonte: asturies.com

Fernández-Osorio escribe ‘Magaya’, el so primer llibru en llingua asturiana

Na semeya, Castañón, Gómez Navarro y Fernández-Osorio

   L’escritor de Viḷḷayana, Alejandro Fernández-Osorio, espubliza per primer vegada n’asturianu. Failo con ‘Magaya’, una obra compuesta por “30 escenes d’un poema únicu” que ye una mirada emocionada y irónica a los oríxenes.

   “‘Magaya’ ye una vuelta d’un narrador a la so casa, a la so tierra, convencíu de qu’eso va salvalu de dalgo; en busca del mitu que lu sostenga. Paez que torna ensin salvase, pero con too un descubrimientu personal que ye la magaya”, espresa l’autor, que presentó la obra’l xueves en La Revoltosa con un diálogu colos escritores Sofía Castañón y Héctor Gómez Navarro. “Magaya ye lo que val y lo que nun val, eso que s’esprime y de lo que sal el frutu, cuasi la llicuación salvadora. Ye lo físico”, continúa esplicando Fernández-Osorio, qu’escribió les 36 primeres escenes d’esta obra híbrida ente poesía y narrativa nuna fin de selmana, pa depués entamar un llargu procesu pa da-y forma a un llibru. Finalmente, l’escritor residente en Madrid redúzolu a 30 escenes que la editorial Impronta presenta cola so traducción al castellanu pa da-y más percorríu comercial fuera del país.

   Nel actu de presentación del llibru, qu’abrió Carlos González Espina, Fernández-Osorio agradeció a Berta Piñán y Xosé Bolado l’enfotu que punxeron nel so trabayu, y a Impronta pola “guapa portada y una edición mui cuidada”. Darréu presentó a los sos colegues Castañón y Gómez Navarro, los trés vencedores del Premiu Asturies Xoven, y continuar col aniciu d’un alderique cola so creación como exe. La escritora señaló sobre la obra que “ye un viaxe de vuelta a la casa. Un llibru que dan ganes d’escribir; de pensar; de falar cola xeneración que nos precede…”.

   Pela so parte, Gómez Navarro apuntó que la llectura de ‘Magaya’ evocó-y a la imaxe de cuando yera neñu y pegaba pataes a un balón contra la parede d’una casa. “Magaya ye cuando te duelen los raigaños. Ye volver a esa momentu de la infancia con más fuercia, como cuando’l balón torna más fuerte tres rebotar contra la parede”, apuntó. El diálogu continúo con afondamientos nel papel que xuega la magaya nel llibru, el procesu de construcción de la obra o l’usu d’un asturianu mui concretu nella, ente otros asuntos.                                                                     Fonte: Asturies.com